2 Samuéu 13:1-39
13 Dawihi ꞌra hã, Absarõhõ hidiba iwẽ uptabi hã te ꞌre ꞌmaihâimana, Tama na isisi hã. Ta hã ma tô Dawihi ꞌra hâiba amo Amno na isisi hã sawi â.
2 Õhõ ma, sawi uptabi wa, ma tô sô tihâzé. Amnohõ nhimirosaꞌrada hã tãma pire di, Tama tihidiba prã, romnhiwasi te te isõpẽtẽ da hã, waihuꞌu õ wa, marĩ te te ãma iꞌmanharĩ da hã, õ hã zahadu ubuni na ꞌre hâimana mono wa.
3 Tawamhã Amnohõ siwaihu te ꞌre ꞌmaihâimana, iꞌrã nhipe hã, isisi Zonadabi na, Siméia, Dawihi sisãnawãi ꞌra hã.
4 Tawamhã Zonadabi, te Amnohõ ma tinha ãne:
— Apito ꞌra, e marĩ wa, te bâtâ mono na robzei ãna hã aimasisi mo. Maꞌãpé ĩma asiwasuꞌu na.
Tawamhã Amno, ma te ãne ãma sadaꞌâ:
— Tama, te sawi âri pese wa, ĩmama hawi ĩsisãnawã Absarõhõ hidiba hã!
5 Tawamhã Zonadabi te ãne tãma tinha:
— Aimorĩ, waptâ anomro da, iꞌaihâzé ne hã. Tawamhã aimama te te asabu da, ãma atẽme morĩ wamhã, ãne tãma nharĩ za: “Ĩmama, maꞌãpé ĩhidiba Tama we ĩtẽme satõrĩ, ĩsa te iꞌrẽne da hã te te ĩma a da. Tawamhã te za ãme ĩhâimanazéb ãma ĩtõmo nhoꞌre dasa hã ꞌmanha, duré tô siꞌuihâ na te te ĩma aꞌâri da.”
6 Tawamhã Amno ma tô oto nomro, ihâzé ne.
Tawamhã apito Dawi te te sabu da, itẽme morĩ wamhã, ma tô Amno hã ãne tãma tinha:
— Ĩzawi na hã, maꞌãpé Tama we satõrĩ, dasai wapu ãme te te ĩma ꞌmanharĩ ré te ꞌmadâꞌâ da wa hã, duré tô siꞌuihâ na te te ĩma sõmri da.
7 Tawamhã Dawi, ma tô dama tiꞌru, isadawa para isimiromhurizé ꞌri ꞌre, Tamahã ma, da te ꞌmairowasuꞌu da, ãne:
— Mo oto Amnohõ nhorõwa u aimorĩ, dasa hã u, tãma ꞌmaꞌmanharĩ da.
8 Tama oto morĩ wamhã, ma tô waptâ nomro ré sõpẽtẽ. Tawamhã amnho zubꞌa trigu te te âri wamhã, ma tô dasai wapu hã ꞌmanha, itõmo nhoꞌre. Tahawa, duré te te oto sebre wamhã,
9 ma tô isebrezém hawimhã Amno te te iꞌrẽne da hã tãma ꞌmaiwaze. Tane nherẽ, te te iꞌrẽne da hã te te sima wẽ õ wa, te ãne tãma tinha:
— Uburé dawairébé da, maꞌãpé dama robꞌru na.
Tawamhã uburé dawairébé da, te te dama robꞌrui wa, ma tô tawairébé ni, rob u hã.
10 Taha pari te Amno, Tamahã ma tinha, ãne:
— Maꞌãpé, dasai wapu ĩnhimiwaptâ u we oto ĩma âri.
Tawamhã ma tô isimiwaptâ u hã oto tãma tisõ.
11 Tawamhã Amnohõ ma, te te oto tãma sõmri da wamhã, ma tô paꞌâ. Taha sina, te ãne tãma tinha:
— Ĩhidiba, ĩꞌrata anomro!
12 Tane nherẽ, ma te ãne ãma tãma waꞌrã:
— Ĩhitébré, tôꞌã! Ãne hã ĩma robꞌmanharĩ tõ! Izaraéu ꞌremhã, ãne hã da te ꞌre ꞌmanharĩ zaꞌra mono õ di. Aiꞌrã siwamnarĩ zarina ãne hã ꞌmanharĩ tõ!
13 E niha wa za duré tâibâ parimhã ĩsihâiꞌré za, danhoꞌre u hã. Duré a hã te za asisimini, Izaraéu ꞌremhã, roti iwazébꞌõ na hã. Ĩzawi na hã maꞌãpé aꞌâ apito ma nharĩ. Ãhã wapsi te za iꞌuwaibaba zarina aima ĩhâiba nho.
14 Tane nherẽ, Tama te te inharĩzé te te iwapari da hã, Amno hã te te sima wẽ õ di. Tahawa, tãma siptete wa, ma tô tãma robꞌmanharĩ wasété.
15 Tawamhã te te tãma robꞌmanharĩ wasété pari, ma tô sima ꞌruiwazere pese oto, iwana ré te te isawi nhipai u. Tahawa, te ãne tãma tinha:
— Ã hawimhã oto aiwatobro!
16 Tane nherẽ, Tama ma te ãne ãma tãma waꞌrã asa:
— Ĩhitébré, ĩwatobro da hã maze di! E niha te a hã ĩma irobꞌru, ĩmorĩ da hã. Ãne ĩma robꞌrui wamhã, nimosi ĩma irobꞌmanharĩ wasété nhipai u, te za duré aiwasété uptabi na ãma isisiwi!
Tane nherẽ, Amno te te sima wẽ õ di, te te ãma tãma iwaꞌrãmizé te te iwapari da hã.
17 Tawamhã tite romhuriꞌwa zô hârâ wamhã, te ãne tãma tinha:
— Wazere, ã hã piꞌõ, ĩhawimhã! Rob u sãrĩ! ꞌRidawa hã duré tété za asisaꞌu!
18 Tawamhã romhuriꞌwa, Tama rob u te te sãrĩ pari, ma tô ꞌridawa hã tété. Tamahã uza hã daꞌuza hâpa, apito ꞌra sipiꞌõ imroꞌõ, tô taha bâtâ mono na ãma ꞌre isiꞌuza zaꞌra mono zém na.
19 Tawamhã ma tô ꞌruꞌa, tiꞌrã nhisiwimhã sima ahi. Tiꞌuza hã ma duré hâiwazu. Taha pari ma tô oto watobro sadari ꞌrãihâ sina, tinhibꞌrata na siꞌubu ubu sina.
20 Absarõ ihitébré hã te ãne sadanha:
— E Amno, marĩ iwasédé ma tô aima ꞌmanha. Ĩhidiba, niꞌwai ma hã wasuꞌu tõ. E marĩ wa, õ hã aihitébré prãi wa. Aipẽꞌẽ ꞌremhã te te aiwi roꞌwaꞌré tõ.
Ãne wa, ma tô Tama, Absarõhõ nhorõwa ãmamhã siwaprosi robzei ãna hã hâimana.
21 Apito Dawi ãne hã te te waihuꞌu wamhã, ma tô abꞌrui pese.
22 Absarõ, Amnohõ ma hã te te robzanhamri waihuꞌu õ di. Taré ma tô sada abꞌrui pese. Duré tãma hã toi õ di. E marĩ wa. Tihidiba Tamahã ma, tinhiptete na te te tãma robꞌmanharĩ wasété wa.
23 Tawamhã maparane wahu pari, Absarõ tite poneꞌẽrebâ te te azéré nhihâri wamhã, Baau-Hazo na ꞌri waꞌõtõ nhisi, Efraĩ te ꞌri nhoꞌõmo ꞌrata ꞌre ihâimana mono ãma ma tô uburé apito ꞌra norĩ waptẽrẽ zaꞌra, õwa siꞌabaꞌré da.
24 Tahawa, apito ma, te te nharĩ da, itẽme morĩ wamhã, ma tô ãne tãma tinha:
— Ĩnhibꞌapito, wa hã wa ĩte poneꞌẽrebâ hã azéré nhihâ. Tahawa, ĩma hã wẽ di, ãma iꞌaimorĩ da hã, duré aima romhuriꞌwa norĩ zama ãma isiꞌabaꞌré da hã.
25 Tawamhã Dawi asa ma te ãne ãma sadaꞌâ:
— Ĩꞌra, ãté mare di za. Aihĩni uburé ãma wasiꞌabaꞌréi wamhã, romhuri saꞌẽtẽ na wa za aima sõmri zaꞌra ni za.
Tawamhã Absarõ, sada hutu ãna te tô nasi tãma tinha. Tane nherẽ, apito imorĩ da hã te te sima wẽ õ wa, ma tô tãma tinha, Absarõhõ ma, tô oto morĩ da hã.
26 Tawamhã Absarõ te oto ãne tãma tinha:
— Wẽ di tô. Tane wamhã, maꞌãpé ĩno Amnohõ ma si rowairébé, taha si ãma ĩme morĩ da.
— E marĩ wa, te za bété õhõ si ãma asiré mo. — Ãne te apito hã sadanha.
27 Tane nherẽ, Absarõ sadahutu ãna te tô nasi tãma tiꞌru, te te tãma rowairébé da, Dawi hã te te tãma irowairébézéb u Amnohõ ma hã, duré uburé tiꞌra norĩ ma siꞌabaꞌré da hã te te irowairébé zaꞌra zéb u.
Tawamhã Absarõ, apito ma, dasa isaꞌẽne hã te te ꞌmanharĩ wamhã,
28 ma tô ãne tite romhuriꞌwa norĩ ma hã waihuꞌu zaꞌra:
— Asimizaꞌrese aihâimana zaꞌra waꞌaba, Amnohõ da hã. Siꞌrãiwamnarĩ wamhã, wa hã wa za aima waihuꞌu zaꞌra waꞌwa, za asiwi wĩrĩ aba da hã. Aipahi zaꞌra waꞌaba tõ. E marĩ wa. Wa hã, aima zaꞌra waꞌaba marĩ ꞌruiꞌwa na, za ĩhâimana dâꞌâsina. Tahawa, asibꞌru zaꞌra waꞌaba wa, duré asima rowairébé zaꞌra waꞌaba!
29 Tawamhã romhuriꞌwa norĩ ma tô Amno hã siwi tiwĩ, Absarõ te te tãma iꞌru zaꞌra zéb zarina. Tawamhã uburé Dawihi ꞌra hâiba amo norĩ, tite awaru poꞌrepore na sarõtõ zaꞌra wamhã, ma tô õne haré pahi te aimani zaꞌra.
30 Zahadu bâdâdi na siꞌabaꞌréi ré, ma tô Dawi rowasuꞌu hã wapa, ãne: “Absarõ, ma tô uburé aiꞌra norĩ hã uprosi. Niꞌwa hã tiwi sisõꞌreptui õ di!”
31 Tawamhã apito, hâiwi sab da, wahutu wamhã, ma tô tiꞌuza hã hâiwazu, robzeiꞌõ zé te. Ma tô duré tiꞌai u sime, siꞌuihâ na hã. Duré uburé isibꞌaꞌuwẽ norĩ, ime tame ihâimana zaꞌra norĩ zama ma tô tiꞌuza hã hâiwazu zaꞌra.
32 Tawamhã Zonadabi, Dawihi sisãnawã Siméiaha ꞌra hã, te tãma tinha, ãne:
— Apito, uburé aiꞌra norĩ hã te te uprosi õ di. Amnohõ si ma siwaprosi dârâ. Ã hã, Absarõhõ nhimirosaꞌrada, ihidiba Tamahã da, Amno hã, tinhiptede te te iꞌmanharĩzém hawim haré te te ãne tãma iꞌmanharĩ da hã.
33 Tahawa, rowasuꞌu na, wa hã ãma ĩnhimizazei õ di, aiꞌra norĩ uburé isiꞌutõrĩ na hã. Amnohõ si, ma te tô dârâ.
34 Tahawa, Absarõ hã ma duré tô aimani.
Tô taha ré, dasiꞌwapéi ꞌmanharĩꞌwa robꞌmadâꞌâꞌwa na ihâiba hã ma tô daꞌahâ na ẽtẽ hawi Horonaꞌĩ na ꞌri nhoꞌõmo nhisi u bâdâdi na, da te isiꞌra zaꞌra hã daꞌabꞌmadâ. Tawamhã apito u morĩ wamhã, ma tô ãne tãma rowasuꞌu:
— Niwam norĩ aibâ hã te ẽtẽ hawimhã Horonaꞌĩ u bâdâdi na we siꞌra zaꞌra, ahâ na.
35 Tahawa, te Zonadabi, Dawihi ma tinha, ãne:
— Aiꞌra norĩ hã te tô apâ hã we aiꞌabaꞌré, te iwasuꞌu zaꞌra zéb zarina aima.
36 Ãne hã timreme te te ꞌrãsutu wi, ma tô Dawihi ꞌra norĩ hã awaꞌawi asisi. Tawamhã ma tô wawa ꞌrãihâ na tisiwaꞌõ na hã ãma sãnaꞌrata zaꞌra. Duré Dawi norĩ zama, ma tô tite dama ipire norĩ me hã saꞌẽtẽ tiꞌruꞌru.
37 Tawamhã Absarõ simani wamhã, ma tô apito Taumaꞌi na isisi, Amiꞌudihi ꞌra ãma hâimana da hã mo, ꞌrinhoꞌu Gesu na isisi u. Tawamhã bâtâ sidâpâsi te ꞌre siwaꞌõ, Dawi hã tiꞌra Amnohõ zô hã.
38 Tawamhã Absarõ, Gesu ãma siꞌubdatõ wahum na hã ma tô tihâiba.
39 Tawamhã duré, apito Dawi, ma tô Absarõhõ ãma ipẽ hã wĩrĩ pese. E marĩ wa. Amnohõ dâꞌâzém na hã oto pẽꞌẽ hâzaꞌõtõ na hâimana wa.
