1 Samuéu 28:1-25
28 Tawamhã nimahãna si ma tô filisteu norĩ hã siꞌrãꞌõtõ dasiꞌwapéi ꞌmanharĩꞌwa norĩ hã, Izaraéu nhihudu norĩ te te ꞌwapé zaꞌra da hã. Tahawa, te Aqui hã tãma tinha ãne, Dawihi ma:
— Maꞌãpé niha waihuꞌu za: Te za ĩsiré iꞌaꞌwapé, ate dasiꞌwapéi ꞌmanharĩꞌwa norĩ ré.
2 Tawamhã Dawi ma ãma sadaꞌâ ãne:
— Marĩ õ di, wẽ di. Ãhãta wa hã wa ãme ĩhâiba, te iꞌaipawaptob da hã. Tahawa, te za iꞌmadâ, za marĩ te iꞌmanharĩzé iwaihuꞌuꞌõ hã.
Tahawa, ma ãne Aqui hã ãma saze:
— Wẽ di tô.
Tawamhã te duré tãma tinha ãne:
— A hã te za duré ĩꞌmadâꞌâꞌwa na õne uꞌâ ĩma ꞌre aihâimana mo.
Sau hã adâꞌâ zadaihuꞌuꞌwa te te isadanharĩzé wasuꞌu
3 Tawamhã Samuéu dâꞌâ wamhã, ma tô uburé Izaraéu nhihudu norĩ hã sô tiꞌruꞌru. Ma tô duré ãma siwi tiꞌa, ꞌriꞌahâ Rama na isisi wa, ipotozéb ãma. Tawamhã Sau hã ma tô uburé adâꞌâ zadaihuꞌuꞌwa norĩ hã, satõrĩ zaꞌra Izaraéu nhihudu norĩ nhiptiꞌai hawimhã.
4 Tawamhã ma tô dasiꞌwapéi ꞌmanharĩꞌwa norĩ filisteu norĩ hã siꞌrãꞌõtõ, te te sima ꞌri nhoré zaꞌra da, ꞌriꞌahâ Sune na isisi ꞌrata. Tahawa, Sau ma tô Izaraéu nhihudu norĩ hã duré ꞌrãꞌõtõ, te te sima ꞌri nhoré zaꞌra da, ẽne hã Ziuboa na isisi ãma.
5 Tawamhã Sau hã dasiꞌwapéi ꞌmanharĩꞌwa filisteu norĩ hã te te ꞌmadâꞌâ zaꞌra wamhã, ma tô tãma tipahi pese zaꞌra.
6 Tahawa, te Uburé Danhibꞌapito hã sadanha ãne:
— Ĩnhibꞌapito, e marĩ, wa za ꞌmanha.
Tane nherẽ, ꞌRe ihâimana uꞌâsi mono hã te te ãma sadaꞌâbâ õ di, sõtõ ꞌrowim na hã duré ẽne Urĩ na hã duré ꞌRe ihâimana uꞌâsi mono zadawa ꞌmahârâꞌwa norĩ nhimirowasuꞌu na hã.
7 Tahawa, ma tô Sau hã tãma waihuꞌu zaꞌra, tizahâpâ romhuriꞌwa norĩ ma hã ãne:
— Airĩtĩ zaꞌra waꞌaba mono, piꞌõ dazadaihuꞌuꞌwa hã te sadawa pibu da.
Tawamhã ma ãma sadaꞌâbâ zaꞌra ãne:
— Te ꞌre ꞌmaihâimana, Ẽdo na ꞌri nhoꞌõmo nhisi ãmamhã.
8 Tawamhã Sau hã ma tô daꞌuza ihâiba amo na hã siꞌuza, da te hâiba waihuꞌu tõ da. Tawamhã robzaꞌrã wamhã oto, ma tô maparane tizapariꞌwa norĩ me hã mo, tô õ hã piꞌõ te te sadanharĩ da. Tahawa, te ãne tãma tinha:
— Maꞌãpé ĩma sadawa pibu zaꞌra na ꞌre idadâꞌâ zaꞌra mono norĩ hâiba warõ hã te te ĩma ꞌmairowasuꞌu da, za marĩ ĩhâimanazém na hã. Wa hã wa za aima ꞌmaiwasuꞌu za aibâ nhisi hã. Tawamhã a hã te za ãma tãma iꞌmairobꞌru, ꞌre idâꞌâ zaꞌra mono hâiba warõ ma hã, ãma ĩtẽme te te iꞌmazaiꞌuri da hã.
9 Tawamhã piꞌõ, ma Sauhu ma ãma tãma waꞌrã, ãne:
— Tô sena aima waihuꞌu pese di, apito Sau marĩ te te iꞌmanharĩzé hã: Ta hã ma tô Izaraéu nhihudu norĩ nhiptiꞌai hawi satõrĩ zaꞌra, dazadaihuꞌuꞌwa norĩ hã. E tiha da, ma tô danhimimramizém na ĩꞌâri pibu da hã irosaꞌra, apito zadawa para da te dasiwi ĩwĩrĩ da.
10 Tahawa, ma tô Sau hã Uburé Danhibꞌapito nhisi na ropisutu ãne:
— Wanhibꞌapito ꞌRe ihâimana uꞌâsi mono, idâꞌâꞌõ nhisi na wa aima ropisutu, ãne hã ĩma iꞌmanharĩzéb zarina, za da te aima irobꞌmanharĩ õ na hã.
11 Tawamhã te piꞌõ sadanha ãne:
— E ꞌwa hã te asima iwẽ, te te ãma isaiꞌuri da, te tãma iꞌmanharĩ da hã, wa hã.
Tawamhã ma tô ãma sadaꞌâ:
— Samuéu!
12 Tawamhã piꞌõ, Samuéu te te ꞌmadâꞌâ wamhã, ma tô tãma tizadari. Tahawa, te Sauhu ma tinha ãne:
— E tiha da, ma tô ĩma asadawa nhipe. A hã apito Sau!
13 Tawamhã Sau ma ãma tãma waꞌrã ãne:
— Aipahi tõ. E marĩ te iꞌmadâ.
— ꞌRe idadâꞌâ zaꞌra mono hâiba warõ tiꞌai hawi hâimo imorĩ hã wa ꞌmadâ. — Ãne te piꞌõ hã tãma wasuꞌu, marĩ te te iꞌmadâ hã.
14 Tawamhã Sau te duré ãma sadanha ãne:
— E niha tawamhã ihâiba hã.
— Aibâ ihire te we saiꞌu. Uburé zazahâ hâpa na hâiba ubu ré. — Ãne ma te piꞌõ hã ãma tãma waꞌrã asa.
Tawamhã Sau hã ma tô waihuꞌu, Samuéu na hã. Tahawa, ma tô hiꞌrãtitõ nhamra. Ma tô tiꞌubu na ropto tiꞌai u hã, te te iwazéb zarina.
15 Tahawa, te Samuéu hã Sauhu ma tinha ãne:
— E marĩ da, ma tô ĩzô irowasu. E marĩ da, ma tô ãne hã ĩma iꞌmanha, apâ we ĩmorĩ da hã.
Tawamhã Sau ma ãma tãma waꞌrã ãne:
— Ĩma ropire uptabi di ãhã na hã, filisteu norĩ hã te te siwi ĩꞌwapéi uꞌâsi mono wa. Duré ꞌRe ihâimana uꞌâsi mono hã ma tô ĩma aiꞌré, ĩme hâimana tõ da hã. Tahawa, marĩ na te te ĩzadaꞌâbâ õ di, isadawa ꞌmahârâꞌwa nhimirowasuꞌu na hã, duré ĩnhotõ ꞌrowim na hã. Tahawa, ãme ĩma rowasuꞌu da hã wa asô hâ, za marĩ te iꞌmanharĩ da na hã.
16 Tawamhã Samuéu te duré asa tãma tinha ãne:
— E marĩ da, te ĩzô aihâ ãhã na awaꞌawi na hã Wanhibꞌapito ꞌRe ihâimana uꞌâsi mono te te airẽme nherẽ, duré asitobꞌru na oto aima hâimana nherẽ.
17 Wanhibꞌapito hã te te aiꞌãma iropisutuzéb zarina hã ma tô aima ꞌmanha, te aima isadawa wasuꞌu zarina ma tô aiwaze apito hawimhã, aimawi ma te te sõmri da oto, apito da hã, Dawi na isisi ma.
18 A hã Wanhibꞌapito te te aima iwaihuꞌuzém na hã sadawa zamarĩ õ di. Õne haré amalequita norĩ hã uprosi pese õ di, isimarĩ zaꞌra zama. Tahawa, ma tô Wanhibꞌapito hã ãhã na awaꞌawi na hã ãne na hã aima robꞌmanha.
19 Tahawa, te za a hã, Izaraéu nhihudu norĩ me, filisteu norĩ ma hã aihâiba nhomri zaꞌra waꞌwa. Duré awẽmhã te za a hã aiꞌra norĩ ré hã ĩsiré aihâiba. Tawamhã Izaraéu nhihudu norĩ te dasiꞌwapéi ꞌmanharĩꞌwa norĩ hã, te za hâiba nhomri zaꞌra filisteu norĩ ma hã.
20 Tawamhã ãne te te tãma waihuꞌu wi, ma tô Sau hã hâiba wahu na dumana na tô õme tiꞌai u hã waptãrã, Samuéu te te tãma inharĩzé ma, pahi uptabi wa. Sibꞌuwa uptabi di, marĩ te te ꞌrẽne õ wa, ã bâtâ wahuré na hã, duré ã mara wahuré na zama.
21 Tawamhã ma tô piꞌõ hã ꞌrâwi itẽme wi. Tahawa, ipahizém na ma tô ꞌmadâ. Tahawa, te ãne tãma tinha:
— Wa hã te ĩsima romnhimimnhasi nherẽ, wa tô ĩwi iwaptẽrẽzé hã ꞌmanha tô.
22 Tahawa, maꞌãpé ĩmreme hã wapari, te aiwi iwaptẽrẽzé hã. Maꞌãpé duré asima wẽ na dasa hã suru na te we aima iꞌâri da hã, ãma aiꞌupari da, taha pari duré asiptete sina apâ aimorĩ da.
23 Tane nherẽ, Sau hã te siwi wẽꞌõ. Te duré tinha, tô sa tõ da hã. Tane nherẽ, isahâpâ romhuriꞌwa norĩ zama te nasi tãma ꞌru zadawa zaꞌréi õ zaꞌra tô sa da hã. Tawamhã Sau ta norĩ hã ma tô oto sina saze zaꞌra. Tahawa, ma tô oto wahudu tiꞌai hawimhã. Ma tô duré oto nhamra, waptâmhã.
24 Tawamhã ma tô piꞌõ hã waptu na tiwĩ powawẽ zapu hâi pe hã. Ma tô duré tiꞌâ amnho trigu zubꞌa ré zama. Ma tô warutu. Tawamhã ma tô duré sebre tãma, iꞌuꞌẽtẽ wapu duptoi ãna.
25 Tawamhã dasa te te tãma ꞌmanharĩ zaꞌra pari ma tô oto tãma tisã Sauhu nhoꞌre isa hã, duré isahâpâ romhuriꞌwa norĩ nhoꞌre ãma zama, ma tô tãma sõré zaꞌra. Tawamhã ma tô oto tisa hã tihu. Taha pari, te bara na hã oto aiꞌabaꞌré.
