1 Samuéu 4:1-22
4 Tawamhã Izaraéu nhihudu norĩ hã taha bâtâ na hã ma tô wairé, filisteu norĩ te te ꞌwapé zaꞌra da hã. Tawamhã ma tô sima ꞌri nhoré zaꞌra, Ebeneze na romnhisi ãma. Duré ma tô filisteu norĩ hã sima ꞌri nhoré zaꞌra, Afeca na ꞌri nhoꞌõmo nhisi ãma.
2 Tawamhã filisteu norĩ hã ma tô oto sisõré pese zaꞌra, sisisi da, siꞌwapé zaꞌra da hã. Tawamhã oto siꞌwapé zaꞌra wamhã, ma tô ãma aiꞌuté zaꞌra, Izaraéu nhihudu norĩ ãmamhã. Tahawa, dasiꞌwapéi ꞌmanharĩꞌwa norĩ hã ma tô 4 miu na ihâiba zaꞌra na hã siwi uprosi.
3 Tawamhã Izaraéu nhihudu norĩ dawi isimani zaꞌra hã ma tô apâ aihutu, te te sima iꞌri nhoré mono zéb u hã. Tahawa, te Izaraéu nhihudu norĩ ma iꞌrãnhoꞌõmo zaꞌra hã nharĩ zaꞌra ãne:
— E marĩ wa, ma tô Uburé Danhibꞌapito hã wazaꞌré zaꞌra, filisteu norĩ te te waꞌãma aiꞌuté zaꞌra da, ãhã na hã. Oto wa te we wasiwi âri aba, Uburé Danhibꞌapito nhimiroti ré, wedehâꞌre ꞌmanharĩ hã Silo hawimhã. Ãne wamhã, te za wawaꞌwab zaꞌra tihâiba. Tawamhã te za duré wanhoꞌreptu zaꞌra, wanhitobꞌru norĩ wi hã.
4 Tahawa, ma tô sô daꞌmazatõrĩ zaꞌra, Silo hawi da te dasiwi âri da hã Uburé Danhibꞌapito iwaihuꞌu pese te, wedehâꞌre ꞌmanharĩ hã, ropoto paihi papo waꞌwa ꞌre isãmra mono ré hã. Tawamhã Hopini norĩ hã Finéaha me maparane Eri ꞌra norĩ hã ma tô ime tineb zahuré, wedehâꞌre ꞌmanharĩ siré hã.
5 Tawamhã te te duré oto siwi ãwisi wamhã, ꞌRe ihâimana uꞌâsi mono nhimiroti ré wedehâꞌre ꞌmanharĩ hã, ma tô nasi hã, hârâ ꞌrãihâ na Izaraéu nhihudu norĩ hã. Tahawa, ma tô nasi ãma siwi tiꞌa sãsãꞌã, te te sitẽme ãwisi zaꞌra wẽ te.
6 Tawamhã filisteu norĩ, Izaraéu nhihudu norĩ hârâ te te wapari zaꞌra wamhã, ma tô sima ꞌmahârâ zaꞌra, ãne:
— Maꞌãpé wapari zaꞌra waꞌaba, hebreu norĩ hârâ hã te te sima iꞌri nhoré mono zéb ãmamhã. E marĩ wa merẽ.
Tawamhã hebreu norĩ hã Uburé Danhibꞌapito te, wedehâꞌre ꞌmanharĩ hã te te sima iꞌri nhoré mono zéb u te te sitẽme iꞌãwisi zaꞌra na te te oto waihuꞌu zaꞌra wamhã,
7 ma tô filisteu norĩ hã oto tipahi zaꞌra. Tahawa, te ãne sima nharĩ zaꞌra:
— Ihâibaꞌõ hã ma tô ꞌmaiwi, Izaraéu nhihudu norĩ te te sima iꞌri nhoré zaꞌra zéb u hã. Wa za aiꞌutõrĩ ni! Niwamhã ãne hã wama romhâimana zaꞌra õ di!
8 Wa za aiꞌutõrĩ ni! E ꞌwa te za bété waꞌanhoꞌreptu, ihâibaꞌõ isiptete norĩ wi hã. Ihâibaꞌõ norĩ hã ezipsiu norĩ ma tô te te aꞌwapé aꞌubuni wimhã, sipuꞌu pese na robꞌmanharĩ wasété na hã.
9 Tane nherẽ, maꞌãpé filisteu norĩ, asiptete zaꞌra waꞌaba! Duré aibâ na te za iꞌwapé zaꞌra waꞌwa. Ãnei õ wamhã, wapawaꞌâbâ ãna wa za hebreu norĩ ma, wa te ꞌre romhuri zaꞌra za, õ norĩ hã pawaꞌâbâ ãna te te wama ꞌre iromhuri zaꞌra mono ne. Tahawa, te za tô sada asiꞌaibâ zaꞌra waꞌwa, ꞌwapé zaꞌra waꞌaba da hã.
10 Tawamhã filisteu norĩ hã ma tô oto ꞌwapé zaꞌra, Izaraéu nhihudu norĩ hã. Tawamhã Izaraéu nhihudu norĩ ãma ma tô aiꞌuté zaꞌra. Tahawa, ma tô duré aimani zaꞌra, sisaꞌrei mono da, tinhorõwa u. Tawamhã ahâ uptabi na ma tô aiꞌutõ, Izaraéu nhihudu norĩ hã. 30 miu na ihâiba zaꞌrata na ma tô uprosi ni.
11 Tahawa, ma tô filisteu norĩ hã siwi tiꞌâ, ꞌRe ihâimana uꞌâsi mono nhimiroti ré wedehâꞌre ꞌmanharĩ hã. Tawamhã ma tô dame tidâꞌâ zahuré Erihi ꞌra norĩ Hopini norĩ Finéaha me hã.
Erihi dâꞌâzé wasuꞌu
12 Tawamhã taha bâtâ na ma tô aibâ Bẽzamihĩ nhihudu hã wara dasiꞌwapézém hawi Silo u hã. Tawamhã tô bâtâ na ma tô wi. Duré robzei õ na da te waihuꞌu zaꞌra da hã ma tô uza hâsi wazui ré wi, duré tiꞌa na ꞌrãzazub ré.
13 Tahawa, te Eri hã nhamra tinhamrazém na bâdâdi ꞌrata simipari sina. Tawamhã duré hâtâꞌâ uptabi di, ꞌRe ihâimana uꞌâsi mono te, wedehâꞌre ꞌmanharĩ ãmamhã. Tawamhã aibâ hã te te oto dama rowasuꞌu wamhã, uburé ꞌri nhoꞌõmo ꞌre, ꞌre idahâimana zaꞌra mono norĩ hã ma tô tapahi pese zaꞌra ni. Ma tô duré taꞌruꞌru ni, dawawa ꞌrãihâ na hã.
14 Tawamhã Eri hã ma tô wapa, idaꞌruꞌruzé hã. Tahawa, te anha ãne:
— E marĩ te ropupuꞌu.
Tahawa, te aibâ hã itẽme wara, te te tãma rowasuꞌu da, Erihi ma.
15 Tawamhã Erihi ãma 98 na ãma iwahu hã. Tahawa, ma tô oto titobꞌa. Tahawa, te te oto robꞌmadâꞌâ waihuꞌu õ uptabi di.
16 Tawamhã te tãma siwasuꞌu, aibâ hã ãne:
— Wa hã dasiꞌwapéi hawi, wa tô we aimani, ã bâtâ na hã. Duré tahawim haré wa we wara ãwa.
Tawamhã Eri te sadanha, ãne:
— E marĩ ma tô watobro, ĩꞌra.
17 Tawamhã romreme ꞌwapéiꞌwa hã ma tô ãma sadaꞌâ, ãne:
— Izaraéu nhihudu norĩ hã ma tô tãma sisaꞌre, filisteu norĩ ma. Duré da te waꞌãma iꞌaiꞌuté zaꞌra zé hã wasété uptabi di. Tawamhã ma tô duré aiꞌra norĩ hã dazu tidâꞌâ zahuré, Hopini norĩ hã Finéaha me. Tawamhã filisteu norĩ hã ma tô siwi tiꞌâ, ꞌRe ihâimana uꞌâsi mono te, wedehâꞌre hã.
18 Tawamhã Eri, ꞌRe ihâimana uꞌâsi mono nhimiroti ré wedehâꞌre te te siwi iꞌâri na te te wapari wamhã, ma tô waptãrã tinhamrazém hawi ba niwĩ, ꞌridawa zaꞌẽne ꞌri nhoꞌõmo u ꞌre idanhisisi mono zéb ꞌrata. Tawamhã oto ihi pese wa, duré hâipese wa, waptãꞌã wamhã, ma tô butuhaihâ. Ma tô aiꞌutõ, õne haré.
Eri hã ma tô iꞌrãnhoꞌõmo na ꞌre hâimana, Izaraéu nhihudu norĩ ma 40 na ãma iwahum na hã.
Finezaha mro dâꞌâzé wasuꞌu
19 Tawamhã Erihi saniꞌwa, Finéaha mro wasã ré te nhamra. Duré oto tãma ipoto da si. Tawamhã ma tô waihuꞌu ꞌRe ihâimana uꞌâsi mono nhimiroti ré wedehâꞌre hã filisteu norĩ te te siwi iꞌâri na hã. Ma tô duré waihuꞌu, imaprewa Eri idâꞌâzé hã duré imro zama idâꞌâzé hã. Tahawa, ma tô ãma sépu, iwasã hã. Ma tô tãma podo oto, aiꞌuté hã.
20 Tahawa, oto idâꞌâ da si, Finezaha mro hã. Tahawa, piꞌõ aiꞌuté te te isapari zaꞌra norĩ hã te ãne tãma nharĩ zaꞌra:
— Maꞌãpé asiptete! Aiꞌuté ma aima podo, ꞌwatébrémi na.
Tane nherẽ, imreme zaꞌra zô hã sipiꞌrai õ di. Duré te te sadaꞌâbâ zaꞌra õ di ãma.
21 Tahawa, ma tô ina hã sisi ꞌwatébrémi hã, Icabô na. Ãma isaprĩ hã ãne: “Izaraéu nhihudu norĩ nhiptiꞌai hawi ꞌRe ihâimana uꞌâsi mono nhamrazé iwatobrozém na hã.” Ãne ma tô piꞌõ hã tinha, ꞌRe ihâimana uꞌâsi mono nhimiroti ré wedehâꞌre da te dasiwi iꞌâri na hã duré imaprebaba norĩ hã tiwi idâꞌâ zahuré na hã imro me.
22 Tawamhã te piꞌõ hã tinha, ãne:
— ꞌRe ihâimana uꞌâsi mono nhamrazé hã ma tô watobro, Izaraéu nhihudu norĩ nhiptiꞌai hawimhã. E tihai wa. ꞌRe ihâimana uꞌâsi mono nhimiroti ré wedehâꞌre hã wanhitobꞌru norĩ te te siwi âri wa.
