1 Samuéu 27:1-12
27 Tawamhã te Dawi hã ãne sima rosaꞌrata:
— Nimahã bâtâ na Sau hã te za ĩwi. Tahawa, ĩma wẽ di za ĩmorĩ da hã, ĩsimani da, filisteu norĩ nhiptiꞌai u. Tawamhã te za Sau hã taré ĩzô ꞌre rĩtĩ, uburé Izaraéu nhihudu norĩ nhiptiꞌai mono na hã. Ãne wamhã, wa za ĩsima iwẽ na nhamra, te ĩsima romnhimimnhasi ãna.
2 Tahawa, ma tô oto Dawi hã mo, ãne te te sima rosaꞌrata wi, tite aibâ norĩ 600 na ihâiba zaꞌra norĩ ré, Aqui hã Maꞌoquihi ꞌra ꞌre ihâimana mono zéb u, Gati na ꞌri nhoꞌõmo nhisi ãma danhibꞌihâꞌa hã.
3 Tawamhã Dawi norĩ hã tite aibâ norĩ me ma tô oto tame ꞌre hâimana zaꞌra, Gati ãma ꞌra ré, duré mro ré. Dawihi me ma tô imro norĩ hã ꞌre hâimana zahuré, ãne isisi zahuré hã: Ainoꞌã, Zezereu na isaꞌru nhisi hã, duré imrotõ hã Abigaiu, Nabau na iꞌamoꞌaba nhisi hã aré Carmeru na isaꞌru nhisi ãma hã.
4 Tawamhã Sau, Gati u Dawi isimanizé te te waihuꞌu wamhã, ma tô oto sazâ, te te sô ꞌre iꞌaba mono zé hã.
5 Tawamhã te Dawi hã Aquihi ma tinha ãne:
— A hã ĩꞌãma asiwaihuꞌu wamhã, te za ĩma isõ, ꞌriꞌahâ isurure hã iwa ꞌre ĩhâimana mono zéb da hã. E marĩ wa. Ĩma hã tô iꞌuwaibaba õ wa, aime ꞌre ĩhâimana uꞌâsi mono da hã, ꞌriꞌahâ isaꞌẽtẽ wamhã.
6 Tawamhã Aqui hã ma tô tãma tisõ, ꞌriꞌahâ Zicradi na isisi hã, Dawihi ma. Tawamhã tahawim haré ãhã na zama Zicradi, Zudaha nhihudu norĩ nhibꞌapito te hã.
7 Tawamhã Dawi hã ma tô iwa ꞌre hâimana, misi wahu pari maparane siꞌuiwa na aꞌamo ãma isiꞌutõrĩ na, filisteu norĩ zaꞌrui ꞌremhã.
8 Tawamhã Dawi, tite aibâ norĩ me, dazaꞌrui wa duréi aꞌuwẽ ꞌre ihâimana zaꞌra mono norĩ te te ꞌre iꞌwapé zaꞌra mono na hã ma tô ãma romhõsi zaꞌra, aꞌuwẽ Gezuri na iwamri norĩ na hã, aꞌuwẽ Zirzi na iwamri norĩ na hã, duré aꞌuwẽ amalequita na iwamri norĩ na hã. Tahawa, ma tô isiptiꞌa zaꞌra ꞌremhã te te ꞌwapé zaꞌra, Su na rowamri hawi, Ezitu u.
9 Tawamhã uburé aibâ norĩ hã ma tô te te siwi ꞌre uprosi, piꞌõ norĩ hã duré. Tawamhã isimizama poneꞌẽrebâ zama, powawẽ zama, awaru poꞌrepore zama, duré awaru baꞌõmore zama hã ma tô te te tiwi ꞌre waibu zaꞌra. Ma tô iꞌuza zaꞌra zama duré te te tiwi ꞌre waibu zaꞌra. Tahawa, Dawi hã Gati u apâ ꞌre ne mono sidâpâsi,
10 ma tô Aqui hã te te ꞌre sadanharĩ ãne:
— E ma hã ma tô iꞌaꞌwapé ã bâtâ na hã.
Tawamhã Dawi hã ma tô te te ãma ꞌre sadaꞌâbâ Zuda tiꞌa niwĩ hâiwa nhimiꞌe niwĩmhã ro ꞌre ihâimana mono ãma te te ꞌre idaꞌaꞌwapéi mono na hã, niha wamhã zerameu na aꞌuwẽ wamri norĩ ãma hã, niha wamhã duré queneu norĩ nhiptiꞌai ãma hã.
11 Tawamhã Dawi hã uburé pese ma tô te te aꞌuprosi aibâ norĩ hã piꞌõ norĩ zama, niꞌwa hã apâ Gati u hã wisi tõ da, tite aibâ norĩ me marĩ te te iꞌmanharĩ zaꞌra zém na dama ipire ma te te iꞌmairowasuꞌu da hã. Ãne Dawi hã, ma tô filisteu norĩ siré ꞌre hâimana mono ré hã te te ꞌre ꞌmanharĩ.
12 Tahawa, Aqui hã ma tô te te ꞌre umnhasi, Dawi hã. Tahawa, te ãne te te dama ꞌre wasuꞌu wẽ:
— Ã hã ma tô isiré Izaraéu nhihudu norĩ hã, te te siwi ꞌre wẽꞌõ pese. Tahawa, te õne uꞌâsi za te te ĩma ꞌre romhuri.
