2 Samuéu 11:1-27
11 Oto wahub ꞌre aꞌẽ taꞌa wi, tô apito norĩ dasiꞌwapéi u ꞌre iwairébé mono na te te ãma iromhõsi zaꞌra zém na ma tô Dawi, Zoabihi ma hã, duré ite dasiꞌwapéi ꞌmanharĩꞌwa ꞌmadâꞌâꞌwa norĩ ma hã, duré Izaraéu nhihudu dasiꞌwapéi ꞌmanharĩꞌwa norĩ ma hã tãma ꞌru zaꞌra, tinhitobꞌru norĩ te te sahu da hã. Ãhã wa, amonita norĩ ãma ma tô ãma aiꞌuté zaꞌra. Ma tô duré ꞌrinhoꞌu Raba na isisi hã siwi uirĩ. Tane nherẽ, te Dawi, Zeruzalẽ ãma si nhamra.
2 Tawamhã Dawi hã nimahã bâtâ na hâiwahâ u suru na sõtõ pari, oto utu wamhã, ma tô tinhimiromhurizé ꞌri nhisi hâpâ waꞌwaibaba ꞌre mo, hâimo. Tô ta hawi ma tô tame piꞌõ iwẽ uptabi hã siꞌupte ré ꞌmadâ.
3 Tawamhã ma tô dama tiꞌru, piꞌõ hã niꞌwa hã zô, da te dasiwi upsibi me da. Tahawa, ma tô tãma wasuꞌu zaꞌra ni, Eriꞌãhã ꞌra, Bate-Seba na isisi na hã, hitita Uriaha mro na hã.
4 Tawamhã Dawi, ma tô tite romreme ꞌwapéiꞌwa hã satõrĩ zaꞌra, sô siꞌabaꞌré da. Te te itẽme siwi saprõni wamhã, ma tô Dawi hã ãma panomro. (Taha õ ré, Bate-Seba ma tô tisihâiba upsõ hã sima ꞌrãsutu, piꞌõi hâzé ãma hâimana pari hâiba wẽ da, tô ãma ꞌre isiꞌupsõ zaꞌra mono zéb zarina.) Taha pari ma tô tinhorõwa u hã apâ mo.
5 Taha pari tiwasã na siwaihuꞌu wa, ma tô Dawihi ma romreme hã tãma tisõ, da te tãma ꞌmaiwasuꞌu da.
6 Tahawa, Dawi, Zoabihi ma, ma ãne romreme hã tãma tisõ:
— Uria, hitita hã we ĩtẽme satõrĩ.
Tawamhã Zoabi ma tô itẽme satõ.
7 Uria oto itẽme wisi wamhã, ma tô Dawi hã sadanha, Zoabi hã tite dasiꞌwapéi ꞌmanharĩꞌwa norĩ me hã niha dasiꞌwapé na hâimana zaꞌra zô.
8 Taha pari te Uriaha ma tinha ãne:
— Aꞌâ asõrõwa u aimorĩ, suru na aiwaꞌutu da.
Tawamhã Uria hã ma tô oto watobro. Ihawi watobro wi, Dawi hã ma tô dama tiꞌru, isõprubzé hã isõrõwa u da te tãma âri da.
9 Tane nherẽ, Uria tinhorõwa u hã morĩ õ di. ꞌRâwi ma tô nhono, apito nhorõwa ꞌridawa nhoꞌõmo na ꞌri u ꞌre idanhisisi mono zéb ãma apito ma, robꞌmadâꞌâꞌwa norĩ siré.
10 Dawi, Uria ꞌri tẽme imorĩꞌõ na te te waihuꞌu wamhã, ma tô ãne sadanha:
— Rom na aihâimana hâ pari, we oto apâ iꞌaiwisizéb ꞌremhã, e marĩ wa, asõrõwa u hã aimorĩ õ di.
11 Uria, ma te ãma tãma waꞌrã ãne:
— Izaraéu te, duré Zuda te aibâ norĩ me, te romhâ na tihâimana zaꞌra, dasiꞌwapé nhoꞌre na hã. Duré ꞌRe ihâimana uꞌâsi mono te, wedehâꞌre hã te isiré tihâimana zaꞌra. Duré ĩnhibꞌihâꞌa Zoabi hã, duré ite dasiꞌwapéi ꞌmanharĩꞌwa norĩ hã te te sima iꞌri nhoré zaꞌra zéb ãma te tihâimana zaꞌra, rom nhoꞌa ãma. E niha ãne nherẽ, wa za bété mo ꞌri tẽmemhã, ĩsa da, duré te simizâri da hã, duré ĩmro ré ĩnhotõ da hã. Uburé marĩ tô iwazéb zahi nhisi na hã wa aima ropisutu, niwamhã ãne hã te iꞌmanharĩ da hã, waihuꞌu õ di!
12 Tawamhã Dawi te ãne tãma tinha:
— Tane ze te bâ, bâtâ ꞌrãsutu u aꞌâ ãme aihâimana. Apâ awẽ aimorĩ da hã wa za aima robꞌru.
Tahawa, Uria tô taha bâtâ na hã ma tô Zeruzalẽ ãmamhã aꞌâ nhamra.
13 Dawi bara na ime sa da, ma tô waptẽ. Ime sai wamhã, ma tô ꞌrãsiwamnarĩ na hâimana da hã marĩ na ꞌrãiwamna. Ãne nherẽ, Uria hã tô duré morĩ õ di, tinhorõwa u, taha mara na hã. Tisisuwazém na te te sima iwaptâ ãmap si ma tô duré nhono, robꞌmadâꞌâꞌwa norĩ nhimiwaptâ ãma.
14 Awẽm na hã ma tô Dawi romnhihâtâ, Uria te te iꞌâri da hã, Zoabihi ma.
15 Ãne ma tô Dawi ãma romnhihâtâ: “Uria hã maꞌãpé sãrĩ danhowa, isiꞌwapéiꞌwa norĩ itete nhoꞌõmo. Taha parimhã isiti aihâiba zarõtõ, da te uꞌa da, duré dâꞌâ da.”
16 Tahawa, Zoabi norĩ ꞌrinhoꞌu te te oto siwi uirĩ wamhã, ma tô Uriaha ma hã tiꞌru, isitobꞌru norĩ isiptete na tãma iwaihuꞌu pese niwĩ hâimana da hã.
17 Isitobꞌru norĩ, Zoabihi te isiptete norĩ te te ꞌwapé zaꞌra da, ꞌri nhoꞌõmo hawi oto sô wairébé wamhã, ma tô siwi uprosi, niꞌwam norĩ Dawihi te daꞌmadâꞌâꞌwa norĩ hã. Tahawa, Uriaha zama ma tô duré oto wĩrĩ ni.
18 Tawamhã Zoabi, ma tô Dawihi ma romreme hã tãma tisõ, dasiꞌwapé na hã.
19 Ãne romreme ꞌwapéiꞌwai ma hã te tãma tinha:
— Uburé apito ma dasiꞌwapé na rowasuꞌu parimhã,
20 ãté te za asada sahi wa, asadanha, ãne: “E marĩ da, ma tô a norĩ wawa hã ꞌri nhoꞌõmo tẽmemhã ꞌrâwi aihutu ꞌwa, õ norĩ ꞌwapé zaꞌra waꞌaba da hã. ꞌRi ꞌwawi waꞌra ꞌrãihâ hawi õ norĩ tiꞌi na te te iꞌasimrimi zaꞌra waꞌaba zém na hã e asina waihuꞌu zaꞌra waꞌaba ã bâ.
21 E niha a norĩ waꞌwa hã ãma rosaꞌrata zaꞌra waꞌaba õ di, duréihã Abimelequi, Zerubezetihi ꞌra da te iwĩrĩzém na hã. ꞌRi nhoꞌu Tebe na isisi ãma, ꞌri ꞌwawi waꞌra ꞌrãihâ nhisi hawi, piꞌõ ẽtẽ tomhâpâ zapodo isisiwi te te ime na ma tô ta hã tiwĩ. E niha ãne nherẽ, ma tô ꞌri ꞌwawi waꞌra ꞌrãihâ tẽme, a norĩ waꞌwa ꞌrâwimhã aihutu ꞌwa.” Ãne na apito te te asadanharĩ wamhã, ãma sadaꞌâbâ za ãne: “Uria ate dama ipire zama hã ma tô wĩrĩ ni, hitita hã.”
22 Tawamhã romreme ꞌwapéiꞌwa oto morĩ wamhã, ma tô Dawihi ma rowasuꞌu, Zoabi te te tãma iꞌruzéb zarina.
23 Ãne romreme ꞌwapéiꞌwa te tãma rowasuꞌu:
— Wanhitobꞌru norĩ, wanhipai u isiptete uptabi zaꞌra hã ma tô ꞌri nhoꞌõmo hawi wairé, romnhoꞌa ãma te te iwaꞌwapé zaꞌra da hã. Tane nherẽ, wa norĩ hã wa tô sada aptete zaꞌra ni, apâ wa te wanoꞌõ mono da hã ꞌri nhoꞌõmo tẽme ꞌridawa nhoꞌõmo na ꞌre idanhisisi mono zéb u.
24 Tahawa, tiꞌi na ꞌri ꞌwawi waꞌra ꞌrãihâ nhisi hawi te te wahâ zaꞌra wa, ma tô niꞌwam norĩ ate dama ipire norĩ hã simro ni. Duré ate dama ipire Uriaha zama hã ma tô dame dârâ, hitita hã.
25 Dawi hã romreme ꞌwapéiꞌwai ma, ma te ãne ãma waꞌrã asa:
— Maꞌãpé Zoabi, asimirowasuꞌu na hã pẽꞌẽ to na. Duré hâtâꞌâ ãna hâimana da, tãma rowasuꞌu na. E marĩ wa. Dasiꞌwapéi ꞌre, niꞌwa tidâꞌâzé te te sina iwaihuꞌu dai õ wa. Tahawa, duré tãma rowasuꞌu na, ꞌri nhoꞌõmo ãma te te ãma iꞌaiꞌutézéb u siptete na te te tô aꞌwapé da hã.
26 Bate-Seba, imro, da te iwĩrĩ na te te waihuꞌu wamhã, ma tô ãma aiwaꞌõ.
27 Rosaꞌrata zé na ihâimana mono na ãma ronomro parip si iꞌamo aba zém na, ma tô Dawi hã dama tiꞌru, isimiromhurizéb u da te dasiwi itẽme saprõni da. Tahawa, ma tô oto imro na hã tãma tihâiba. Tahawa, ma tô oto iwa aiwabzu, Dawi hã. Tane nherẽ, Uburé Danhibꞌapito ma tô wẽꞌõ, Dawi te te iꞌmanharĩzé hã.
