2 Samuéu 10:1-19
10 Nimahã na wahu siꞌutõrĩ mono pari, apito Naꞌasi tiꞌai waꞌõtõ nhoꞌu Amo na isisi ãma ꞌre ihâimana mono dâꞌâ wamhã, ma tô iꞌra Hanu na isisi hã iꞌuirĩ na siꞌapito.
2 Tawamhã Dawi te ãne tinha:
— Wa hã Hanuhu ma, wa za ĩwẽ na si tãma ꞌre ĩhâimana, imama Naꞌasi iwẽ na ĩma ꞌre ihâimana mono ne.
Tahawa, ma tô dama romreme ꞌwapéiꞌwa hã itẽmemhã ꞌmazatõrĩ zaꞌra, Hanuhu ma, tinhimizawizé te te tãma hâiꞌré da hã. Tane nherẽ, romreme ꞌwapéiꞌwa norĩ, ꞌri nhoꞌu Raba na isisi u sihutu wamhã,
3 ma tô amonita norĩ te, dama ipire norĩ hã tinhibꞌapito ma nharĩ zaꞌra, ãne:
— E ma tô irosaꞌra, aimama te te ꞌre iwazé mono zéb zarina, Dawi aibâ norĩ we te te isatõrĩ zaꞌra zém na hã, tinhimizawizé te te aima hâiꞌré da hã. Mare di. Taré te te we wapsãiꞌa zaꞌra mono da hã, ma tô we satõrĩ zaꞌra, ꞌri nhoꞌu te te siwi waihuꞌu wa, duré te te siwi prub da hã.
4 Tawamhã Hanu, Dawihi te, rowasuꞌu ꞌwapéiꞌwa norĩ hã ma tô waibu. Te te waibui wamhã, ma tô iꞌuꞌrata amo niwĩp si watasu pari zaꞌra. Ma duré isãna hi zahâpâmhã iꞌuza hã tiwi hânhihâri zaꞌra. Taha pari, ma tô siꞌabaꞌré da hã, duré oto satõrĩ zaꞌra.
5 Dawi, ãne hã te te waihuꞌu wamhã, ma tô duré romreme ꞌwapéiꞌwa norĩ ihâiba amo aimawi hã satõrĩ zaꞌra, te te isõpẽtẽ zaꞌra da hã. E marĩ wa. Tãma rowazéb uptabi zaꞌra wa, õ norĩ ma hã. Dawi hã timreme ma tô tãma sõmri zaꞌra, Zerico ãma aꞌâ siꞌubumro da, iwatasu apâ tãma pa zaꞌra wapsi, duré apâ hã itẽme te te sina siri zaꞌra da.
6 Amonita norĩ nhimiꞌmanharĩzéb zarina ma tô Dawihi nhitiꞌruzé hã sisisiwimhã saꞌwari zaꞌra. Tahawa, ma tô siriu norĩ dasiꞌwapéi ꞌmanharĩꞌwa ꞌri nhoꞌu Bete-Reobi ãma, duré ꞌrinhoꞌu Zoba na isisi ãma 20 miu na ihâiba zaꞌra na hã awaibu. Maꞌaca ãma apito, ma tô duré tiꞌâ. Tame aibâ norĩ ꞌre ihâimana zaꞌra mono norĩ zama, ma tô duré miu na ihâiba zaꞌra na awaibu. Duré ꞌrinhoꞌu Tobi na isisi ãma hã, ma tô duré 12 miu na ihâiba zaꞌra na aibâ norĩ hã awaibu.
7 Dawi hã ãne te te waihuꞌu wamhã, ma tô Zoabi hã satõ, Izaraéu nhihudu norĩ uburé dasiꞌwapéi ꞌmanharĩꞌwa norĩ isiꞌabaꞌréi pese si ré, te te daꞌwapé zaꞌra da.
8 Amonita norĩ wairébé wamhã, ma tô Raba dazasizéb ãma simire sina sô tihâimana zaꞌra, siꞌwapé zaꞌra da hã. Taha ré, Zoba hawi, Reobe hawi siriu norĩ, Tobi hawi, duré Maꞌaca hawimhã aibâ norĩ ma tô ta norĩ zama simire sina sô tihâimana zaꞌra, romnhoꞌa ãma.
9 Zoabi hã isitobꞌru norĩ isõꞌre hawi, duré ibabarãi hawi za te te iꞌwapé zaꞌra na hã ma tô waihuꞌu siro. Tahawa, Izaraéu nhihudu norĩ dasiꞌwapéi ꞌmanharĩꞌwa isiꞌabaꞌréi pese norĩ hã ma tô pisutu zaꞌra. Taha pari, ma tô siriu norĩ nhoꞌre uwaibaba sada sõré, te te iꞌwapé zaꞌra da hã.
10 Tawamhã dasiꞌwapéi ꞌmanharĩꞌwa isiꞌmairẽme norĩ hã ma tô tisisãnawã Abisaihi ma saꞌré zaꞌra, amonita norĩ nhoꞌre uwaibaba, te te sõré da.
11 Zoabi hã te Abisaihi ma hã tinha ãne:
— Siriu norĩ te te ĩꞌãma iꞌaiꞌuté zaꞌra na a hã ꞌmadâꞌâ zaꞌra wamhã, we ĩtẽme aimorĩ za ĩpawaptob da. Duré amonita norĩ te te aiꞌãma iꞌaiꞌuté zaꞌra na, wa hã te ꞌmadâꞌâ zaꞌra wamhã, wa za ãma atẽme hã mo, te aipawaptob da.
12 Sada asibꞌru na! Wanhiptete na wa te aꞌwapé na, wate aꞌuwẽ norĩ zawi te hã, duré ꞌri nhoꞌõmo norĩ, ꞌRe ihâimana uꞌâsi mono te ma hã. Uburé Danhibꞌapito te te sima iwẽzéb zarina, marĩ te te iꞌmanharĩ da si, iwẽ hã.
13 Tawamhã Zoabi norĩ, tite dasiꞌwapéiꞌwa norĩ me te te sahu zaꞌra da, te te oto sina tété zaꞌra wamhã, ma tô siriu norĩ hã tãma simani.
14 Amonita norĩ, siriu isisaꞌrei mono na te te ꞌmadâꞌâ zaꞌra wamhã, te duré Abisaihi ma hã sisaꞌre. Ma tô apâ ꞌri nhoꞌõmo u hã asisi. Tahawa, Zoabi te te ꞌwapé zazâri zaꞌra wa, ma tô Zeruzalẽ u hã apâ oto mo.
15 Siriu norĩ, Izaraéu nhihudu norĩ te te ãma iꞌaiꞌuté zaꞌra zé te te sina waihuꞌu zaꞌra wamhã, ma tô duré uburé apâ dasiꞌwapéiꞌwa norĩ hã sina ubumro.
16 Tawamhã apito Hadadeze, siriu norĩ bâtâ pusizém niwĩ â Eufrati na isisi pa zara niwĩ ihâimana zaꞌra norĩ zô ma tô tihârâ zaꞌra. Tahawa, ma tô oto aiꞌabaꞌré, Herã u hã. Tawamhã Sobaque, Hadadezehe ma dasiꞌwapéi ꞌmanharĩꞌwa norĩ ꞌmadâꞌâꞌwa, ma tô isõwab zaꞌra hã mo.
17 Dawi ãne hã te te waihuꞌu wamhã, ma tô tite dasiꞌwapéi ꞌmanharĩꞌwa Izaraéu nhihudu norĩ hã ꞌrãꞌõtõ. Te te ꞌrãꞌõtõ wamhã, Zodã pa â na te te saprĩ zaꞌra wi, ma tô te te ropãrĩ zaꞌra mono sina, sisõré pese na hã oto aiꞌabaꞌré, Herã u. Tawamhã tame siriu norĩ, Izaraéu nhihudu norĩ nhoꞌremhã te oto sada aimasa. Tawamhã dasiꞌwapé hã ma tô oto tinhanaꞌrata.
18 Ma tô Izaraéu nhihudu norĩ, siriu norĩ duré te te wanoꞌõ. Dawi norĩ, tite dasiꞌwapéi ꞌmanharĩꞌwa norĩ me hã ma tô dasiꞌwapéi ꞌmanharĩꞌwa, dasiꞌwapézéb da wedewara zapore ꞌmaprabaꞌwa norĩ hã siwi uprosi, 700 na. 40 miu na ma tô duré siwi uprosi, awaru na dasiꞌwapéi ꞌmanharĩꞌwa, siriu norĩ hã. Duré Sobaque, dasiꞌwapéi ꞌmanharĩꞌwa norĩ ꞌmadâꞌâꞌwa te te siwi iꞌuꞌa hã ma tô aꞌubuni wi dârâ, tame dasiꞌwapézéb ãmam haré.
19 Hadadezehe nhimiꞌmadâ apito norĩ hã, Izaraéu nhihudu norĩ te te ãma iꞌaiꞌuté zaꞌra zém na te te waihuꞌu zaꞌra wa, ma tô oto siwi waptẽ, robꞌéꞌé da. Tahawa, ma tô oto isimiꞌmadâꞌâ nhiptete zahâpâmhã ꞌre hâimana zaꞌra. Tahawa siriu norĩ hã pahi zaꞌra di apâ, amonita norĩ te te duré ipawaptob zaꞌra da hã.
