1 Samuéu 9:1-27
9 Tawamhã aibâ Quisi na isisi te ꞌre hâimana, Bẽzamihĩ nhihudu hã. Ta hã Abiꞌéhé ꞌra, duré Zeroho nhihudu, duré Becuratihi ꞌra nhihudu, duré Apiꞌasihi ꞌra ꞌra nhihudu. Tawamhã Quisi hã sibro pese di, duré dama pire na ꞌre ihâimana mono.
2 Tawamhã taha ꞌra aibâ iprédupté iwẽ uptabi, isisi hã Sau. Izaraéu nhihudu norĩ ꞌremhã taha nhipai u iwẽ uptabi hã ꞌmaihâimana õ di. Duré uburé nhipai u te te sina irowabzu. Tahawa, Izaraéu nhihudu norĩ waꞌwa hâimana wamhã, te za sisé watobro danhipai u, ꞌrãihâ wa.
3 Tawamhã awaru poꞌrepore sipiꞌõ, Quisi Sauhu mama te hã ma tô aimani zaꞌra. Tahawa, te Sauhu ma tinha ãne, imama hã:
— Ĩꞌra, maꞌãpé ãma asiré saprõni, wama romhuriꞌwa hã, taha me sô airĩtĩ aba mono da, awaru poꞌrepore sipiꞌõ isimani zaꞌra zô.
4 Tawamhã ãne imama te te tãma waihuꞌu wa, ma tô oto tineb zahuré Sau norĩ hã uburé te te sô rowaimrami zahuré mono da, Efraĩ nhihudu norĩ nhiptiꞌa na ẽtẽ ꞌratamhã, duré Sarisa na romnhisi ãma tiꞌa na. Tane nherẽ, te te anhopẽtẽ zahuré õ di, awaru poꞌrepore sipiꞌõ hã. Tahawa, ma tô sô rĩtĩ zahuré, Saꞌarĩhĩ na romnhisi ãma. Tane nherẽ, tamemhã duré robaba di. Tawamhã Bẽzamihĩ nhihudu norĩ nhiptiꞌa na ma tô duré sô rĩtĩ zahuré. Tane nherẽ, tamemhã te te duré anhopẽtẽ zahuré õ di, taré ma ro ãma wazere zahuré.
5 Tawamhã Zupi na romnhisi tiꞌai u oto zasi wamhã, ma tô Sau hã tãma tinha, tite zahuré romhuriꞌwai ma hã ãne:
— Oto wane na apâ ꞌri u. Ĩmama hã hâtâꞌâ dai õ di awaru poꞌrepore sipiꞌõ norĩ ãma hã. Waꞌãma si te za hâtârâ, apâ wasimasisi suꞌu õ wa.
6 Tawamhã romhuriꞌwa ma tô ãma tãma waꞌrã ãne:
— Aꞌâza pé. Ã hã ꞌri nhoꞌõmo ãma hã te aibâ hã ꞌre sãmra, ꞌRe ihâimana uꞌâsi mono ãma si ꞌre imorĩ hã. Ta hã dama iwazéb zaꞌẽne, uburé marĩ na te te ꞌre inharĩ mono zéb zarina, marĩ hã ꞌre hâimana mono wa. Tahawa, oto itẽme wane na, wa te tãma wasuꞌu da. Tawamhã ãté ta hã te za wama wasuꞌu za awaru poꞌrepore sipiꞌõ norĩ za wa te isõpẽtẽzéb da hã.
7 Tawamhã te Sau sadanha ãne:
— Tawamhã bété itẽme wane wamhã, e marĩ, wa za tãma âri ni za tawamhã. Wasa hã tâibâ wanhimiroꞌwapézéb ꞌremhã. Marĩ õ di, wa te tãma isõmri da hã. E marĩ wa za tãma sõmri ni.
8 Tawamhã romhuriꞌwa hã ma tô ãma tãma waꞌrã ãne:
— Ĩte iré hã surure na ẽtẽ waipo prã prata hã za te tãma sõmri wa, te te wama iwasuꞌuzéb da hã, awaru poꞌrepore isimasabzé hã.
9 9:9-11 Tawamhã Sau ma ãma sadaꞌâ ãne:
— Wẽ di tô, iwaihu hã. Tane wamhã, oto wane na pé.
Tahawa, ma tô oto tineb zahuré, aibâ ꞌRe ihâimana uꞌâsi mono ãma si ꞌre imorĩ ꞌre ihâimana mono zéb u hã. Tawamhã oto ꞌri nhoꞌõmo tẽme sõꞌa na neb zahuré ré, ma tô niꞌwam norĩ azarudu hã sõpẽtẽ zaꞌra bâdâdi wa, â te te amrami zaꞌra da, isiꞌabaꞌré hã. Tawamhã Sau norĩ hã ma tô sadanharĩ zaꞌra ãne:
— E aibâ hã te ꞌri nhoꞌõmo ãma ꞌre sãmra, sõtõ ꞌrowim ne marĩ ꞌmadâꞌâꞌwa hã.
(Duréihã niꞌwa hã ꞌRe ihâimana uꞌâsi mono te te sadanharĩ da, te te sima wẽ wamhã, te za tinha ãne, tisiré ma hã: “Oto wane na, sõtõ ꞌrowim ne marĩ ꞌmadâꞌâꞌwai u, wa te wasima rowasuꞌu zaꞌra da.” E marĩ wa, ma tô ãne hã te te sima ꞌre ꞌmanharĩ zaꞌra. Duréihã ꞌRe ihâimana uꞌâsi mono zadawa ꞌmahârâꞌwa norĩ hã sõtõ ꞌrowim ne marĩ ꞌmadâꞌâꞌwa na da te ꞌre sisi zaꞌra mono wa.)
10 ꞌMadâꞌâ 9:9
11 ꞌMadâꞌâ 9:9
12 Tawamhã azarutu norĩ hã ma tô ãma sadaꞌâbâ zaꞌra ãne:
— Ĩhe. Ãme te nhamra. Õhõta te oto mo aiwana waꞌaba. Tahawa, maꞌãpé aiꞌabaꞌré na ãma itẽme ane waꞌaba. Ta hã ma tô we ꞌri nhoꞌõmo u hã ãzé, ã bâtâ na danhimizama zata na ꞌRe ihâimana uꞌâsi mono ma, za da te tãma sõmri zaꞌra wa, danhoprubzé hã, wedezane nhisiwimhã ẽtẽ ãma ꞌre isa mono nhisiwimhã.
13 Tawamhã ꞌri nhoꞌõmo u azasi aba wi, te za isõpẽtẽ ꞌwa, sa da, sõꞌa na zahadu morĩ õ ré, ẽtẽ nhisi u hã. Duré zahadu datẽme wisi õ ré, dasa na da te sãnaꞌrata zaꞌra õ di. E tihai wa. Imorĩꞌrata na za aꞌâ danhimizama zata na ꞌRe ihâimana uꞌâsi mono ma, mreme wa. Taha parip si te za tisaihu, sô idahãsi norĩ hã. Tahawa, saꞌẽtẽ anep suꞌu aba, sõpẽtẽ aba hâ.
14 Tawamhã te oto tineb zahuré, ꞌri nhoꞌõmo u. Tawamhã oto zasi zahuré wi, ma tô Samuéu ꞌmadâꞌâ zahuré, sõꞌa na morĩ ré, ꞌRe ihâimana uꞌâsi mono ãma ꞌre idawata zaꞌra mono zéb u.
15 Sau iwisizé bâtâ wana ré, ma tô Samuéu ma hã waihuꞌu, Uburé Danhibꞌapito hã ãne:
16 — Awẽmhã tô ãne bâtâ na wa za we aibâ hã atẽme satõ, Bẽzamihĩ nhihudu hã. Tawamhã a hã te za iꞌrãti za ĩnhibꞌaꞌuwẽ Izaraéu nhihudu norĩ te, iꞌrãnhoꞌõmo da hã. Duré ta hã te za Izaraéu nhihudu norĩ hã anhoꞌreptu, filisteu norĩ nhiptetezé wi hã. E marĩ wa. Wa hã wa tô te ꞌre ꞌmadâꞌâ, ĩnhibꞌaꞌuwẽ te te ꞌre irobzépata zaꞌra mono zé hã. Duré wa tô te ꞌre wapari zaꞌra, te ꞌre pawaptob zaꞌra mono da, te te ĩwi ꞌre irowaptẽrẽ zaꞌra mono zé hã.
17 Tawamhã Samuéu, Sau te te ꞌmadâꞌâ wamhã, ma tô Uburé Danhibꞌapito hã tãma tinha ãne:
— Õ hã aibâ na wa aima tinha. Õ hã te za ĩnhibꞌaꞌuwẽ norĩ ma siꞌĩꞌrãnhoꞌu.
18 Tawamhã Sau ma tô oto sõpẽtẽ Samuéu hã, ꞌridawa zaꞌẽtẽ ꞌrata. Tawamhã te sadanha ãne:
— Ĩzawi na hã ĩma wasuꞌu na. E mame te aibâ hã nhamra, sõtõ ꞌrowim ne marĩ ꞌmadâꞌâꞌwa hã.
19 Tawamhã Samuéu ma asa ãma sadaꞌâ ãne:
— Wa hã ĩnhotõ ꞌrowim ne marĩ ꞌmadâꞌâꞌwa. Mo oto ĩnhowa ane waꞌaba, ꞌRe ihâimana uꞌâsi mono ãma ꞌre idawata zaꞌra mono zéb u. Ãhã na a norĩ waꞌwa hã te za ĩme asai waꞌwa, ã mara na hã. Duré awẽ mararé si wa za ãma asadaꞌâbâ ꞌwa, uburé ĩzadanharĩ aba mono zém na hã. Taha parip si te za apâ ane waꞌwa.
20 Aihâtâꞌâ aba tõ awaru poꞌrepore sipiꞌõ isimani zaꞌra ãmamhã, siꞌubdatõ bâdâ ãma ineb zaꞌra na hã. E marĩ wa. Ma tô sõpẽtẽ zaꞌra ni. Tazahã e ꞌwa hã ma tô bété Izaraéu nhihudu norĩ hã sima wẽ zaꞌra. A hã ma tô sima aiwẽ zaꞌra. Duré aimama hawi aꞌuwẽ norĩ zama te tô sima aiwẽ zahi zaꞌra.
21 Tawamhã Sau ma tô ãma tãma waꞌrã ãne:
— Wa hã Bẽzamihĩ nhihudu. Bẽzamihĩ nhihudu norĩ nhiptiꞌa hã, uburé Izaraéu nhihudu norĩ nhiptiꞌai ma surure di. Duré tô ĩmama norĩ hã tisiré Bẽzamihĩ nhihudu norĩ ma iwapure. Tawamhã e marĩ da, te ãne na hã ãma ĩma inha.
22 Tawamhã ãne na tãma siwasuꞌu wa, te oto Samuéu hã saprõni zahuré Sau norĩ hã, tite romhuriꞌwai me, ꞌre idasaihuri mono zéb u. Tawamhã ma tô tãma nharĩ zahuré simasisi da, dasimasisizé ipire ãmamhã, dame sa zahuré da, 30 na dahâiba na sô idahãsi norĩ siré.
23 Tawamhã Samuéu te tãma tinha oto ãne, apiꞌwai ma hã:
— We âri romnhi waꞌõno hã, te aré aima isõmri hã, ĩza hiri da.
24 Tawamhã apiꞌwa iza nhi romnhi iwẽ uptabi hã ma tô tiꞌâ. Te te âri wamhã, ma tô tihi, Sauhu nhoꞌre.
Tawamhã Samuéu te tãma tinha ãne:
— Ãhãta romnhi, da te asô ihiri. ꞌRẽne, ꞌrẽne da, da te asô ihiri wa, dazô ĩhârâzé bâtâ ꞌre wa.
Ãne ma tô tawamhã Sau hã tisa, Samuéu siré hã.
25 Tawamhã sa zahuré pari, ma tô oto tineb zahuré apâ, ẽtẽ nhisi ãma ꞌRe ihâimana uꞌâsi mono ãma ꞌre idawata zaꞌra mono zém hawimhã, ꞌri nhoꞌõmo u. Tawamhã Samuéu ma tô tãma waptâ, Sauhu ma, ꞌri nhisi hâbâ hâimo ãma.
26 Tawamhã ma tô tame oto nhono.
Tawamhã Samuéu awẽ u ma tô saiꞌu, ꞌri nhisi hâpâ u. Te ꞌmahâ, ãne Sau hã:
— Aiꞌutu, aimorĩ hâ. Wa hã wa za aꞌâ asiré mo, suru na.
Tahawa, ma tô oto Sau hã udu. Tawamhã ma tô Samuéu siré watobro, ꞌri nhiꞌriti u hã.
Samuéu, Sau hã te te iꞌrãtiꞌizé wasuꞌu
27 Tawamhã ꞌri nhoꞌõmo hawi ꞌre idawairébé mono zéb u oto simasisi wamhã, ma tô Samuéu hã tãma tinha ãne, Sauhu ma:
— Maꞌãpé tãma robꞌru na, aima romhuriꞌwai ma, asõwa morĩ da. Tawamhã a hã te za ãme aꞌâ aihâiba za isaꞌu.
Tawamhã tãma iromhuriꞌwa hã ma tô isõwamhã mo. Oto morĩ zaꞌusi, te Samuéu, Sauhu ma tinha ãne:
— Wa hã ꞌRe ihâimana uꞌâsi mono mreme, te aima iwasuꞌu da hã te ĩma tihâiba.
