1 Samuéu 24:1-22
24 Tawamhã Sau, filisteu norĩ te te iꞌaꞌwapézém hawi apâ morĩ wamhã, ma tô waihuꞌu, Dawi aꞌubuni wi Gedi na romnhisi ꞌrata isãmrazé hã.
2 Tahawa, ma tô pisutu zaꞌra Izaraéu nhihudu norĩ dasiꞌwapéi ꞌmanharĩꞌwa iwẽ hã 3 miu na. Tawamhã ma tô ta norĩ hã isiré aiꞌabaꞌré, Dawihi zô rĩtĩ zaꞌra mono da, duré isibꞌaꞌuwẽ norĩ zô zama, Poneꞌẽrebâ zéré uzé siꞌaibâ na ẽtẽ tõmo wawẽ nhisi niwĩ bâtâ pusizém niwĩ.
3 Tawamhã Sau, ma tô oto wi ẽtẽ zahâpâ abꞌre ꞌrata, poneꞌẽrebâ ꞌwawi waꞌra u hã bâdâdi ꞌratamhã. Tawamhã tame tisai ꞌrada te te saꞌwari da hã ma tô ãzé. Tahawa, te Dawi norĩ hã tô tame abꞌre ꞌre tihâimana zaꞌra, abꞌre waꞌwa u pese.
4 Tawamhã isiré aibâ norĩ hã ma tô tãma nharĩ zaꞌra ãne, Dawihi ma:
— Ate hã oto bâdâ. A hã te za oto asiꞌmadâ. Wanhibꞌapito ꞌRe ihâimana uꞌâsi mono ma tô tinha, asitobꞌru hã te te aima sõmri da, asibꞌrata, a hã marĩ ãma ꞌmanharĩ da, asima iwẽzéb uwaibaba.
Tawamhã ãne wa, Dawi hã ma tô oto atãma hâire sisaꞌré, Sau tisai ꞌrata ma isãmrazéb u. Tahawa, ma tô duré te te sina saꞌrese ãna iꞌuza hâzadaꞌré hã tiwi anhizâ, suru na.
5 Tane nherẽ, Dawihi nhimirosaꞌrada hã ma tô tãma tizé naꞌrata, Sauhu uza hâ ꞌrãsudu te te tiwi sizâri wa.
6 Tahawa, te tite dasiꞌwapéi ꞌmanharĩꞌwa norĩ ma zaꞌra ãne:
— Wa ĩsima wẽ, Uburé Danhibꞌapito hã te te ĩma wairébé da, marĩ iwasédé ĩnhibꞌapito te te ipisutu ma te ꞌmanharĩ tõ da. Wa hã te iꞌwapé da hã mare uptabi di, õ hã Wanhibꞌapito nhimipisutu wa, siꞌapito da hã.
7 Tawamhã ãne ma tô Dawi hã timreme na tite dasiꞌwapéi ꞌmanharĩꞌwa norĩ wi hã ãma tiwi saprĩ zaꞌra isimirosaꞌrata zaꞌra na hã, te te ꞌwapé zaꞌra tõ da, Sau hã.
Tahawa, Sau hã, ma tô oto wahudu. Wahutu wamhã, ma tô ẽtẽ zahâpâ na abꞌre hawi watobro, bâdâdi na timorĩ na hã te te ãma uzusi da.
8 Tahawa, ma tô Dawi hã isarina watobro. Tawamhã te ãne duré ꞌmahâ:
— Apito Sau!
Ãne wa, ma tô Sau hã aipiꞌra sibabarãi u. Tawamhã Dawi hã te te iwazéb zarina ma tô hiꞌrãtitõ tãma nhamra. Ma tô duré tiꞌubu na tãma ropto, tiꞌai u.
9 Tawamhã te Dawi tãma tinha ãne:
— E marĩ da, ma tô iwapa danhimirowasuꞌu hã wa hã te ĩsima iwẽ na za marĩ iwasédé te aima iꞌmanharĩ na hã.
10 Ãhã na te za a hã iwaihu, Wanhibꞌapito ꞌRe ihâimana uꞌâsi mono te te ĩma iꞌasõmrizé hã ĩnhibꞌrata. Niꞌwam norĩ hã ma tô ĩma nharĩ zaꞌra, aré te aiwĩrĩ da. Tane nherẽ, te ĩsima wẽ õ di, ãne hã te iꞌmanharĩ da hã. Tahawa, wa tinha ãne: “Ĩnhibꞌrada te isarõtõ da hã mare di ĩnhibꞌapito da hã, õ hã Wanhibꞌapito te te ipisutu wa, siꞌapito da.”
11 Ĩnhibꞌapito, maꞌãpé aiꞌuza nhizâri hâiwaꞌõno hã ꞌmadâꞌâ ĩnhibꞌratamhã. Wa hã wa tô aiwi anhizâ, aiꞌuza hâ ꞌrãsudu hã. Tane nherẽ, wa hã te aiwĩrĩ õ di. Ã hã te za iwaihu, wa hã te rosaꞌrata õ di, asada ĩhâimana da hã, duré ĩwasédé te aiꞌãma iꞌmanharĩ da hã. A hã ĩzô ꞌre airĩtĩ mono zé hã ĩwĩrĩ da, te waihuꞌu pese nherẽ, tane nherẽ, wa hã te aiꞌwapéi õ di tô.
12 Tahawa, te za Wanhibꞌapito si wawaihuꞌu, marĩ na wa te ãma iꞌupa na hã. E a hã e wa hã. Tahawa ĩma iwẽ õhõ si te te aima robꞌmanharĩ da, ĩzada aihâimanazéb zarina. Tane nherẽ, wa hã te iꞌaiꞌwapé da hã mare di.
13 Duréihã wahiꞌrata norĩ te te sima ꞌre inharĩ zaꞌra mono zé hã ãne: “Iwasété norĩ hawip si rowasété pusizé hã.” Tane nherẽ, wa hã ĩwasédé hã te aima iꞌmanharĩ da hã mare di.
14 Izaraéu nhihudu norĩ nhibꞌapito, maꞌãpé ãma rosaꞌrata, za iwĩrĩ da ãma, duré sô iꞌaba mono ãma, wapsã idâꞌâ ne zô, duré wapsãꞌu hã taré pese ihâimana ne zô.
15 Tahawa, te za Wanhibꞌapito ꞌRe ihâimana uꞌâsi mono si wawaihuꞌu, nimahã wa te iꞌupazém na hã, e a hã e wa hã. Wa tiwi waptẽ, te te ĩwaihuꞌuzéb zarina, ĩꞌãma sisaprĩ da, duré taha zarina te te aiwi ĩnhoꞌreptu da hã.
16 Tawamhã Dawi ãne na te te tãma nharĩ mono pari, ma tô Sau hã tãma tinha ãne:
— E tô a hã Dawi, ĩꞌra.
Tahawa, ma tô oto ãma amnhihâ wawa ꞌrãihâ na, Sau hã.
17 Tawamhã te duré tãma tinha ãne, Dawihi ma:
— A hã iꞌuwaibaba na si te aihâimana mo. Ĩwétési wa tô ĩwasété na hã ĩhâimana. A hã ma tô iwẽ na si ĩma aihâimana mo, wa hã ĩwasédé te aima ꞌmanharĩ mono ré hã.
18 Ã bâtâ na ma tô ĩma asihâimanazé hâiꞌré, iwẽ ĩma iꞌmanharĩzém na hã. E marĩ wa. Ĩwĩrĩ õ wa, Wanhibꞌapito hã te te aima ĩhâiba nhomri nherẽ, asibꞌrata.
19 E niꞌwa hã te aré tinhitobꞌru hã satõ, dâꞌâ ãna morĩ da hã, te te âri parimhã asine. Mare di. Tahawa, te za Wanhibꞌapito hã iwẽ na hã aipawapto, ã bâtâ na ĩma iꞌmanharĩ wẽ zé waꞌrãmi.
20 Tahawa, ãhã na hã tô sena wa tô waihuꞌu, za asiꞌapito da, Izaraéu nhihudu norĩ ma hã, duré za asiptete na iꞌrãnhoꞌõmo na ꞌre aihâimana mono ré ꞌre idaꞌaꞌmadâꞌâ mono na hã.
21 Tahawa, te za Wanhibꞌapito ꞌRe ihâimana uꞌâsi mono nhisi na ĩma iropisu, ĩnhihudu norĩ hã ĩwi uprosi tõ da. Ãne wamhã, ĩnhisi na duré ĩte aꞌuwẽ norĩ nhisi na hã ꞌre dapoꞌre siꞌâri zaꞌra mono õ di za.
22 Tawamhã Dawi ma tô tãma ropisudu hã ꞌmanha, te te tiwi iwaptẽrẽzéb zarina.
Taha pari, ma tô oto mo Sau hã, tinhorõwa u. Tane nherẽ, Dawi hã tite dasiꞌwapéi ꞌmanharĩꞌwa norĩ me, ma tô tisimanizéb u hã apâ aiꞌabaꞌré.
