1 Samuéu 23:1-29
23 Tawamhã Dawi ma tô waihuꞌu, filisteu norĩ ꞌriꞌahâ Queira ãma, ꞌre idahâimana zaꞌra mono norĩ te te iꞌwapé zaꞌra zé hã, duré tame amnho trigu tehâri té hã te te isimiꞌuri zaꞌra zé hã.
2 Tahawa, te Uburé Danhibꞌapito hã sina sadanha ãne:
— E wa za mo, te aꞌwapé da, filisteu norĩ hã.
— Tô aimorĩ, aꞌwapé da filisteu norĩ hã, duré anhoꞌreptu da, ꞌriꞌahâ Queira ãma, ꞌre idahâimana zaꞌra mono norĩ hã. — Ãne ma ãma tãma waꞌrã, ꞌRe ihâimana uꞌâsi mono hã.
3 Tane nherẽ, Dawihi te dasiꞌwapéi ꞌmanharĩꞌwa norĩ hã te nharĩ zaꞌra ãne:
— Ãme Zuda ãma wapahi zaꞌra di. E niha wa za taha nherẽ, aiꞌabaꞌré ni ꞌriꞌahâ Queira u hã, dasiꞌwapéi ꞌmanharĩꞌwa filisteu norĩ wa te ꞌwapé zaꞌra da hã.
4 Tawamhã Dawi, Uburé Danhibꞌapito hã ma duré isadanharĩ na ãma sahu. Tahawa, ma ãne ãma tãma waꞌrã:
— Mo oto aimorĩ Queira u, aꞌwapé da, za te aima sõmri wa, filisteu norĩ ãma iꞌaiꞌuté zaꞌra zé hã.
5 Tahawa, ma tô Dawi hã tite dasiꞌwapéi ꞌmanharĩꞌwa norĩ me aiꞌabaꞌré Queira u hã. Tahawa, ma tô oto ꞌwapé zaꞌra, filisteu norĩ hã. Tawamhã ahâ uptabi na ma tô siwi uprosi. Ma tô duré isimizama norĩ sipuꞌu pese na te te siwi duri. Ãne ma tô Dawi hã anhoꞌreptu aꞌuwẽ, ꞌriꞌahâ Queira ãma ꞌre ihâimana zaꞌra mono norĩ hã.
6 Abiata, Aimeretihi ꞌra hã simani wamhã, Dawi hã te te hâiba waptob da, Queira u itẽme morĩ wamhã, ma tô sasedoti norĩ siꞌuzazé hã siré tiꞌâ.
7 Tawamhã Sau, Dawi hã Queira u imorĩzém na da te dasiwi poꞌre puꞌu wamhã, ma tô ãne tinha:
— ꞌRe ihâimana uꞌâsi mono hã ma tô oto Dawi hã ĩnhibꞌrata ĩma tisõ. ꞌRiꞌahâ ꞌwawi waꞌra ꞌrãihâ ãma ꞌridawa zaꞌẽne isitoptete u ma tô mo. Tahawa da te ꞌre idawaibui waihuꞌu pese mono zéb u ma tô sisẽ.
8 Tawamhã Sau hã ma tô dasiꞌwapéi ꞌmanharĩꞌwa norĩ zô uburé tihârâ zaꞌra, siꞌwapé zô, te te ropãrĩ zaꞌra mono sina, sisõré pese na siꞌabaꞌré da, Queira u, tame duré tiwi sitob da, Dawihi wi, duré ite dasiꞌwapéi ꞌmanharĩꞌwa norĩ wib zama.
9 Tawamhã Sau za te te iꞌwapézém na te te sima irosaꞌratazé hã Dawi hã te te waihuꞌu wamhã, ma tô tãma tinha ãne, sasedoti Abiataha ma:
— We ãwa âri sasedoti norĩ siꞌuzazé hã, ꞌRe ihâimana uꞌâsi mono hã wa te iré sadanharĩ da.
10 Tawamhã Dawi te oto ãne sadanha iré:
— Wanhibꞌapito, Izaraéu nhihudu norĩ te ꞌRe ihâimana uꞌâsi mono, wa hã asibꞌaꞌuwẽ Dawi, wa tô waihuꞌu Sau te te sima irosaꞌratazé hã, ĩhâimana ré Queira u we morĩ da, taha ré te te ĩzô daꞌuprosi da.
11 E tawamhã te za ꞌriꞌahâ Queira ãma ꞌre idahâimana zaꞌra mono norĩ hã tãma ĩhâiba nhomri zaꞌra za, Sauhu ma hã isibꞌrata. Duré e tawamhã te za tô Sau hã we mo, wa hã te iwaparizéb zarina, za we imorĩ na. Tahawa, Wanhibꞌapito Izaraéu nhihudu norĩ te ꞌRe ihâimana uꞌâsi mono, maꞌãpé we ãma ĩzadaꞌâbâ.
Tawamhã ma ãma sadaꞌâ ãne:
— Te za tô we mo, Sau hã.
12 Tawamhã te duré Dawi sadanha ãne:
— E tawamhã te za Queira ãma ꞌre idahâimana zaꞌra mono norĩ hã Sauhu ma ĩhâiba nhomri zaꞌra za, duré ĩte dasiꞌwapéi ꞌmanharĩꞌwa norĩ zama.
— Ĩhe! Wa za tô tãma aihâiba nhomri zaꞌra. — Ãne ma tô Uburé Danhibꞌapito hã ãma tãma waꞌrã.
13 Tawamhã Dawi tite dasiꞌwapéi ꞌmanharĩꞌwa norĩ me 600 na ihâiba zaꞌra norĩ me ma tô awaꞌawi wairé, Queira hawimhã. Siwaꞌru te aiꞌabaꞌré. Tawamhã Sau, Dawi hã Queira hawi isimanizé te te waihuꞌu wamhã, ma tô rosaꞌrata ma hã oto marẽ.
Dawi hã isimaꞌurizé ẽtẽꞌrãirã zahâpâ niwĩ
14 Tawamhã Dawi ma tô aꞌubuni wi aimaꞌu ẽtẽꞌrãirã niwĩ, Zipe na romnhisi ꞌrata. Sau hã te bâtâ sidâpâsi sô ꞌre rĩtĩ. Tane nherẽ, ꞌRe ihâimana uꞌâsi mono Dawi hã te te tãma hâiba nhomri õ di, Sauhu ma hã.
15 Dawi hã ma tô pahi na tihâiba, Sau hã sô watobro wa, te te wĩrĩ da. Tahawa te oto Horeza na romnhisi ãma ꞌre sãmra, rop si ꞌre irosaꞌwari mono ãma, Zipe ꞌratamhã.
16 Tawamhã Zonata hã ma tô itẽme mo, te te sõpẽtẽ da tame. Tahawa, ma tô apâ ipẽꞌẽ nhiptede hã sina tãma tisõ, za te te sina iꞌumnhasizé hã isitobꞌru norĩ wi ꞌRe ihâimana uꞌâsi mono nhimipawaptobzé hã.
17 Tawamhã Zonata te ãne tãma tinha:
— Aipahi tõ. Ĩmama Sau hã te te aima robꞌmanharĩ waihuꞌu õ di za. Tahawa, te za a hã asiꞌapito, Izaraéu nhihudu norĩ ma. Tawamhã wa hã wa za asahâpâ ꞌre ĩhâimana. Ãne hã ĩmama te te waihuꞌu pese di.
18 Tawamhã tame ma tô Uburé Danhibꞌapito nhoꞌa apâ ropisudu hã sima ꞌmanharĩ na sitéb zahuré, tisisawi zahuré zéb uꞌâbâ hã. Tawamhã Dawi hã ma tô Horeza ãma nhamra uꞌâ. Tawamhã Zonataha si ma tô apâ mo, tinhorõwa u hã.
19 Tawamhã niꞌwam norĩ hã Zipe na romnhisi ãma ꞌre ihâimana zaꞌra mono norĩ hã ma tô ꞌmane Zibea u hã. Tawamhã ta norĩ hã ma tô Sauhu ma hã ꞌmairowasuꞌu ãne:
— Dawi hã ma tô aimaꞌu, wanhiptiꞌa zaꞌra Horeza ãma, Haquira na ẽtẽ nhisi ãma, Zézimo na romnhisi ãma, hâiwa nhimiꞌe niwĩ.
20 Wa norĩ hã wama waihuꞌu pese zaꞌra di, Dawi hã âri da, asima iwẽ na hã. Tahawa, maꞌãpé we wasiré aimorĩ zaꞌra na, wa te aima sõmri zaꞌra da, asibꞌrata.
21 Tawamhã Sau ma tô asa ãma tãma waꞌrãmi zaꞌra ãne:
— Wa ĩsima wẽ, Wanhibꞌapito si iwẽ na te te aipawaptob zaꞌra waꞌaba da, ĩma iꞌmanharĩ wẽ zaꞌra waꞌaba waꞌrãmimhã.
22 Tô apâ aiꞌabaꞌréi aba na sahu waꞌaba ihâimanazé hã asiwi waihuꞌu wẽ waꞌaba hâ. Duré tô sena asiwi upsibi mei waꞌaba da, tame niꞌwam norĩ Dawi te te siwi iꞌmadâ hã. E marĩ wa. Te nasi ĩma dasiwi wasuꞌu ni, ihâimana nhimizaꞌrese na hã.
23 Tô sena ro isimaꞌurizé hã asiwi upsibi mei waꞌaba. Taha parimhã te za we apâ ĩtẽme aiꞌabaꞌréi waꞌwa, õne haré. Tawapsi wa za wa hã oto aime ãma ĩmorĩ ꞌwa. Duré tô sena õme hâimana wapsi, wa za tô tiꞌâ, uburé Zuda ãma ropâ te sô rowaimrami mono nherẽ.
24 Tawamhã Sauhu wana ma tô apâ aiꞌabaꞌré, Zipe u. Tahawa, Dawi hã duré tite dasiꞌwapéi ꞌmanharĩꞌwa norĩ me, te Maꞌõ na rop si ꞌre irosaꞌwari mono nhisi ãma tihâimana zaꞌra, ẽtẽ siwaꞌaba ãma paꞌre ꞌré wa Zézimo na romnhisi ãma, hâiwa nhimiꞌe niwĩ.
25 Tawamhã Sau hã tite dasiꞌwapéi ꞌmanharĩꞌwa norĩ me te oto aiꞌabaꞌré, sô rĩtĩ zaꞌra mono da, Dawihi zô. Tane nherẽ, Dawi hã ma tô waihuꞌu. Tahawa, ma tô mo, ẽtẽ tõmo wawẽ nhiꞌriti baba, Maꞌõ na rop si ꞌre irosaꞌwari mono nhisi u, tame hâimana da. Tawamhã Sau ãne hã te te waihuꞌu wamhã, ma tô duré Dawihi zarina mo.
26 Tawamhã Sau, tite dasiꞌwapéi ꞌmanharĩꞌwa norĩ me, te ẽtẽ uiwada zara niwĩmhã tihâimana zaꞌra. Duré Dawi hã tite dasiꞌwapéi ꞌmanharĩꞌwa norĩ me hã te iꞌuiwada amo niwĩ tihâimana zaꞌra. Tahawa, Dawi norĩ hã ma tô waptu na aimani zaꞌra. E marĩ wa. Sau norĩ hã te te siwi uirĩ zaꞌra wa, te te waibu zaꞌra da.
27 Tane nherẽ, ma tô rowasuꞌuꞌwa hã itẽme wi. Ta hã ma tô ãne tawamhã tãma rowasuꞌu, Sauhu ma hã:
— Apâ waptu na aimorĩ õne haré! Filisteu norĩ, tiꞌai waꞌõtõ nhoꞌõmo u ma asisi piꞌuriwi, te te siwi âri da.
28 Tawamhã Sau, Dawihi zarina timorĩ hã ma tô sazâ. Tahawa, ma tô mo, filisteu norĩ si te te aꞌwapé da. Taha wab zama taha romnhisi hã ãne: “Ẽtẽ tõmo wawẽ ãma dasina dasiwãnhizari na”.
29 Tawamhã Dawi hã ma tô oto watobro ta hawimhã. Ma tô mo, ro hã itẽme ꞌre idanhisisi waihuꞌu mono õ u, Gedi na romnhisi u.
