2 Samuéu 19:1-43
19 Tawamhã Zoabihi ma, ma tô apito Dawi, tiꞌra Absarõhõ zô isiwaꞌõzé hã, duré te te sô irobzépatazé hã tãma wasuꞌu ni.
2 Ãne tô taha bâtâ na rowẽ zaꞌẽne aré ihâiba hã te te daꞌãma iꞌaiꞌuté zaꞌra zém na hã, ma tô robzeiꞌõ hã ãma tiwi saprĩ zaꞌra. E marĩ wa. Te te waihuꞌu zaꞌra wa, apito Dawi tiꞌra zô isiwaꞌõzé hã.
3 Tahawa, apâ siꞌabaꞌréi wamhã, ma tô ariꞌiwi pese mreme ãna ꞌri ahâ u hã asisi, dasiꞌwapéi ꞌmanharĩꞌwa norĩ dasiꞌwapéi wa, dama ꞌre sisaꞌre mono zép te, sisé wa, ariꞌiwi pese mreme ãna ꞌre isisisi mono ne.
4 Tawamhã apito siꞌubu ubu sina, ma tô sadari sina mreme ꞌrãihâ na nasi tinha ãne:
— Ĩꞌra! Ĩꞌra, Absarõ! Absarõ, ĩꞌra!
5 Tawamhã Zoabi, apito nhorõwa u ma tô mo. Morĩ wamhã, ma tô ãne tãma tinha:
— Ã bâtâ na hã ma tô ate dasiꞌwapéi ꞌmanharĩꞌwa te te siwi iꞌasõꞌreptu zaꞌra norĩ hã asina isisém hiri zaꞌra, aiꞌra siꞌaibâ norĩ me, aiꞌra sipiꞌõ norĩ me, duré aimro norĩ me, aimro prã norĩ me zama.
6 Apito, asawiꞌwa norĩ hã ma tô asiwi iwẽꞌõ pese zaꞌra. Duré aiwẽꞌõ pese ꞌwa norĩ si, aima sawi zaꞌra di. Ma tô ate dama ipire norĩ ma, duré ate dasiꞌwapéi ꞌmanharĩꞌwa norĩ ma hã, asihâiꞌré wasé, õ norĩ ꞌre ihâimana zaꞌra mono zé marĩ dai õre na hã. Duré ãhã na hã wa hã wa tô aiwaihuꞌu, Absarõ ãhã na hâimana ꞌwaꞌâhã, aré aima irowẽ uptabi, duré uburé wa norĩ hã wasiꞌutõrĩ ꞌwaꞌâhã, iꞌupana.
7 Tahawa, ãhã na maꞌãpé aimorĩ, ate dasiꞌwapéi ꞌmanharĩꞌwa norĩ, aimreme wẽ na upari zaꞌra da, duré siptete zaꞌra da. Ãne hã ꞌmanharĩ õ wamhã, ãhã na wa ropisutu, Uburé Danhibꞌapito nhisi na, awẽm na hã õ norĩ asiniwĩ iꞌmaihâimana da hã mare di za. Ãhã wamhã, iwasété uptabi te za oto tihâiba za, aihâimanazéb ꞌremhã.
8 Tawamhã apito ma tô wahudu. Wahutu wamhã, ma tô ꞌri ahâ u ꞌridawa zaꞌẽtẽ na ꞌre idanhisisi mono zéb ꞌrata nhamra. Tawamhã ite dasiꞌwapéiꞌwa norĩ, õme ihâimana na te te waihuꞌu zaꞌra wa, ma tô siwi uirĩ, imana wawimhã.
Taha ré, ma tô uburé Izaraéu nhihudu norĩ tinhorõwa mono bâ ꞌri u hã sisaꞌre.
Dawi, Zeruzalẽ u apâ te te sina isirizé wasuꞌu
9 Ma tô uburé tiꞌai waꞌõtõ nhoꞌõmo mono bâ mreme nhitiꞌru na te te sima nharĩ zaꞌra. Ãne te sima nharĩ zaꞌra:
— Apito Dawi hã ma tô wanhitobꞌru norĩ wi hã wanhoꞌreptu zaꞌra. Filisteu wi hã ma tô wanhoꞌreptu zaꞌra. Tane nherẽ, Absarõhõ uꞌâbâmhã, ma tô tiꞌai waꞌõtõ nhoꞌõmo hawimhã oto watobro.
10 Wa norĩ hã wa tô aré Absarõ, wate apito da hã wasiwi pisutu ni. Tane nherẽ, ma tô dasiꞌwapéi u dârâ. E marĩ wa bété, wa te wasiwi pibui õ di, apâ we wa te wasiwi ãma siri da, apito Dawihi ãma hã.
11 Tawamhã apito Dawi, Izaraéu nhihudu norĩ te te sima inharĩ zaꞌra zé hã ma tô waihuꞌu. Tahawa, ma tô sasedoti Zadoqui norĩ, Abiataha me, Zudaha nhihudu norĩ ma iꞌrãnhoꞌõmo norĩ tẽme hã satõrĩ zahuré, ãne na te te sadanharĩ zaꞌra da hã:
— E marĩ wa, te daꞌrãsutu u aihâimana zaꞌra waꞌwa, apâ apito Dawihi ãma isimiromhurizé ꞌri ꞌrãihâ u ãma asiwi siri aba da, asima iwẽ zaꞌra waꞌaba zém na hã, ãma aime zaꞌra waꞌaba da hã.
12 A norĩ waꞌwa hã ĩsisãnawã ĩsihâiba uptabi, duré ĩsiwapru uptabi. E marĩ wa, ma bété daꞌrãsutu ãmap si ĩpawaptob zaꞌra waꞌaba da hã, duré apâ ĩꞌãma asiwi siri aba da hã asima iwẽ zaꞌra waꞌwa.
13 Tawamhã Dawi, ma tô duré Amasa hã tãma hâiba ꞌru zahuré, te te tãma sadawa wasuꞌu zahuré da ãne:
— A hã ĩsisãnawã ĩsiwadi uptabi. Tahawa, awaꞌawimhã ã hawim haré te za Zoabihi nhowaꞌreꞌre, dasiꞌwapéi ꞌmanharĩꞌwa norĩ ꞌmadâꞌâꞌwa na hã ꞌre aihâimana mo oto. Ãne, wa hã te ꞌmanharĩ õ wamhã, ꞌRe ihâimana uꞌâsi mono hã te te ĩwĩrĩre tô!
14 Tawamhã Dawi hã ma tô timreme na uburé aibâ Zudaha nhihudu norĩ hã sitẽme pizari zaꞌra. Tahawa, ma tô õ norĩ dama hâiba ꞌru zaꞌra, da te tãma ꞌmairowasuꞌu da, uburé apâ tite dawadaꞌuriꞌwa norĩ me hã te te sina siri zaꞌra da, õ norĩ ꞌre ihâimana zaꞌra mono zéb u hã.
15 Dawi hã apâ te te sina siri wamhã, ma tô panhoꞌu Zodã pa u hã wi. Tawamhã Zudaha nhihudu aibâ norĩ hã ma tô aiꞌabaꞌré, Gilga na romnhisi u hã te te siwi sõpẽtẽ da hã, te te saprĩ ré â na te te siwi ipawaptob da hã.
16 Taha ré, Simei Bẽzamihĩ nhihudu, Geraha ꞌra, ꞌrinhoꞌu Baurĩ na isisi ãma ꞌre ihâimana mono hã ma tô saꞌẽtẽ hã mo, Zodã pa u apito Dawi te te sõpẽtẽ da hã.
17 Simehe me hã te Bẽzamihĩ nhihudu norĩ aibâ hã miu na tihâimana zaꞌra. Duré Ziba, Sauhu hawi aꞌuwẽ norĩ ma, romhuriꞌwa zama ma tô Zodã pa u hã mo, 15 na tiꞌra norĩ ré, duré 20 na tite romhuriꞌwa norĩ ré. Tawamhã ma tô apito wana tamomomhã aihutu.
18 Sihutu wamhã, ma tô Zodã pa na hã saprĩ zaꞌra, apito nhibꞌaꞌuwẽ norĩ te te isaprĩ zaꞌra zém na te te pawaptob zaꞌra da, duré uburé apito te te sima iwẽzé, marĩ hã te te siwi ꞌmanharĩ da.
Tawamhã apito, â na te te oto saprĩ da wamhã, ma tô Simei isõꞌremhã sime, tiꞌai u.
19 Tahawa, ma tô ãne tãma tinha:
— Apito, wa aiwi waptẽ, ĩꞌruiwapari tõ da, Zeruzalẽ hawi aiwatobrozé bâtâ na, iwasédé te aima iꞌmanharĩzém na hã. Maꞌãpé ãma aipoꞌre siꞌâri, wa hã te iꞌmanharĩzém na hã. Niwamhã ãne na hã ãma rosaꞌrata tõ.
20 Wa hã ĩma waihuꞌu pese di, marĩ na te iꞌupazé hã. Tahawa, wa tô imorĩꞌrata na hâiwa nhimiꞌe niwĩ aꞌuwẽ hã wei mo, ãhã na te asõpẽtẽ da.
21 Tawamhã Zeruꞌizaha ꞌra Abisai hã ma tô ãne tãma tinha:
— Simei hã idâꞌâ da si, ꞌRe ihâimana uꞌâsi mono, apito da, te te ipisutu ma, iwasédé hã te te tãma pisutu wa.
22 Tane nherẽ, te Dawi, Abisaihi norĩ ma, isisãnawã Zoabihi me hã tãma nharĩ zahuré ãne:
— Zeruꞌizaha ꞌra norĩ, e marĩ hã aima hâimana aba bâ, ãne na hã! E te asima iwẽ waꞌwa, marĩ ĩzada poto aba da. Ãhã na, wa hã Izaraéu norĩ te apito ꞌremhã, Izaraéu nhihudu norĩ hã ã bâtâ ꞌremhã da te iꞌmaiwĩrĩ da hã mare di.
23 Tawamhã te Simeihi ma tinha ãne:
— Wa hã wa aima ropisutu, za da te aiwĩrĩ tõ da hã.
24 Tawamhã Mefibozéti, Sauhu nhihudu zama ma tô apito, te te sõpẽtẽ da hã mo. Tipara hã te te upsõi õ di. Duré tiwatasu hã te te sihâri õ di. Te te duré tiꞌuza hã hâ upsõi õ di, Zeruzalẽ hawi apito hã iwatobrozém hawim haré, te te daꞌãma aiꞌuté pari, bâdâ apâ te te sina isirizéb u.
25 Tawamhã Mefibozéti, apito te te sõpẽtẽ da, Zeruzalẽ u oto wisi wamhã, ta hã ma tô ãne sadanha:
— Mefibozéti, e marĩ wa, ãma ĩsiré hã aimorĩ õ di.
26 Tawamhã ma te ãne ãma tãma waꞌrã:
— Apito, aima waihuꞌu pese di, wa hã ĩmorĩ õ na ꞌre ĩhâimana mono na hã. Tahawa, ĩma romhuriꞌwai ma, wa tô tiꞌru, ĩte awaru poꞌrepore hã, te te ĩma bazadâ da aré, ãma asiré ĩmorĩ da hã. Tane nherẽ, ma tô ĩte romhuriꞌwa hã ĩma sadawa hapese.
27 Taré ma tô sadawa nhipese sina hã aima ĩwasuꞌu. Tane nherẽ, a hã ꞌRe ihâimana uꞌâsi mono ma hâiwa ãma romhuriꞌwa ne hã. Marĩ sena hã aima waihuꞌu pese di. Tahawa marĩ iwẽ sãmrizéb zarina hã maꞌãpé ꞌmanharĩ.
28 Uburé ĩmama hawi aꞌuwẽ norĩ hã ibâre hã iꞌuprosi zaꞌra da hã aré. Tane nherẽ, a hã asiré ꞌre ĩsai mono da hã, ma tô ĩma ipisu. Tahawa, wa hã ĩma hâimana õ di oto, marĩ te aiwi iwaptẽrẽ zahu da hã.
29 Tawamhã apito, ma ãne ãma sadaꞌâ, asa hã:
— Marĩ na hã nharĩ zahu tõ. E marĩ wa. Wa hã wa tô rowairébé, Sauhu nhimarĩ hã aima waꞌaba si sipoꞌo aba da hã, Zibaha me.
30 Tane nherẽ, Mefibozéti ma ãne ãma tãma waꞌrã:
— Zibaha ma si, uburé marĩ hã tãma hâimana. Ĩma ipire hã apâ rowẽ na asõrõwa u asina isirizép si.
31 Baziraꞌihi zama ꞌrinhoꞌu Rogerĩ ãmamhã, Ziliadi tiꞌa niwĩmhã ma tô tite ꞌri nhoꞌõmo hawimhã mo, Zodã pa â na apito siré te te saprĩ da hã.
32 Baziraꞌi hã ihi uptabi. 80 na ãma iwahu. Duré isibro pe ta hã. Tahawa apito, Maꞌanaꞌĩ ãma hâimana ré hã ma tô te te ꞌre upari.
33 Tawamhã Baziraꞌihi ma, te apito hã tinha ãne:
— Baziraꞌi, ĩsiré ꞌre aihâimana mono da, Zeruzalẽ u hã ĩsiré ãma aimorĩ. Tawamhã wa za te ꞌre aiꞌupari.
34 Tane nherẽ, ma ãma tãma waꞌrã ãne:
— Wa hã ꞌre ĩhâimana hâ mono õ di za. E marĩ zô, wa za bété Zeruzalẽ u hã ãma asiré mo.
35 Ĩꞌãma iwahu hã oto 80 na. Tahawa marĩ hã te oto ꞌre awaihuꞌu mono õ di, iwẽ hã duré iwasédé hã. Duré marĩ te ꞌre ihâsi mono hã sei waihuꞌu õ di oto. Duré isõꞌreꞌwa norĩ nhoꞌre hã te ꞌre wapari waihuꞌu mono õ di oto. Tahawa, wa aré taré ropire hã te aima ꞌre sõmri ĩsina, apito.
36 Ĩma hã ibâi õ di, ĩpawaꞌâ saꞌẽtẽ na ĩma ꞌre ihâimana mono da hã, ãne na hã. Tahawa, wa za taré suru na asiré hã mo za, Zodã pa na saprĩ parimhã.
37 Maꞌãpé ĩma rowairébé, apâ ĩmorĩ da si, ꞌri u hã, ĩmama ꞌru ꞌrata ꞌrâwi ĩdâꞌâ da. Ãmemhã te tihâiba, ĩma romhuriꞌwa, Quima na isisi hã. Maꞌãpé õhõ si ãma asiré saprõni, marĩ asima iwẽzéb zarina tãma ꞌmanharĩ da hã.
38 Tawamhã apito, ma ãne ãma tãma waꞌrã:
— Wa za ãma ĩsiré saprõ tô. Uburé marĩ asima iwẽzéb zarina, wa za te tãma ꞌre abꞌmanharĩ. Duré siwaꞌru, wa za marĩ hã ĩwi ꞌre iꞌawaptẽrẽ mono hã te aima ꞌre abꞌmanharĩ za.
39 Tawamhã Dawi, uburé tite dasiꞌwapéi ꞌmanharĩꞌwa norĩ me, ma tô Zodã pa â na oto saprĩ zaꞌra. Tawamhã apito ma tô Baziraꞌi hã tobꞌrata hârâ na sawi. Duré iwẽ hã ma tô tãma pisutu. Taha pari Baziraꞌi hã ma tô ꞌri u hã apâ mo.
Izaraéu tiꞌai ꞌremhã duré Zuda tiꞌai ꞌrem norĩ me timreme na isiꞌwapé zaꞌra zé wasuꞌu
40 Tawamhã apito ma tô â na saprĩ, uburé Zuda tiꞌai ꞌrem norĩ aibâ siré hã, duré Izaraéu tiꞌai ꞌrem norĩ aiwa ãma isipoꞌo norĩ siré hã. Tawamhã ta hawi Gilga na romnhisi u ma tô mo. Morĩ wamhã, ma tô Quima hã isiré mo.
41 Tawamhã uburé Izaraéu nhihudu norĩ isiꞌabaꞌré hã ma tô Dawihi ma nharĩ zaꞌra:
— Apito, e marĩ da, ma tô wasisãnawã norĩ Zuda tiꞌai ꞌrem norĩ hã siwi aiꞌâ, Zodã pa zara u te te we siwi asaprõni da hã, aihawi aꞌuwẽ norĩ ré, duré ate aibâ norĩ ré.
42 Tawamhã Zuda tiꞌai ꞌrem norĩ aibâ hã ma te ãne ãma sadaꞌâbâ zaꞌra:
— Apito hã wasisãnawã zaꞌra dâꞌâsina, wa tô ãne hã wasiwi ꞌmanharĩ ni tô. E niha da hã ma tô ãne zarina hã bété asahi zaꞌra waꞌwa. E apito hã ma tô wasa hã wama waꞌâbâ zaꞌra. E ma tô duré marĩ hã wama sõmri zaꞌra.
43 Tawamhã Izaraéu nhihudu norĩ te ãne tãma nharĩ zaꞌra:
— Asipai u pese zaꞌra waꞌaba, te tô ibâre aré waniwĩmhã ꞌre hâimana apito Dawi hã, ãne nherẽ merẽ õ hã asisãnawã zaꞌra waꞌwa. E marĩ da, ma tô wa norĩ hã tarére na hã waꞌãma irosaꞌrata zaꞌra waꞌwa. Wa norĩ si wa tô imorĩꞌrata na apito ma, nharĩ zaꞌra ni, we apâ wa te wasiwi ãma siri da hã!
Tane nherẽ, Zuda tiꞌai ꞌre aibâ norĩ te nasi sitiꞌru sina saꞌẽtẽ ãma sadaꞌâbâ zaꞌra, Izaraéu nhihudu norĩ te te nasi ãma isadaꞌâbâ zaꞌra nhipai u.
