1 Samuéu 26:1-25
26 Tawamhã niꞌwam norĩ Zipe na romnhisi ãma ꞌre isiꞌubumroi mono norĩ hã ma tô aiꞌabaꞌré, Zibea na romnhisi u, Sauhu ma te te rowasuꞌu zaꞌra da, Dawi hã tiwi isimaꞌuri na hã Haquira na ẽtẽ nhisi ãma, Zézimo na romnhisi nhoꞌre.
2 Tawamhã ãne te te tãma rowasuꞌu zaꞌra wi, ma tô Sau hã awaꞌawi mo, Zipe na rop si ꞌre irosaꞌwari mono nhisi u. Dasiꞌwapéi ꞌmanharĩꞌwa norĩ iwẽ uptabi hã 3 miu na ihâiba na ma tô te te simro siré, sô sõpré mono da, Dawihi zô.
3 Tawamhã ma tô sima ꞌri nhoré zaꞌra Haquira na ẽtẽ nhisi ãma, Zézimo na romnhisi nhoꞌre. Tahawa, Dawi hã te nhamra aꞌubuni wi suparaꞌré ãma. Taha ré, ma tô Sauhu wasuꞌu hã wapa isarina imorĩzém na hã.
4 Tahawa, ma tô Dawi hã tite aibâ norĩ hã ꞌmazatõ, te te ꞌmaiwapsãiꞌa mono da, Sau tô sena õme ihâimanazé hã te te waihuꞌu da.
5 Tawamhã Dawi hã ma tô õne haré mo. Morĩ wamhã, ma tô sõpẽtẽ, Sau norĩ te te sima iꞌri nhoré zaꞌra zé hã. Tahawa, ma duré tisã Sau norĩ isõtõ zahuré zé hã Abinehe me. Ta hã dasiꞌwapéi ꞌmanharĩꞌwa norĩ wadaꞌuriꞌwa, Nehe ꞌra. Sau hã te te sima iꞌri nhoré zaꞌra zéb ꞌremhã te nhono. Ite dasiꞌwapéi ꞌmanharĩꞌwa norĩ hã te te sima iꞌri nhoré zaꞌra mono na, ma tô ãma siwi uirĩ.
6 Tawamhã Dawi te hitita na aꞌuwẽ iwamri hã sadanha Aimereti duré Abisai, Zeruꞌiza na ina nhisi hã, Zoabihi sisãnawã hã ãne:
— E ꞌwa hã te za ĩme mo, Sau norĩ te te sima iꞌri nhoré zaꞌra zéb u hã.
Tawamhã Abisai ma ãma sadaꞌâ ãne:
— Wa hã wa za ãma mo asiré.
7 Ãne ma tô taha mara na hã tizasi zahuré Dawi norĩ hã Abisaihi me hã, Sau norĩ te te sima iꞌri nhoré zaꞌra zéb u. Tawamhã ma tô Sau hã sõtõ ré sõpẽtẽ zahuré, ꞌri nhoꞌõmo waꞌwa, duré te te ãma romnhiptâꞌâ haré iꞌrãihâ na sab ré ite isiꞌuwazi ꞌrãꞌwa hã. Abine norĩ hã te Sau manawawimhã tinhotõ zaꞌra, dasiꞌwapéi ꞌmanharĩꞌwa norĩ me.
8 Tawamhã te Abisai Dawihi ma tinha ãne:
— Ã mara na hã ꞌRe ihâimana uꞌâsi mono ma tô asitobꞌru hã asibꞌrata aima tisõ. Maꞌãpé ĩma rowairébé, Sauhu ãma saꞌẽtẽ ite isiꞌuwazi ꞌrãꞌwa na te ãma romnhiptâꞌâ da. Ãhã wamhã te ãma isahu da hã mare di za ihâiba zapuꞌu na tiꞌai u hã.
9 Tane nherẽ, ma tô Dawi hã ãma tãma waꞌrã ãne:
— Tôꞌã. Wĩrĩ tõ. E marĩ wa. Niꞌwa hã ꞌRe ihâimana uꞌâsi mono apito da, te te ipisudu hã te te wĩrĩ da, tipa te te sarõtõ wamhã, te za Wanhibꞌapito hã tãma robꞌmanha.
10 Sena na ꞌre ihâimana uꞌâsi mono ne Wanhibꞌapito, tô sena te za tô taha si tiwĩ Sau hã, ite bâdâ hã tãma wisi wapsi, idâꞌâzéb da hã, niha wamhã tô, dasiꞌwapéi u.
11 Tahawa, wa tô waptẽ, Wanhibꞌapito wi, te te ĩpatété da, te sada sarõtõ tõ da apito da, te te ipisutu da hã. Tahawa, oto ubꞌrẽ si wa te tiwi âri, duré ite isiꞌuwazi ꞌrãꞌwa zama. Taha parimhã, õne haré wa za oto apâ wanem ni.
12 Tawamhã Dawi hã ma tô tiwi tiꞌâ, isiꞌuwazi ꞌrãꞌwa si, duré ubꞌrẽ si, Sauhu ꞌrã ãma isimaꞌwara norĩ si. Taha pari, ma tô oto ne, Abisaihi me hã. Taha ré hã niꞌwa hã te te ꞌmadâꞌâ zahuré õ di. Duré niꞌwa hã te te waihuꞌu zahuré õ di, marĩ te te iꞌmanharĩ zahuré zém na hã. Niꞌwa hã duré topoꞌo õ di. Uburé ma tô tinhotõ pese zaꞌra. E marĩ wa. Uburé Danhibꞌapito te te hâ zaꞌra wa, aptâꞌâ uptabi na hã.
13 Tawamhã Dawi hã ma tô saprĩ ẽtẽ siwaꞌaba na zara u, te te saiꞌuri da, ẽtẽ na isisi u, Sau norĩ ma hã tãma romhâ uptabi zaꞌra da.
14 Tahawa, ma tô oto hâ, hârâ ꞌrãihâ na Abinehe ma, duré Sauhu te dasiꞌwapéi ꞌmanharĩꞌwa norĩ ma, ãne:
— Abine, e ma tô ĩhârâ wapa.
Ãhã wamhã, te Abine hã anha ãne:
— E ꞌwa te hâ, apito ma hã.
15 Tahawa, Dawi ma sadaꞌâ ãne:
— Oro a hã aibâ za. E Izaraéu nhihudu norĩ nhiptiꞌai ꞌre danhipai u dasiꞌwapéi ꞌmanharĩꞌwa asiptete õ di duré. Asiptete di. Tane nherẽ, e niha bâ bété asibꞌihâꞌa ꞌwawimhã aimapa õ di. Awaꞌawi na hã ma tô niꞌwa hã ãzé ꞌri asima isõré zaꞌra waꞌaba zéb u apito asibꞌihâꞌa hã te te wĩrĩ da.
16 Abine, ma tô ãma iꞌupa, asibꞌihâꞌa ꞌmadâꞌâ na hã. Wanhibꞌapito sena na ꞌre ihâimana mono ne, te za tô sena uburé a norĩ waꞌwa hã aiꞌutõrĩ ꞌwa, asibꞌihâꞌa zaꞌra waꞌwa hã Wanhibꞌapito ꞌRe ihâimana uꞌâsi mono, siꞌapito da, te te ipisutu ꞌwawimhã aimapa zaꞌra waꞌaba õ wa. Duré ĩwapari! E mahãta apito te isiꞌuwazi ꞌrãꞌwa hã. E mahãta duré ubꞌrẽ, iꞌrãihâ na isa hã.
17 Tawamhã Sau hã ma tô mreme waihuꞌu, Dawi hã. Tahawa, te ãne sadanha:
— E a hã Dawi, ĩꞌra.
Tawamhã Dawi ma tô sadaꞌâ ãne:
— Ĩnhibꞌapito, ĩhe, wa hã.
18 Te duré tãma tinha ãne:
— E marĩ da, te bété asibꞌaꞌuwẽ nherẽ, we ĩzarina aimorĩ na hã iꞌuzusi mo. E marĩ te ꞌmanharĩ bâ, iwasédé hã.
19 Apito, te za ĩwapa, za te aima inharĩzém na hã. ꞌRe ihâimana uꞌâsi mono, ĩzada aihâimana da, te te aiꞌrãi piꞌrai wamhã, te za õ hã danhoprubzém na tãma asõpru wamhã tinhimirosaꞌrata na hã aiꞌãma saprĩ za. Tane nherẽ, duré, ãne na hã nima norĩ aibâ te te siwi ꞌmanharĩ wamhã, tô za ibâre ꞌRe ihâimana uꞌâsi mono nhimihâzé isisiwi waptãꞌã zaꞌra da hã. E marĩ wa. Õ norĩ hã ma tô siwi ĩwaze, Wanhibꞌapito ꞌRe ihâimana uꞌâsi mono nhiptiꞌa nhiti, wasiré aꞌuwẽꞌõ norĩ nhiptiꞌai u, ro hã romhâibarĩ na si ꞌre idawata zaꞌra mono zéb u.
20 Tahawa, Wanhibꞌapito ꞌRe ihâimana uꞌâsi mono nhiti, romhâ na wasiré aꞌuwẽꞌõ norĩ nhiptiꞌai ꞌre da te ĩwĩrĩ tõ da hã maꞌãpé ĩpawapto na. E marĩ da, ma tô Izaraéu nhihudu norĩ nhibꞌapito we aimo ãwamhã, ĩzô ꞌre airĩtĩ mono da. Wa hã wapsãꞌu ne hã marĩ dai õre di. E marĩ da, te we ĩzô ꞌre iꞌaba mo wiꞌi zô ẽtẽ na da te ꞌre iꞌaba zaꞌra mono ne.
21 Tawamhã Sau ma te ãma tãma waꞌrã ãne:
— Wa hã wa tô ãma upa. Tahawa, apâ te za aimo. Niwamhã te aima ꞌmanharĩ wasété zahu õ di za, ã mara na hã a hã ĩwazé wa. Tahawa, wa tô ĩnhimizaꞌreseꞌõ ne ĩhâimana. Wa tô duré ãma aima upa zaꞌẽtẽ.
22 Tawamhã Dawi ma ãma tãma waꞌrã ãne:
— Apito, ãhãta isiꞌuwazi ꞌrãꞌwa, te ate hã za. Ate aibâ norĩ hã we sô ꞌmaimorĩ.
23 Wanhibꞌapito ꞌRe ihâimana uꞌâsi mono hã te ꞌre inomro wẽ mono norĩ ma si te te ꞌre awaꞌâbâ iwẽ na hã, te te sina ꞌre iꞌumnhasi zaꞌra mono norĩ ma hã, duré sena na iꞌuwaibaba na si ãma ꞌre inomro mono norĩ ma hã. Ã bâtâ na ma tô aré ĩma aihâiba nho ĩnhibꞌratamhã. Tane nherẽ, ĩnhibꞌrada te sarõtõ õ di, ꞌRe ihâimana uꞌâsi mono, apito da, te te iꞌaipisudu te iꞌaiwĩrĩ da hã.
24 Ã bâtâ na wa hã te aiwazém ne, tane da hã wa Wanhibꞌapito wi waptẽ, te te ĩpawaptob da, uburé marĩ ipire hã te te ĩma ꞌre baꞌa mono da.
25 Tawamhã Sau ma tô ãma tãma waꞌrã ãne, Dawihi ma:
— Ĩꞌra, wa ĩsima aiwẽ, ꞌRe ihâimana uꞌâsi mono hã iwẽ si te te aima ꞌre apisutu mono da. Uburé marĩ hã ꞌre iꞌmanharĩ mono hã te za wẽ na ꞌre wairébé.
Tahawa, Dawi hã ma tô oto apâ mo. Sauhu zama ma tô apâ mo, tinhorõwa u.
