2 Timotiu 1:1-18
1 Wa hã Paulu, Cristu Zezusihi zadawa wasuꞌuꞌwa da, ꞌRe ihâimana uꞌâsi mono te te sima iwẽzéb zarina te te ĩpisudu, dahâimanazé isiꞌutõrĩꞌõ na ropisudu, Cristu Zezusihi ãma ꞌre ihâimana mono na te dama ãma ꞌre robꞌmahârâ mono da,
2 ĩꞌra Timotiu ĩma iꞌasawi pe hã wa ãma aima robꞌuiꞌéré.
Wamama ꞌRe ihâimana uꞌâsi mono nhimizawi pese zé duré ihawi rowẽ uꞌâ hã duré Zezu Cristu Wanhoꞌreptuiꞌwa te hã asiré ꞌre ihâimana mono da si, iwẽ hã.
Paulu hã, Timotiuhu ma te te irotizé
3 Rowaptẽrẽ na aiꞌãma ꞌre ĩpoꞌre puꞌu mono sidâpâ, ꞌRe ihâimana uꞌâsi mono ãma wa ꞌre ĩwata uꞌâsi, mara na duré bâtâ na zama, marĩ na ꞌrâwi ĩpẽꞌẽ na ꞌre ĩsiwẽꞌõ mono ãna, te tãma ꞌre iromhuri mono ma, wahiꞌrata norĩ hã te te tãma ꞌre iromhuri zaꞌra mono ne.
4 Aiwaꞌõi wa atõmo u na wa ãma ꞌre ĩsipoꞌre puꞌu uꞌâsi. Wa ĩsima wẽ pese, te duré asabu zahu da, ĩtoi uptabi na ĩhâimana da.
5 Wanhibꞌapito sena na asina ꞌre iꞌumnhasi mono zém na wa ãma ꞌre ĩpoꞌre puꞌu uꞌâsi, aiꞌrada Loidi duré ana Eunisihi zama te te sina ꞌre iꞌumnhasi zahuré mono ne, asina ꞌre umnhasi mono wa. Tahawa tô ĩma hã, isine zahuré te aima ꞌre hâimana, asimiꞌumnhasizé hã.
6 Tahawa, wa ĩsima wẽ, ãma ꞌre aipoꞌre puꞌu mono da, ꞌRe ihâimana uꞌâsi mono hã sõpru wa, te te aima isõmrizém na, dapawaptom na tãma ꞌre iromhuri mono da hã, ĩnhibꞌrada te aiꞌãma hiri wamhã.
7 E marĩ wa. ꞌRe ihâimana uꞌâsi mono, Tipẽꞌẽzani te te wama ꞌre iꞌanhomri mono hã te te ꞌre waꞌaꞌmanharĩ mono õ di, wapahi na ꞌre wahâimana zaꞌra mono da hã. Tazahã Ipẽꞌẽzani hã te wanhiptede te te wama ꞌre anhomri, duré wanhimizawizé duré wawaimri na iꞌuwaibaba na ꞌre iwahâimana zaꞌra mono zé hã.
8 Tahawa, ꞌre asisé mono tõ, Wanhibꞌapito wasuꞌuwẽ dama ꞌre iwasuꞌu mono da hã. Duré ĩꞌuꞌâbâ ꞌre asisé mono tõ, dazazéb ꞌre ĩza wa, te tãma ꞌre iromhuri mono uꞌâbâ. Iwaꞌrãmi ꞌRe ihâimana uꞌâsi mono hawi asiptede aima ꞌre ihâimana mono na si, asimizaꞌrese ꞌre aihâimana mono, ĩsiré ꞌre robzépata mono da, Rowasuꞌuwẽ itéb uꞌâbâmhã.
9 ꞌRe ihâimana uꞌâsi mono hã ma tô waꞌanhoꞌreptu. Ma tô duré waꞌapisutu, isibꞌaꞌuwẽ na ꞌre wanomro mono da. Mare di, marĩ iwẽ, wa te ꞌre iꞌmanharĩ zaꞌra mono uꞌâbâmhã. Tazahã, tô ã hã ite rowaꞌõtõ wa, duré isimizawi pese uꞌâbâ. Õ hã ma tô ã hã tinhimizawizé wama sõmri zaꞌra Cristu Zezusihi uꞌâbâ, uburé te te aropoto mono wana ré.
10 Ta hã isimizawizé hã, ãhã na si ma tô oto wama sihâiꞌré zaꞌra, wẽ uptabi na Cristu Zezusi Waꞌanhoꞌreptuiꞌwa we isihâiꞌrézém na hã. Õ hã ma tô dadâꞌâ nhiptetezém na ãma aiꞌuté. Duré Rowasuꞌuwẽ itém na ma tô hâiꞌré, dahâimanazé isiꞌutõrĩꞌõ hã.
11 Ta hã Rowasuꞌuwẽ ité ꞌmahârâꞌwa da, ma tô ꞌRe ihâimana uꞌâsi mono hã ĩpisutu, duré isadawa wasuꞌuꞌwa da duré rowahutuꞌwa da zama.
12 Tahawa, wa ã hã marĩ hã te ꞌre azépata. Tane nherẽ, zahadu wa ĩsiwawãi ãna te ꞌre robꞌumnhasi. E marĩ wa. Ĩma waihuꞌu pese wa, te isaze hã. Duré ĩma waihuꞌu pese di, Õ hã iwaihuꞌu pese uptabi na te te ꞌre ĩꞌmadâꞌâ mono da hã, te ꞌre ꞌmanharĩ mono da, te te ĩma ipisudu hã bâdâ iwa iwaptãꞌãzéb u.
13 Aima ꞌre hâimana mono, roti tô sena ĩꞌãma iwaihu hã, ãma aima ĩsisanho zarina. Ãne hã asiptete sina ãma ꞌre aihâimana mono, asina ꞌre iꞌumnhasi mono zém na, duré asimizawi pese zém na, Cristu Zezusihi ãma ꞌre aihâimana mono wa.
14 ꞌRe ihâimana uꞌâsi mono Pẽꞌẽzani siptete uptabi na waꞌãma ꞌre ihâimana zaꞌra mono zarina, maꞌãpé asima ꞌre ꞌmadâꞌâ pese mono, danhibro iwẽ uptabi ne, da te aima isõmri hã.
15 Aima waihuꞌu pese di, Azia na danhiptiꞌa nhoꞌõmo nhisi ãma wasisãnawã norĩ ꞌre isiꞌubumroi mono norĩ te te siwi ĩrẽme na hã. Fizelu norĩ Emozenihi me ma tô dame ĩrẽme zahuré.
16 Wanhibꞌapito hã, Onezifuru sipoto hawi aꞌuwẽ norĩ ãma ꞌre isiwamri mono da si, ta hã te te ꞌre ĩnhiptete mono wa, duré ĩꞌuꞌâbâ siséb õ wa, dazazéb ꞌre ĩza wa!
17 Tazahã, ta hã Roma u wei wisi wamhã, ma tô ĩzô ꞌre rĩtĩ, te te ĩnhopẽtẽzéb u.
18 Wanhibꞌapito hã te te tãma iꞌmanharĩ da si, bâdâ Daꞌãma Rowairébézé iwa waptãꞌã wamhã, isiwamrizé te te isõpẽtẽ da si! Éfézu ãma romhuri hã te te ꞌmanharĩ wa, ĩꞌãma isime zaꞌẽtẽ na hã aima waihuꞌu pese di, ĩnhipai u.
