2 Samuéu 16:1-23
16 Dawi hã, Oriwera na ẽtẽ siwaꞌaba amoi u, te te oto saprĩ wamhã, ma tô tame sõpẽtẽ Ziba na isisi hã, Mefibozétihi ma romhuriꞌwa hã. Ta hã te maparane awaru poꞌrepore norĩ hã saprõni zahuré, iꞌuꞌẽtẽ wapu 200 na, 100 na uwa ꞌrãi ꞌré isu ré hã, 100 na robꞌrã iwahâzé, duré misi romhâ ꞌmanharĩ marĩ waꞌu nhemezé iꞌmasi uwa ꞌrãi waꞌu isé na te te iꞌwapé zahuré hã.
2 Tawamhã te apito Dawi ãma sadanha ãne:
— E marĩ te za ã norĩ na hã iꞌmanha.
Ziba, ma te sadaꞌâ ãne:
— Ã hã awaru poꞌrepore norĩ, apito hawi aꞌuwẽ norĩ hã te te sima ꞌre ibazadâ zaꞌra mono da hã wa we saprõni zahuré. Duré iꞌuꞌẽtẽ wapu norĩ, robꞌrãi norĩ me hã, aibâ norĩ ãma ĩsiꞌupari zaꞌra zéb da hã wa we tidu. Duré uwa ꞌrãi waꞌu isé hã aꞌubuni wi suparaꞌré ꞌre isaꞌwari mono ãma wasutu uptabi wa, te te iꞌâhuri da hã wa we tãma âri zaꞌra.
3 — E mame te Mefibozéti hã tihâiba, asibꞌihâꞌa Sauhu nhihudu hã. — Ãne te apito hã sadanha.
Ziba, ma te sadaꞌâ ãne:
— Zeruzalẽ ãma te ta hã nhamra uꞌâ, te te sina robꞌumnhasi wa, Izaraéu nhihudu norĩ, apâ roti hã za te te tãma sõmri õꞌumnhasite, iꞌrada Sau isiꞌapitozé hã.
4 Tawamhã apito te Zibaha ma tinha ãne:
— Uburé Mefibozétihi nhimarĩ hã te za oto aima tihâimana zaꞌra, ate da.
Ziba ma te duré ãne ãma sadaꞌâ:
— Wa za aima aiwẽꞌẽ, ĩnhibꞌapito asõꞌre. Õne uꞌâ ĩma ꞌre aipẽꞌẽ toi uꞌâsi mono da si, ĩma iwẽ hã!
Dawi norĩ wasuꞌu, Simehe me
5 Tawamhã apito Dawi hã ma tô ꞌrinhoꞌu Baurĩ u hã wi. Wisi wamhã, Simei, Geraha ꞌra, Sau sisãnawã siwadi ꞌra ma tô itẽme mo. Te te sõpẽtẽ wamhã, ma tô robꞌmanharĩ wasétézé hã nasi ãma pisutu.
6 Simei hã te duré nasi hâ Dawi ẽtẽ na. Ite dama rotiꞌwa norĩ zama, te nasi ahâ, Dawihi te dasiꞌwapéi ꞌmanharĩꞌwa norĩ te te siwi uirĩ zaꞌra nherẽ.
7 Tawamhã Dawihi ãma robꞌmanharĩ wasétézé te te pisutu wa, te ãne tãma tinha:
— Ã hawi aiwatobro, asipãrĩ zeire! Duré marĩ ꞌmanharĩ wasété zei ꞌwaire!
8 A hã ma tô Sau isiꞌapitozé hã iꞌârire. Tahawa, Uburé Danhibꞌapito te aima robꞌmanharĩre ãhã na hã, Sauhu hawi aꞌuwẽ norĩ ahâ uptabi na uprosi wa. Tahawa, ꞌRe ihâimana uꞌâsi mono awaꞌawi na ma tô isiꞌiꞌrãnhoꞌõmozé aiꞌra Absarõhõ ma hã tisõ. Duré aihâimanazéb ꞌremhã roꞌwaꞌrutu di, iꞌasipãrĩ zeire!
9 Tahawa, te Abisai, Zeruꞌiza na ina nhisi hã tãma tinha ãne, apito ma:
— E marĩ da, ma tô iwapro, ã hã wapsã idâ te te aiꞌãma iwasété da hã. Tahawa maꞌãpé ĩma rowairébé, wa hã sô ĩmorĩ da, te ꞌrãnhizâri da!
10 — Zeruꞌizaha ꞌra norĩ, ã hã ate waꞌaba õ di, romhâimanazé hã. — Ãne ma te apito Abisai norĩ ma, isisãnawã Zoabihi me hã asa ãma tãma waꞌrãmi zahuré.
— Uburé Danhibꞌapito, robꞌmanharĩ wasétézé hã te te ĩꞌãma pisutu da, ã hã aibâ ma, te te ꞌrui wamhã, e ꞌwa hã te za bété sadanha, marĩ wa, ãne hã te te iꞌmanharĩzém na hã.
11 Tawamhã Dawi te Abisaihi ma, duré uburé ite dama ipire norĩ ma hã tãma nharĩ zaꞌra ãne:
— Tô ĩꞌra te te ĩwĩrĩ da, te te sima pibui wamhã, e marĩ da bâ, wa za bété ãma ĩtobꞌuzu, Bẽzamihĩ nhihudu tô õne hã te te sima iwẽzéb zarina te te iꞌmanharĩzém na hã. Ã hã aibâ rowẽ na hâimana da hã tãma saꞌré zaꞌra waꞌaba. Duré robꞌmanharĩ wasétézé te te ĩꞌãma pisutu da hã tãma saꞌré zaꞌra waꞌaba. E marĩ wa. Uburé Danhibꞌapito ãne hã te te tô ꞌmanharĩ da, te te tãma ꞌrui wa.
12 Ãté Uburé Danhibꞌapito si te za ꞌmadâ, ĩnhimirobzépatazé hã. Ãté taha zarina te za marĩ iwẽ si ĩꞌãma pisutu, ã hã robꞌmanharĩ wasété nhowaꞌreꞌremhã.
13 Tawamhã Dawi norĩ tite aibâ norĩ me hã ma tô timorĩ na ãma uzusi zaꞌra. Simehe zama, te isiré isababab zaꞌra hã mo, ẽtẽ nhisi baba, Dawihi ãma robꞌmanharĩ wasété zé te te ãma pisutu mono sina, duré ẽtẽ na te te hâ mono sina, duré tiꞌa na zama te te sazu mono sina.
14 Tawamhã apito norĩ tite aibâ norĩ me, sadâꞌâ uptabi zaꞌra na panhoꞌu Zodã pa u hã ma tô aihutu. Sihutu wamhã, te tame oto tiwaꞌutu zaꞌra.
Zeruzalẽ u Absarõ apâ imorĩzé wasuꞌu
15 Absarõ norĩ hã ma tô Zeruzalẽ u uburé Izaraéu nhihudu norĩ me oto asisi. Sisisi wamhã, ma tô duré Aitopé ime zaꞌra hã tihâiba.
16 Husaꞌi hã romnhiwasi Dawihi ma, te te ꞌre iroti mono hã, Absarõ te te sõpẽtẽ wamhã, ma tô hârâ ꞌrãihâ na hâ ãne:
— Apito, rowẽ na si ꞌre aihâimana mono! Apito, rowẽ na si ꞌre aihâimana mono!
17 Tawamhã Absarõ te ãne sadanha:
— E mahãta asiwaihuꞌu ma, sena na iꞌaihâimanazé hã. E marĩ wa bété, ime hã aimorĩ õ di.
18 Husaꞌi ma te ãne ãma tãma waꞌrã:
— E niha wa za bété ãne hã ꞌmanha. Wa hã wa ĩhâiba, Uburé Danhibꞌapito ã hã aꞌuwẽ norĩ ma da, duré uburé Izaraéu nhihudu norĩ ma da hã te te ipisutu siré. Tahawa, wa za wa hã aime ꞌre ĩhâimana.
19 Ãhã wamhã, e ꞌwa nhibꞌaꞌuwẽ na wa za bété ꞌre ĩhâimana, ĩnhibꞌihâꞌa ꞌra upana hã. Ãne aimama nhibꞌaꞌuwẽ na ꞌre ĩhâimana mono ne, wa za ãhã na asibꞌaꞌuwẽ na aima ꞌre ĩhâimana, wa hã.
20 Tawamhã Absarõ, te Aitopéhé ma tinha ãne:
— Wa ĩsima wẽ, ĩma rowaihuꞌu da. E marĩ, wa za ꞌmanharĩ zaꞌra ni.
21 Aitopé, ãne ma te ãma sadaꞌâ:
— Aimama mro prã norĩ na, maꞌãpé marĩ hã ãma ꞌmanharĩ zaꞌra na, isimiromhurizé ꞌri ꞌrãihâ te te ꞌre ꞌmadâꞌâ zaꞌra mono da, te te irẽme zaꞌra norĩ ãma hã. Ãne wamhã, uburé Izaraéu nhihudu norĩ te za waihuꞌu zaꞌra, aimama nhitobꞌru na oto iꞌaihâimana na hã. Ãne wamhã, te za duré asibꞌaꞌuwẽ norĩ hã sima rowẽ pese zaꞌra.
22 Tawamhã Absarõhõ ma, ma tô apito nhimiromhurizé ꞌri nhisi hâpâ ãma romhâ ꞌmanharĩ na ꞌri hã siwi tisã. Duré tame ma tô uburé norĩ nhoꞌremhã timama mro prã norĩ ãmamhã marĩ hã ꞌmanha.
23 Taha wahu mono ꞌremhã, Aitopéhé nhimiroti te te dama ꞌre iꞌabꞌmanharĩ mono hã, tô ꞌRe ihâimana uꞌâsi mono mreme ne hã ma tô da te ꞌre mreme zamarĩ pese zaꞌra. Tane Dawi norĩ hã Absarõhõ me ma tô duré isimiroti zarina ãma ꞌre hâimana zahuré.
