1 Samuéu 5:1-12
5 Tawamhã filisteu norĩ ꞌRe ihâimana uꞌâsi mono nhimiroti ré wedehâꞌre te te siwi âri parimhã, ma tô oto siwi tiꞌâ Ebeneze na romnhisi hawi, ꞌri nhoꞌu Asidodi na isisi u.
2 Tawamhã te te siwi ãwisi wamhã, ma tô oto siwi tisã, ta norĩ te ihâibaꞌõi ãma ꞌre iwata zaꞌra mono zé ꞌri ꞌre, romhâiba ꞌmanharĩ zababa, Dagõ na ihâibaꞌõ nhisi hã.
3 Tawamhã awẽm na mararé ma tô Asidodi ãma ꞌre ihâimana zaꞌra mono norĩ hã siwi ꞌmadâ romhâibarĩ Dagõ na isisi iwaptã hã tiꞌai u ubu niwĩ, ꞌRe ihâimana uꞌâsi mono te, wedehâꞌre nhoꞌre. Tahawa, ma tô siwi tiꞌâ romhâibarĩ hã apâ te te siwi sãrĩ da, isabzéb ãma.
4 Tane nherẽ, awẽm na mararé ma tô duré siwi ꞌmadâ apâ iwaptãꞌã na, ꞌRe ihâimana uꞌâsi mono nhimiroti ré wedehâꞌre nhoꞌre. Tawamhã romhâibarĩ ꞌrã hã duré ipaihi zahuré hã ma aiprub zahuré. ꞌRidawa ãma te daꞌwa. Tawamhã ihâiba si te wahuré nomro oto.
5 Tahawa, ãhã na hã uburé sasedoti norĩ hã Dagõ na ihâibaꞌõ nhisi te hã, duré Asidodi ãma uburé ãma ꞌre iwata zaꞌra mono norĩ hã te te ꞌre watiꞌi zahu zaꞌra mono õ di tipara na hã, taha rob ãma iwaptãꞌãzé hã.
6 Tawamhã Uburé Danhibꞌapito ma tô saꞌẽtẽ hâ zaꞌra oto, ꞌrinhoꞌu Asidodi ãma ꞌre ihâimana zaꞌra mono norĩ hã, duré taha waptoma tame ꞌre ihâimana zaꞌra mono norĩ zama. Ihâ ꞌrowi iwaꞌre tobꞌmaiꞌãsi na ma tô hâ zaꞌra.
7 Tawamhã ãne hã ꞌrinhoꞌu Asidodi ãma ꞌre ihâimana zaꞌra mono norĩ te te ꞌmadâꞌâ zaꞌra wamhã, ma tô nharĩ zaꞌra, ãne:
— Izaraéu nhihudu norĩ te, ꞌRe ihâimana uꞌâsi mono hã ma tô wahâ zaꞌra. Wate zaꞌra ihâibaꞌõ hã ma tô duré azâ, Dagõ na isisi hã. Tahawa, wa te wasiwi tété õ di za, Izaraéu nhihudu norĩ te, ꞌRe ihâimana uꞌâsi mono nhimiroti ré, wedehâꞌre hã ãme inomro da hã, waꞌratab zaꞌra.
8 Tahawa, ma tô sô ꞌmazatõrĩ zaꞌra romreme ꞌwapéiꞌwa norĩ hã, filisteu norĩ te 5 na dama iꞌrãnhoꞌõmo norĩ zô, siꞌrãꞌõtõ da, te te siwi ãma sadanharĩ zaꞌra da, ãne:
— E marĩ, wa za ãma ꞌmanharĩ zaꞌra ni, Izaraéu nhihudu norĩ te, ꞌRe ihâimana uꞌâsi mono nhimiroti ré wedehâꞌre na hã.
Tawamhã ma tô ãma dazadaꞌâbâ zaꞌra ãne:
— Asiwi âri aba, ꞌrinhoꞌu Gati na isisi u!
Tahawa, te oto filisteu norĩ hã tamomo siwi tiꞌâ.
9 Tane nherẽ, te te siwi ãwisi parimhã, ma tô Uburé Danhibꞌapito hã duré tãma robꞌmanharĩ zaꞌra ꞌri nhoꞌõmo ꞌrem norĩ ma. Ma tô duré tapẽꞌẽwara zaꞌra ni, ꞌri nhoꞌõmo ãma ꞌre idahâimana zaꞌra mono norĩ hã. Tawamhã uburé ꞌri nhoꞌõmo ꞌremhã ma tô dahâ ꞌrowi daꞌwaꞌre tobꞌmaiꞌã hã te te daduri, dama ipire norĩ hã duré dama iwapu norĩ zama.
10 Tahawa, ma tô duré siwi tisõ ꞌRe ihâimana uꞌâsi mono te. wedehâꞌre hã, ꞌrinhoꞌu Ecrõ na isisi u hã. Tawamhã duré tamomo te te siwi ãwisi wamhã, ma tô tame ꞌre idahâimana zaꞌra mono norĩ hã dahârâ ꞌrãihâ na ꞌre dahãsi, ãne:
— Izaraéu nhihudu norĩ te, ꞌRe ihâimana uꞌâsi mono nhimiroti ré wedehâꞌre hã ma tô we dasiwi ãwisi ni ãwamhã. Ma tô õ norĩ hã sima wẽ zaꞌra, te te waꞌuprosi da!
11 Tawamhã ma tô romreme ꞌwapéiꞌwa norĩ hã ꞌmazatõrĩ zaꞌra, uburé filisteu norĩ ma iꞌrãnhoꞌõmo norĩ ma, te te tãma nharĩ zaꞌra da, ãne:
— Apâ asiwi sõmri aba, Izaraéu nhihudu norĩ te, ꞌRe ihâimana uꞌâsi mono nhimiroti ré wedehâꞌre hã ꞌre isa mono zéb u, te te waꞌuprosi tõ da, duré waꞌra norĩ hã te te wawi sõꞌrebzâri tõ da.
Ãne ma tô tãma nharĩ zaꞌra, tamemhã ꞌRe ihâimana uꞌâsi mono nhimihâzé ipire na daꞌahâ na ꞌri nhoꞌõmo ꞌremhã dasiꞌutõrĩ wa.
12 Tawamhã idâꞌâ zaꞌra õ norĩ ãma ma tô wairébé ihâ ꞌrowi iꞌwaꞌre tobꞌmaiꞌãsi pe hã. Duré taha wa, ꞌri nhoꞌõmo ꞌre, ꞌre idahâimana zaꞌra mono zadari hã ma tô sina hâimo pese, hâiwa u hã.
