1 Samuéu 29:1-11
29 Tawamhã uburé filisteu dasiꞌwapéi ꞌmanharĩꞌwa norĩ hã ma tô siꞌrãꞌõtõ, Afeca na ꞌri nhoꞌõmo nhisi ãma. Taha ré, Izaraéu nhihudu norĩ hã ma tô sima ꞌri nhoré zaꞌra, Zezereu na ẽtẽ siwaꞌaba nhisi ãma, u siromo ꞌrata.
2 Tawamhã 5 na dama iꞌrãnhoꞌõmo norĩ filisteu hã ma tô te te ropãrĩ zaꞌra mono sina, sisõré pese na aiꞌabaꞌré tite dasiꞌwapéi ꞌmanharĩꞌwa norĩ ré, nima norĩ 100 na ãma sima isipoꞌo zaꞌra ré, duré nima norĩ miu na ãma sima isipoꞌo zaꞌra ré. Tahawa, Davi tite aibâ norĩ ré ma tô isaꞌu zaꞌra mo, te te ropãrĩ zaꞌra mono sina, sisõré pese na, Aqui na isisi siré.
3 Tawamhã filisteu norĩ te dasiꞌwapéi ꞌmanharĩꞌwa norĩ ꞌmadâꞌâꞌwa hã ma tô ãne anharĩ zaꞌra:
— E marĩ te Ebreu norĩ hã ãmemhã ꞌmanharĩ zaꞌra.
Tawamhã Aqui ma tô ãma sadaꞌâbâ zaꞌra ãne:
— Ã hã Davi, Izaraéu nhihudu norĩ nhibꞌapito ma romhuriꞌwa aré, Sauhu ma hã. Duré ma tô bâtâ ahâ na hã ĩsiré ꞌre hâimana, Sau te te irẽme hawim haré. Tô ĩtẽme wisi hawim haré, marĩ hã te ꞌmadâꞌâ õ di, te te iꞌmanharĩ upazé hã, ĩwi.
4 Tane nherẽ, ãne te te tãma wasuꞌu zaꞌra wa, ma tô filisteu norĩ te dawadaꞌuriꞌwa norĩ hã sada tizahi zaꞌra, Aquihi da hã. Tahawa, te ãne tãma nharĩ zaꞌra:
— Ã hã aibâ apâ morĩ da te za isatõ za, ꞌriꞌahâ tãma isõmri u apâ morĩ da hã. Tãma rowairébé õ di za, dasiꞌwapéi u wame isébré zaꞌra da hã, wazada zaꞌra sipiꞌrai õꞌumnhasite, dasiꞌwapéi ré hã. Tãma iwẽ hã tô aré, wate aibâ norĩ te te isimrozéb zarina, isibꞌihâꞌa te te iwẽsãmri da hã.
5 Davihi ãmamhã ma tô piꞌõ norĩ hã tinhoꞌre zaꞌra, siꞌrẽne zaꞌra sina ãne: “Sau hã ma tô dapã miu na. Davi hã 10 miu na ma tô dapã”
6 Tawamhã Aqui hã ma tô sô hâ Davihi zô. Tahawa, te ãne tãma tinha:
— Uburé Danhibꞌapito idâꞌâꞌõ nhisi na wa tô sena na aiꞌãma waihuꞌu ãne: A hã sena na ma tô ĩma aiꞌumnhasi na ĩma ꞌre aihâimana mo. Duré ĩma rowẽ uptabi di za, ĩsiré aiꞌwapéi wamhã, dasiꞌwapéi u hã. Niwamhã marĩ na iꞌupazém na hã te aiꞌmadâꞌâ õ di, ĩtẽme aiwisizém hawim haré, ã bâtâ u hã. Tane nherẽ, filisteu dama iꞌrãnhoꞌõmo norĩ ma hã aiwẽ zaꞌra õ di.
7 Tahawa, rowẽ na apâ aimorĩ za ꞌriꞌahâ u hã, marĩ hã ꞌmanharĩ ãna, filisteu norĩ te iꞌrãnhoꞌõmo norĩ hã, te te siwi aiwẽꞌõ zaꞌra tõ da.
8 Tawamhã Davi ma tô ãma sadaꞌâ ãne:
— E marĩ te ꞌmanharĩ bâ. Niwamhã a hã ĩzô irobaba na hã asimrami õ di, romhurizém na te aima isãnaꞌratazé bâtâ hawim haré. Ĩnhibꞌihâꞌa, duré ĩnhibꞌapito, ãne nherẽ, e marĩ wa bété, aime ĩmorĩ õ di za, asitobꞌru norĩ te iꞌaꞌwapé da hã.
9 Tawamhã ma tô duré Aqui hã ãma sadaꞌâ ãne:
— Wa hã tô tane hã ĩma waihuꞌu pese di, asimiꞌmanharĩzé mono hã. A hã ĩma aiꞌumnhasi uptabi di, hâiwa ãma ꞌRe ihâimana uꞌâsi mono ma romhuriꞌwa ne hã. Tane nherẽ, dama iꞌrãnhoꞌõmo norĩ hã ma tô nharĩ zaꞌra, wame aimorĩ zaꞌra tõ da, dasiꞌwapéi u hã.
10 Tahawa, awẽmhã te za duréi uptabi aiꞌutu zaꞌra waꞌwa, Sau te te irẽme zaꞌra norĩ me ã hawi aiꞌabaꞌréi waꞌaba da.
11 Tawamhã ãne ma tô Davi tisiré aibâ norĩ me hã tiꞌutu zaꞌra mararé uptabi, siꞌabaꞌré da apâ, Filistéa na ꞌriꞌahâ nhisi u. Tahawa, filisteu norĩ hã ma tô aiꞌabaꞌré, Zezereu u.
