2 Samuéu 1:1-27
1 Sau hã dâꞌâ parimhã, Dawi, amalequita norĩ ãma te te iꞌaiꞌuté zaꞌra zém hawimhã, ma tô apâ hã oto mo. Tawamhã ꞌri nhoꞌu Zicradi ãma te maparane bâtâ na tihâiba.
2 Ãma awẽ wamhã, iprédupté, Sau norĩ te te sima iꞌri nhorézém hawi imorĩ hã ma tô wi. Ãhã wana ré, robzei ãna sihâiꞌré da hã ma tô tiꞌuza hã hâiwazu. Ma tô duré tiꞌrã nhisiwimhã tiꞌa hã ahi. Tawamhã Dawi ihâimanazéb u oto itẽme wisi wamhã, ma tô hiꞌrãtitõ tãma nhamra. Tiꞌubu na tiꞌai u hã ma tô duré ropto, tãma iwazéb zarina.
3 Tawamhã Dawi te sadanha ãne:
— E ma hawi te we aimo.
— Wa hã, Izaraéu nhihudu norĩ te te sima iꞌri nhoré zaꞌra zém hawimhã wa tô we dawi aimani! — Ãne ma te ãma sadaꞌâ.
4 Dawi hã te ãne duré tãma tinha:
— Marĩ iwatobrozé hã ĩma wasuꞌu na!
Tahawa, te ãne aiꞌrepudu hã tãma wasuꞌu oto:
— Wate dasiꞌwapéi ꞌmanharĩꞌwa norĩ hã ma tô dasiꞌwapéi hawimhã aimani zaꞌra. Ahâ uptabi na ma tô duré aiꞌutõ, wate aibâ norĩ hã! Sau norĩ zama, tiꞌra Zonataha me ma tô tidâꞌâ zahuré.
5 — E niha ma tô merẽ Sau norĩ, Zonataha me idâꞌâ zahuré zé hã iwaihu. — Ãne te Dawi hã sadanha.
6 Tawamhã ãne aiꞌrepudu hã ma te duré ãma sadaꞌâ:
— Wa hã, ẽne Ziuboa na isisi u dasiꞌwapé ĩma waihuꞌu õ nherẽ, siwaꞌru na nherẽ te robꞌuwaimrami wamhã, wa tô Sau isiꞌuwazi ꞌrãꞌwa na siꞌupari sina sab ré hã ꞌmadâ. Isitobꞌru norĩ wedewara zapore na dasiꞌwapézém na hã, duré awaru na dasiꞌwapézém na hã, ma tô itẽme te te sina rotété zaꞌra.
7 Sipiꞌrai wa, te te ĩꞌmadâꞌâ wamhã, ma tô ĩꞌmahâ. Tawamhã wa tô sadaꞌâ ãne: “E marĩ, ãhãta ãme wa ĩhâiba!”
8 Tawamhã Sau te ĩzadanha, wa hã niꞌwa hã zô. Tahawa, wa ãma sadaꞌâ ãne, wa hã amalequita na hã.
9 Tawamhã te ãne ĩma tinha: “Ĩꞌuꞌa zaꞌẽtẽ di. Wa za oto dârâ. Tahawa, we aimorĩ, ĩwĩrĩ da.”
10 Tawamhã wa hã isabzéb u itẽme ĩmorĩ wamhã, wa tô tiwĩ. E marĩ wa. Te waihuꞌu siromo wa, tiꞌai u waptãꞌã wi za idâꞌâzém na hã. Tawamhã isõprezé, isipsisi me te tiwi isani zahuré hã wa tô we aima timra.
11 Tawamhã Dawi tiꞌuza hã robzeiꞌõ zé te, ma tô hâiwazu. Duré ite dasiꞌwapéi ꞌmanharĩꞌwa norĩ hã ma tô isine uburé õne hã ꞌmanharĩ zaꞌra.
12 Ma tô tiꞌruꞌru. Ma tô duré wawa ꞌrãihâ na hã aiwaꞌõ zaꞌra. Sai ãna te duré aꞌâ tihâimana zaꞌra, ãma ihâiwahâ zaꞌra zéb u, Sau norĩ ãma hã, Zonataha me, duré Izaraéu nhihudu norĩ, ꞌRe ihâimana uꞌâsi mono, Uburé Danhibꞌapito nhibꞌaꞌuwẽ isiꞌutõrĩ ãmab zama hã. E marĩ wa. Ahâ uptabi na siꞌutõrĩ wa, dasiꞌwapéi ꞌmanharĩꞌwa norĩ hã.
13 Tawamhã Dawi te aiꞌrepudu romreme te te itẽme iꞌâri hã sadanha ãne:
— E ma hawimhã, a hã.
Ãne ma te duré ãma sadaꞌâ:
— Wa hã, aꞌuwẽ amalequita. Tane nherẽ, wa ãme asiptiꞌai ãma ꞌre ĩhâimana!
14 — E niha ma tô merẽ a hã sada asibꞌru ꞌRe ihâimana uꞌâsi mono, Uburé Danhibꞌapito, apito da, te te ipisudu iwĩrĩ da hã. — Ãne te Dawi hã sadanha.
15 Tawamhã tite aibâ norĩ te te iꞌmaiꞌmahârâ ma hã, te ãne tãma tiꞌru:
— Wĩrĩ, ã hã aibâ hã!
Ãhã wa, amalequita siꞌaibâ te te oto uꞌa wamhã, ma tô tiwĩ.
16 Tawamhã Dawi te amalequita ma hã tinha ãne:
— A hã ma te tô ãma iꞌupa, ãne na hã. Tahawa asaihâ na ãma asiwasuꞌuzé hã te asada tihâiba, ãne na ãma iꞌasiwasuꞌuzé hã: “Wa hã wa tiwĩ, Uburé Danhibꞌapito, apito da, te te ipisudu hã.”
Dawi hã Sau norĩ ãma Zonataha me isiwaꞌõzé wasuꞌu
17 Dawi hã ma tô Sau norĩ ãma tinhoꞌre zahuré, iꞌra Zonataha me, ãma ipẽꞌẽzé zahuré zém na hã.
18 Ma tô duré pisutu, Zudaha nhihudu norĩ ma, da te tãma waihuꞌu zaꞌra da hã. (Ã hã daꞌãma dapẽꞌẽzézém na danhoꞌre na hã, ma tô ãma robꞌuiꞌéré ni itepãiwasi Sena na ꞌre ihâimana mono nhisi ꞌrem na.)
19 Izaraéu nhiptiꞌai ãma, wate iꞌrãnhoꞌõmo norĩ ẽtẽ ꞌrãihâ ãma hã ma tô aiꞌutõ!Duré wate dasiꞌwapéi ꞌmanharĩꞌwa isibꞌru norĩ hã ma tô tiꞌai u hã rere!
20 ꞌRinhoꞌu Gati na isisi ãma ãne na hã wasuꞌu zaꞌra waꞌaba tõ, duré Asquerõ ꞌri nhiꞌriti na zama hã, filisteu nhipiꞌõ norĩ te te sima rowẽ zaꞌra tõ da, duré iwasété ꞌra sipiꞌõ norĩ ꞌre sarõtõ zaꞌra mono tõ da, te te ãma sima rowẽ zaꞌra wa.
21 Niwamhã tã norĩ atébré me hã, ẽne Ziuboa ãmamhã we ꞌre rowaihi aba mono tõ! Duré tame rom na daburu ãmamhã amnho ꞌre aiꞌrã zahu zaꞌra waꞌaba mono tõ!E marĩ wa. Tame dasiꞌwapéi ꞌmanharĩꞌwa norĩ isibꞌru, ibaihâ ꞌmanharĩ zapoto na ꞌre isimapa zaꞌra mono zé hã robzapru te te upsibi zaꞌra wa, duré Sau, ãma ꞌre isimapa mono zé hã tame tiwaipo te te simini wa.
22 Zonataha nhimnhiꞌãsi na hã aré ãma idasisõpãrĩ pe. Duré Sauhu te sibꞌézé ꞌwapa na hã niwamhã tinhitobꞌru norĩ isiptede te te ãma ꞌre ꞌmapãrĩ mono da hã te te ãma ꞌre anhimini waihuꞌu mono õ di. Te te tô ãma ꞌre anhimirei uꞌâsi.
23 Sau norĩ, Zonataha me hã, dama sawi uptabi zahuré di, duré dama wẽ uptabi zahuré di. Hâiba ré, niwamhã siwi siwãnhizari waihuꞌu zahuré õ di. Oto duré dâꞌâ zahuré nherẽ, sima siwãnhizari waihuꞌu zahuré õ di, hâiba ré zahuré wam ne!Ta norĩ hã siꞌõmo wawẽ nhipai u hã waptu zahuré di aré. Huꞌu zérépa nhipai u hã duré aré siptete uptabi zahuré di.
24 Izaraéu nhihudu nhipiꞌõ norĩ, Sau ãma hã aiꞌruꞌru waꞌaba!E marĩ wa. Õ hã ma tô poneꞌẽrebâ zéré mapure zéré pré ꞌmanharĩ na daꞌuza na hã te te ꞌre aiꞌuza zaꞌra waꞌwa, iwaꞌâbâ zaꞌẽtẽ na. Ma tô duré ẽtẽ waipo pré oru ꞌmanharĩ na daꞌuza hã te te asada ãma ꞌre ahâiwamnarĩ ꞌwa.
25 Dasiꞌwapéi ꞌmanharĩꞌwa isibꞌru norĩ hã ma tô rere. Ma tô aiꞌutõ.Zonata zama ma duré ẽtẽ ãma hã dârâ.
26 Ĩsisãnawã Zonata, wa aiꞌãma aiwaꞌõ; ĩma iꞌasawi uptabi zarina!Duré asimizawizé ĩma hã wẽ uptabi di, piꞌõ nhimizawizé nhipai u hã.
27 Dasiꞌwapéi ꞌmanharĩꞌwa isibꞌru norĩ hã ma tô rere. Isimnhiꞌãsi norĩ hã ma tô duré aiꞌutõ, isiré zaꞌra.
