1 Samuéu 6:1-21
6 Tawamhã ꞌRe ihâimana uꞌâsi mono nhimiroti ré wedehâꞌre na hã ma tô aꞌamo hã 7 na ãma aiꞌutõ oto, filisteu norĩ nhiptiꞌai ãma hã.
2 Tahawa, ma tô tite sasedoti norĩ zô tihârâ zaꞌra, duré marĩ ꞌmanharĩ waihuꞌu nhipeseꞌwa norĩ zô zama. Tawamhã sô hârâ zaꞌra wa, itẽme sihutu wamhã, te ãne ãma sadanharĩ zaꞌra:
— E marĩ wa za ãma ꞌmanharĩ zaꞌra ni, Uburé Danhibꞌapito te, wedehâꞌre na hã. Duré apâ ihâimanazéb u wa te wasiwi sõmri da wamhã, e marĩ, wa za isiré wasiwi sõmri ni.
3 Tawamhã ma ãma dazadaꞌâbâ zaꞌra ãne, sasedoti norĩ hã, marĩ ꞌmanharĩ waihuꞌu nhipeseꞌwa norĩ me:
— Izaraéu nhihudu norĩ te, ꞌRe ihâimana uꞌâsi mono nhimiroti ré wedehâꞌre hã, apâ asiwi sõmri aba da wamhã, taha si asiwi isõmri aba da hã mare di za. Danhoprubzé te za duré isiré hã asiwi isõmri ꞌwa, aiwasété zaꞌra waꞌwa hã ãma asiwi iwaꞌâbâ aba zéb da hã. Duré ãne wamhã, te za aima apari zaꞌra waꞌwa, dahâ ꞌrowi daꞌwaꞌre tobꞌmaiꞌã hã. Tawamhã te za duré iwaihuꞌu zaꞌra waꞌwa, marĩ ꞌre iꞌmanharĩ zaꞌra waꞌaba mono zéb zarina, ꞌRe ihâimana uꞌâsi mono hã tinhimihâzém na te te aima ibaꞌa zaꞌra waꞌaba mono õ na hã.
4 Tawamhã filisteu norĩ hã te ãma sadanharĩ zaꞌra ãne, danhoprubzém na hã:
— E marĩ wa za wanhoprubzé wasiwi sõmri ni, wawasété waꞌâbâzéb da hã.
Tawamhã ma ãma dazadaꞌâbâ zaꞌra ãne sasedoti norĩ hã, marĩ ꞌmanharĩ waihuꞌu nhipeseꞌwa norĩ me hã:
— Te za asiwi isõmri ꞌwa, imrotõ na dahâ ꞌrowi daꞌwaꞌre tobꞌmaiꞌã si na ẽtẽ waipo pré oru na iꞌmanharĩ hã, duré imrotõ na ꞌrure oru na iꞌmanharĩ hã, filisteu norĩ te iꞌrãnhoꞌõmo hâiba zaꞌrata zarina. E marĩ wa. Imrotõ na iꞌrãnhoꞌõmo norĩ hâiba zô marĩ ipipa hã watobro wa, asô iwatobro zaꞌra waꞌaba ne hã.
5 Tahawa, te za isizusi zaꞌra waꞌwa, daꞌwaꞌre tobꞌmaiꞌãsi na hã, duré ꞌrure na hã, wanhiptiꞌai ꞌre te te iwaꞌawamnarĩ mono hã. Ã norĩ hã te za tãma isõmri zaꞌra waꞌwa, Izaraéu nhihudu norĩ te, ꞌRe ihâimana uꞌâsi mono wazézéb da hã. Ãne wamhã, te za ãté sazâ, te te aima irobꞌmanharĩ wasété zaꞌra waꞌaba zé hã, ate zaꞌra waꞌwa ihâibaꞌõ norĩ ma hã, duré asiptiꞌa zaꞌra waꞌaba ma hã.
6 E marĩ wa, te aipẽꞌẽ tete na aihâimana zaꞌra waꞌwa, Ezitu ãma apito pẽꞌẽ tete ne hã, duré ezipsiu norĩ pẽꞌẽ tete zaꞌra ne zama. Maꞌãpé taha wa, ãma aipoꞌre siꞌâri zaꞌra waꞌaba tõ, Ezitu ꞌre, ꞌre ihâimana zaꞌra mono norĩ ma, ꞌRe ihâimana uꞌâsi mono te te nasi irobꞌmanharĩzém na hã, apito Faraꞌo hã Izaraéu nhihudu norĩ ma, te te tãma irowairébé zaꞌra zéb u, Ezitu hawi wairébé da.
7 Tahawa, te za duré ãne iꞌmanharĩ zaꞌra waꞌwa za: Maꞌãpé powawẽ maparane asiwi mrami aba zahadu wedewara zapore te te iꞌmasari zahuré õ hã, ãma ꞌmaiwasisi zahuré aba da, wedewara zapore itém na te te sari zahuré da. Taha parip si te za isiré powawẽ zapu norĩ hã tiwi isimroi waꞌaba mo za, waꞌra u hã.
8 Tawamhã taha parip si te za oto Uburé Danhibꞌapito nhimiroti ré wedehâꞌre hã asiwi iꞌâri ꞌwa za, asiwi sẽrẽ aba da, wedewara zapore ꞌremhã. Tawamhã te za duré isababa oru ꞌmanharĩ na isizusi zaꞌra waꞌaba zéb ré wedehâꞌre hã asiwi isẽrẽ ꞌwa za, Izaraéu nhihudu norĩ te ꞌRe ihâimana uꞌâsi mono ma, za asiwi isõmri aba da hã aiwasété waꞌâbâ zaꞌra waꞌaba zéb da hã. Tawamhã te za asiwi izusi ꞌwa, siꞌuihâ na sisamro da, te te sima iwẽ zahuré zéb uwaibaba.
9 Maꞌãpé aipoꞌre pese zaꞌra waꞌaba. Powawẽ norĩ wedewara zapore hã ꞌrinhoꞌu Bete-Semesi nhoꞌõmo te te sari zahuré wamhã, ã hã te wasuꞌu, Izaraéu nhihudu norĩ te, ꞌRe ihâimana uꞌâsi mono hã ipire na te te iwahâ zaꞌra zé. Duré ãnei õ wamhã, te te isari zahuré zé hã, wa za wa norĩ hã waihuꞌu zaꞌra ni, õhõ nhimihâzéb õ na hã, daꞌwaꞌre na hã, tô sapaꞌabâ waꞌãma iwairébé mono na hã.
10 Tawamhã filisteu norĩ hã ma tô ãne hã siwi ꞌmanha, sasedoti norĩ te te tãma iwaihuꞌu zaꞌra zéb zarina, marĩ ꞌmanharĩ waihuꞌuꞌwa norĩ me. Tahawa, powawẽ hã te te siwi imrami hã ma tô ãma wasisi zaꞌra, wedewara zapore na. Tawamhã isapure norĩ hã ma tô siwi sé, waꞌra ꞌre.
11 Tawamhã ma tô siwi tisẽ wedewara zapore ꞌremhã, Uburé Danhibꞌapito nhimiroti ré wedehâꞌre hã. Tawamhã isiré da hã ma tô duré siwi tisẽ isababa wedehâꞌre hã oru na ꞌrure ꞌmanharĩ ré hã, duré daꞌwaꞌre tobꞌmaiꞌãsi na romhâibarĩ ré hã.
12 Tawamhã powawẽ norĩ hã awaꞌawi na ma tô wedewara zapore hã sari zahuré, iré zaꞌra, ꞌrinhoꞌu Bete-Semesi na isisi u bâdâdi hã inomro na. Tawamhã hârâ sina te sa praba zahuré, sipa zahuré ãna bâdâdi nhiti. Tawamhã imrotõ na filisteu norĩ te, iꞌrãnhoꞌõmo norĩ hã ma tô isarina aiꞌabaꞌré, ꞌrinhoꞌu Bete-Semesi tiꞌa zadaꞌré u si.
13 Tahawa, Bete-Semesi ãma ꞌre idahâimana zaꞌra mono norĩ hã ma tô amnho trigu hã te te tehâri, ẽtẽ siwaꞌaba wa buru ãma. Tawamhã taha ré ꞌRe ihâimana uꞌâsi mono te, wedehâꞌre hã te te siwi ꞌmadâꞌâ wamhã, ma tô ꞌre to zaꞌra, iwẽ te.
14 Tawamhã powawẽ norĩ wedewara zapore te te iré isari zahuré hã ma tô ãwisi zahuré, Zozué Bete-Semesi ãma ꞌre isãmra mono te te irobꞌrezéb u hã. Tahawa, tame ma tô ꞌmazahâri zahuré, ẽtẽ tõmo wawẽ ꞌrata. Tawamhã tame ꞌre idahâimana zaꞌra mono norĩ hã, ma tô wedewara zapore ꞌmanharĩzém na wede hã sihâri zaꞌra. Taha pari, ma tô siwi tipã powawẽ hã, te te siwi zata da, Uburé Danhibꞌapito ma.
15 Tahawa, ma tô levita norĩ hã siwi tiꞌâ Uburé Danhibꞌapito nhimiroti ré wedehâꞌre hã. Duré wedehâꞌre amo zama ma tô siwi tiꞌâ, ẽtẽ waipo pré oru na romhâibarĩ ꞌmanharĩ ré hã. Tawamhã ma tô siwi tino, ẽtẽ tõmo wawẽ nhisiwi. Duré te te siwi nomri pari, taha bâtâ na ma tô ꞌrinhoꞌu Bete-Semesi ãma ꞌre ihâimana zaꞌra mono norĩ hã tinho na tinhoprubzé hã tãma zata pese zaꞌra, Uburé Danhibꞌapito ma hã. Tinhimizama zata na zama ma duré tãma tinhoprub zaꞌra.
16 Tawamhã imrotõ na filisteu norĩ te, iꞌrãnhoꞌõmo norĩ hã ma tô ãne hã uburé marĩ hã ꞌmadâꞌâ zaꞌra, Bete-Semesi ãma ꞌre ihâimana zaꞌra mono norĩ te te iꞌmanharĩ zaꞌra zé hã. Taha pari, ma tô oto aiꞌabaꞌré apâ, taha bâtâ na, Ecrõ u hã.
17 Ãne ma tô filisteu norĩ hã siwi tisõ, Uburé Danhibꞌapito, tãma ꞌre idanhoprub zaꞌra mono ne, tiwasédé te te ãma siwi iwaꞌâbâzéb da hã, romhâibarĩ ẽtẽ waipo pré oru ꞌmanharĩ na dahâ ꞌrowi daꞌwaꞌre tobꞌmaiꞌãsi na hã. Tawamhã danhoprubzé ẽtẽ waipo pré oru hã ꞌri nhoꞌõmo mono bâ misi si te te siwi isõmri zaꞌra norĩ hã ãne; Asidodi, Gaza, Asquerõ, Gati, duré Ecrõ.
18 Tawamhã ma tô duré siwi tisõ imrotõ na ẽtẽ waipo pré oru na ꞌrure ꞌmanharĩ zama, ꞌri nhoꞌõmo ꞌre filisteu norĩ te, iꞌrãnhoꞌõmo norĩ zaꞌrata zarina. ꞌRinhoꞌu hã imrotõ na iꞌwawi waꞌra ꞌrãihâ hã duré ꞌri waꞌõno hã ꞌri nhoꞌõmo mana wawi ꞌre ihâimana zaꞌra mono hã. Tawamhã Zozué Bete-Semesi ãma ꞌre ihâimana mono te te irobꞌre ãma ma tô ꞌRe ihâimana uꞌâsi mono nhimiroti ré wedehâꞌre hã siwi tihi, ẽtẽ tõmo wawẽ nhisiwimhã. Tawamhã ta hã te zahadu ꞌre saꞌwari, ẽtẽ tõmo wawẽ hã tame robꞌmanharĩzém na ãma ꞌre idasipoꞌre puꞌu zaꞌra mono zéb da hã.
19 Tawamhã 70 na aibâ norĩ Bete-Semesi ãma ꞌre ihâimana zaꞌra mono norĩ hã ma tô ꞌmadâꞌâ zaꞌra, ꞌRe ihâimana uꞌâsi mono te, wedehâꞌre ꞌremhã. Ãne wa ma te Uburé Danhibꞌapito hã simro, aibâ norĩ hã. Taha wa, ma tô taꞌruꞌru ni, ahâ na te te uprosi wa, ꞌRe ihâimana uꞌâsi mono hã.
Wedehâꞌre hã iwisizé wasuꞌu, Zearĩ u hã
20 Tawamhã aibâ norĩ Bete-Semesi ãma ꞌre ihâimana zaꞌra mono norĩ hã te sima nharĩ zaꞌra ãne:
— E ꞌwa hã te za Uburé Danhibꞌapito ꞌRe ihâimana uꞌâsi mono nhoꞌremhã tihâiba, iwasétéꞌõ iwẽ uptabi nhoꞌremhã. Mare di. Niꞌwa hã ihâimana da hã waihuꞌu õ di. Duré isimiroti ré, wedehâꞌre hã e momo wa za wasiwi sõmri ni, wanhiti zaꞌra ꞌre ihâimana mono da hã.
21 Tahawa, ma tô romreme ꞌwapéiꞌwa hã satõrĩ zaꞌra, Zearĩ ãma ꞌre idahâimana zaꞌra mono norĩ ma, te te rowasuꞌu zaꞌra da, ãne:
— Filisteu norĩ hã ma tô we apâ siwi tisõ Uburé Danhibꞌapito te, wedehâꞌre hã. Tahawa, we aiꞌabaꞌréi waꞌaba ãwa, wedehâꞌre hã asiwi âri aba da.
