1 Tesalonita 1:1-10
1 Isazeiꞌwa norĩ, wa hã Paulu, Sila norĩ, Timotiu norĩ me, wa ãma aima robꞌuiꞌéré zaꞌra waꞌaba ni, Tesalonita na ꞌri nhoꞌõmo nhisi ãma asiré ꞌre asiꞌrãꞌõtõ aba mono norĩ ma.
Wamama hã ꞌRe ihâimana uꞌâsi mono hã, duré Wanhibꞌapito Zezu Cristu hã te asina ꞌre iꞌumnhasi zaꞌra waꞌaba mo, isibꞌaꞌuwẽ, ꞌre aihâimana zaꞌra waꞌaba mono da. Wa norĩ hã, wa ta norĩ ma hã, aiꞌãma ꞌre wamreme zusi uꞌâsi ꞌwa, isimizawizé hã aiꞌãma ꞌre hâimana uꞌâsi zaꞌra waꞌaba mono da, rowẽ uꞌâsi, ãma ꞌre anomro aba mono da.
Tesalonita ãma isazeiꞌwa norĩ, tô sena ꞌre ihâimana wẽ zaꞌra mono zé wasuꞌu
2 Wa norĩ hã ꞌRe ihâimana uꞌâsi mono ãma, wa ꞌre wawata uꞌâsi zaꞌra, ꞌre aihâimana wẽ zaꞌra waꞌaba mono wa. Aiꞌãma ꞌre wamreme zusi aba mono wamhã, wa duré wa te tiwi ꞌre rowaptẽrẽ zaꞌra, te te ꞌre aipawaptob zaꞌra waꞌaba mono da.
3 Tãma ꞌre wamreme zusi mono sina, wa aiꞌãma ꞌre wapoꞌre puꞌu uꞌâsi zaꞌra waꞌwa, ꞌre aihâimana wẽ zaꞌra waꞌaba mono zém na, ãma ꞌre wawata zaꞌra mono da. A norĩ waꞌwa hã sazei pese zaꞌra waꞌaba wa, marĩ iwẽ si te ꞌre iꞌmanharĩ zaꞌra waꞌaba mo. Wamama hã, Wanhibꞌapito ꞌRe ihâimana uꞌâsi mono, te ꞌre isawi pese zaꞌra waꞌaba mo. Taha zarina, te duré ꞌre idazawi pese zaꞌra waꞌaba mo. Tahawa, dawi ꞌre asisawi zaꞌra waꞌaba mono õ di, marĩ iwẽ hã dama ꞌre ꞌmanharĩ zaꞌra waꞌaba mono tõ da. Duré Wanhibꞌapito Zezu Cristu we imorĩzéb zô, asimiꞌẽ na te sô ꞌre asimipari uꞌâsi zaꞌra waꞌaba mo. Ãne na ꞌre anomro wẽ waꞌaba mono na, wa aiꞌãma ꞌre wapoꞌre puꞌu uꞌâsi zaꞌra waꞌwa, wawaꞌa ãna, Wamama ma ꞌre wamreme zusi mono wamhã.
4 Wasiré isazeiꞌwa norĩ, wa tô duré aiꞌãma waihuꞌu zaꞌra waꞌaba ni, ꞌRe ihâimana uꞌâsi mono te te ꞌre asawi pese zaꞌra waꞌaba mono na hã, duré isibꞌaꞌuwẽ ꞌre anomro aba mono da, te te sima aipisutu zaꞌra waꞌaba na hã.
5 Zezusihi wasuꞌuwẽ na, wa te aima rowasuꞌu zaꞌra waꞌaba wamhã, taré wamreme na si, wa te aima ãma rowasuꞌu zaꞌra waꞌaba õ di. ꞌRe ihâimana uꞌâsi mono pẽꞌẽzani hã tiwaihuꞌu pese na te te ꞌre iwapawaptob zaꞌra mono zém na, wa tô duré aima rowasuꞌu zaꞌra waꞌaba ni. Zezusihi wasuꞌuwẽ hã tô sena na, wa te ꞌre iꞌumnhasi zaꞌra mono zéb zarina, wa tô duré aima ãma rowasuꞌu zaꞌra waꞌaba ni. Tahawa, wa tô aiꞌãma waihuꞌu zaꞌra waꞌaba ni, ꞌRe ihâimana uꞌâsi mono te te sima iꞌaiwẽ zaꞌra waꞌaba na hã. Duré a norĩ waꞌwa hã ma tô waꞌãma iwaihuꞌu zaꞌra waꞌwa, aiꞌrata wahâimana zaꞌra waꞌaba ré, ꞌre iwanomro wẽ mono zém na, wa te aipawaptob zaꞌra waꞌaba da.
6 A norĩ waꞌwa hã ma tô ꞌre anomro wẽ waꞌaba mo, ãma iwasisanhozéb zarina, duré Wanhibꞌapito ãma isisanhozéb zarina. Iwaihuꞌu pese pẽꞌẽzani hã ma tô te te ꞌre aipawaptob uꞌâsi zaꞌra waꞌwa, atoi uptabi zaꞌra waꞌaba na ꞌre sazei pese zaꞌra waꞌaba mono da, da te aiꞌãma ꞌre irowasété zaꞌra waꞌaba mono na ꞌre robzépata zaꞌra waꞌaba mono nherẽ.
7 Taha na a norĩ waꞌwa hã ma tô duré dama ãma asanho zaꞌra waꞌwa, aihĩni isazeiꞌwa norĩ, Masédonia na danhiptiꞌa nhoꞌõmo nhisi ãma ꞌre isiꞌubumroi mono norĩ ma, duré Ataza na danhiptiꞌa nhoꞌõmo nhisi ãma ꞌre isiꞌubumroi mono norĩ ma zama.
8 Tame ꞌre isiꞌubumroi mono norĩ hã ma tô ꞌRe ihâimana uꞌâsi mono zadawa wasuꞌu hã wapari zaꞌra, a norĩ waꞌwa hã dama ꞌre sadawa wasuꞌu pese zaꞌra waꞌaba mono wa, Wanhibꞌapito wasuꞌuwẽ hã. Duré isipai u, dazaꞌrui mono bâ ma tô isadawa wasuꞌu hã datẽme ꞌre waptãꞌã. Duré ꞌre isazei pese zaꞌra waꞌaba mono na, ma tô aiwasuꞌu waꞌwa hã da te ꞌre wapari zaꞌra, daro mono bâ. Tahawa, wa norĩ hã ꞌre isaze zaꞌra waꞌaba mono na, wa te duré dama ꞌre aiwasuꞌu zaꞌra waꞌaba mono õ di, aiwasuꞌu zaꞌra waꞌwa hã da te ꞌre wapari siromo zaꞌra mono wa.
9 Aiwasuꞌu wapariꞌwa norĩ hã, siꞌuihâ na te wama rowasuꞌu zaꞌra, atẽme iwasihutu aba zém na. Ma tô, u, asima iwawẽ zaꞌra waꞌwa. Te duré wama aiwasuꞌu zaꞌra waꞌwa, ãne: “Ta norĩ hã, ꞌRe ihâimana uꞌâsi mono te te ꞌre sazei pese zaꞌra. Tahawa, romhâiba ꞌmanharĩ ãma, nasi wata zaꞌra õ di oto. Te te tãma ꞌre romhuri zaꞌra mono õ di duré oto. Ma tô rẽme pese zaꞌra. ꞌRe ihâimana uꞌâsi mono si, tô sena hã, u. Tahawa, isadawa wasuꞌu, ma tô saze zaꞌra. Tahawa, te taha na si te te tãma ꞌre romhuri pese zaꞌra.
10 Iꞌra hã hâiwa hawi apâ we imorĩzéb zô, te ꞌre simipari uꞌâsi zaꞌra, abꞌre hawi apâ te te ihâiwaꞌutu zô.” Ãne te wama aiwasuꞌu zaꞌra waꞌwa. Tane tô. Ta hã Zezusi hã, Wanhoꞌreptuiꞌwa. Ma tô wanhoꞌreptu zaꞌra, ꞌRe ihâimana uꞌâsi mono hã za te te idahâ zaꞌra zé wi hã.
