2 Samuéu 17:1-29
17 Ãne pari te Aitopé, Absarõhõ ma tinha ãne:
— Ĩma saꞌré na, aibâ norĩ hã 12 miu na te pisutu zaꞌra da. Tawamhã ã barana wa za watobro, Davihi ãma, te roꞌwaꞌrutu da hã.
2 Wa za ꞌwapé, sadâꞌâ na hâimana ré, te te ãma wazere wa, duré robzeiꞌõ na hâimana ré. Tawamhã pahi uptabi na hâimana wa, te za duré ite dasiꞌwapéi ꞌmanharĩꞌwa norĩ hã uburé sisaꞌre. Tawamhã wa hã apito si wa za tiwĩ. Te wĩrĩ wamhã,
3 piꞌõ apâ timro tẽme te te sina ꞌre isiri zaꞌra mono ne, wa za ite aibâ norĩ hã uburé we atẽmemhã te simro. Duré misi aibâ wĩrĩ da hã, ma tô asima iwẽ. Tawamhã isiré aꞌuwẽ norĩ si wa za rẽme zaꞌra, rowẽ na ꞌre hâimana zaꞌra mono da.
4 Absarõ hã, ã hã rowaꞌõtõ na roti ma tô wẽsã. Duré uburé Izaraéu nhihudu ma iꞌrãnhoꞌõmo norĩ zama ma duré siwi wẽsã.
5 Tahawa, te Absarõ tãma nharĩ zaꞌra, ãne:
— Husaꞌi zô aihârâ aba, niha duré ta hã te te inharĩzé, wa te wasiwi wapari da.
6 Husaꞌi wisi wamhã oto, te Absarõ ãne tãma rowasuꞌu:
— Aitopé roti te te wama iꞌmanharĩ zaꞌra hã ãne. E wa za wasiwi ꞌmanharĩ ni. Duré mare wamhã, a hã te za wama iwaihuꞌu zaꞌra, marĩ, wa te wasiwi iꞌmanharĩzéb da hã.
7 Husaꞌi, ma te ãne ãma sadaꞌâ asa:
— Aitopé, tinhimiroti ãhã na hã te te aima iꞌmanharĩ zaꞌra waꞌaba zé hã iwẽ hãi õ di.
8 A hã ma tô aimama ꞌre ihâimana mono zé hã, duré ite aibâ norĩ ꞌre ihâimana zaꞌra mono zé hã iwaihu, siptete uptabi na dasiꞌwapéi ꞌmanharĩꞌwa na ꞌre ihâimana zaꞌra mono na hã. Ma tô duré iwaihuꞌu zaꞌra, sitiꞌru na ꞌre ihâimana zaꞌra mono na hã, aiwa ursu marã na ꞌre hâimana mono ré, iꞌra da te tiwi ꞌre simiꞌuri zaꞌra mono wa, ꞌre isitiꞌrui mono ne hã. Aimama hã dasiꞌwapéi ꞌmanharĩꞌwa isimirosaꞌrata waihuꞌu pe. Tahawa duré mara na hã, tite dasiꞌwapéi ꞌmanharĩꞌwa norĩ ꞌratamhã ꞌre hâimana mono õ di.
9 Tahawa, ãhã na awaꞌawi na hã ãté ẽtẽ na abꞌre ꞌre simaꞌuri nherẽ, niha wamhã duré nimomo rom na. Tawamhã Davi ate dasiꞌwapéi ꞌmanharĩꞌwa norĩ te te sahui wi, niꞌwam norĩ ãne na te te iwapari zaꞌra hã, te za nharĩ zaꞌra ãne: “Absarõhõ te dasiꞌwapéi ꞌmanharĩꞌwa norĩ ãma hã ma aiꞌuté zaꞌra ni.”
10 Tawamhã dasiꞌwapéi ꞌmanharĩꞌwa norĩ sibꞌru uptabi nherẽ, duré nima norĩ aiwa huꞌu zérépa ne sahi uptabi nherẽ, te za tipahi pese zaꞌra. E marĩ wa. Uburé Izaraéu nhihudu norĩ ma hã tãma waihuꞌu pese zaꞌra di, aimama hã dasiꞌwapéi ꞌmanharĩꞌwa isiptete na hã, duré aibâ norĩ ime ihâimana zaꞌra isiꞌwapé waihuꞌu pe isiptete zaꞌra na hã.
11 Tahawa, te aima irotizé hã ãne: Maꞌãpé Izaraéu nhihudu norĩ uburé asima ꞌrãꞌõtõ, tiꞌai waꞌõtõ nhoꞌõmo ꞌre, uburé dazaꞌrui mono bâ. Tawamhã pa zaihâ na suparaꞌré ꞌre isimiꞌwara mono ne ahâ uptabi na asima ꞌrãꞌõtõ pari wamhã, te za a hã tô asiꞌuihâ na dasiꞌwapéi u hã isimroi mo.
12 Tawamhã Davi hã nimame ihâimanazéb ãma, wa za wasiwi sõpẽtẽ ni za, marĩ iwatobrozé, õ hã te te waihuꞌu wana ré. Ãne wamhã, ite aibâ norĩ iꞌmasimani da hã mare uptabi di za.
13 Nimahã ꞌri nhoꞌu ẽtẽ na iꞌmanharĩ u sébré da, wara wamhã, te za uburé wanhibꞌaꞌuwẽ norĩ hã wedenhorõ hã we siwi ꞌwasa, ꞌri ꞌwawi waꞌra te te siwi ãma prub da hã, romharé u te te siwi sari da, ẽne hã isisiwimhã ꞌmaihâimana ãna da, hâimomhã.
14 Tawamhã Absarõ te uburé Izaraéu nhihudu norĩ me hã nharĩ zaꞌra ãne:
— Husaꞌi tinhimiroti te te iwaihuꞌuzé hã wẽ di, Aitopé te te wama iwaihuꞌu zaꞌra zém nhipai u.
Ãne wa, ma tô Uburé Danhibꞌapito waprosi, Aitopéhé nhimiroti iwẽ hã da te dasiwi samarĩ tõ da hã, ãne zarina Absarõhõ nhisi wimhã Uburé Danhibꞌapito nhimihâzé hã waptãꞌã da.
Davi da te poꞌre puꞌu wa, isimanizé wasuꞌu
15 Tawamhã Husaꞌi, Absarõhõ ma, duré Izaraéu nhihudu norĩ iꞌrãnhoꞌõmo ma, tinhimiroti te te tãma iwaihuꞌu zaꞌra zé, ma tô sasedoti Zadoquihi norĩ ma, Abiataha me tãma wasuꞌu zahuré. Duré Aitopé, tinhimiroti te te iwaihuꞌuzéb zama ma tô tãma wasuꞌu zahuré.
16 Tahawa, te ãne tãma nharĩ zahuré:
— Maꞌãpé waptu na, Davihi ma romreme hã sõmri waꞌaba, da te tãma ꞌmairowasuꞌu da, barana hã õmem haré hâimana tõ da, aꞌubuni wi suparaꞌré bâdâdi ꞌre isaꞌwari mono na hã. Davi hã ãhã na awaꞌawi waptu na te te saprĩ panhoꞌu Zodã pa na, tite aibâ norĩ ré hã uburé da te dasiwi uprosi tõ da!
17 Zonata norĩ, Aimaꞌasihi me, te Rozé na â nhisi ꞌrata simipari sina hã tihâimana zahuré, ꞌri nhoꞌõmo u zasi zahuré ré, da te ꞌmadâꞌâ zahuré tõ da, te te sima wẽ zahuré õ wa. Tawamhã nimahã na romhuriꞌwa sipiꞌõ, ma tô nasi itẽme tineb zahuré, romhâimanazém na te te tãma rowasuꞌu zahuré da hã. Ãne rowasuꞌu sidâpâsi, ma tô apito Davihi tẽme nasi tineb zahuré, te te tãma rowasuꞌu zahuré da hã.
18 Tane nherẽ, nimahã na ma tô aiꞌrepudu hã ꞌmadâꞌâ zahuré. Tahawa, te Absarõhõ ma wasuꞌu zahuré. Tahawa, ma tô Zonata norĩ, Aimaꞌasihi me, ꞌrinhoꞌu Baurĩ na isisi ãma aibâ ꞌre ihâimana mono nhorõwa u hã saꞌẽtẽ tineb zahuré. Tame isõrõwa ꞌrata â zô abꞌre ihâimana ꞌre, ma tô tizasi zahuré.
19 Tawamhã aibâ mro, ma tô dasisuwazé hã hânhozi, abꞌre zadawa nhisi wimhã. Amnho zu pe hã ma duré isisi wimhã ãma ropé, niꞌwa te te upsibi me tõ da hã.
20 Tawamhã Absarõhõ te, dama ipire norĩ hã ma tô oto aihutu. Sihutu wamhã, ma tô piꞌõ hã siwi sadanha ãne:
— E mame te tihâimana zahuré, Aimaꞌasi norĩ, Zonataha me hã.
— Pa nhoꞌõmo na ma saprĩ zahuré! — Ãne ma te piꞌõ hã asa ãma tãma waꞌrãmi zaꞌra.
Tawamhã aibâ norĩ hã sô ꞌre rĩtĩ zaꞌra mono wamhã, te te siwi sõpẽtẽ zahuré õ di. Tahawa ma tô apâ Zeruzalẽ u hã aiꞌabaꞌré.
21 Apâ siꞌabaꞌréi parip si, ma tô Aimaꞌasi norĩ, Zonataha me abꞌre hawi pusi zahuré wa, apito Davi te te poꞌre puꞌu zahuré da hã itẽme tineb zahuré. Tawamhã ma tô Aitopé te te sada irowaꞌõtõzé hã tãma wasuꞌu zahuré. Tahawa ma tô ãne tãma nharĩ zahuré:
— Maꞌãpé saꞌẽtẽ pa na hã saprĩ na!
22 Tawamhã Davi, tite aibâ norĩ me hã ma tô panhoꞌu Zodã pa na saprĩ zaꞌra. Bâdâ ꞌrãi watobro wana ré, ma tô uburé hã saprĩ pari zaꞌra.
23 Aitopé, isimiroti zarina idahâimana zaꞌra õ na, te te waihuꞌu wamhã, ma tô tite awaru poꞌrepore sima bazadâ. Taha pari ma tô apâ mo, tite ꞌri nhoꞌõmo u hã. Tawamhã te te robzaꞌra wẽ pari, ma tô sisõꞌreti ꞌrâwi uihâ na. Tahawa, imama na, da te itiꞌazéb ãma ma tô dasiwi sẽrẽ ni.
24 Absarõ norĩ, tite dasiꞌwapéi ꞌmanharĩꞌwa norĩ me panhoꞌu Zodã pa na te te saprĩ zaꞌra siwaprã hã, ma tô Davi hã ꞌrinhoꞌu Maꞌanaꞌĩ na isisi u hã oto wi.
25 Nimahã na hã Absarõ ma tô Amasa na isisi hã Zoabihi nhowaꞌreꞌremhã pisutu, dasiꞌwapéi ꞌmanharĩꞌwa norĩ ꞌmadâꞌâꞌwa na hâimana da hã. Amasa hã, Itra na aibâ nhisi ꞌra, ismaelita. Ina hã Abigaiu, Naꞌasihi ꞌra, Zeruꞌiza, Zoabihi na sisãnawãi ꞌra.
26 Tawamhã Absarõ norĩ hã, Izaraéu nhihudu norĩ me, Giliadi tiꞌai ãma hã ma tô sima ꞌri nhoré zaꞌra.
27 Davi hã, Maꞌanaꞌĩ u wisi wamhã, ma tô Sobi, Naꞌasihi ꞌra hã sõpẽtẽ, Amo tiꞌai ꞌre, ꞌrinhoꞌu Raba ãma ꞌre ihâimana mono hã ma tô sõpẽtẽ. Duré Maqui, Amiꞌéhé ꞌra ꞌrinhoꞌu Lo-Deba na isisi ãma ꞌre ihâimana mono hã ma tô duré sõpẽtẽ. Baziraꞌi zama, Giliadi tiꞌai ꞌre, ꞌrinhoꞌu Rogerĩ ãma ꞌre ihâimana mono hã ma duré sõpẽtẽ.
28 17:28-29 Ã norĩ hã ma tô pizaꞌa ꞌrenhoꞌa ꞌreptõ hã, duré tiꞌai ꞌmanharĩ na marĩ nhemezé piza hã, duré waptâ hã, dasa zama Davihi ma, duré ite aibâ norĩ ma hã ꞌwasa. Duré amnho trigu zama ma tô ꞌwasa, cevada hã, farinha trigu zubꞌa ꞌré hã, uhi hã, amnho zazu hã, robꞌrã erwira na isisi hã, ropĩ hã, abaze danhimizama hâiwaꞌu uꞌẽne hã, duré nima norĩ poneꞌẽrebâ zéré mapu hã. E marĩ wa. Õ norĩ ma hã waihuꞌu pese zaꞌra wa, Davi norĩ tite aibâ norĩ me mra te te isépata zaꞌra zém na hã, ꞌrubu na ihâimana zaꞌra zém na hã, duré wasutu uptabi na ihâimana zaꞌra zém na hã aꞌubuni wi suparaꞌré ꞌre isaꞌwari mono ãmamhã. Tahawa, ma tô ã norĩ marĩ hã tãma ꞌwasa tô.
29 ꞌMadâꞌâ 17:28
