2 Samuéu 18:1-33
18 Tawamhã apito Dawi hã ma tô tite dasiꞌwapéi ꞌmanharĩꞌwa norĩ hã uburé ꞌrãꞌõtõ, miu na iꞌupsãtã mono na, duré 100 na iꞌupsãtã mono na. Ma tô duré ta norĩ ꞌmadâꞌâꞌwa da hã te te apisutu.
2 Taha pari siꞌubdatõ iwaꞌõtõ na wairébé da hã ma tô oto tãma robꞌru zaꞌra, Zoabi isibꞌihâꞌa na tãma ihâimana zaꞌra hã, duré ihâiba amo iwaꞌõtõ ma, Zoabihi sisãnawã (ina zahuré hã Zeruꞌiza) Abisai isibꞌihâꞌa na tãma ihâimana zaꞌra hã, duré iwaꞌõtõ hâiba amoi ma, Itaꞌi isibꞌihâꞌa na tãma ihâimana zaꞌra hã, ꞌrinhoꞌu Gati na isisi ãma ꞌre ihâimana mono hã. Tawamhã apito te ãne tite aibâ norĩ ma nharĩ zaꞌra:
— Ĩzama wa za ãma asiré ĩmorĩ zaꞌra waꞌwa.
3 Tane nherẽ, ma te ãne ãma sadaꞌâbâ zaꞌra:
— Ãma aimorĩ õ di za, wasiré zaꞌra hã. E marĩ wa. Wa norĩ hã tãma wasisaꞌrei mono da wamhã, duré niha wamhã, wate dasiꞌwapéi ꞌmanharĩꞌwa norĩ aiwa ãma isipoꞌo na te te wawi uprosi wamhã, marĩ dai õ di za õ norĩ ma hã. Tane nherẽ, 10 miu na wahâiba zaꞌra nherẽ, a hã misi aihâiba nherẽ, wanhipai u tãma zaꞌra hã. Tahawa, wẽ di, ꞌri nhoꞌõmo ꞌrep si ãme iꞌaihâimana da hã, waꞌuparizém na si wapawaptob zaꞌra da.
4 Tawamhã apito, ma te ãne ãma tãma waꞌrãmi zaꞌra:
— Wa za ꞌmanha tô, niha hã iwẽ asiwi isãmri zaꞌra waꞌaba zéb zarina!
Tahawa apito te ꞌridawa zaꞌẽtẽ zababa dasiꞌwapéi ꞌmanharĩꞌwa norĩ 10 miu na iwaꞌõtõ na te te ropãrĩ zaꞌra mono sina, sisõré pese na wairébé ré hã, duré 100 na iwaꞌõtõ na wairébé ré hã za.
5 Tawamhã ãne ma te tãma waihuꞌu Zoabihi ma hã, Abisaihi ma hã, duré Itaꞌihi ma hã:
— Aima ĩwẽ zaꞌra waꞌaba wamhã, maꞌãpé iprédupté Absarõ hã asiwi pibui wẽ waꞌaba, uꞌa tõ da.
Ãne hã uburé dasiꞌwapé ꞌmanharĩꞌwa norĩ hã ma tô daꞌmadâꞌâꞌwa norĩ ma, Dawi te te tãma iwaihuꞌu zaꞌra zé hã wapari zaꞌra.
6 Tawamhã Dawihi te dasiꞌwapéi ꞌmanharĩꞌwa norĩ, ma tô wairé roptehutu u, Izaraéu nhihudu norĩ te te ꞌwapé zaꞌra da hã. Tahawa, ma tô Efraĩ tiꞌai ꞌre marã ihâimana ãma aiꞌwapé zaꞌra.
7 Tawamhã Dawihi te dasiꞌwapéi ꞌmanharĩꞌwa norĩ, Izaraéu nhihudu norĩ ãmamhã ma tô ãma aiꞌuté zaꞌra. Te te ãma iꞌaiꞌuté zaꞌra zé hã, iwasété uptabi. 20 miu na ma tô taha bâtâ na hã siꞌuprosi.
8 Tô taha robꞌremhã dasiꞌwapé hã parapo wamhã, ma tô marãi ãmamhã aibâ norĩ hã ahâ uptabi na aiꞌutõ, rom na isiꞌwapé zaꞌra norĩ isiꞌutõrĩ nhipai u.
9 Taha ré, ma tô niꞌwam norĩ Dawihi te dasiꞌwapéi ꞌmanharĩꞌwa, Absarõ hã siwi sõpẽtẽ. Absarõ hã te awaru poꞌrepo ba nhisi wara. Carvariu na wede nhisi zahâpâ te te roꞌrazâri wamhã, ma tô wede panhipti hã ꞌrã tété. Awaru poꞌrepore hã te te tô tiwara na uzusi wamhã, ma tô Absarõ hã wede panhipti na isaꞌu daꞌo.
10 Tawamhã Dawihi te dasiꞌwapéi ꞌmanharĩꞌwa misi aibâ, ma tô Absarõ ꞌmadâ. Tahawa, te wasuꞌu Zoabihi ma ãne:
— Absarõ wede panhipti na isaꞌo hã wa tô ꞌmadâ!
11 Tawamhã Zoabi, te ãma sadanha ãne:
— E ma iꞌmadâ. Zapré tamem haré wĩrĩ õ di. Wa hã wa aré aima sõmri zaꞌra, 10 na ẽtẽ waipo prã prata ꞌmanharĩ zapotore hã, duré misi daꞌusisizé hã.
12 Tane nherẽ, ma te aibâ ãne ãma tãma waꞌrã:
— Tô aré a hã miu na prata ꞌmanharĩ zapotore hã ĩma sõmri da nherẽ, wa hã te aré apito ꞌra da, ĩnhibꞌrada isarõtõ da hã mare di. Uburé wa norĩ hã apito, tinhimiroti te te aima iwaihuꞌuzé hã wa tô wapari zaꞌra ni, Abisaihi ma, duré Itaꞌihi ma, ãne: “Aima ĩwẽ zaꞌra waꞌaba wamhã, maꞌãpé iprédupté Absarõ hã asiwi pibui wẽ waꞌaba, uꞌa tõ da.”
13 Ĩnhimipari ãna ĩhâimana wa, Absarõ te wĩrĩ ꞌwaꞌâhã, te aré apito ãne na hã duré waihuꞌu. E marĩ wa. Õhõ ma uburé marĩ hã tãma waihuꞌu pese wa. Duré aré a hã ĩꞌwawimhã iꞌaimapa da hã mare di.
14 — Asiré bâdâ saꞌẽtẽ na te isimini da hã mare di! — Ãne te Zoabi tãma tinha.
Tahawa, Zoabi siꞌubdatõ isiꞌuwazi ꞌrãꞌwa ma tô timra. Taha na ma tô Absarõ zahadu hâiba ré wede nhisi panhipti na saꞌo ré hã ãma sõꞌutu zapuꞌu zaꞌra.
15 Tawamhã Zoabihi te dasiꞌwapéi ꞌmanharĩꞌwa norĩ, ma tô Absarõ hã siwi uirĩ. Tahawa, ma te oto siwi wĩrĩ pese.
16 Tawamhã Zoabi, ma tô danhimnhihârâzé hã hârâ, dasiꞌwapé oto simizazâri da. Tahawa, ite dasiꞌwapéi ꞌmanharĩꞌwa norĩ hã, Izaraéu nhihudu norĩ zarina timorĩzé te te sahâri zaꞌra wamhã, ma tô apâ oto aiꞌabaꞌré.
17 Absarõhõ hâiba te te siwi âri wamhã, ma tô siwi time, marãi ãma abꞌre ꞌrehâ uptabi wa. Tahawa, ma tô ẽtẽ na hã siwi upsibi ꞌrãihâ pese. Ma tô duré Izaraéu nhihudu norĩ, tinhorõwa mono bâ hã simani.
18 Absarõ ꞌre hâimana mono ré hã ma tô ẽtẽ na ꞌri hã iꞌuirĩ na ihâimanazém na ãma ꞌre idasipoꞌre puꞌu zaꞌra mono zéb da hã sima ꞌmanha, ẽtẽ nhiꞌriti wa, romharé Apito norĩ na romnhisi ãma. E marĩ wa. Iꞌra hã tãma ꞌmaihâimana õ wa, isisi hã õne uꞌâ ꞌre ihâimana mono zéb da hã. Tahawa, ꞌri isa tinhisi na ma tô sisi. Ta hawim haré te ãhã na hã dama waihuꞌu pese na ꞌre hâimana, Absarõhõ te ꞌri na hã.
Absarõ dâꞌâ wa, Dawi isiwaꞌõzé wasuꞌu
19 Tawamhã Aimaꞌasi, Zadoquihi ꞌra, te Zoabihi ma tinha ãne:
— Ĩma rowairébé, apito u ĩwara da, te tãma rowasuꞌu da, Uburé Danhibꞌapito iꞌuwaibaba na te te iꞌmanharĩ na, isitobꞌru norĩ wi te te isõꞌreptuzém na hã.
20 Mare di. — Ãne ma te Zoabi ãma tãma waꞌrã. — Ãhã na rowasuꞌu iwẽ, a hã iꞌâri da hã mare di. Nimahã na romhâimana zahu wapsi, te za tane hã iꞌmanha. Ãhã na hã mare di. E marĩ wa. Apito ꞌra hã dâꞌâ wa.
21 Tawamhã Zoabi, te tite romhuriꞌwa etiopihi ma tinha ãne:
— A hã te za aimo, apito ma, rowasuꞌu da hã marĩ iꞌmadâꞌâzém na.
Tawamhã Zoabihi nhoꞌre romhuriꞌwa siwẽꞌẽi pari, ma tô siꞌabaꞌré na watobro, wara da.
22 Tane nherẽ, ma tô Aimaꞌasi nasi ãne tãma tinha, te te tãma rowairébé da:
— Maꞌãpé ĩma rowairébé, ĩzama rowasuꞌu hã te âri da. Ĩma hã marĩ dai õ di, marĩ watobro wamhã.
— Ĩꞌra, e marĩ wa, te bété ãne ꞌmanharĩ da hã asima iwẽ. E aipawaꞌâ hã iꞌâri da ne, te irosaꞌra. — Ãne te Zoabi hã tinha.
23 — Marĩ watobro wamhã, tô watobro. Wa ĩsima wẽ, tô ĩmorĩ da hã! — Ãne ma Aimaꞌasi timreme na ãma tãma sahu.
— Mo oto tô aimorĩ! — Ãne Zoabi, ma te ãma tãma waꞌrã.
Tawamhã oto watobro wa, panhoꞌu Zodã pa u bâdâdi inomro na wara wamhã, ma tô romhuriꞌwa etiopi ãma hã sisaꞌu.
24 ꞌRidawa zaꞌẽtẽ na ꞌri nhoꞌõmo hawi rob u dapusizéb ãma, duré ꞌri para u ꞌri nhoꞌõmo tẽme ꞌre idanhisisi mono zé waꞌwa, te Dawi hã nhamra. Tawamhã robꞌmadâꞌâꞌwa ma tô saiꞌu hâimo, ꞌri ꞌwawi waꞌra ꞌrãihâ na. ꞌRi nhisi hâpâ ãma te nhamra. Ta hã rob u te te robꞌmadâꞌâ wamhã, ma tô aibâ hã ꞌmadâ, siwaprosi we iwara hã.
25 Tawamhã ma tô apito hã poꞌre puꞌu. Tahawa te apito ãne tãma tinha:
— Tô siwaprosi wei wara wamhã, rowasuꞌu wẽ te we ĩma tiꞌâ.
Tawamhã we iwara hã ma tô oto wi.
26 Robꞌmadâꞌâꞌwa, duré aibâ ihâiba amo siwaprosi we iwara na te te ꞌmadâꞌâ wamhã, ma tô ꞌridawa zaꞌẽtẽ ꞌmadâꞌâꞌwai ma hã ꞌmahâ ãne:
— ꞌMadâꞌâ pé! Aibâ ihâiba amo te we duré wara!
— Taha zama te rowasuꞌu wẽ hã duré we tiꞌâ! — Ãne ma te Dawi hã ãma sadaꞌâ.
27 Tawamhã robꞌmadâꞌâꞌwa te ãne tãma tinha:
— Imorĩꞌrata na we iwara hã, ĩma hã, Aimaꞌasi, Zadoquihi ꞌra!
— Ta hã aibâ iprédupté iwẽ. Ãté rowasuꞌu wẽ hã te we tiꞌâ. — Ãne te apito hã tinha.
28 Tawamhã Aimaꞌasi te hârâ ꞌrãihâ na apito hã ꞌmahâ ãne:
— Uburé rowẽ si!
Hiꞌrãtitõ isõꞌre tãma sãmra wamhã, duré tiꞌubu na tiꞌai u te te tãma ropto wamhã, ma tô tãma tinha ãne:
— Ate Uburé Danhibꞌapito ãma, wawata zaꞌra waꞌaba, asada ihâimana zaꞌra norĩ ãma iꞌaiꞌutézé hã te te aima sõmri wa.
29 Tawamhã apito te ãne sadanha:
— E Absarõ aibâ iprédupté hã te rowẽ na tihâiba.
Tawamhã Aimaꞌasi ma ãne ãma sadaꞌâ:
— Aima dawadaꞌuriꞌwa Zoabi, we te te ĩma robꞌrui wa, we ĩmorĩ wi, wa hã wa tô ꞌmadâ, ꞌre idasiwairõtõ mono hã. Tane nherẽ, marĩ na te ãma aima irowasuꞌu da hã te waihuꞌu õ di.
30 — Aꞌâ ã niwĩ asa na, asimipari da! — Ãne te apito hã tãma tinha.
Tawamhã Aimaꞌasi hã ma tô aꞌâ za. Te aꞌâ mapa.
31 Tawamhã etiopi romreme ꞌwapéiꞌwa wisi wamhã, te apito ma ãne tãma rowasuꞌu:
— Apito, rowasuꞌu wẽ, wa we aima tiꞌâ! Ã bâtâ na ma tô Uburé Danhibꞌapito hã asada ihâimana zaꞌra norĩ ãma iꞌaiꞌutézé hã aima tisõ.
32 — E bété Absarõ, iprédupté hã. E rowẽ na te tihâiba. — Ãne te apito hã sadanha.
Tawamhã romreme ꞌwapéiꞌwa, ma ãne ãma sadaꞌâ:
— Wa hã ĩma iwẽ uptabi aré, õhõ zô marĩ iwatobro ne, uburé asitobꞌru norĩ zô, duré uburé asada ihâimana zaꞌra norĩ zô zama, marĩ sô iwatobro zaꞌra da hã.
33 Tawamhã apito wi, ma tô tiwi tirobzeiꞌõ pese. Tahawa, ꞌridawa zaꞌẽtẽ nhisiwi ꞌri ꞌre waꞌõtõ u te te saiꞌuri wamhã, ma tô aiwaꞌõ. Tawamhã robꞌru te, te nasi sina siri õwamhã, duré apâ hã. Duré taha wamhã, sadari ꞌrãihâ sina te tinha ãne:
— Ĩꞌra! Ĩꞌra Absarõ! Absarõ ĩꞌra! Ĩma hã wẽ uptabi di aré, asibrobꞌre ĩdâꞌâ da hã, ĩꞌra!
