2 Samuéu 15:1-37
15 Ronomro pari, ma tô Absarõ hã wedewara zapore, awaru na da te tãma wasisi da hã dama tiꞌru, duré 50 na aibâ norĩ isõwa sisaꞌrei mono da hã.
2 Ta hã te robzaꞌrã ré ꞌre utu uꞌâsi. Te duré ꞌri nhoꞌõmo u ꞌridawa zaꞌẽtẽ na ꞌre idanhisisi mono zéb ãmamhã ꞌre simasisi, bâdâdi nhitõ ãma. Duré apito Dawi, marĩ na te te dama ꞌre iꞌarowairébé mono zéb u ꞌre danhisisi mono wamhã, te Absarõ hã dazô ꞌre ꞌmaihârâ. Te duré te te ꞌre daꞌaꞌmazadanharĩ, nima hawi we ꞌre idaꞌmane mono zô. Tahawa, te da te ãma ꞌre sadaꞌâbâ, nimahã Izaraéu nhihudu norĩ waꞌõtõ wamri ꞌremhã.
3 Absarõ hã te tawamhã ãne te te dama ꞌre anharĩ: “Maꞌãpé ãma rosaꞌrata! Asiniwĩ te tihâiba, roti na robꞌuiꞌéré ré hã. Tane nherẽ, niꞌwai õ di, te te iꞌaiwapari da hã, apito hawimhã, aiꞌãma iromhâimanazém na hã.”
4 Te duré ãne na zama te te dama ꞌre anharĩ: “Wa hã ãme daꞌãma rowairébéꞌwai ꞌwaꞌâhã! Siwaꞌru marĩ dama ꞌre hâimana zaꞌra mono wa, niha da hã te aré ĩzô hã ꞌre danhopré, da te ĩwi ꞌre waptẽrẽ zaꞌra mono da hã. Ãhã wamhã, wa aré duré te dama ꞌre abꞌmanharĩ, iꞌuwaibaba na, da te daꞌãma ꞌre irowairébé zaꞌra mono zém na hã.”
5 Duré Absarõ, da te dasina ꞌre tété zaꞌra mono wa, tãma ꞌre daꞌmasiwẽꞌẽi mono wamhã, ma tô te te ꞌre daꞌatété. Duré ma tô te te ꞌre daꞌazawi, datobꞌrata hârâ na hã.
6 Ãne ma tô Absarõ, Izaraéu nhihudu ma hã te te ꞌre abꞌmanharĩ, apito Dawihi wi, da te ꞌre iwaptẽrẽ zaꞌra mono zé te te dama ꞌre arowairébé mono da hã, itẽme ꞌre danhisisi mono wamhã. Ãne ma tô Izaraéu nhihudu norĩ pẽꞌẽ na hã te te ãma ꞌre aiꞌuté.
7 Tawamhã maparane siꞌuiwa na wahu pari, te Absarõ hã apito Dawihi ma tinha ãne:
— Ĩma rowairébé, Hebrõ u ĩmorĩ da, Uburé Danhibꞌapito ma ĩnhimiropisudu te iꞌmanharĩzé hã te ãma uwaimrami da.
8 Siria ꞌre, Gesu ãma ꞌre ĩhâimana mono ré, wa tô ropisutu ãne: “Uburé Danhibꞌapito, Zeruzalẽ u apâ ĩmorĩ da, te te ĩma rowairébé wamhã, wa za Hebrõ ãmamhã ãma ĩwata.”
9 Mo oto aimorĩ, rowẽ sina! — Ãne te apito hã tãma tinha.
Tawamhã Absarõ ma tô mo, Hebrõ u hã.
10 Tawamhã rowasuꞌu ꞌwapéiꞌwa norĩ, ma tô uburé Izaraéu nhihudu waꞌõtõ wamri norĩ u hã ãne te te tãma rowasuꞌu zaꞌra da hã itẽmemhã satõrĩ zaꞌra:
— A norĩ waꞌwa hã danhimnhihârâzém hârâ wapari zaꞌra waꞌaba wamhã, te za inharĩ zaꞌra waꞌwa za ãne: “Absarõ hã ma tô dama siꞌapito, Hebrõ ãma hã!”
11 Zeruzalẽ hawimhã, Absarõhõ siré 200 na aibâ norĩ hã ma tô wairé, te te iwaptẽrẽ zaꞌra zéb zarina. Tane nherẽ, te te sima irowaꞌõtõzé te te waihuꞌu zaꞌra ãna, ma tô duré ime uburé hã aiꞌabaꞌré, te te ãma isazei wẽ zaꞌra zéb zarina.
12 Abaze zata na tinhoprubzé te te sõmri ré, ma tô Absarõ duré Aitopéhé zô zama hã daꞌmazatõ, ꞌrinhoꞌu Gilo na isisi ãma ꞌre ihâimana mono zô. Aitopé, ta hã Dawihi ma rotiꞌwa na dama ꞌre ihâimana mono. Ãne ma tô apito da, iromhâimanazé hã aptete. Duré Absarõhõ siré norĩ hã ma tô sina hâ.
Dawi hã, Zeruzalẽ hawi isimanizé wasuꞌu
13 Tawamhã romreme ꞌwapéiꞌwa, ma tô Dawihi ma hã rowasuꞌu, Absarõhõ niwĩ Izaraéu nhihudu norĩ te te oto isaprĩ zaꞌra na hã.
14 Tawamhã Dawi, uburé Zeruzalẽ ãma ihâimana zaꞌra norĩ, tite dama rotiꞌwai ma hã te ãne tãma nharĩ zaꞌra:
— Absarõhõ wi wasimani zaꞌra da, wa te wasima wẽ zaꞌra wamhã, wasimani suꞌu zaꞌra waꞌaba. Saꞌẽtẽ wasiꞌabaꞌréi suꞌu aba! Ãnei õ wamhã, ãmem haré te za wazasãmri zaꞌra. Te te wazasãmri zaꞌra wamhã, te za waꞌãma aiꞌuté zaꞌra. Duré uburé niꞌwam norĩ ꞌri nhoꞌõmo ãma ihâimana zaꞌra norĩ hã te za uprosi za!
15 — Ibâre bâ, tô tane hã! Asibꞌaꞌuwẽ, wa norĩ hã wa tô mare siromo zaꞌra ni tô, aimreme uburé wa te iꞌmanharĩ zaꞌra zéb da hã! — Ãne ma te asa ãma sadaꞌâbâ zaꞌra.
16 Tawamhã apito watobro wamhã, ma tô tiꞌra norĩ ré duré tite romhuriꞌwa norĩ ré hã mo. 10 na timro prã si ma tô rẽme zaꞌra, isimiromhurizé ꞌri ꞌrãihâ, te te siwi iꞌmadâꞌâ da hã.
17 Apito norĩ, uburé tinhibꞌaꞌuwẽ norĩ me ꞌri nhoꞌõmo hawi wairébé wamhã, ma tô ꞌri daꞌrãsutuꞌwai ãma hã mazahâri zaꞌra.
18 Uburé romhuriꞌwa norĩ, te apito nhoꞌremhã hâiwi aimasa, quereti norĩ hã, pereti norĩ hã, duré dasiꞌwapéi ꞌmanharĩꞌwa norĩ 600 na Gati hawim haré isiré isiꞌabaꞌré norĩ hã te te roꞌrahâri zaꞌra ré.
19 Tawamhã Dawi, te isibꞌihâꞌa zaꞌra Itaꞌihi ma hã tinha ãne:
— E marĩ zô, te wasiré hã ãma aimo. Apâ aimorĩ, apito itép siré si aihâimana da. A hã wasiré aꞌuwẽ õ di, asiptiꞌa nhiti romhâ na aimani wa, ꞌre iꞌaihâimana mono.
20 A hã ma tô duré suru na ãmemhã ꞌre aihâimana mo. Tane nherẽ, e niha wa za bété ãma ĩme aimorĩ da hã aima waprosi. Nimomo ĩmorĩzé hã, wa hã te waihuꞌu õ di. Tahawa maꞌãpé apâ aimorĩ. Asiré norĩ hã apâ ãma simroi mono. Uburé Danhibꞌapito nhimizawizé hã duré iwẽ te te aima ꞌre iꞌabꞌmanharĩ mono zé hã aiꞌratamhã ꞌre ihâimana mono da si iwẽ hã!
21 Tane nherẽ, Itaꞌi, ma te ãne ãma tãma waꞌrã:
— Apito, wa hã wa za ropisutu, Uburé Danhibꞌapito idâꞌâꞌõ nhisi na, asima iwẽzéb uwaibaba ꞌre iꞌaimorĩzéb zarina wa hã asiré õne uꞌâ ꞌre ĩmorĩ da hã ĩma wẽ di. Niha hã wamhã, duré tô ãne uꞌâbâ ĩdâꞌâ wamhã, wa za tô dârâ. Marĩ õre di.
22 Wẽ di tô! Tane wamhã, maꞌãpé aimorĩ na ãma uzusi wasiré! — Ãne ma te Dawi ãma sadaꞌâ.
Tawamhã Itaꞌi, uburé tite aibâ norĩ ré, ma timorĩ na uzusi, duré ihawi aꞌuwẽ norĩ ré hã.
23 Dawihi siré ꞌre ihâimana zaꞌra mono norĩ, oto wairébé wamhã, ma tô dawawa ꞌrãihâ na hã taꞌruꞌru ni. Tawamhã apito, Cedurõ na romharé nhisi na te te saprĩ wamhã, ma tô uburé ite aibâ norĩ zama saprĩ zaꞌra, aꞌubuni wi suparaꞌré ꞌre isaꞌwari mono nhoꞌõmo.
24 Sasedoti Zadoqui, isiré zaꞌra te tihâiba, duré levita norĩ zama. Ta norĩ hã te ꞌRe ihâimana uꞌâsi mono nhimiroti ré wedezane ꞌmanharĩ iwazéb zahi hã siwi tiꞌâ. Tawamhã ma tô wedezane ꞌmanharĩ hã tiꞌai wamhã, oto siwi tihi, uburé ꞌri nhoꞌõmo hawi aꞌâ idawairébézéb u. Abiataha zama ma tô tame tihâiba, isiré zaꞌra.
25 Tawamhã apito, te Zadoquihi ma tinha ãne:
— ꞌRi nhoꞌõmo u apâ âri, ꞌRe ihâimana uꞌâsi mono te, wedehâꞌre ꞌmanharĩ hã. Duré Uburé Danhibꞌapito, ĩzabâdâ tãma rowẽ wapsi, te za apâ ĩꞌãma siri za, wedezane ꞌmanharĩ, te ꞌmadâꞌâ da hã, duré ꞌri iwa isabzé, te ꞌmadâꞌâ da zama.
26 Tane nherẽ, ĩma toi õ wapsi, te te sima iwẽ na tô marĩ te te ĩꞌãma ꞌmanharĩ!
27 Dawi hã Zadoquihi ma, te zahadu tinha ãne:
— Maꞌãpé ĩwapari zadaihuꞌu! Aiꞌra Aimaꞌasi hã apâ saprõni. Duré Zonata, Abiataha ꞌra zama ãma apâ saprõni. Apâ duré aimorĩ, aima rowẽ sina ꞌri nhoꞌõmo u hã.
28 Taha ré hã, wa hã wa za ĩnhimipari sina, aꞌubuni wi suparaꞌré ꞌre isaꞌwari mono u bâdâdi ãmamhã aꞌâ nhamra za, aiwasuꞌu zaꞌra waꞌwa hã we ĩtẽme iwisizéb u.
29 Tawamhã Zadoqui norĩ, Abiataha me, ma tô ꞌRe ihâimana uꞌâsi mono nhimiroti ré wedezane ꞌmanharĩ hã Zeruzalẽ u apâ âri zahuré. Tame ma tô tihâimana zahuré.
30 Dawi hã, Oriwera na ẽtẽ nhisi na siwaꞌõ mono sina ma tô saiꞌu. Ãhã wamhã, te para ubana mo, duré siꞌrãꞌubu sina robzeiꞌõ zé te. Uburé ime isiꞌabaꞌré norĩ hã ma tô siꞌrãꞌubu zaꞌra. Ta norĩ zama ma tô tiꞌruꞌru.
31 Dawihi ma, Aitopé, Absarõhõ niwĩ te te isaprĩ na, da te tãma wasuꞌu wamhã, te ãne tinha:
— Uburé Danhibꞌapito, maꞌãpé ꞌmanharĩ, Aitopé, tinhimirotizém na, Absarõ te te sima irowaꞌõtõzé hã te te tiwi ãma ꞌwaꞌrutu da!
32 Dawi hã ẽtẽ ꞌrãihâ nhisi u wisi wamhã, Uburé Danhibꞌapito ãma ꞌre idawata zaꞌra mono zéb u, isiwaihu Husaꞌi na isisi, sena na te te ꞌre iꞌumnhasi mono hã arquita na iwamri hã, ma tô tame sõpẽtẽ. Tawamhã Husaꞌi hã uza hâsi wazu ti. Duré tiꞌa, tiꞌrã nhisi wi te te sima iꞌahiri ré, te tihâiba, tãma irobzei õ zarina.
33 Tawamhã Dawi hã te ãne tãma tinha:
— Ãma ĩsiré hã aimorĩ õ di za, ĩpawaptob dai õ wa, ãne na hã.
34 Tane nherẽ, te za tô ĩpawapto za a hã, Aitopéhé nhimirotizé hã taré hâimana da. ꞌRi nhoꞌõmo u apâ aimorĩ wamhã, ãne Absarõhõ ma hã nharĩ za: “Apito, awaꞌawi na hã wa hã wa za oto aima te ꞌre romhuri, aimama ma, te ꞌre iromhuri mono ne.”
35 Sasedoti Zadoqui norĩ, Abiataha me te za tamemhã aime hã tihâimana zahuré. Tawamhã te za uburé tãma ꞌre irowasuꞌu zahuré mo, apito ꞌre iwapari mono zém na isimiromhurizéb ãma hã.
36 Iꞌra norĩ zama te za tamemhã aime tihâimana zahuré, Aimaꞌasi norĩ hã, Zonataha me. Duré taha ré te za ta norĩ ma, romreme hã we ꞌre iꞌanhomri mo, uburé a hã ꞌre iꞌawaihuꞌu mono zé hã.
37 Tawamhã Husaꞌi, Dawihi siwaihu hã ma tô wi ꞌri nhoꞌõmo u hã, Absarõ hã iwisi siwaprã.
