1 Samuéu 30:1-31
30 Tawamhã maparane bâdâ ãma neb zaꞌra pari, ma tô Davi norĩ hã ꞌriꞌahâ Zicradi na ite zaꞌra nhisi u hã aihutu. Davi hã ꞌriꞌahâ nhiti ꞌre hâimana mono ré, ma tô amalequita norĩ, Zuda u hã asisi, hâiwa nhimiꞌe niwĩmhã. Tahawa, ma tô ꞌriꞌahâ Zicradi ãma, ꞌre idahâimana zaꞌra mono norĩ hã ꞌwapé zaꞌra. Tawamhã ma tô ꞌriꞌahâ ãma hã te te sazu zaꞌra.
2 Ma tô uburé pese piꞌõ norĩ hã waibu zaꞌra. Tane nherẽ, ta hã te te siwi ꞌmaiwĩrĩ õ di. Tahawa, apâ oto siꞌabaꞌréi wamhã, ma tô uburé pese taré te te siwi simro.
3 Tawamhã Davi tite aibâ norĩ me, tamomo apâ sihutu wamhã, ma tô ꞌriꞌahâ Zicradi ãma da te ãma isazu zaꞌra mono zé hã ꞌmadâꞌâ zaꞌra. Duré ite piꞌõ norĩ hã da te isimroi mono zé hã ma tô duré waihuꞌu zaꞌra, iꞌra siꞌaibâ norĩ hã, duré iꞌra sipiꞌõ norĩ hã.
4 Tawamhã Davi hã tite aibâ norĩ me, ma tô tiꞌruꞌru, isiptete siꞌutõrĩ zaꞌra zéb u.
5 Tawamhã Davihi mro piꞌõ norĩ hã ma tô dazu tiwi saprõni zahuré ni, Ainoꞌã na isisi hã Zezereu na isaꞌru nhisi hã, duré Abigaiu imrotõ, Nabau na iꞌamoꞌaba nhisi hã tiwi idâ ꞌriꞌahâ Carmeru na isisi ãmamhã.
6 Tawamhã Davihi ma hã ropire uptabi di. E marĩ wa. Ite aibâ norĩ hã ꞌra ãna oto hâimana zaꞌra wa, ma te oto isé pire hã sô tiwatobro zaꞌra. Tahawa, Davi hã ẽtẽ na te te siwi wĩrĩ da te ãma sima robzanhamri pibu zaꞌra. Tane nherẽ, ma tô Uburé Danhibꞌapito ite ꞌRe ihâimana uꞌâsi mono nhimipawaptobzém na hã ipẽꞌẽ ꞌremhã aptete.
7 Tahawa, ma tô sasedoti Abiata, Aimeretihi ꞌra ma hã tãma tinha ãne:
— We ãwa ĩma âri, sasedoti norĩ siꞌuzazé hã, ꞌRe ihâimana uꞌâsi mono te iré ãma sadanharĩ da. Tawamhã Abiata ma tô tãma tiꞌâ.
8 Tahawa, ma tô Davi hã Uburé Danhibꞌapito hã sadanha ãne:
— E we ãwa piꞌuriwi waro wamnarĩꞌwa norĩ zarina hã wa za mo. E tawamhã te sasãmri waihuꞌu pese zaꞌra di duré, te iwaibu da hã.
Tawamhã ma ãne ꞌRe ihâimana uꞌâsi mono hã ãma sadaꞌâ:
— Aimorĩ tô isarina zaꞌra hã. Tawamhã sasimri zaꞌra wamhã, da te isimroi mono norĩ hã te za isõꞌreptu zaꞌra.
9 Tawamhã Davi, tite 600 na aibâ norĩ me hã ma tô oto wairé. Tawamhã panhoꞌõmo ãma Bezo na isisi u sihutu wamhã, ma tô niꞌwam norĩ tame aꞌâ dazaꞌu tihâimana zaꞌra.
10 Davi hã ma tô ta hawi duré mo, 400 na aibâ norĩ ré. Tawamhã isiré norĩ 200 na ihâiba zaꞌra norĩ hã ma tô dazaꞌu asimro sadâꞌâ zé te, panhoꞌõmo na te te isaprĩ zaꞌra da hã. Tahawa, te dazaꞌu hã tihâimana zaꞌra.
11 Tahawa, Davihi te aibâ norĩ hã ma tô aꞌubuni wimhã siwi sõpẽtẽ, aibâ iprédupté ezipsiu hã. Ta hã ma tô siwi saprõ, Davihi u hã. Tawamhã ma tô isa hã tãma sõmri zaꞌra, duré â hã,
12 robꞌrã figu ꞌrã iꞌré hã, duré maparane iꞌru ꞌré na uva ꞌrãiꞌré prã ꞌmanharĩ na iꞌuꞌẽne hã. Siꞌubdatõ mara na duré siꞌubdatõ bâtâ na ma tô sai ãna tihâiba, iprédupté hã, duré â te te hâꞌrẽne ãna hã. Tane nherẽ, sai parimhã, ma tô apâ isiptede hã tãma wi.
13 Tawamhã te Davi ãne sadanha:
— E ꞌwa hã asibꞌapito. E ma hawimhã a hã.
— Wa hã ezipsiu norĩ siré, amalequita na aꞌuwẽ wamri ma romhuriꞌwa ĩpawaꞌâbâ ãna. — Ãne ma te ãma tãma waꞌrã, aibâ iprédupté, ezipsiu hã. Te duré tãma siwasuꞌu ãne:
— Ĩnhibꞌapito hã siꞌubdatõ bâdâ imorĩ ꞌremhã ma tô ĩrẽ ãmemhã, ĩhâzé wa.
14 Wa norĩ hã wa te daꞌwapé zaꞌra da, wa tô asisi ni, quereti norĩ nhiptiꞌai u hã, duré Zuda na tiꞌa nhisi hâiwa nhimiꞌe niwĩb u hã, duré Calebihi nhihudu norĩ nhiptiꞌai u. Wa tô duré tawamhã ãma sazu zaꞌra ni, ꞌriꞌahâ Zicradi na isisi ãmamhã.
15 Tawamhã Davi te tãma tinha ãne:
— E tawamhã ĩzaprõni õ di za, amalequita norĩ ihâimana zaꞌra zéb u hã.
Tawamhã aibâ iprédupté ma ãma tãma waꞌrã ãne:
— Marĩ õ di. Wa za tô asaprõ, a hã, ꞌRe ihâimana uꞌâsi mono nhisi na ĩwĩrĩ tõ da hã, duré ĩnhibꞌapito ma ĩhâiba nhomri tõ da hã, ĩma ropisutu wamhã.
16 Tawamhã ma tô oto saprõ, Davi hã. Te te saprõni wamhã, amalequita norĩ hã tiꞌai mono bâ te te ropéi mono haré ma tô sõpẽtẽ zaꞌra. Filisteu norĩ wi, duré Zuda tiꞌai ãma marĩ ahâ na te te dawi waibu zaꞌra wẽ te, te dato isaꞌẽne hã sima ꞌmanharĩ zaꞌra, mra te te ihuri na hã, duré â sipãrĩ te te iꞌâhuri na zama.
17 Tawamhã ãma awẽ wamhã, rowaꞌa wi ma tô Davi hã aꞌwapé marazéb u. Tahawa, niꞌwa hã simani õ di. 400 na aibâ ipréduptém norĩ, awaru baꞌõmore te te sima ibazadâ zaꞌra na si, ma tô tawamhã ãma aimani zaꞌra.
18 Tawamhã Davi hã ma tô uburé sõꞌreptu zaꞌra, da te isimroi mono norĩ hã, duré timro norĩ zama. Isibrob zaꞌra hã ma tô duré uburé apâ ꞌwasa, amalequita norĩ te te siwi iwaibu hã.
19 Sô ꞌmairobaba õ di. Davi hã ma tô apâ uburé te te simro, isibꞌaꞌuwẽ ꞌra siꞌaibâ norĩ hã, iꞌra sipiꞌõ norĩ hã, uburé marĩ isaꞌẽtẽ norĩ hã, duré isurure norĩ hã, amalequita norĩ te te aré siwi iwaibu hã, tiwi zaꞌra.
20 Uburé poneꞌẽrebâ norĩ hã ma tô apâ te te simro, powawẽ norĩ zama. Tahawa, te Davihi te aibâ norĩ hã danhimizama te te tãma simro Davihi ma hã. Tawamhã te ãne tãma nharĩ zaꞌra:
— Ã hã asimizama da hã.
21 Tawamhã Davi hã ma tô apâ mo, 200 na aibâ norĩ sadâꞌâ uptabi zaꞌra wa, ime isiꞌabaꞌréi õ norĩ u, Bezo na panhoꞌõmo nhisi ãma isaꞌu isiꞌubumroi u hã. Tawamhã ma tô aibâ norĩ hã wairé, Davi norĩ hã, ite aibâ norĩ me, te te sõpẽtẽ zaꞌra da hã. Tawamhã Davi ma tô ꞌrâwi itẽme tiwisi zaꞌra. Tahawa, ma tô õne haré azawi, tinhibꞌaꞌuwẽ norĩ hã.
22 Tane nherẽ, niꞌwam norĩ hã aibâ hã iwasédé Davihi siré isiꞌabaꞌré hã ma tô tãma nharĩ zaꞌra ãne:
— Õ norĩ hã wame siꞌabaꞌréi õ di. Tahawa, marĩ we wa te iꞌwasari hã wa te tãma iꞌmanhomri zaꞌra da hã mare di za. Timro norĩ si, duré tiꞌra norĩ si te za tite mono bâ apâ hã te te waibu. Taha pari te za õne haré duré siré oto te te simro.
23 Tane nherẽ, ma Davi hã ãma tãma waꞌrãmi zaꞌra ãne:
— Ĩsisãnawã norĩ, ãne hã ꞌmanharĩ zaꞌra waꞌaba õ di za, Wanhibꞌapito ꞌRe ihâimana uꞌâsi mono te te wama isõmri zaꞌra na hã. Õ hã ma tô wanhoꞌreptu zaꞌra. Ma tô duré wapawaptob zaꞌra, wanhitobꞌru norĩ ãma wa te ãma aiꞌuté zaꞌra da hã.
24 Niꞌwa hã te te ãma asaze zaꞌra waꞌaba dai õ di, iwaihuꞌu zaꞌra waꞌaba zém na hã. Tahawa, wa za uburé wasima ãma wasipé zaꞌra, aiwapsi da. Tawamhã niꞌwam norĩ dazaꞌu danhimarĩ ꞌrata isiꞌubumro norĩ hã te za duré aiwa ãma sima aipé zaꞌra, dasiꞌwapéi u isiꞌabaꞌré norĩ me hã.
25 Ãne Davi ma tô tiꞌru tinhimiroti hã, da te oto ꞌre ꞌmadâꞌâ uꞌâsi zaꞌra mono da ãma. Taha zarina te Izaraéu nhihudu norĩ hã roti õne uꞌâ oto siwi ꞌre sama.
26 Tawamhã Davi Zicradi u apâ wisi wamhã, ma tô marĩ hã tinhitobꞌru norĩ wi te te iwaibu zaꞌra hã, tisiwaihuꞌu norĩ ma sõmri zaꞌra, Zuda tiꞌai ãma dama iꞌrãnhoꞌõmo norĩ ma. Tawamhã ãne robꞌuiꞌéré na hã ma tô tãma nharĩ zaꞌra:
— Ã hã ate zaꞌra waꞌaba da, wa ãma aima sõmri zaꞌra waꞌwa, Wanhibꞌapito ꞌRe ihâimana uꞌâsi mono nhitobꞌru norĩ wi, wa te irowaibu te aima ãma ipoꞌo zaꞌra waꞌwa hã.
27 Tawamhã Davi hã ma tô tinhoprubzé hã sõmri zaꞌra, ãne ꞌriꞌahâ nhisi norĩ ãma dama iꞌrãnhoꞌõmo norĩ ma hã: Bétéu, Rama hâiwa nhimiꞌe niwĩ Zuda tiꞌai ãma, duré Zati,
28 Aroꞌe, Simote, duré Estemoa,
29 30:29-31 Racaꞌu, Horma, Borasã, Atasi, duré Hebrõ. Duré ꞌriꞌahâ zerameu norĩ ꞌre ihâimana zaꞌra mono zéb u zama ma tô duré sõmri zaꞌra tinhoprubzé hã, duré queneu norĩ u zama, uburé dazaꞌru na Davi hã tisiré aibâ norĩ ré, ꞌre imorĩ u hã.
30 ꞌMadâꞌâ 30:29
31 ꞌMadâꞌâ 30:29
