2 Samuéu 14:1-33
14 Tawamhã Zoabi, Zeruꞌizaha ꞌra hã ma tô apito Dawi, Absarõhõ ãma ipẽꞌẽzé uptabi zé hã waihuꞌu.
2 Tahawa, piꞌõ iꞌrã nhipe, ꞌrinhoꞌu Tecoa na isisi ãma ꞌre ihâimana mono zô daꞌmaimorĩ da, te te sô idaꞌmazatõrĩ ma, te ãne tinha:
— Maꞌãpé niꞌwa sô iꞌaiwaꞌõ ne, robzei ãna iꞌaihâimana ne hã tô aihâimana. Duré dazô ꞌre dasiwaꞌõ zaꞌra mono wa, dasiꞌuzazé hã asima sẽrẽ. Duré asiwarĩrĩ tõ. Bâtâ ahâ na aipẽꞌẽzé te, robzei ãna iꞌaihâimana ne hã te za iꞌmanha.
3 Tahawa maꞌãpé aimorĩ, apito ma, nharĩ da, za te aima inharĩzéb zarina.
Tawamhã Zoabi te oto tãma tinha, marĩ na za õ hã te te inharĩzéb da hã.
4 Piꞌõ hã apito ihâimanazéb u morĩ wamhã, ma tô hiꞌrãtitõ tãma nhamra. Tiꞌubu na tiꞌai u ma tô duré tãma ropto, iwazéb zarina. Tawamhã te ãne tãma tinha:
— Apito, maꞌãpé ĩzawi na hã ĩpawapto na!
5 — E marĩ te tawamhã asima iwẽ. — Ãne te apito hã sadanha.
Tawamhã piꞌõ, ma te ãma sadaꞌâ ãne:
— Ĩmro hã ma tô ĩwi dârâ. Wa hã ĩmrotõre ĩnhiptihaiꞌõre.
6 Apito, ĩꞌra hã maparane aré. Nimahã bâtâ na ma tô aꞌubuni wimhã siꞌahâri zahuré. Tawamhã niꞌwai õ di ãma isiwanhizari zahuré da hã. Tahawa, ma tô ꞌrâwi sipã.
7 Tahawa, ma tô uburé ĩsiré aꞌuwẽ ꞌremhã ĩzada tihâimana zaꞌra. Te duré ĩwi waptẽrẽ zahi zaꞌra, ĩꞌra hã te tãma hâiba nhomri zaꞌra da, te te siwi wĩrĩ da, tisisãnawã hã te te wĩrĩ ꞌru te. Ãne hã te te ꞌmanharĩ zaꞌra wamhã, ĩꞌra ãna wa za oto ꞌre ĩhâimana. Duré ĩma isiꞌatarẽme hã te za siwi sõꞌrebzâ, ĩmro hã ꞌra ãna da. Duré tiꞌai ãma sisi ãna ꞌre hâimana mono da hã te za ãne hã tãma ꞌmanharĩ zaꞌra.
8 Tawamhã Dawi ma te ãne asa ãma sadaꞌâ:
— ꞌRi tẽme apâ aimorĩ. Ĩwétési, za té marĩ na hã ãma ĩsiꞌmadâ.
9 — Apito, ĩsiré aꞌuwẽ norĩ me hã wama wẽ zaꞌra di za, a hã siwaꞌru za marĩ na uburé waꞌãma iꞌasiꞌmadâꞌâ zaꞌra zém na hã, upai wamhã, wate zaꞌra za iꞌupa aiꞌupana. Tawamhã aiꞌra norĩ me hã aiwẽ uptabi na te za ꞌre aihâimana zaꞌra waꞌaba mo. — Ãne te piꞌõ hã asa tãma tinha.
10 Tawamhã apito te ãne tãma tinha:
— Niꞌwa te te duré aima amhâzépa wamhã, maꞌãpé we ãwa saprõni za. Tawamhã niwamhã te te aiwi iroꞌwaꞌré zahu da hã mare di za.
11 Ãne te te tãma waihuꞌu wa, te piꞌõ tawamhã duré tãma tinha ãne:
— Apito, maꞌãpé ĩzawi na hã Uburé Danhibꞌapito, ate ꞌRe ihâimana uꞌâsi mono ma, ĩꞌãma aimreme, ĩsisãnawã norĩ, ĩꞌra te te siwi ꞌruiwaꞌâbâ da, rosaꞌrada te te sima iꞌmanharĩ zaꞌra norĩ hã, ĩꞌra ihâiba amo te te siwi iwĩrĩ na iwasété uptabi hã te te iꞌmanharĩ zaꞌra na te te sahu zaꞌra tõ da.
Tawamhã Dawi te piꞌõi ma ãne tinha:
— Wa za ropisutu, Uburé Danhibꞌapito idâꞌâꞌõ nhisi na, niꞌwa hã aiꞌra te te iꞌupi da hã, mare di za.
12 Tawamhã piꞌõ te duré ãne tãma tinha:
— Apito, wa za aꞌâ duré tiha ihâiba amo na aima tinha.
— Maꞌãpé tô! — Ãne ma te asa ãma sadaꞌâ.
13 Tawamhã piꞌõ te ãne sadanha:
— Apito, e tiha da, ma tô ꞌRe ihâimana uꞌâsi mono nhibꞌaꞌuwẽ ma iꞌmanharĩzém na ãma iꞌupa. Aiꞌra ma hã rowairébé õ di, apâ tisiré aꞌuwẽꞌõ norĩ nhiptiꞌai hawi we imorĩzéb da hã. Ãne wa, ma te tô a hã ãma iꞌupa. Asihawi inharĩzém na hã ma ropire asima ihi.
14 Wa norĩ hã wa za uburé wadâꞌâ zaꞌra ni, aiwa â, tiꞌai u ꞌre sisaꞌwari mono wa, apâ da te dasiwi ꞌre iꞌubumroi waihuꞌu mono õ ne. Tane duré tô ꞌRe ihâimana uꞌâsi mono, ꞌre idadâꞌâ zaꞌra mono norĩ ma, apâ dapẽꞌẽzani hã te te dama ꞌre anhomri mono õ di, apâ ꞌre idahâimana zaꞌra mono da hã. Tane nherẽ, apito, aima waihuꞌu pese di aré, aibâ tisiré aꞌuwẽꞌõ norĩ nhiptiꞌai hawi, we apâ iꞌãwisi da hã.
15 Apito, wa we atẽme mo, te aima nharĩ da, aꞌuwẽ norĩ te te ĩma amhâzépa zaꞌra wa. Tahawa wa tô rosaꞌrata, ãne: “Wa za mo, apito ma, te tãma nharĩ da, te tiwi iwaptẽrẽzém na, te te ĩzazei wa, te te ĩma ãma uwaimrami da.”
16 Tawamhã wa tô rosaꞌrata aré, ãma ĩzazei wa, ĩnhoꞌreptu da na hã, ĩꞌra te te wĩrĩ da, duré te te ĩwĩrĩ da, rosaꞌrada te te ipibui wi hã, ꞌRe ihâimana uꞌâsi mono tinhibꞌaꞌuwẽ ma, tiꞌa te te isõmri hawi te te wazani da, te te sima iwẽ wi hã.
17 Tawamhã wa hã aima romhuriꞌwa, asimiropisutuzé te te ĩnhoꞌreptu da hã, wa tô aré rosaꞌrata. E tihai wa. A hã apito, aiwa ꞌRe ihâimana uꞌâsi mono ma, hâiwa ãma romhuriꞌwa ne, uburé marĩ hã aima waihuꞌu pese wa. Uburé Danhibꞌapito, ate ꞌRe ihâimana uꞌâsi mono, asiré ꞌre ihâimana mono da si iwẽ hã!
18 Tawamhã apito te ãne tãma tinha asa:
— Wa za asadanha. Sena na uburé pese te za marĩ na ĩma irowasuꞌu, ĩwi robꞌudâ ãna.
— Maꞌãpé tô, asima iwẽzéb zarina tiha na ĩzadanharĩ! — Ãne ma te ãma tãma waꞌrã.
19 — E Zoabihi zadawa zarina ãne hã ꞌmanharĩ da, ma tô aipisutu. — Ãne te apito hã sadanha.
Tawamhã piꞌõ, ma te ãma sadaꞌâ ãne:
— A hã sena aihâiba ré ꞌre iꞌaihâimana mono zarina, wa sena na aima tinha, niꞌwa hã asimizadanharĩzé wi siwazere waihuꞌu õ wa. Ĩhe tô, Zoabi ate dama ipire daꞌmadâꞌâꞌwa ma tô ĩma tinha, ãne hã te ꞌmanharĩ da, duré tiha na te aima nharĩ mono da hã.
20 Ãne hã tiha na romhâimanazém na te te ãma saprĩ da hã, ma tô ꞌmanha. A hã aiꞌrãi waihuꞌu pese di, ꞌRe ihâimana uꞌâsi mono ma, hâiwa ãma romhuriꞌwa ne. Tiha uburé ꞌre iwairébé mono hã aima waihuꞌu pese di.
21 Tawamhã ronomro prãi wi, ma tô apito, Zoabihi ma tinha ãne:
— Wa tô oto rowairébé wa hã, marĩ asima iwẽzém na hã. Mo oto aimorĩ, Absarõ aibâ iprédupté hã we apâ saprõni da.
22 Tawamhã Zoabi, ma tô Dawihi nhoꞌremhã tiꞌai u sime, tãma iwazéb zarina. Tahawa, te ãne tãma tinha:
— Apito, ꞌRe ihâimana uꞌâsi mono iwẽ na si te te ꞌre iꞌaipawapto mono da si iwẽ hã! Ãhã na wa tô waihuꞌu, ĩma iꞌaipẽꞌẽtozém na hã. E marĩ wa. Wa hã aima romhuriꞌwa, te irowaptẽrẽzé, ãma ĩzazezé hã ꞌmanharĩ wa.
23 Tawamhã Zoabi hâiwi sa wa, duré oto ꞌrinhoꞌu Gesu na isisi u morĩ wamhã, ma tô Absarõ, Zeruzalẽ u hã oto apâ saprõ.
24 Tane nherẽ, apito, ma tô Absarõhõ hâiba na roti zahi ꞌmanha, isimiromhurizé ꞌri ꞌrãihâ ꞌre, ꞌre hâimana mono tõ da hã. Tahawa, te ãne tinha:
— Te ĩsima wẽ õ di, te iꞌmadâꞌâ da hã!
Ãne wa, ma tô Absarõ tinhorõwa u hã mo, tame ꞌre sãmra mono da. Tahawa apito nhoꞌre u hã sihâiꞌré õ di.
Absarõ hã Dawi apâ te te isawi ârizé wasuꞌu
25 Izaraéu norĩ nhiptiꞌai ꞌremhã niꞌwa hã ꞌre hâimana mono õ di, iwẽ iꞌmadâꞌâ ze hã dama isaꞌrese zaꞌẽne iwẽ, Absarõhõ ne hã. Ta hã iꞌrãi hawimhã, ipara u hã ꞌmanharĩ wẽ di.
26 Séré pa uptabi di. Tizéré hã misi haré wahup sidâpâsi te te ꞌre sihâri, pire wa, duré pa wa. Iséré nhihâri pire pibuzé hã 2 kilu na, tô apito nhimipisutuzéb zarina, marĩ pire pibuzé wa.
27 Iꞌra hã siꞌubdatõ ihâiba zaꞌra hã. Misi iꞌra sipiꞌõ nhisi hã Tama na, piꞌõ iwẽ uptabi, ta hã.
28 Absarõ hã maparane wahum na ma tô Zeruzalẽ ãmamhã ꞌre hâimana, apito te te ꞌmadâꞌâ ãna.
29 Tahawa, ma tô Zoabihi zô hã daꞌmazatõ, te te tiwi waptẽrẽ da, apito u imorĩzém na hã te te tãma nharĩ da, ihâiba na. Tane nherẽ, Zoabi hã te te sima wẽ õ di, imorĩ da hã. Tawamhã ma tô apâ duré daꞌmazatõ, sô daꞌmaimorĩ da. Tane nherẽ, ma tô duré tiwi rowẽꞌõ zahu.
30 Tahawa, te Absarõ, tite romhuriꞌwa norĩ ma nharĩ zaꞌra ãne:
— Maꞌãpé ãma rosaꞌrata zaꞌra waꞌaba! Zoabihi te robꞌre, ĩte zababa te ꞌre hâimana. Taha ꞌremhã te robꞌre cewada hã tihâiba. Tahawa mo oto aiꞌabaꞌréi waꞌaba õwa, ãma tiwi sazu zaꞌra waꞌaba da, buru hã unhama na.
Tahawa, ma tô oto aiꞌabaꞌré. Siꞌabaꞌréi wamhã, ma tô Zoabihi wi iburu na hã ãma tiwi sazu zaꞌra.
31 Tahawa, Zoabi, Absarõhõ nhorõwa u te mo. Morĩ wamhã, te sadanha ãne:
— E marĩ da, ma tô aima romhuriꞌwa norĩ ĩburu na hã ãma siwi sazu, unhama na.
32 Tawamhã Absarõ, ma te ãne ãma sadaꞌâ:
— Wa hã wa ãma asô hâ. Wa ĩsima wẽ, apito u aimorĩ da hã ãne na tãma rowasuꞌu da: “E marĩ wamhã, wa tô bété apâ wei mo, Gesu na ꞌri nhoꞌõmo nhisi hawimhã. Ĩma hã aré wẽ di, õmep si ꞌre ĩhâimana mono ꞌwaꞌâhã.”
Te duré zahadu tawamhã Absarõ tãma tinha ãne:
— Wa ĩsima wẽ, apito ma, te robzanhamri da hã. Te upai wamhã, te te ĩꞌru, da te dasiwi ĩwĩrĩ da hã.
33 Tawamhã Zoabi, apito ma, te te nharĩ da hã ma tô mo. Tahawa, apito, Absarõhõ zô te te daꞌmazatõrĩ wa, duré itẽme morĩ wamhã, ma tô apito nhoꞌremhã hiꞌrãtitõ hã nhamra. Ma duré tiꞌubu na tiꞌai u hã ropto. Tawamhã apito tobꞌrata hârâ na hã ma tô sawi.
