1 Samuéu 8:1-22
8 Tawamhã Samuéu siꞌihi wamhã oto, ma tô tiꞌra norĩ hã pisutu zahuré, Izaraéu nhihudu norĩ ma rowairébéꞌwa na ꞌre hâimana zahuré mono da.
2 Iꞌra idubꞌrata nhisi hã ãne, Zuéu na, duré ino nhisi hã ãne, Abiꞌasi na. Ta norĩ hã daꞌãma rowairébéꞌwa Beseba na ꞌri nhoꞌõmo nhisi ãma.
3 Tane nherẽ, iꞌra norĩ hã timama hâimanazém na ꞌre hâimana zahuré mono õ di. Ma tô robꞌuiprazém na si te te sima ꞌre rosaꞌrata zahuré, taha na si ꞌre hâimana zahuré mono da. Robꞌuiprazé piꞌuriwi te te dawi ꞌre iꞌawaibu zahuré mono waꞌrãmi, ma tô duré te te dama ꞌre rowairébé zahuré. Tahawa, duré iꞌuwaibaba na te te dama ꞌre arowairébé zahuré mono õ di.
4 Tahawa, uburé Izaraéu nhihudu norĩ ma iꞌrãnhoꞌõmo zaꞌra norĩ hã ma tô siꞌrãꞌõtõ. Tawamhã ma tô aiꞌabaꞌré Rama u, Samuéu tẽme, te te tãma nharĩ zaꞌra da.
5 Itẽme sihutu wamhã, te ãne tãma nharĩ zaꞌra:
— A hã ma tô aihâiba prédu pe oto. Duré aiꞌra norĩ hã aihâimanazém na ꞌre hâimana zahuré mono õ di. Tahawa, te za a hã wama iꞌmaipisutu zaꞌra, wama isiꞌapito da hã, te te ꞌre waꞌaꞌmadâꞌâ mono da, tiꞌai waꞌõtõ nhoꞌõmo amoi ãma apito da te ꞌre iséme mono ne.
6 Tane nherẽ, Samuéu ma hã wẽ õ di, te te tiwi iwaptẽrẽ zaꞌra zé hã. Tahawa, ma tô tãma mre, Uburé Danhibꞌapito ma.
7 Tawamhã ãne ma tô ãma sadaꞌâ, tãma imremezém na ꞌRe ihâimana uꞌâsi mono hã:
— Te za ãma isadaꞌâbâ zaꞌra, Izaraéu nhihudu norĩ te te aiwi irowaptẽrẽ zaꞌra na hã. Duré aiwétési te te siwi aiwẽꞌõ õ di. Ĩzama ma tô duré siwi ĩwẽꞌõ, Tinhibꞌapito zaꞌra na hã.
8 Ezitu hawi wa hã te isani zaꞌra hawim haré ma tô õne uꞌâ ĩwi ꞌre sipizari zaꞌra, aimawi ihâibaꞌõ norĩ ãma si ꞌre wata zaꞌra mono da. Tahawa, ãhã na hã ma tô duré aima robꞌmanharĩ zaꞌra, õne uꞌâ te te ĩma ꞌre irobꞌmanharĩ zaꞌra mono ne hã.
9 Tahawa, maꞌãpé ãma saze zaꞌra na te te aiwi irowaptẽrẽ zaꞌra zém na hã. Tane nherẽ, poꞌre puꞌu zaꞌra na Izaraéu nhihudu norĩ hã. Duré ãma tãma rowasuꞌu pese zaꞌra na, za niha apito te te ꞌre iꞌmadâꞌâ zaꞌra mono zém na hã.
10 Tawamhã Samuéu hã ma tô ãma tãma rowasuꞌu zaꞌra, Izaraéu nhihudu norĩ ma Uburé Danhibꞌapito te te tãma iwaihuꞌuzéb zarina.
11 Tawamhã te tãma rowasuꞌu zaꞌra ãne:
— Ãne te za apito hã aima ꞌre ihâimana zaꞌra waꞌaba mono hã te te ꞌre romhuri za. Aiꞌra norĩ waꞌwa hã te za awaibu, dasiꞌwapéi ꞌmanharĩꞌwa da hã. Te za duré niꞌwam norĩ hã waibu, tite wedewara zapore na dasiꞌwapézém na isisaꞌrei mono da hã, ihâiba amo norĩ awaru na isisaꞌrei mono da hã, duré wedewara zapore na dasiꞌwapézém nhowa za isisaꞌrei mono da hã.
12 Tawamhã te za awaibu za miu na danhibꞌihâꞌa da hã, duré 50 na danhibꞌihâꞌa da hã. Tawamhã te za duré awaibu, tite buru na te te ꞌre iromhuri zaꞌra mono da hã, duré tãma ꞌre ꞌrã zaꞌra mono wa, te te ꞌre itehâri zaꞌra mono da hã. Duré umnhiꞌãsi ꞌmanharĩ na te te ꞌre irobꞌmaꞌwamarĩ mono da hã te za duré awaibu.
13 Tawamhã aiꞌra sipiꞌõ norĩ hã te za apisutu, dasisadazezé ꞌmanharĩ na te te ꞌre romhuri zaꞌra mono da apito ma, duré isipiꞌwa na, duré iꞌuꞌẽtẽ ꞌmanharĩ na.
14 Tawamhã te za duré aiwi waibu zaꞌra waꞌwa, tiꞌa na robꞌre iwẽ norĩ hã, uwaꞌru na robꞌre iwẽ norĩ hã duré oriwera wede na robꞌre iwẽ norĩ hã uburé tite romhuriꞌwa norĩ ma, te te ꞌre sõmri zaꞌra mono da.
15 Tawamhã ta norĩ hã amnho 10 na te te itehâri zaꞌra mono wasi hã tãma ꞌre isimiꞌwara mono hã duré uwaꞌru ꞌrã norĩ hã te za te te tãma ꞌre sõmri zaꞌra, misi iwasisi na amnho teihi wasi hã, uwaꞌru rã hã, tite daꞌmadâꞌâꞌwa norĩ ma hã, duré ihâiba amo tite romhuriꞌwa norĩ ma hã.
16 Tawamhã te za duré awaibu, aima romhuri zaꞌra waꞌaba ꞌwa norĩ hã, powawẽ iwẽ uptabi norĩ hã, duré awaru poꞌrepore iwẽ uptabi norĩ hã, te te tãma ꞌre iromhuri zaꞌra mono da hã.
17 Tawamhã te za duré awaibu, asimizama zaꞌra waꞌwa, 10 na simasa wamhã, misi si hã te za te te awaibu. Tawamhã tô a norĩ waꞌwa hã te za aipawaꞌâbâ ãna tãma ꞌre iromhuri zaꞌra waꞌaba mo.
18 Tawamhã ãne asibꞌapito zaꞌra waꞌwa hã marĩ te te aima pisutu zaꞌra waꞌaba wamhã, isimirobꞌmanharĩzé te, te za a norĩ waꞌwa hã ꞌre aiꞌruꞌru waꞌaba mo, apito asiwi ipisutu zaꞌra waꞌaba nhimiꞌmanharĩzé te. Tane nherẽ, Uburé Danhibꞌapito hã te te iwapari da hã mare di za, tãma iꞌaiwapsari zaꞌra waꞌaba zé hã.
19 Tane nherẽ, te te ãma saze zaꞌra õ di Izaraéu nhihudu norĩ hã ãne na Samuéu te te ãma ipoꞌre puꞌu zaꞌra zém na hã. Tahawa, ma tô ãne tãma nharĩ zaꞌra, iwaꞌrãmi:
— Mare di. Apito si wa tô wasima wẽ zaꞌra ni.
20 Dazaꞌru ihâiba amoi ãma wasiré aꞌuwẽ õ norĩ te ne hã apito wama ꞌre ꞌmaihâimana mono da hã, wa wasima wẽ zaꞌra ni, te te ꞌre waꞌaꞌmadâꞌâ mono da, duré dasiꞌwapéi wa, te te ꞌre waꞌanhimroi mono da, te te duré wama ꞌre daꞌaꞌwapéi mono da hã.
21 Tawamhã Samuéu ãne na da te tãma inharĩ zaꞌra zé hã te te wapari pari, ma tô ꞌRe ihâimana uꞌâsi mono Uburé Danhibꞌapito ma hã tãma wasuꞌu uburé.
22 Tahawa, ma ãma sadaꞌâ ãne, ꞌRe ihâimana uꞌâsi mono hã:
— Tãma ꞌmanharĩ zaꞌra na tô, Izaraéu nhihudu norĩ te te sima iwẽ zaꞌra zéb zarina. Duré tô tãma sõmri zaꞌra na, apito hã.
Taha pari, ma tô Samuéu hã tiwi waptẽrẽ zaꞌra Izaraéu nhihudu norĩ siꞌaibâ norĩ wi, apâ siꞌabaꞌré da, tinhorõwa zaꞌra u hã.
