1 Tesalonita 4:1-18
4 Wasisãnawã norĩ, wa tô aima waihuꞌu pari zaꞌra waꞌaba ni, ꞌre iꞌanomro wẽ waꞌaba mono zéb da na, taha zarina, ꞌRe ihâimana uꞌâsi mono hã aiꞌãma ꞌre toi uꞌâsi zaꞌra waꞌaba mono da. Taha zarina, te tô oto ãma ꞌre anomro wẽ waꞌaba mo. Ãhã na wa za duré aima roti pese zaꞌra waꞌaba ni, ꞌre anomro wẽ waꞌaba mono zém nhipai u, asima ꞌre saꞌẽtẽ zaꞌra waꞌaba mono da, Wanhibꞌapito Zezusihi zadawa para.
2 Taha zadawa para, wa te aima ꞌre iroti zaꞌra waꞌaba mono zé hã ma tô oto iwaihuꞌu pese zaꞌra waꞌwa.
3 ꞌRe ihâimana uꞌâsi mono hã ma tô te te sima ꞌre aiwẽ zaꞌra waꞌwa, ꞌre anomro wẽ waꞌaba mono da, piꞌõ norĩ, duré aibâ norĩ zama aihâiba na asiwi ꞌre asimisaihuri siꞌuiwa zaꞌra waꞌaba mono zé hã aiꞌãma ꞌre hâimana zaꞌra waꞌaba mono tõ da oto.
4 Aibâ norĩ hã aimro si te za ꞌre iꞌmadâꞌâ zaꞌra waꞌaba mo, aiwasédé hã ꞌre ꞌmanharĩ zaꞌra waꞌaba mono tõ da.
5 ꞌRe irowasutu zaꞌra waꞌaba mono zô si asima ꞌre robꞌruiwapari zaꞌra waꞌaba mono õ di za. Ta hã, isazeiꞌõꞌwa norĩ ꞌre ihâimana zaꞌra mono zé, ꞌRe ihâimana uꞌâsi mono te te waihuꞌu zaꞌra õ wa.
6 Tane ꞌre anomro aba mono õ di za. Isazeiꞌwa norĩ hã, asisãnawã te ꞌre anomro aba mo. Tahawa, asisãnawãi mro nherẽ, asiwi ꞌre upi zaꞌra waꞌaba mono õ di za, asiwi ꞌre asimisaihuri zaꞌra waꞌaba mono tõ da, aiwasédé hã duré asiꞌãma ꞌre ꞌmanharĩ zaꞌra waꞌaba mono tõ da. Tane, niꞌwa hã tiwasédé te te ꞌre ꞌmanharĩ mono wamhã, ꞌRe ihâimana uꞌâsi mono hã te za niha tãma robꞌmanha. Ãne tô sena, wa tô aima waihuꞌu zaꞌra waꞌaba ni, waihuꞌu pese zaꞌra waꞌaba da. Tane nherẽ, wa duré ãma aima sahu zaꞌra waꞌaba ni.
7 Aibâ norĩ, aimro hâiba upana aimawi piꞌõ hã ꞌre upi zaꞌra waꞌaba mono õ di za. Duré piꞌõ norĩ hã aimro hâiba upana aimawi aibâ hã ꞌre upi zaꞌra waꞌaba mono õ di za. Dahâimana nhiséb õ ré, ꞌre wanomro mono da, ꞌRe ihâimana uꞌâsi mono te te sima ꞌre waꞌapisutu mono õ di. Wanhimiꞌẽ na ãma ꞌre wanomro wẽ uptabi mono da si, ma tô te te sima ꞌre waꞌapisutu.
8 Tahawa, ãne wa te aima iroti zaꞌra waꞌwa hã, asiwi wẽꞌõ zaꞌra waꞌaba õ di za. Niꞌwa hã te te siwi wẽꞌõ wamhã, e ta hã tiꞌai ãma dahâiba te za siwi wẽꞌõ. Mare di. ꞌRe ihâimana uꞌâsi mono te za siwi wẽꞌõ, wama Tipẽꞌẽzani nhomriꞌwa hã.
9 Isazeiꞌwai mono bâ ꞌre asisawi pese zaꞌra waꞌaba mono zém na, wa te aima robꞌuiꞌéré zaꞌra waꞌaba õ di za oto. Tô sena ma tô ꞌRe ihâimana uꞌâsi mono hã siꞌuihâ na ãma aima rowahutu zaꞌra waꞌwa, ꞌre asisawi pese zaꞌra waꞌaba mono zéb da hã.
10 Ma tô ꞌre idazawi pese zaꞌra waꞌaba mo tô, Masédonia na danhiptiꞌa nhoꞌõmo nhisi ãma ꞌre idasiꞌubumroi mono norĩ hã, ꞌRe ihâimana uꞌâsi mono te te ꞌre isaze zaꞌra mono norĩ hã. Tane nherẽ, wa aima roti pese zaꞌra waꞌaba ni, asimizawi pese zém nhipai u, asima ꞌre saꞌẽtẽ zaꞌra waꞌaba mono sina, iwẽ uptabi hã ꞌre ꞌmanharĩ zaꞌra waꞌaba mono da.
11 Aiꞌrata wasiꞌubumroi waꞌaba ré, ãne wa tô aima roti zaꞌra waꞌaba ni, rowẽ na si ꞌre aihâimana zaꞌra waꞌaba mono da, duré asima ꞌre ropibui wẽ zaꞌra waꞌaba mono da, duré asimiꞌẽ na asiꞌuihâ na aihâimanazéb da, ꞌre romhuri zaꞌra waꞌaba mono da, aihâiba mono bâ waꞌaba. Ãne, wa tô aima roti zaꞌra waꞌaba ni. Ãne iwẽ uptabi hã te za tô ꞌre iꞌmanharĩ uꞌâsi zaꞌra waꞌaba mo.
12 Tawamhã danhoꞌa ꞌre anomro wẽ waꞌaba mono wa, isazeiꞌõꞌwa norĩ hã te za te te ꞌre aiwẽsãmri zaꞌra waꞌwa. Te za duré te te oto ꞌre aiwazéb zaꞌra waꞌwa. Duré asimiꞌẽ na ꞌre romhuri zaꞌra waꞌaba mono wamhã, ꞌre dawari zaꞌra waꞌaba mono ãna, te za ꞌre anomro aba mo.
Uburé Danhibꞌapito Zezu Cristu apâ za we imorĩzé wasuꞌu
13 Wasisãnawã norĩ, niꞌwa hã ꞌRe ihâimana uꞌâsi mono zazeiꞌõꞌwa, dawi dâꞌâ wamhã, te za isiré norĩ hã ãma ꞌre pẽꞌẽzé pese zaꞌra, apâ ꞌre idahâiwaꞌutu zaꞌra mono zé wasuꞌu hã te te ꞌre waihuꞌu zaꞌra mono õ wa. Tanei õ di za, a norĩ waꞌwa hã. Tahawa, wa wasima wẽ zaꞌra ni, sena na waihuꞌu zaꞌra waꞌaba da, dadâꞌâ wasuꞌu hã.
14 Zezusi hã ma tô dârâ. Ma tô pẽꞌẽhaiꞌutõ. Pẽꞌẽ siꞌutõrĩ nherẽ, ma tô apâ hâiwaꞌudu. Ãhã na te oto ꞌre morĩ uꞌâ. Ãne na hã wa tô saze zaꞌra ni. Tahawa, wa tô duré waihuꞌu zaꞌra ni, isazeiꞌwa norĩ hã ꞌre dâꞌâ zaꞌra mono wamhã, apâ ꞌre ihâiwaꞌutu zaꞌra mono zém na hã. ꞌRe ihâimana uꞌâsi mono hã te za apâ te te ꞌre ahâiwaꞌutu, Zezusi te te apâ ihâiwaꞌutu ne.
15 Tawamhã Wanhibꞌapito we apâ wazô morĩ zaꞌra wamhã, ãté wa norĩ hã zahadu wahâiba ré ꞌre wanomro mono ré, te za wei mo. Tawamhã ꞌre idâꞌâ zaꞌra mono norĩ wana, itẽme wasihutu õ di za. Ãne Wanhibꞌapito te te wama irowahutu zaꞌra zarina, wa aima rowasuꞌu zaꞌra waꞌaba ni.
16 Tô sena, Wanhibꞌapito hã te za wei wazô siꞌra zaꞌra, hâiwa hawi. Tawamhã te za tãma waꞌru zaꞌra, hâiwa ãma tãma iromhuri pese ꞌwai ma. Hâiwa ãma tãma iromhuri pese ꞌwa hã, te za wei hâ, hârâ ꞌrãihâ na, ꞌRe ihâimana uꞌâsi mono nhimnhihârâzém na. Tawamhã isazeiꞌwa norĩ hã ꞌre idâꞌâ zaꞌra mono norĩ hã, te za uimrehẽne apâ hã hâiwaꞌutu zaꞌra za.
17 Tawamhã wa norĩ hã isazeiꞌwa norĩ, zahadu wahâiba ré ꞌre iwahâimana zaꞌra mono norĩ hã, apâ ihâiwaꞌutu zaꞌra norĩ me, te za sitẽme waꞌubumro awaꞌawi, hâiwaꞌa ãma. Tawamhã Wanhibꞌapito ãhã wamhã wa za oto aihĩni sõpẽtẽ zaꞌra ni, hâiwa nhoꞌre ãma. Tawamhã iꞌrata wa za oto ꞌre wahâimana uꞌâsi zaꞌra.
18 Ãne te za iwasuꞌu na ꞌre asipawaptob uꞌâsi zaꞌra waꞌaba mo.
