1 Samuéu 31:1-13
31 Tawamhã filisteu norĩ hã ma tô Izaraéu nhihudu norĩ hã ꞌwapé zaꞌra ẽne Ziuboa na isisi ãma. Tahawa, ma tô Izaraéu nhihudu norĩ hã ahâ na uprosi ni, tame. Niꞌwam norĩ si ma tô dawi aimani zaꞌra.
2 Tawamhã filisteu norĩ ma tô Sau norĩ wi iꞌra norĩ me hã, tiwi atob zaꞌra. Tawamhã ma tô Zonata hã siwi tiwĩ, Abinadabi hã, duré Maꞌuquisua hã.
3 Tawamhã Sau mana wawi, filisteu norĩ hã siꞌwapé zaꞌra wamhã, ma tô tisiꞌwapézé hã te te ꞌrãzaꞌa uꞌâsi zaꞌra. Tahawa, Sau hã ma tô ibu na hã siwi hâzu. ꞌWaꞌre ahâ uptabi di duré ibu na hã.
4 Tawamhã Sau ma tô tãma isimnhiꞌãsi ꞌwapéiꞌwai ma tinha ãne:
— Maꞌãpé ĩzada wazere ate sibꞌézé ꞌwapa hã ãma ĩwĩrĩ da, filisteu iwasété norĩ hã ĩꞌãma sima to zaꞌra tõ da, duré ta norĩ hã te te siwi ĩwĩrĩ tõ da.
Tane nherẽ, isimnhiꞌãsi ꞌwapéiꞌwa ma tô tipahi pese. Tahawa, te te sima wẽ õ di, ãne hã te te tãma iꞌmanharĩ da hã. Tahawa, ma tô Sau hã tite sibꞌézé ꞌwapa hã tiꞌâ. Tawamhã siꞌuihâ na itẽme simei wa, ma tô oto ꞌrâwi taha na sima apese.
5 Tawamhã tãma isimnhiꞌãsi ꞌwapéiꞌwa, Sauhu dâꞌâzé te te ꞌmadâꞌâ wamhã, ma tô taha zama ꞌrâwi siꞌuihâ na tite sibꞌézé ꞌwapa u hã sime. Tawamhã taha zama, ma tô duré isiré dârâ oto.
6 Ãne ma tô Sau norĩ tidâꞌâ zaꞌra taha bâtâ na hã siꞌubdatõ iꞌra hâiba norĩ me hã, duré tãma isimnhiꞌãsi ꞌwapéiꞌwa zama. Duré uburé Sauhu te dasiꞌwapéi ꞌmanharĩꞌwa norĩ zama ma uburé aiꞌutõ.
7 Tawamhã Izaraéu nhihudu norĩ Zezereu na ẽtẽ siwaꞌaba nhisi zara niwĩ ꞌre ihâimana zaꞌra mono norĩ hã, duré panhoꞌu Zodã pa zara niwĩ bâtâ pusizém niwĩ ꞌre ihâimana zaꞌra mono norĩ zama, ma tô Izaraéu nhihudu norĩ dasiꞌwapéi ꞌmanharĩꞌwa isimani zaꞌra na hã waihuꞌu zaꞌra, duré Sau norĩ tiꞌra norĩ me idâꞌâ zaꞌra na hã. Tahawa, ma tô tite zaꞌra ꞌriꞌahâ hã siwi tirẽ. Tawamhã ma tô filisteu norĩ hã itẽme zâmo, ꞌriꞌahâ wa iwa ꞌre hâimana zaꞌra mono da.
8 Tawamhã dasiꞌwapé na bâdâ misi ãma morĩ pari, filisteu norĩ hã idâꞌâ zaꞌra norĩ nhibro hã te te siwi sani zaꞌra da, siꞌabaꞌréi wamhã, ma tô siwi tisã Sauhu hâiba hã, duré siꞌubdatõ iꞌra norĩ hâiba hã rereꞌe haré isimiꞌwara hã ẽne Ziuboa na isisi ãmamhã.
9 Tawamhã ma tô Sau hã siwi ꞌrã ta. Ma tô duré siwi waze, dasiꞌwapé da danhoꞌutu ubuzé ihâ tede, te te sima ꞌre izai mono hã. Taha parimhã ma tô duré siwi ꞌmazatõ, tinhiptiꞌa zaꞌra u hã rowasuꞌu wẽ te te iꞌâri da hã, tite zaꞌra romhâibarĩ ma hã, duré uburé tinhibꞌaꞌuwẽ norĩ ma hã.
10 Romhâibarĩ na ãma ꞌre iwata zaꞌra mono zé ꞌri ꞌremhã, ma tô Sau nhimnhiꞌã hã siwi saꞌra. Tawamhã duré Bete-Sã na ꞌri nhoꞌõmo nhisi ãma, ma tô ꞌriꞌahâ ꞌwawi waꞌra ꞌrãihâ na hã, ihâiba na ãma siwi romnhiptâꞌâ hâiwi saꞌo da.
11 Tawamhã Ziliadi tiꞌai ꞌremhã Zabesi na ꞌri nhoꞌõmo nhisi ãma ꞌre ihâimana zaꞌra mono norĩ hã filisteu norĩ Sauhu ma te te iꞌmanharĩ zaꞌra zém na te te waihuꞌu zaꞌra wamhã,
12 ma tô isitiꞌru norĩ hã ta hawimhã wairé, te te ropãrĩ zaꞌra mono sina, sisõré pese na. Mara bâre te taha wamhã Bete-Sã u sihutu da hã sina mara ꞌrẽne zaꞌra. Tawamhã oto sihutu wamhã, ma tô siwi siꞌra, Sauhu hâiba hã ꞌriꞌahâ ꞌwawi waꞌra hawimhã. Iꞌra norĩ hâiba zama ma tô duré siwi wamirĩ zaꞌra. Taha pari, ma tô apâ ꞌwasa, Zabesi u. Tawamhã tame ma tô ãma siwi sazu, ihâiba zaꞌra na hã.
13 Taha parimhã ma tô Sau hi hã iꞌra norĩ hi me ãma dasiwi tiꞌa zaꞌra ni, ꞌriꞌahâ ãma, tãmara wede zahâpâ. Taha pari, ma tô dasai ãna hã tahâimana zaꞌra ni, 7 na bâtâ ꞌremhã.
