1 Tesalonita 1:1-10
1 Wa hã Paulu, duré Silas duré Timotiuhu zama, wa ãma aima robꞌuiꞌéré zaꞌra waꞌaba ni, Tesalonita na ꞌri nhoꞌõmo nhisi ãma asiré ꞌre iꞌaiꞌrãꞌõtõ aba mono norĩ ma, Wamama ꞌRe ihâimana uꞌâsi mono ãma isiré ꞌre iꞌaihâimana zaꞌra waꞌaba mono hã duré Wanhibꞌapito Zezu Cristuhu ãmab zama.
ꞌRe ihâimana uꞌâsi mono nhimizawizé duré rowẽ uꞌâ ite hã aiꞌãma ꞌre ihâimana uꞌâsi zaꞌra waꞌaba mono da si, iwẽ hã.
Tesalonita ãma isazeiꞌwa norĩ ꞌre ihâimana zaꞌra mono zé
2 Wa norĩ hã wa te ꞌre rowaptẽrẽ zaꞌra mono wamhã, ꞌRe ihâimana uꞌâsi mono ãma wa ꞌre wawata uꞌâsi zaꞌra, uburé aiꞌãma zaꞌra waꞌaba. Wa duré wa te aiꞌãma ꞌre rowaptẽrẽ uꞌâsi zaꞌra waꞌwa, te te ꞌre aipawaptob zaꞌra waꞌaba mono da.
3 Wate zaꞌra Wamama ꞌRe ihâimana uꞌâsi mono nhoꞌre, wa ãma ꞌre wapoꞌre puꞌu uꞌâsi zaꞌra, romhuri ꞌre iꞌmanharĩ zaꞌra waꞌaba mono zém na isaze zaꞌra waꞌaba uꞌâbâ, duré asimizawi zaꞌra waꞌaba zéb zarina ꞌre iromhuri pese zaꞌra waꞌaba mono na hã duré asiwawãi ãna asiptete sina Wanhibꞌapito Zezu Cristu apâ we imorĩzéb zô iꞌasimipari zaꞌra waꞌaba zém na hã.
4 Wasisãnawã norĩ, wa waihuꞌu zaꞌra ni, ꞌRe ihâimana uꞌâsi mono te te ꞌre iꞌasawi pese zaꞌra waꞌaba mono na hã duré te te sima iꞌaipisutu zaꞌra waꞌaba na hã, ite da.
5 E marĩ wa. Rowasuꞌuwẽ ité hã wa te aima wasuꞌu zaꞌra waꞌaba wamhã, wamreme na si wa te aima wasuꞌu zaꞌra waꞌaba õ di. Tazahã, ꞌRe ihâimana uꞌâsi mono Pẽꞌẽzani waihuꞌu pese uptabi na ꞌre ihâimana mono nhimipawaptobzéb zarina, duré Rowasuꞌuwẽ ité hã tô sena ꞌRe ihâimana uꞌâsi mono nhimiroti na ãma iwasiwawãi õ uptabi zaꞌra na. Duré aima wawaihuꞌu pese zaꞌra waꞌaba di, aiwazari wahâimana zaꞌra waꞌaba ré hã, wa te ãma ipibui pese zaꞌra na hã aiꞌudâna zaꞌra waꞌaba.
6 Ãma aima iwasisanho zaꞌra waꞌaba zéb zarina, te aihâimana zaꞌra waꞌwa, wanhirã zarina duré Wanhibꞌapito nhirã zarina.
A norĩ waꞌwa hã ꞌre robzépata zaꞌẽtẽ zaꞌra waꞌaba mono nherẽ, ma tô ato sina iwaibui wẽ waꞌwa Cristuhu wasuꞌu wẽ hã, rowẽ uptabi ꞌRe ihâimana uꞌâsi mono Pẽꞌẽzani hawi we ꞌre ine mono ré.
7 Ãne wa, te ꞌre aihâimana zaꞌra waꞌaba mo, uburé Zezu Cristuhu zazeiꞌwa norĩ ma ãma isisanhoꞌwa na, Masédonia duré Acaia ãma danhiptiꞌa nhoꞌõmo ꞌre, ꞌre ihâimana zaꞌra mono norĩ ma zama.
8 E marĩ wa. Wanhibꞌapito wasuꞌu hã aihawib zaꞌra waꞌaba watobro wamhã, Masédonia ãma duré Acaia ãmab zama ma tô ropé. Duré ꞌRe ihâimana uꞌâsi mono asina ꞌre iꞌumnhasi zaꞌra waꞌaba mono zé wasuꞌu hã ma tô ropé ropâ. Tahawa, taha na wa te inharĩ zaꞌra da hã wanhimnhasi waihuꞌu zaꞌra õ di oto.
9 E marĩ wa. Tame ꞌre isiꞌubumroi mono norĩ hã siꞌuihâ na te te aiwasuꞌu zaꞌra waꞌaba wa, iwawaibui wẽ waꞌaba na hã. Te duré aiwasuꞌu zaꞌra waꞌwa, romhâiba ꞌmanharĩ ãma ꞌre iꞌaiwata zaꞌra waꞌaba mono zé irẽme zaꞌra waꞌaba na hã, ꞌRe ihâimana uꞌâsi mono hâiba ré ꞌre ihâimana mono ãma si oto ꞌre aiwata zaꞌra waꞌaba mono da, tô sena ꞌre ihâimana mono ãma si.
10 Te duré aiwasuꞌu zaꞌra waꞌwa, Zezusi, ꞌRe ihâimana uꞌâsi mono ꞌra zô iꞌasimipari zaꞌra waꞌaba na hã, ꞌRe ihâimana uꞌâsi mono te te ihâiwaꞌudu apâ hâiwa hawi we imorĩzéb zô, ta hã Zezusi Waꞌanhoꞌreptuiꞌwa, ꞌRe ihâimana uꞌâsi mono nhimihâzé, za iwisi wi hã.
