1 Tesalonita 3:1-13
3 Tawamhã wanhimipari waihuꞌu zaꞌra õ di oto, aiwasuꞌu zaꞌra waꞌwa hã, wa te waihuꞌu zaꞌra ãna wahâimana zaꞌra da hã. Tahawa, wa tô wasima waihuꞌu ni, wasiwaprosi wahâimana da Atena ãma hã,
2 duré wasisãnawã Timotiu wa te ãma atẽme satõrĩ zaꞌra waꞌaba da hã. Ta hã wasiré te te ꞌre romhuri, ꞌRe ihâimana uꞌâsi mono ma romhuri na, Cristuhu wasuꞌuwẽ na. Wa ãma satõrĩ ni atẽme zaꞌra waꞌaba hã te te asiptete zaꞌra waꞌaba da, duré ꞌRe ihâimana uꞌâsi mono asina ꞌre iꞌumnhasi zaꞌra waꞌaba mono zém na, asiptete sina ãma ꞌre aihâimana zaꞌra waꞌaba mono da, te te aipawaptob zaꞌra waꞌaba da,
3 aiwi ꞌmairobzeiꞌõ waꞌaba tõ da, da te aima irobꞌmanharĩ wasété zaꞌra waꞌaba uꞌâbâmhã. Aima waihuꞌu pese zaꞌra waꞌaba di, ãne na tô, wa te ꞌre iroꞌrahâri zaꞌra mono da hã, ꞌRe ihâimana uꞌâsi mono te te waꞌãma ꞌre irowaꞌõtõ zaꞌra mono zéb zarina.
4 E marĩ wa. Tame aiꞌrata wahâimana zaꞌra waꞌaba ré hã, wa tô ãma aipoꞌre puꞌu zaꞌra waꞌaba ni, za da te tô wama ꞌre irobꞌmanharĩ wasété zaꞌra mono na hã. Tawamhã ma tô ãne hã wama tiromhâiba tô. Ã hã aima waihuꞌu pese zaꞌra waꞌaba di.
5 Tahawa, aiwasuꞌu zaꞌra waꞌwa te waihuꞌu ãna ĩhâimana da hã, te oto ꞌwapéi waihuꞌu õ wa, wa ãma atẽme satõrĩ zaꞌra waꞌwa Timotiu hã, Wanhibꞌapito Zezu Cristu asina ꞌre iꞌumnhasi zaꞌra waꞌaba mono zé hã te te waihuꞌu da, asiptete uꞌâsi ãma ꞌre aihâimana zaꞌra waꞌaba mono zô, duré aiꞌãma ĩhâtâꞌâ zaꞌra waꞌaba wa, Dapibuiꞌwa hã te te aipibu zaꞌra waꞌaba õꞌumnhasite niha na, duré uburé wanhimiromhuri zaꞌra hã taré hâimana õꞌumnhasite zama.
Timotiu hã, rowasuꞌu wẽ apâ te te iꞌãwisizé, Paulu norĩ ma
6 Ãhã na hã, Timotiu hã aihawi waꞌaba ma tô we apâ watẽme sina siri zaꞌra. Aiwasuꞌu wẽ zaꞌra waꞌwa hã ma tô we ãwisi, ꞌRe ihâimana uꞌâsi mono asina ꞌre iꞌumnhasi zaꞌra waꞌaba mono zém na duré ꞌre iꞌasisawi pese zaꞌra waꞌaba mono zém na zama. Ma tô duré wama aiwasuꞌu zaꞌra waꞌwa, waꞌãma ꞌre iꞌaipoꞌre puꞌu wẽ uꞌâsi zaꞌra waꞌaba mono na hã duré waꞌmadâꞌâ zahu zaꞌra waꞌaba da, asima iwẽ pese zaꞌra waꞌaba na hã, wa te aiꞌmadâꞌâ zaꞌra waꞌaba da, wa te wasima iwẽ uptabi zaꞌra ne.
7 Ãne wasisãnawã norĩ, ropire hã duré robzépada hã ahâ na wama hâimana zaꞌra nherẽ, aiwasuꞌu zaꞌra waꞌwa hã, ma wama rowẽ pese zaꞌra, wa te wapari zaꞌra wa, asimiꞌumnhasi zaꞌra waꞌaba zé hã.
8 Tahawa, wasisãnawã norĩ, ãhã na hã apâ wa aptete zaꞌra ni, Wanhibꞌapito ãma asiptete sina iꞌaihâimana zaꞌra waꞌaba zé hã wa te waihuꞌu zaꞌra wa.
9 Ãne wa, e niha wa za ꞌRe ihâimana uꞌâsi mono ãma wawata zaꞌra ni, ibâ na hã, asiptete sina ãma ꞌre iꞌaihâimana zaꞌra waꞌaba mono zém na hã duré watoi uptabi na ꞌRe ihâimana uꞌâsi mono nhoꞌre iwahâimana zaꞌra zém na, aiꞌuꞌâbâ zaꞌra waꞌaba hã. Waihuꞌu õ di.
10 Bâtâ na duré mara na zama saꞌẽtẽ, wa wa te ꞌre rowaptẽrẽ uꞌâsi zaꞌra, te te wama pisutu zaꞌra da, wasiꞌuihâ na wa te ãma asabu zaꞌra waꞌaba da, wa te duré aipawaptob zaꞌra waꞌaba da, ꞌRe ihâimana uꞌâsi mono asina ꞌre iꞌumnhasi zaꞌra waꞌaba mono zé hã ibâ na oto aima hâimana zaꞌra waꞌaba da.
11 Wamama ꞌRe ihâimana uꞌâsi mono duré Wanhibꞌapito Zezusi hã siꞌuihâ na bâdâdi te te wama isaꞌra pese zaꞌra da si, ãma atẽme zaꞌra waꞌaba, iwasiꞌabaꞌrézéb da hã!
12 Wanhibꞌapito hã asisawi zaꞌra waꞌaba zé hã duré uburé ꞌre idazawi pese zaꞌra waꞌaba mono zéb zama aima saꞌẽtẽ uꞌâsi zaꞌra waꞌaba mono da, te te aima iꞌmanharĩ zaꞌra waꞌaba da si iwẽ hã, wa te ꞌre iꞌasawi pese zaꞌra waꞌaba mono ne.
13 Duré aipẽꞌẽ ꞌre, te te ꞌre iꞌasiptete uꞌâsi zaꞌra waꞌaba mono da si, iwẽ hã, aiwasédé hã da te aiꞌãma ꞌre saꞌra waihuꞌu zaꞌra waꞌaba mono ãna duré aiwasété ãna zama, Wamama ꞌRe ihâimana uꞌâsi mono nhoꞌre aimasa waꞌaba da, niwa Wanhibꞌapito Zezusi apâ wei morĩ wa, uburé isibꞌaꞌuwẽ norĩ wẽ uptabi na ꞌre ihâimana zaꞌra mono norĩ siré.
