1 Tesalonita 2:1-20
2 Wasisãnawã norĩ, aiꞌrata wasiꞌubumroi waꞌaba ré, aima wanhimiromhuri zaꞌra waꞌaba zé hã taré hãi õ di. Tô sena, wa tô aipawaptob zaꞌra waꞌaba ni, sazei pese zaꞌra waꞌaba da. Ãne na ma tô waꞌãma iwaihuꞌu zaꞌra waꞌwa.
2 Filipu na ꞌri nhoꞌõmo nhisi ãma zahadu wasiꞌubumroi ré, wa tô robzépata zaꞌra ni, isazeiꞌõꞌwa norĩ nhimihâzém na, duré damreme wasété na zama. Taha na ma tô waꞌãmamhã iwaihuꞌu zaꞌra waꞌwa. Tane nherẽ, Wanhibꞌapito ꞌRe ihâimana uꞌâsi mono hã ma tô wapawaptob zaꞌra, wapahi ãna, isadawa wasuꞌu hã wa te aima wasuꞌu zaꞌra waꞌaba da, Cristuhu wasuꞌuwẽ hã. Tahawa, wamreme waꞌrãmi, da te wawi roꞌwaꞌrutu zaꞌra nherẽ, wa tô iwasuꞌuwẽ na aima rowasuꞌu zaꞌra waꞌaba ni tô, wapahi zaꞌra ãna.
3 Roti tô sena na si, wa aima roti zaꞌra waꞌaba ni, ãhã na hã. Rowasuꞌu wẽ upana, wa te aima roti zaꞌra waꞌaba õ di. Duré marĩ iwẽ hã wa te aiwi ꞌre waibui zaꞌra waꞌaba mono da, wa te wasima ãma aiwi ꞌre rosaꞌrata zaꞌra waꞌaba mono õ di. Marĩ iwẽ hã wa te aiwi udâ zaꞌra waꞌaba õ di.
4 Mare di. Ãnei õ di. Tô sena, ꞌRe ihâimana uꞌâsi mono te te sima ꞌre iwawẽ zaꞌra mono zéb zarina, te te wapisutu zaꞌra wa, wa iwasuꞌuwẽ na wa te dama ꞌre rowasuꞌu zaꞌra, ãne na romhuriꞌwa da, te te wawẽsãmri zaꞌra wa, wa norĩ hã.
Tawamhã wanhimirowasuꞌu wẽ wa, taré wama ꞌre dato zaꞌra mono da, wa te wasina ꞌre rosaꞌrata zaꞌra mono õ di. Mare di. ꞌRe ihâimana uꞌâsi mono hã te te ꞌre iwawẽsãmri zaꞌra mono da si, wanhimirosaꞌrata zaꞌra hã. Õhõ si te za te te ꞌre wapibu zaꞌra, ꞌre iwanomro wẽ mono zéb zô, iwẽ na si ꞌre iwanhimirosaꞌrata zaꞌra mono zéb zô zama. Tahawa, isadawa wasuꞌu na, wa te dama ꞌre irowasuꞌu wẽ zaꞌra mono na, waꞌãma ꞌre toi mono da, wa wa te wasina ꞌre rosaꞌrata zaꞌra.
5 Aiꞌrata wahâimana zaꞌra waꞌaba ré, taré wamreme to na aiꞌãma wawata zaꞌra waꞌaba õ di. Duré marĩ iwẽ hã wanhimirowahutu waꞌrãmi, wama sõmri zaꞌra waꞌaba da, wa te wasina rosaꞌrata zaꞌra õ di. Ãne na ma tô waꞌãma iwaihuꞌu zaꞌra waꞌwa. ꞌRe ihâimana uꞌâsi mono ma, waihuꞌu pese di, ãne na wapẽꞌẽ ꞌre, wanhimirosaꞌrata zaꞌra hã.
6 Wanhimirowahutu wẽ na waꞌãma ꞌre aiwata zaꞌra waꞌaba mono da, wa te wasina rosaꞌrata zaꞌra õ di. Duré, aimawi norĩ hã ãne zarina, waꞌãma wata zaꞌra da, wa te wasina rosaꞌrata zaꞌra õ di duré.
7 Cristu hã ma tô wazatõrĩ zaꞌra, iwasuꞌuwẽ hã wa te dama ꞌre waihuꞌu zaꞌra mono da, isadawa para. Tahawa, dama wamreme pire zaꞌra di. Tane nherẽ, wamreme pire na, wa te duré ꞌre aiwari zaꞌra waꞌaba mono õ wa, wa te ãma aiwi robzeiꞌõ zaꞌra waꞌaba õ di. Mare di. Ãnei õ di, wa te aima iꞌmanharĩ zaꞌra waꞌaba zé hã. Wamreme wẽ na si, wa tô aima rowasuꞌu zaꞌra waꞌaba ni. Wa tô aiꞌmadâꞌâ pese zaꞌra waꞌaba ni, dana norĩ hã tiꞌra te te ꞌre iꞌmadâꞌâ pese zaꞌra mono ne.
8 ꞌRe ihâimana uꞌâsi mono zadawa wasuꞌu hã, iwasuꞌuwẽ hã wawaꞌa ãna, wa tô aima wasuꞌu zaꞌra waꞌaba ni, wama asawi pese zaꞌra waꞌaba wa. Tahawa, aiwi ꞌre wasisawi zaꞌra waꞌaba mono õ di, wa te ꞌre aipawaptob zaꞌra waꞌaba mono tõ da hã. Tô sena, a norĩ waꞌwa hã wama asawi uptabi zaꞌra waꞌaba di.
9 Wasisãnawã norĩ, ãne na te tô waꞌãma ꞌre aipoꞌre puꞌu uꞌâsi zaꞌra waꞌaba mo, ꞌre iwanomro wẽ mono zém na. Wa norĩ hã wahâimanazéb da, wa tô wasima romhuri pese zaꞌra ni, wapatâꞌâ nherẽ, duré wawasutu nherẽ. Bâtâ sidâpâsi wasiꞌuihâ na wanhibꞌrata na wa tô romhuri zaꞌra ni, wahâimanazéb da hã. Bâdâ ꞌrãiwatobro õ ré, duré bâdâ sébré nherẽ, wa tô wasima romhuri zaꞌra ni, wa te aiwari zaꞌra waꞌaba tõ da, wama asõprub zaꞌra waꞌaba na wapire na waꞌmadâꞌâ zaꞌra waꞌaba tõ da, ꞌRe ihâimana uꞌâsi mono zadawa wasuꞌu na, wa te aima rowasuꞌu zaꞌra waꞌaba ré.
10 A norĩ waꞌwa hã ma tô iwawaihuꞌu zaꞌra waꞌwa, asõꞌa zaꞌra waꞌaba, ꞌre iwanomro mono zé hã. ꞌRe ihâimana uꞌâsi mono hã ma tô duré wawaihuꞌu zaꞌra, ꞌre iwanomro wẽ mono zém na hã. Wawasédé hã wa te ꞌmanharĩ zaꞌra õ di. Iwẽ na si wa tô wahâimana zaꞌra ni, asõꞌa zaꞌra waꞌaba. ꞌRe ihâimana uꞌâsi mono nhimiroti na hã duré ãma wasipa zaꞌra õ di. Ãne ãma ꞌre iwanomro mono zé hã, tô ibâ na si.
11 Damama hã, dahâimanazém na tiꞌra norĩ te te ꞌre ipawaptob zaꞌra mono ne, wa tô wa norĩ hã aihâiba mono bâ waꞌaba, aipawaptob zaꞌra waꞌaba ni, ꞌRe ihâimana uꞌâsi mono zadawa wasuꞌu na ꞌre anomro wẽ waꞌaba mono da. Ãne hã aima waihuꞌu pese zaꞌra waꞌaba di.
12 Duré da te aima ꞌre amhâzépa zaꞌra waꞌaba mono nherẽ, wa tô ãma aima robze zaꞌra waꞌaba ni iwasuꞌuwẽ na, aiwi ꞌre robzeiꞌõ tõ zaꞌra waꞌaba mono da. Wa tô aima roti pese zaꞌra waꞌaba ni, ꞌRe ihâimana uꞌâsi mono nhoꞌa ꞌre anomro wẽ waꞌaba mono da, toi uptabi na te te ꞌre aiꞌmadâꞌâ zaꞌra waꞌaba mono da. Ta hã ma tô te te sima ꞌre aiwẽ zaꞌra waꞌwa, hâiwa ãma ihâiba na rowaꞌa na isiré ꞌre aihâimana uꞌâsi zaꞌra waꞌaba mono da, rowẽ uptabi na.
13 ꞌRe ihâimana uꞌâsi mono zadawa wasuꞌu hã wa te aima iwasuꞌu zaꞌra waꞌwa hã wapari zaꞌra waꞌaba wamhã, ma tô asima iwẽ zaꞌra waꞌwa. Taré tiꞌai ãma aibâ nhimirowasuꞌu newa, ãma ꞌre rosaꞌrata zaꞌra waꞌaba mono õ di. Tô sena ꞌRe ihâimana uꞌâsi mono mreme na, ma tô ãma irosaꞌrata zaꞌra waꞌwa. Tane tô, ꞌRe ihâimana uꞌâsi mono zadawa wasuꞌu na si wanhimirowasuꞌu zaꞌra hã. Isadawa wasuꞌu hã te tô aiꞌãma te te ꞌre romhuri pese zaꞌra waꞌwa, aipẽꞌẽ ꞌre, iwẽ na si ꞌre anomro aba mono da. Tahawa, ꞌRe ihâimana uꞌâsi mono ãma si, wa ꞌre wawata zaꞌra, imreme hã asina ꞌre waihuꞌu zaꞌra waꞌaba mono wa.
Isazeiꞌwa norĩ te te ꞌre irobzépata zaꞌra mono zé wasuꞌu
14 Zudéa na danhiptiꞌa nhoꞌõmo nhisi ãma hã, aiwana zaꞌra waꞌaba, ma tô da te ꞌre sazei pese zaꞌra, ꞌRe ihâimana uꞌâsi mono zadawa wasuꞌu hã, iwasuꞌuwẽ hã. Tawamhã Cristu Zezusihi ãma ma tô ꞌre danomro, isazeiꞌwa norĩ, siré ꞌre isiꞌrãꞌõtõ mono norĩ hã. Tawamhã isiré norĩ hã isazeiꞌõꞌwa norĩ hã ma tô te te ãma ꞌre rowasété zaꞌra, isazeiꞌwa norĩ hã te te ꞌre saze zaꞌra mono tõ da, iwasuꞌuwẽ hã, tisiré nherẽ. Tane, a norĩ waꞌwa hã wasiré isazeiꞌwa norĩ hã, ta norĩ ne, ma tô ꞌre irobzépata zaꞌra waꞌaba mo, asiré norĩ hã asada ꞌre sahi zaꞌra waꞌaba mono wa, Zudéa norĩ ne.
15 Duréihã, zudeu norĩ hã ma tô te te ꞌre simro, ꞌRe ihâimana uꞌâsi mono zadawa ꞌmahârâ ꞌrata ꞌwa norĩ hã. Duré, ãhã na zama isihudu norĩ hã ihiꞌrata norĩ hã te te ꞌre irobꞌmanharĩ zaꞌra mono zéb zarina, ma tô siwi tiwĩ, Wanhibꞌapito Zezusi hã. Ma tô duré te te waꞌãma ꞌre rowasété zaꞌra, iwasuꞌuwẽ hã wa te dama ꞌre wasuꞌu zaꞌra mono tõ da. Ma tô sisiti siwi wazatõrĩ zaꞌra, isiti wasiꞌabaꞌré da. Ma tô duré uburé daꞌãma tinhitobꞌru zaꞌra. Tahawa, ꞌRe ihâimana uꞌâsi mono ma, wẽ õ di, ꞌre ihâimana zaꞌra mono zé hã.
16 Tawamhã wa norĩ hã zudeuꞌõ norĩ ma, wa tô wa te tãma ꞌre rowasuꞌu zaꞌra iwasuꞌuwẽ na, da te ꞌre sazei pese zaꞌra mono da, Zezusi hã te te ꞌre daꞌanhoꞌreptui mono da. Tawamhã ta norĩ hã zudeu nherẽ, isazeiꞌõꞌwa norĩ hã, ma tô te te wawi ꞌre roꞌwaꞌrutu zaꞌra, te te ꞌre wazadawa uwati zaꞌra mono da aré, iwasuꞌuwẽ na wa te dama ꞌre rowasuꞌu zaꞌra mono tõ da. Ãne tiwasété na ꞌre ihâimana zaꞌra mono zém na, ma tô ꞌre siwasété zaꞌẽtẽ zaꞌra. Tawamhã tâibâ oto. ꞌRe ihâimana uꞌâsi mono hã ma tô wawi roꞌwaꞌrutuꞌwa norĩ hã te te ꞌre wẽꞌõ pese zaꞌra. Rowẽꞌõ, ma tô duré tãma pisutu zaꞌra. Tawamhã isiti te za oto ꞌre nomro uꞌâsi.
Paulu hã Tesalonita u apâ imorĩzém na isiwasuꞌuzé wasuꞌu
17 Wasisãnawã norĩ, isazeiꞌõꞌwa norĩ nhimirobꞌmanharĩzéb zarina, wasiꞌabaꞌré na aihawi zaꞌra waꞌaba, wasiꞌabaꞌréi wamhã, asiti zaꞌra waꞌaba, wa aꞌâ ꞌre wasiꞌubumro. Tane nherẽ, aiꞌrata ꞌre iwasiꞌubumroi uꞌâsi aba mono ne, wa wanhimirosaꞌrata na wa te aiꞌãma ꞌre rosaꞌrata wẽ uꞌâsi zaꞌra waꞌwa. Awaꞌawi hã wapẽꞌẽzé uptabi na, wa ꞌre wahâimana zaꞌra. Tahawa, apâ atẽme wasihutu suꞌu aba da, wa tô wasima waihuꞌu zaꞌra ni, wa te asabu zaꞌra waꞌaba da.
18 Wa te duré asabu téb zaꞌra waꞌaba neza. Wa hã Paulu hã, apâ atẽme ĩmorĩ aba neza. Tahawa, atẽme ĩmorĩ aba da, bâdâ, wa tô nasi ĩsima pisutu. Tane nherẽ, Satanasi hã wanhitobꞌru hã ma tô nasi waꞌãma roꞌwaꞌrutu zaꞌra, ãma atẽme ĩwisi zaꞌra waꞌaba tõ da.
19 Tane tô. Niꞌwam norĩ me asõwaꞌreꞌreb zaꞌra waꞌaba, wasisõpẽtẽ zaꞌra õ di za, Wanhibꞌapito Zezusi apâ wei morĩ wamhã. Niꞌwam norĩ hã, asõwaꞌreꞌreb zaꞌra waꞌaba, te te wama ꞌre rowẽ zani zaꞌra mono õ di za. Wanhibꞌapito wei morĩ wamhã, niꞌwam norĩ hã asõwaꞌreꞌreb zaꞌra waꞌaba, te te dama wawaihuꞌu zaꞌra õ di za, tô sena aima zaꞌra waꞌaba, wa te ꞌre isadawa wasuꞌu zaꞌra mono zém na hã.
20 Tane tô, wato sina, wa wa te ꞌre aiwasuꞌu wẽ zaꞌra waꞌwa dama, a norĩ waꞌwa hã wama ꞌre rowẽ zani zaꞌra waꞌaba mono wa, ꞌRe ihâimana uꞌâsi mono ꞌre isaze zaꞌra waꞌaba mono zém na.
