2 Timotiu 4:1-22
4 4:1-2 Wa za oto marĩ hã aima waihuꞌu, ꞌRe ihâimana uꞌâsi mono nhoꞌa, Cristu Zezusihi nhoꞌa zama. Nimahã bâtâ na te za Cristu Zezusi hã dahâimanazém na daꞌawaihuꞌu, dawasété na, dawẽ na zama. Taha zarina, te za aihĩni norĩ ma dama arowairébé, dahâiba ré norĩ ma, duré adâꞌâ norĩ ma zama. Wanhibꞌapito hã te za wei mo apâ, Danhibꞌapito uptabi na oto dama ꞌre sãmra mono da. Ãne wa, wa za aima tiꞌru. Maꞌãpé, Wanhibꞌapito wasuꞌuwẽ na dama ꞌre rowasuꞌu uꞌâsi mono za. Asô danhimiparizém na, duré asô danhimipari õ zém na zama, te za Wanhibꞌapito wasuꞌuwẽ na ꞌre idaꞌapoꞌre puꞌu uꞌâsi mo. Daꞌãma aiwaꞌa ãna, te za asimiroti na ꞌre idaꞌapawapto mo, dawasété na ꞌrâwi ꞌre dasisãmri zaꞌra mono da, dawasédé hã da te ꞌre rẽme pese zaꞌra mono da, dawẽ na si oto ꞌre dahâimana zaꞌra mono da.
2 ꞌMadâꞌâ 4:1
3 E marĩ wa, wa ãne aima tiꞌru. Nimahã na hã sena roti hã da te ꞌre wapari ze zaꞌra mono õ di za. Rowasuꞌu hã da te ꞌre iwapari ze zaꞌra mono zéb uwaibaba si, te za da te ꞌre wapari zaꞌra. Dama rowahutuꞌwa da, te za daꞌahâ na da te dasima ꞌre pisutu zaꞌra, rowasuꞌu hã da te ꞌre iwapari ze zaꞌra mono zéb uwaibaba si, te te dama ꞌre rowasuꞌu zaꞌra mono da.
4 Roti tô sena uptabi hã te za da te ꞌre rẽme zaꞌra, da te ꞌre wapari zaꞌra mono tõ da, dahiꞌrata norĩ nhimirobꞌrãzarõtõ ꞌrata si rowasuꞌu senai õ hã, da te ꞌre wapari zaꞌra mono da oto.
5 Ta norĩ ne ꞌre aihâimana mono õ di za. Asimizaꞌrese te za ꞌre aihâimana mo. Te za duré aihâimanazém na ãma ꞌre ipibui pese mo. Duré, Wanhibꞌapito zazeiꞌwa ꞌre aimorĩ ꞌru te, da te dasiwi aima ꞌre robꞌmanharĩ wasété mono nherẽ, ꞌre asisawi mono õ di za, ꞌre robzépata mono tõ da. Te za duré Wanhibꞌapito wasuꞌuwẽ na ꞌre idaꞌapoꞌre puꞌu uꞌâsi mo, ꞌRe ihâimana uꞌâsi mono te te aima ipisutuzéb zarina, asimiromhuri na tãma ãma ꞌre uwaimrami mono da.
6 Wa za oto aima ĩsiwasuꞌu. Ĩnhibâdâ romhuture di oto. Wanhibꞌapito zadawa wasuꞌuꞌwa ꞌre ĩmorĩ ꞌru te, za da te dasiwi ĩwĩrĩ nherẽ, ĩdâꞌâ tõ da hã, ĩsisawi õ di za.
7 4:7-8 ꞌRe dasiꞌwamhâri zaꞌra mono wa, danhiptete na dasiwi ꞌre idawairébé mono ne, wa tô wa hã ĩnhiptete na ꞌre ĩpusi. Duré dawara na dawi ĩwatobro ne, wa ꞌre ĩhâimana, Wanhibꞌapito ma, ĩnhimiromhuri na te ĩsina tãma uwaimrami pari wa. Cristu umnhasi sina, wa tô duré ꞌre morĩ uꞌâ, isimiroti ꞌmadâꞌâ sina. Niꞌwa hã dawara na dawi watobro wẽ te, te za ropsu ꞌmanharĩ hã sô tihâiba, da te ãma isõprezéb da hã. Tane, te marĩ iwẽ uptabi hã ĩzô ꞌre hâimana, Wanhibꞌapito ma, ĩnhimiromhuri na te ĩsina tãma uwaimrami wẽ te. Nimahã na te za bâdâ hã iwa waptãrã, Wanhibꞌapito apâ we imorĩzéb da hã, dahâimanazém na te te idaꞌawaihuꞌuzéb zarina, te te daꞌãma iꞌarowairébézéb da hã. Tawapsi, ta hã wẽ uptabi wa, te za marĩ iwẽ uptabi hã ĩma pisutu, iꞌuwaibaba si. E ĩma si te za pisutu. Mare di. Aihĩni Wanhibꞌapito zawi sina, wei imorĩzéb zô ꞌre isimipari zaꞌra mono norĩ ma zama, te za duré marĩ iwẽ uptabi hã tãma pisutu zaꞌra.
8 ꞌMadâꞌâ 4:7
Paulu hã Timotiuhu ma, marĩ na te te ipoꞌre puꞌuzém na rowasuꞌu
9 Maꞌãpé, we asima rowairébé, we ĩtẽme aimorĩ hâ, ĩzabu da.
10 Demasi hã ĩꞌãma sapaꞌa õ di oto. Ma tô ĩwi watobro, Tesalonita na ꞌri nhoꞌõmo nhisi u morĩ da, marĩ hã te te sima iꞌawẽ zarina, taha na si oto ꞌre morĩ da. Cresẽti hã ma tô mo, Galasia na danhiptiꞌa nhoꞌõmo nhisi u. Titu hã ma tô duré mo, Damasiza na danhiptiꞌa nhoꞌõmo nhisi u.
11 Lucaha si te ĩꞌrata nhamra. Ãhã wa, Marcuhu zô rowaimrami mono za, sõpẽtẽ da, asiré we saprõni da, ĩnhimiromhuri na te te ꞌre ĩpawapto mono da.
12 Wa hã wa tô Tiquicu hã satõ, Éfézu na ꞌri nhoꞌõmo nhisi u morĩ da hã.
13 Tawamhã we aimorĩ wamhã, ĩsiꞌubuzé hã we ĩma âri za, Capuhu nhorõwa ãma te irẽme hã, Trowadi na ꞌri nhoꞌõmo nhisi ãma. Ibaihâ zama, we ĩma duri za. Ibaihâ hã romhâ ꞌmanharĩ hã, ĩma wẽ uptabi wa, ta norĩ zama we ĩma duri za.
14 Alesãdri hã ma tô ĩwi roꞌwaꞌrutu pese, isiꞌuwazi na romhuriꞌwa hã. Wanhibꞌapito si te za tãma ãma waꞌrã, marĩ te te ĩma iꞌabꞌmanharĩ wasété zé waꞌrãmimhã.
15 Taha aibâ hã ma tô wanhimirowasuꞌu na hã wazada tihâiba, sahi sina. Maꞌãpé tiwi ꞌre asiꞌmadâꞌâ pese mono za.
16 Daꞌãma rowairébéꞌwai ma, ĩsiwasuꞌu ꞌrata wamhã, ĩhâimana wasété õ zém na hã, niꞌwa hã ĩꞌãma sapaꞌa õ di aré, tinhimiroti na ĩꞌãma sime da. Aihĩni ma tô ĩwi sina tipahâ zaꞌra. Tane nherẽ, te ĩsima wẽ õ di, da te ĩrẽmezém na te te dama ãma iꞌawaꞌrãmi da hã, ꞌRe ihâimana uꞌâsi mono hã.
17 Da te ĩrẽme zaꞌra nherẽ, ma tô Wanhibꞌapito hã ĩꞌrata tihâiba, te te ĩnhiptete da, ꞌri para zudeuꞌõ norĩ ma, te rowasuꞌu da, Wanhibꞌapito wasuꞌuwẽ na. Ãhã wamhã, ma tô Wanhibꞌapito hã ĩnhoꞌreptu, ĩdâꞌâ tõ da aꞌâ.
18 Tane te za Wanhibꞌapito hã duré rowasété hawi ĩnhoꞌreptu, hâiwa u te te ĩꞌãwisi wẽ da, tinhibꞌaꞌuwẽ norĩ te te ꞌre iꞌabꞌmadâꞌâ mono zéb u hã. Ta hã si wẽ uptabi wa, aihĩni wa za ãma ꞌre wawata uꞌâsi zaꞌra.
Paulu hã sisaꞌu te te idazawizém na rowasuꞌu
19 Maꞌãpé ĩma sawi zahuré na, Prisila norĩ hã Aquiraha me. Duré ĩma sawi zaꞌra na, Onesifuruhu nhorõwa ꞌre, ꞌre ihâimana zaꞌra mono norĩ hã.
20 Erastu hã ma tô ĩzaꞌu nhamra, Corĩtu na ꞌri nhoꞌõmo nhisi ãma. Trufimu hã hâzé wa, wa tô tirẽ, Miletu na ꞌri nhoꞌõmo nhisi ãma.
21 Maꞌãpé, niha asina rosaꞌrata, rowaꞌuꞌu wahâ ꞌre saꞌwari mono õ ré, za we iꞌaimorĩzéb da na hã. Wasiré isazeiꞌwa norĩ hã te ãma asawi zaꞌra, Euburu norĩ hã, Pudẽti norĩ me, duré Rino, duré Claudia. Duré uburé isazeiꞌwa hâiba amo norĩ hã te ãma asawi zaꞌra.
22 Timotiu, wa ĩsima aiwẽ, Wanhibꞌapito hã ꞌrâwi aipẽꞌẽ ꞌre, ꞌre isãmra mono na, asina ꞌre waihuꞌu uꞌâsi mono da. Duré ꞌRe ihâimana uꞌâsi mono wi, wa tô te tiwi ꞌre waptẽrẽ uꞌâsi, isimizawizé hã uburé aiꞌãma zaꞌra waꞌaba ꞌre hâimana uꞌâsi mono da.
