2 Zuã 1:1-13
1 Wa hã, Wanhibꞌapito zazeiꞌwa norĩ ꞌmadâꞌâꞌwa, wa ãma aima robꞌuiꞌéré zaꞌra waꞌwa, Piꞌõi ma duré iꞌra norĩ ma*, tô sena ĩma iꞌasawi pese zaꞌra waꞌaba norĩ ma. Ĩwétési õ di. Uburé ꞌRe ihâimana uꞌâsi mono nhimiroti tô sena ꞌre ihâimana mono waihuꞌuꞌwa norĩ zama, te te asawi pese zaꞌra waꞌaba di.
2 Wama asawi pese zaꞌra waꞌaba di, tô sena ꞌRe ihâimana uꞌâsi mono nhimiroti ꞌre ihâimana mono, wasiré ꞌre ihâimana uꞌâsi zaꞌra mono uꞌâbâ. Ta hã te za wasiré ꞌre hâimana uꞌâsi zaꞌra.
3 Wamama ꞌRe ihâimana uꞌâsi mono duré Wanhibꞌapito Cristu Zezusihi zama, isimizawi zahuré zé hã waꞌãma ꞌre ihâimana uꞌâsi zaꞌra mono da si, duré waꞌãma ꞌre ipẽꞌẽzé uꞌâsi zahuré mono da si, rowẽ uꞌâsi, ãma ꞌre wanomro mono da, tô sena ꞌRe ihâimana uꞌâsi mono nhimiroti ꞌre ihâimana mono na duré isimizawizém na.
Tô sena ꞌRe ihâimana uꞌâsi mono nhimiroti duré isimizawizé
4 Nima norĩ aiꞌra norĩ waꞌwa hã, te sõpẽtẽ zaꞌra wa, ma tô ĩma tirowẽ pese, tô sena ꞌRe ihâimana uꞌâsi mono nhimiroti zarina ꞌre hâimana zaꞌra mono wa, Wamama hã te te wama iꞌru zaꞌra zéb zarina.
5 Tahawa, ĩma iꞌasawi pese zaꞌra waꞌaba norĩ, ãhã na hã wa za aiwi waptẽrẽ zaꞌra waꞌwa, ꞌre iwasisawi pese zaꞌra mono da si. ꞌRe ihâimana uꞌâsi mono nhimiroti itém na te aima rowasuꞌu zaꞌra waꞌaba õ di. Tazahã, ã hã wa te ꞌre isaze naꞌrata zaꞌra mono hawim haré, wa te ꞌre iwapari zaꞌra mono.
6 Danhimizawi pese zé hã, ãne: ꞌRe ihâimana uꞌâsi mono nhimiroti zahi, wa te ꞌre ꞌmadâꞌâ pese zaꞌra mono sina, wa za ꞌre wahâimana zaꞌra. ꞌRe isaze naꞌrata zaꞌra waꞌaba mono hawim haré, ma tô ꞌre iwapari zaꞌra waꞌaba mo, ã hã: ꞌRe asisawi uꞌâsi zaꞌra waꞌaba mono sina, ꞌre iꞌanomro aba mono da si.
7 Dama robꞌrãmiꞌwa norĩ hã ahâ na ma tô ropâ oto sihâiꞌré zaꞌra. Ta norĩ hã, Zezu Cristu tiꞌai ãma aꞌuwẽ na ipoto na te te ꞌre udâ zaꞌra. Niꞌwa hã ãne te te ꞌre iꞌmanharĩ mono hã, ta hã Dama Robꞌrãmiꞌwa, duré Cristuhu Nhitobꞌru.
8 Tahawa, maꞌãpé ãma ꞌre pibui pese zaꞌra waꞌaba mono, romhuri wa te atẽme iꞌmanharĩ zaꞌra waꞌaba zé hã, simini zaꞌra waꞌaba tõ da, aipawaꞌâ hã wahuré waibui waꞌaba da.
9 Niꞌwa hã Cristuhu nhimiroti na ꞌre hâimana mono õ wamhã, duré sihawi ãma sipai wamhã, taha siré ꞌRe ihâimana uꞌâsi mono ꞌre hâimana mono õ di. Tanei õ di, niꞌwa hã Cristuhu nhimiroti na ꞌre hâimana mono wamhã, Wamama hã te za isiré ꞌre hâimana duré Iꞌra zama.
10 Niꞌwa atẽme wisi aba wamhã, Cristuhu nhimiroti ré atẽme morĩ aba õ nherẽ, asõrõwa u hã âri aba tõ. Duré sawi aba tõ.
11 Niꞌwa hã timreme na si te te sawi nherẽ, te za isiré oto tiwasété, isimiromhuri wasété na hã.
Zuwãhã nhimiꞌuiꞌéré iꞌrãsudu
12 Zahadu marĩ ahâ di, te aima iwasuꞌu zaꞌra waꞌaba da hã. Tane nherẽ, te ĩsima wẽ õ di, robꞌuiꞌéré na te aima ãma irowasuꞌu zaꞌra waꞌaba da hã. ꞌRâwi te iꞌasabu zaꞌra waꞌaba da si, wa ĩsima wẽ, ĩsiꞌuihâ na te aima rowasuꞌu zaꞌra waꞌaba da, watoi uptabi zé hã wahuré wama hâimana zaꞌra da.
13 Isazeiꞌwa norĩ hã, ꞌRe ihâimana uꞌâsi mono te te sima ipisutu zaꞌra norĩ hã, te ãma asawi zaꞌra waꞌwa.
Ĩwaꞌõtõ piꞌreba watsuꞌu mono
^ 1:1 “Piꞌõi ma, duré iꞌra norĩ ma”, Isazeiꞌwa norĩ ꞌmadâꞌâꞌwa duré isazeiꞌwa norĩ, te wasuꞌu.
