2 Corĩtu 13:1-14
13 Siꞌubdatõ, ãma atẽme zaꞌra waꞌaba ĩmorĩ na hã wa za oto sahu, te asabu zaꞌra waꞌaba da. ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne: “Niꞌwam norĩ da, ꞌre dawasété zaꞌra mono wamhã, maparane dahâiba ma, te za ꞌre siwasuꞌu zaꞌra, ta norĩ hã danhoꞌa te te ꞌre sadawa waptob zaꞌra mono da, tãma ꞌre isiwasuꞌu zaꞌra mono zém na hã.” Tawamhã wa hã ãma atẽme ĩmorĩ aba wamhã, taha zarina, wa za tô sena zarina, aiwasété zaꞌra waꞌaba na hã aiwaihuꞌu zaꞌra waꞌwa.
2 Maparane ãma, ĩmorĩ na te ãma atẽme sahu zaꞌra waꞌaba wamhã, wa tô aima waihuꞌu siromo zaꞌra waꞌwa, aiwasédé ꞌre iꞌmanharĩ uꞌâsi zaꞌra waꞌaba mono norĩ, za te iꞌaihâ zaꞌra waꞌaba zém na hã. Ĩnhimiꞌuiꞌéré na, wa za oto ãne na aima ãma sahu zaꞌra waꞌwa, asiti zaꞌra waꞌaba ĩhâimana nherẽ. Ãma atẽme ĩmorĩ aba wamhã, ĩnhimiꞌahârizé hã te aima baꞌa zaꞌra waꞌaba õ di za, aiwasédé ꞌre iꞌmanharĩ uꞌâsi zaꞌra waꞌaba mono norĩ ma hã, duré ĩzaꞌu si tiwasété zô ꞌre isipizari zaꞌra mono norĩ ma zama.
3 Sena na Cristuhu zadawa para, te aima ꞌre irowasuꞌu zaꞌra waꞌaba mono na, asiwi ĩwaihuꞌu zaꞌra waꞌaba da, ma tô ãne na asima ĩꞌãma irosaꞌrata zaꞌra waꞌwa. Tane tô wẽ di, ĩma hã. Ãma atẽme ĩmorĩ aba wamhã, Cristuhu zadawa para, wa za tô aihâ zaꞌra waꞌwa. Tawamhã ãté te za oto asiwi ĩwaihuꞌu zaꞌra waꞌwa, sena na Cristuhu zadawa para, te aima ꞌre irowasuꞌu zaꞌra waꞌaba mono na hã. Cristu hã niha te te aima irobꞌmanharĩ zaꞌra waꞌaba zéb da hã, e sibꞌuware bâ za, asada zaꞌra waꞌaba hã za. Mare di. Siptete uptabi di ta hã, te te iꞌaihâ zaꞌra waꞌaba zéb da hã.
4 Cristu hã wedepoꞌo nhonhiꞌrãmi na, da te dasiwi sasõmri wamhã, ihâiba hã sibꞌuware di. Tane nherẽ, ꞌRe ihâimana uꞌâsi mono nhiptetezém na ma tô apâ hâiwaꞌudu, ꞌre hâimana uꞌâsi mono da oto. Tane, wa tô duré wa norĩ hã wanhibꞌuware na ꞌre wahâimana. Tane nherẽ, ꞌRe ihâimana uꞌâsi mono nhiptetezém na, wa duré ꞌre wahâimana, Cristuhu ne. Taha zarina, wa za niha aima robꞌmanharĩ zaꞌra waꞌaba ni, wasiꞌuihâ nai õ nherẽ.
5 Aipẽꞌẽ ꞌre, te za aꞌâ ꞌrâwi asiꞌmadâꞌâ zaꞌra waꞌwa, isazeiꞌwa norĩ hâimanazéb zarina, tô sena ꞌre aihâimana zaꞌra waꞌaba mono zô. Ãne na asina tãma ꞌre uwaimrami zaꞌra waꞌaba mono wamhã, Zezu Cristu, aipẽꞌẽ ꞌre, ꞌre isãmra aba mono na, te za asina iwaihuꞌu zaꞌra waꞌwa. E ãne hã asina ꞌre waihuꞌu zaꞌra waꞌaba mono õ di bété. Tane nherẽ, Cristu hã aipẽꞌẽ ꞌre, ꞌre sãmra aba mono õ wamhã, asina tãma ꞌre iꞌuwaimrami zaꞌra waꞌaba mono õ na, te za asina iwaihuꞌu zaꞌra waꞌwa, asiꞌuihâ na ꞌrâwi.
6 Wa hã wa ãma ĩsima aiwẽ zaꞌra waꞌwa, ãma atẽme ĩmorĩ aba wamhã, asiwi wawaihuꞌu zaꞌra waꞌaba da, ꞌRe ihâimana uꞌâsi mono zadawa ꞌmahârâꞌwa norĩ ꞌre ihâimana zaꞌra mono zém na, wa te wasina ãma iꞌuwaimramizém na hã.
7 Wa duré ꞌre wamreme uꞌâsi, aiꞌãma zaꞌra waꞌaba, ꞌRe ihâimana uꞌâsi mono ma, ta hã te te ꞌre aipawaptob uꞌâsi zaꞌra waꞌaba mono da, marĩ iwasétére hã ꞌre ꞌmanharĩ zaꞌra waꞌaba mono tõ da. E aiꞌãma zaꞌra waꞌaba, wa te ꞌre iromhuri mono na, da te dasiwi ꞌre wawẽsãmri mono da, wa ãne hã aiꞌãma ꞌre wamreme uꞌâsi zaꞌra waꞌwa. Mare di. Taré a norĩ waꞌwa hã iwẽ si oto ꞌre ꞌmanharĩ uꞌâsi zaꞌra waꞌaba mono da si, wa aiꞌãma ꞌre wamreme uꞌâsi zaꞌra waꞌwa, ꞌRe ihâimana uꞌâsi mono ma hã. Iwẽ si tô ꞌre ꞌmanharĩ zaꞌra waꞌaba mono wamhã, wa te aihâ zaꞌra waꞌaba õ di za. Ãne wamhã, ãté te za ãne na waꞌãma irosaꞌrata zaꞌra waꞌwa, asima: “Oro Paulu norĩ hã, Zezusihi zadawa wasuꞌuꞌwa, tô sena ꞌre hâimana zahuré mono za, te te wahâ zaꞌra õ di.” Ãté ãne na te za waꞌãma irosaꞌrata zaꞌra waꞌwa. Tane nherẽ, wama wẽ di tô, iwẽ si tô ꞌre ꞌmanharĩ uꞌâsi zaꞌra waꞌaba mono wamhã.
8 Cristuhu wasuꞌuwẽ hã tô sena uptabi hã, niꞌwa te te dawi pari waihuꞌu õ di, dama siptete uptabi wa, iwasuꞌuwẽ hã. Taha zarina si, wa za tô ꞌre wahâimana, wa norĩ hã, ꞌrâwi wa te wasiwi ꞌre wẽꞌõ mono ãna.
9 A norĩ waꞌwa hã tô sena Cristuhu ãma asiptete sina ꞌre anomro wẽ waꞌaba mono wamhã, wa za tô aima ꞌre wato zaꞌra waꞌwa. Ãne wamhã, Cristuhu zadawa para, wa te aihâ zaꞌra waꞌaba õ di za. Wa te aihâ zaꞌra waꞌaba õ wamhã, ãté niꞌwam norĩ hã te za waꞌãma sima rosaꞌrata wasété zaꞌra, wawẽꞌõꞌwa norĩ hã, aima wapahi zaꞌra waꞌaba na hã. Tane nherẽ, wẽ di tô wama hã, tô sena Cristuhu ãma si oto ꞌre anomro wẽ waꞌaba mono wamhã.
10 Ãne wa, wa asiti ĩnhamra aba ré, aima ãma robꞌuiꞌéré zaꞌra waꞌwa, za ãma atẽme ĩwisi aba wa, asõꞌa te aima nharĩ zaꞌra waꞌaba tõ da, Wanhibꞌapito zadawa para te te ĩma ipisutuzéb zarina. Ma tô ĩma pisutu tô, isadawa para si te ꞌre aipawapto wẽ zaꞌra waꞌaba mono da. E tawamhã ĩnhimipawaptobzéb zarina, ãma ꞌre anomro wẽ waꞌaba mono zé hã te aiwi ꞌre uprosi zaꞌra waꞌaba mono da, ma tô ãne hã ĩma pisutu. Mare di. Taré isadawa para si, te ꞌre aipawapto wẽ zaꞌra waꞌaba mono zéb zarina, asiptete sina ãma ꞌre anomro aba mono da si, ma tô ĩma pisutu tô, Wanhibꞌapito hã.
11 Ĩsisãnawã norĩ, ĩnhimiꞌuiꞌéré na wa za oto aima ãma ꞌrãsutu zaꞌra waꞌwa. ꞌRe aihâimana wasété zaꞌra waꞌaba mono zé hã te za oto irẽme pese zaꞌra waꞌwa. Te aima ꞌre iroti zaꞌra waꞌaba mono zé hã te za ꞌre iwapari pese zaꞌra waꞌaba mo. Tahawa, te za simisutu asimirosaꞌrata na ꞌre asisazei pese zaꞌra waꞌaba mo. Rowẽ na si asiré ꞌre aihâimana uꞌâsi zaꞌra waꞌaba mono da, te za duré asina ꞌre irosaꞌrata wẽ uꞌâsi zaꞌra waꞌaba mo. Ãne wamhã, ꞌRe ihâimana uꞌâsi mono hã isimizawi pe hã, te za ꞌrâwi asiré ꞌre hâimana uꞌâsi zaꞌra waꞌwa, dama rowẽ nhomriꞌwa hã.
12 Tahawa, te za uburé asiré isazeiꞌwa na ꞌre aihâimana zaꞌra waꞌaba mono wa, asõꞌutu na asisawi sina ꞌre asitobꞌrata hârâ zaꞌra waꞌaba mo.
Ãme, ꞌRe ihâimana uꞌâsi mono nhibꞌaꞌuwẽ ꞌre isiꞌubumroi mono norĩ hã te ãma asawi zaꞌra waꞌwa, uburé.
13 Wanhibꞌapito Zezu Cristuhu ma, wa aiꞌãma ꞌre ĩmreme uꞌâsi zaꞌra waꞌwa, ta hã te te ꞌre asawi pese zaꞌra waꞌaba mono wa, te te ꞌre aipawaptob uꞌâsi zaꞌra waꞌaba mono da. ꞌRe ihâimana uꞌâsi mono hã tinhimizawi pese zéb zarina, iwẽ si te te aima ꞌre pisutu zaꞌra waꞌaba mono da, wa duré aiꞌãma tãma ꞌre ĩmreme uꞌâsi zaꞌra waꞌwa, duré Ipẽꞌẽzani hã te te ꞌre aipawaptob uꞌâsi zaꞌra waꞌaba mono da, simisutu ãma ꞌre anomro wẽ waꞌaba mono da, taha ãma si.
14 ——
