1 Samuéu 7:1-17
7 Tawamhã aibâ norĩ, ꞌrinhoꞌu Zearĩ ãma ꞌre ihâimana zaꞌra mono norĩ hã ma tô aiꞌabaꞌré, Uburé Danhibꞌapito nhimiroti ré wedehâꞌre hã te te siwi âri da. Tawamhã ma tô siwi tiꞌâ. Duré te te siwi âri wamhã, ma tô siwi tihi Abinadabi na aibâ nhisi nhorõwa ãma ẽtẽꞌrãirã nhisiwi ꞌre isa mono ãma. Tawamhã Eriazaha ꞌra hã ma tô sada pisutu zaꞌra, ꞌRe ihâimana uꞌâsi mono nhimiroti ré wedehâꞌre hã te te ꞌre iꞌmadâꞌâ mono da hã.
Samuéu isiꞌiꞌrãnhoꞌõmozé wasuꞌu
2 Tawamhã ꞌRe ihâimana uꞌâsi mono te, wedehâꞌre hã ma tô ꞌre saꞌwari hâ, ꞌrinhoꞌu Zearĩ ãmamhã, 20 na ãma iwahum na. Tame ꞌre saꞌwari hâ mono ré hã ma tô Izaraéu nhihudu norĩ hã tãma ꞌre mreme zusi, Uburé Danhibꞌapito ma hã, te te ꞌre pawaptob zaꞌra mono da.
3 Tawamhã Samuéu te Izaraéu nhihudu norĩ ma nharĩ zaꞌra ãne:
— Uburé Danhibꞌapito u hã apâ aipẽꞌẽ ꞌre itẽme aipizari zaꞌra waꞌaba da, asima wẽ zaꞌra waꞌaba wamhã, maꞌãpé sãmra zaꞌra waꞌaba uburé wasiréꞌõ norĩ te ihâibaꞌõ norĩ hã, duré romhâibarĩ na piꞌõi podo hã Asitaroti na isisi hã. Maꞌãpé duré ꞌre asisõmri zaꞌra waꞌaba mono, õhõ ãma si oto ꞌre aiwata zaꞌra waꞌaba mono da, Uburé Danhibꞌapito ãma. Tawamhã te za õ hã asõꞌreptu zaꞌra waꞌwa, filisteu norĩ nhiptetezé wi hã.
4 Tawamhã ãne te te tãma waihuꞌu zaꞌra wa, ma tô Izaraéu nhihudu norĩ hã romhâibarĩ Baau na isisi siwazari tãma ihâimana zaꞌra hã siwi sãmra. Tawamhã ma tô duré siwi time romhâibarĩ na piꞌõi podo hã Uburé Danhibꞌapito ãma si ꞌre wata zaꞌra mono da oto.
5 Tawamhã Samuéu hã ma tô tãma ꞌru zaꞌra Izaraéu nhihudu norĩ ma, uburé pese siꞌrãꞌõtõ da Mispa na ꞌri waꞌõtõ nhisi ãma. Tawamhã ma tô duré tãma ropisutu zaꞌra, tame ãma ꞌre mreme zaꞌra mono da, Uburé Danhibꞌapito ma hã.
6 Tawamhã ãne ma tô uburé Izaraéu nhihudu norĩ hã siꞌrãꞌõtõ, Mispa ãma. Tahawa, ma tô â hã duré siwi waze. Ta hã ma tô duré siwi saꞌwa, Uburé Danhibꞌapito ma tinhoprubzém na hã. Tawamhã siꞌupari ãna ma tô bâtâ bâre tihâimana zaꞌra. Tahawa, te ãne tãma siwẽꞌõ zaꞌra, ꞌRe ihâimana uꞌâsi mono ma:
— Uburé Danhibꞌapito, wa norĩ hã wa tô wawasédé hã ꞌmanharĩ zaꞌra ni aiwi.
Tawamhã tame ma tô Samuéu hã Izaraéu nhihudu norĩ ma siꞌĩꞌrãnhoꞌu, Mispa ãma. Tame ma tô duré daꞌãma rowairébéꞌwa na hã ꞌre hâimana.
7 Tawamhã Mispa ãma Izaraéu nhihudu norĩ isiꞌrãꞌõtõzém na filisteu norĩ te te waihuꞌu zaꞌra wamhã, ma tô imrotõ na dama iꞌrãnhoꞌõmo norĩ hã wairé, tinhibꞌaꞌuwẽ norĩ ré te te ꞌwapé zaꞌra da hã. Tawamhã ãne hã Izaraéu nhihudu norĩ te te waihuꞌu zaꞌra wamhã, ma tô tãma tipahi zaꞌra, iwasuꞌu zaꞌra ma hã.
8 Tahawa, te Samuéu ma nharĩ zaꞌra ãne:
— Wanhibꞌapito ꞌRe ihâimana uꞌâsi mono ma aimreme hã ꞌre sahâri mono tõ, te te wanhoꞌreptu zaꞌra da, filisteu norĩ nhiptetezé wi hã.
9 Tawamhã Samuéu ma tô ꞌmaiwĩ poneꞌẽrebâ ꞌra hã zahadu tina hâ te te irẽmeꞌõ hã. Tawamhã ma tô wahuré zata, ãma tãma sõprub da, Uburé Danhibꞌapito ma. Duré taha na ãma tãma sõpru pari, ma tô tiwi rowaptẽ, Izaraéu nhihudu norĩ te te pawaptob zaꞌra da. Tahawa, ma tô ãma sadaꞌâ, te te tiwi irowaptẽrẽzém na hã.
10 Tawamhã Samuéu, ꞌRe ihâimana uꞌâsi mono ma tinhimizama zata na tãma sõprub ré, ma tô filisteu norĩ hã te te sina rotété, te te ꞌwapé zaꞌra da, Izaraéu nhihudu norĩ hã. Tane nherẽ, ma tô Uburé Danhibꞌapito hã hâ zaꞌra, tãirãrãꞌã ne na. Tahawa, ma tô õne haré niha tihâimana zaꞌra. Ma tô duré oto siwaꞌru rom na sisaꞌre.
11 Tawamhã Izaraéu nhihudu norĩ hã ma tô wairé Mispa hawimhã siꞌabaꞌré da, filisteu norĩ zarina, Bete-Ca na ꞌri waꞌõtõ nhisi u. Tawamhã duré oto isarina zaꞌra siꞌabaꞌréi wamhã, ma tô te te simro, bâdâdi na.
12 Tawamhã Samuéu hã ma tô tiꞌâ ẽtẽ tõmo wawẽ hã. Tawamhã ma tô tihi, Mispa na ꞌri nhoꞌõmo ro waꞌwa, Sẽ na dazaꞌru nhisi waꞌwa me. Tawamhã te ãne tinha:
— Ãwap si ma tô Uburé Danhibꞌapito hã wapawaptob zaꞌra.
Tahawa, ma tô sisi, Ebeneze* na.
13 Ãne ma tô filisteu norĩ ãma hã aiꞌuté zaꞌra ni. Duré tawamhã Uburé Danhibꞌapito hã te te tãma saꞌré zaꞌra õ di, dawi isisisi da hã, Izaraéu nhihudu norĩ nhiptiꞌai u hã, Samuéu ꞌre hâimana mono ré hã.
14 Ãne uburé Izaraéu nhihudu norĩ te ꞌrinhoꞌu filisteu norĩ te te tiwi iwaibu zaꞌra norĩ hã ma tô apâ tãma sõmri zaꞌra, Izaraéu nhihudu norĩ ma. Ecrõ na ꞌri nhoꞌõmo nhisi hawi, Gati na ꞌri nhoꞌõmo nhisi u hã ma tô ꞌri nhoꞌõmo mono bâ tãma sõmri zaꞌra apâ. Tahawa, ma tô Izaraéu nhihudu norĩ hã uburé apâ ãma ate zaꞌra, tinhiptiꞌa zaꞌra na hã. Tawamhã Izaraéu nhihudu norĩ hã duré amoreu norĩ me zama ma tô rowẽ na si siré apâ ꞌre hâimana zaꞌra.
15 Samuéu hã tihâimanazéb ꞌrãsutu u ma tô daꞌãma rowairébéꞌwa na hã ꞌre hâimana, Izaraéu nhihudu norĩ ma.
16 Wahup sidâpâsi ma tô ꞌre ne Bétéu u hã, Gilga u hã, duré Mispa u hã. Ã norĩ dazaꞌru ãma isõꞌre da te tãma ꞌre ihâiꞌré zaꞌra mono zéb zarina ma tô te te dama ãma ꞌre arowairébé.
17 Taha pari, ma tô apâ ꞌre ne, ꞌrinhoꞌu Rama ãma tinhorõwa u hã, duré tameb zama daꞌãma rowairébéꞌwa na ꞌre hâimana mono wa, Izaraéu nhihudu norĩ ma. Tawamhã Rama ãma ma tô Samuéu hã ꞌmanha, Uburé Danhibꞌapito ma, danhoprubzé zatazé wedeza ꞌmanharĩ hã.
Ĩwaꞌõtõ piꞌreba watsuꞌu mono
^ 7:12 Ebeneze hã hebreu norĩ mreme na “Ẽtẽ nhimipawaptobzém na” te wasuꞌu.
