1 Samuéu 3:1-21
3 Tawamhã Samuéu hã zahadure nherẽ, ma tô Eri hã te te ꞌre pawapto, ꞌRe ihâimana uꞌâsi mono Uburé Danhibꞌapito ma romhurizém na hã. Tawamhã tô taha bâtâ mono na Uburé Danhibꞌapito zadawa wasuꞌu hã suru na ma tô dama ꞌre simasisi. Ma tô duré suru na marĩ hã da te ꞌre ꞌmadâꞌâ zaꞌra, danhotõ ꞌrowim ne.
2 Eri hã te te robꞌmadâꞌâ pibui prã ti oto. Tahawa, nimahã mara na hã te oto nhono, tinhimiwaptâ ãmamhã.
3 Tawamhã Samuéu hã, romhâ ꞌmanharĩ na ꞌri iwazéb zahi ꞌre, te nhono, ꞌRe ihâimana uꞌâsi mono nhimiroti uiꞌéré wedehâꞌre ꞌmanharĩ ꞌre isa mono zéb ãma. Duré taha ré hã, te zahadu ãro, ꞌRe ihâimana uꞌâsi mono te robꞌuiwẽzé hã.
4 Tawamhã te Uburé Danhibꞌapito ꞌmahâ ãne:
— Samuéu, Samuéu!
Tawamhã ma tô sadaꞌâ ãne, Samuéu hã:
— E marĩ. Ãhãta ãme wa nhamra.
5 Tawamhã wara sina te wara Samuéu hã, Erihi zaꞌwarizéb u. Ãne te sadanha:
— Ĩnhibꞌapito, e te ĩꞌmahâ. Ĩꞌmahârâ wamhã, ãhãta wa za, aiꞌrata.
Tane nherẽ, Eri ma tô ãma tãma waꞌrã, ãne:
— Wa hã te aiꞌmahârâ õ di. Aimorĩ apâ, asimiwaptâ u.
Tawamhã ãne te te tãma nharĩ wa, ma tô apâ mo, Samuéu hã.
6 Tawamhã Uburé Danhibꞌapito te duré ꞌmahârâ zahu, Samuéu hã. Tahawa, ma tô duré udu. Ma tô duré mo, Erihi zaꞌwarizéb u. Ãne te sadanharĩ na sahu duré:
— Ĩnhibꞌapito, e te ĩꞌmahâ. Ĩꞌmahârâ wamhã, ãhãta wa za, aiꞌrata.
Tane nherẽ, ma duré ãma sadaꞌâ, ãne:
— Ĩꞌra, te aiꞌmahârâ õ di. Mo oto apâ aimorĩ, asimiwaptâ u.
7 Tawamhã Samuéu hã zahadu te te waihuꞌu õ di, Uburé Danhibꞌapito hã. E marĩ wa. Zahadu ꞌRe ihâimana uꞌâsi mono niwamhã te te tãma nharĩ õ wa.
8 Tawamhã Uburé Danhibꞌapito te duré ꞌmahâ, Samuéu hã siꞌubdatõ ãmamhã. Tahawa, ma tô duré udu wara sina. Tawamhã ma tô mo duré, Erihi zaꞌwarizéb u hã. Tahawa, te duré sadanha, ãne:
— Ĩnhibꞌapito, e te ĩꞌmahâ. Ĩꞌmahârâ wamhã, ãhãta wa za, aiꞌrata.
Tawamhã Eri ma tô oto waihuꞌu, Uburé Danhibꞌapito te te nasi iꞌmahârâ na hã, Samuéu hã.
9 Tahawa, te ãne tãma tinha:
— Apâ te za aimo asimiwaptâ u. Te te duré aiꞌmahârâ na sahu wamhã, ãne sadaꞌâbâ za: “E marĩ, Uburé Danhibꞌapito. Asibꞌaꞌuwẽ, ãhãta wa aiwapa.” Ãne ma tô Eri hã ãma tãma asanho, za te te tãma ãma iwaꞌrãmizém na hã.
Taha pari, ma tô oto mo apâ, Samuéu hã tinhimiwaptâ u.
10 Tawamhã Uburé Danhibꞌapito ma tô oto itẽme mo. Tahawa, te oto iꞌrata za. Tawamhã iwana nasi te te iꞌmahârâ ne, ma tô duré ꞌmahâ, ãne:
— Samuéu! Samuéu!
Tawamhã Samuéu ma sadaꞌâ oto ãne:
— E marĩ! Asibꞌaꞌuwẽ ãhãta wa aiwapa.
11 Tawamhã te Uburé Danhibꞌapito hã tãma tinha ãne, Samuéu ma:
— Wa hã wa za tãma robꞌmanharĩ zaꞌra, marĩ iwasété uptabi na, Izaraéu nhihudu norĩ ma. Tahawa, ãne hã uburé za te tãma irobꞌmanharĩ zaꞌra zé te te sina wapari zaꞌra wamhã, te za tãma tipahi pese zaꞌra.
12 Taha bâtâ na hã wa hã wa za tãma robꞌmanha, Erihi ma, uburé iꞌra norĩ hâiba na te tãma iropisutuzéb zarina, isãnaꞌrata hawimhã duré iꞌrãsutu u hã.
13 Wa tô tãma tinha, za iꞌra norĩ te ꞌre iꞌahâri uꞌâsi mono na hã. E marĩ wa. Iꞌra norĩ hã ĩhâiba na te te ꞌre nharĩ wasété zahuré mono wa. Tawamhã ãne za te tãma iꞌmanharĩ zahuré zé hã, Eri hã te te waihuꞌu pese di. Tane nherẽ, tiꞌra norĩ wi te te sawi zahuré õ di, te te ꞌre iꞌmanharĩ wasété zahuré mono zé hã te te isahâri da hã.
14 Tahawa, sena na wa tãma waihuꞌu zaꞌra, Eri norĩ ma hã iꞌra norĩ hâiba na hã za niwamhã ꞌRe ihâimana uꞌâsi mono ma tinhoprubzém na hã tiwasédé te te sima ãma ꞌre ipari waihuꞌu zaꞌra mono õ na hã.
15 Tawamhã ãne te te tãma nharĩ pari, ma tô oto nhono Samuéu hã, ãma iꞌawẽzéb u. Tawamhã ma tô oto udu. Utu wamhã, ma tô duré oto ꞌridawa, ꞌridawa zaꞌẽne hã romhâ ꞌmanharĩ na ꞌri iwazéb zahi u, ꞌre idanhisisi mono zéb ꞌridawa zaꞌẽne hã. Tawamhã duré pahi di, Erihi ma, te te tãma iwasuꞌu da hã, sõtõ ꞌrowim ne marĩ te te iꞌmadâꞌâzé hã.
16 Tane nherẽ, te Eri hã ꞌmahâ, ãne:
— Ĩꞌra Samuéu!
Tahawa ma sadaꞌâ ãne:
— E marĩ. Ãhãta ãme wa nhamra.
17 Tawamhã te Eri sadanha ãne:
— E niha ma tô ꞌRe ihâimana uꞌâsi mono hã aima rowaihuꞌu. Ĩwi udâ tõ. Tawamhã ꞌRe ihâimana uꞌâsi mono te za aima robꞌmanha, uburé te te aima inharĩzé, ĩma wasuꞌu õ wamhã.
18 Tahawa, Samuéu ma tô uburé tãma wasuꞌu, te te tiwi udâ ãna, te te tãma inharĩzé hã. Tawamhã te Eri tinha, ãne:
— Õ hã tô ꞌRe ihâimana uꞌâsi mono, Uburé Danhibꞌapito. Ĩma wẽ di tô, marĩ te te ꞌre iꞌabꞌmanharĩ mono da hã, tãma iwẽzéb zarina si!
19 Tawamhã Samuéu hã ma tô oto tiprédu. Prédu wamhã, ma tô Uburé Danhibꞌapito hã ime ꞌre hâimana. Uburé marĩ hã te te ꞌre abꞌmanharĩ mono da, te te tãma inharĩzéb zarina, ma tô ãma uwaimra, ꞌRe ihâimana uꞌâsi mono hã.
20 Ãne wa, ma tô uburé Izaraéu nhihudu norĩ hã tiꞌai waꞌõtõ nhoꞌõmo ꞌre ropâ ꞌre ihâimana zaꞌra mono hã waihuꞌu zaꞌra, Dã bâtâ pusizém hawi Beseba bâtâ zasizéb u, Samuéu tô sena na Uburé Danhibꞌapito zadawa ꞌmahârâꞌwa na hã.
21 Tawamhã Uburé Danhibꞌapito ma tô duré Silo u hã nasi itẽme aimasisi, Samuéu u, imorĩꞌrata na tãma isihâiꞌrézéb u, duré te te tãma inharĩzéb u. Tahawa, ma tô uburé Izaraéu nhihudu norĩ hã Samuéu mreme hã te te siwi ꞌre wazé pese.
