2 Samuéu 2:1-32
2 Tawamhã ãma ronomro pari, ma tô Dawi, Uburé Danhibꞌapito hã sadanha ãne:
— E wa za mo, Zuda tiꞌai ãma nimahã ꞌri nhoꞌõmo ma, ĩsiꞌĩꞌrãnhoꞌõmo da hã.
— Ĩhe, te za aimo! — Ãne ma te Uburé Danhibꞌapito hã ãma sadaꞌâ.
Te duré tawamhã ꞌri ahâ nhisi na ãma sadanha ãne:
— E ma hã tawamhã.
— Hebrõ! — Ãne ma te asa ãma sadaꞌâ.
2 Tawamhã Dawi, ma tô oto mo, Hebrõ u. Morĩ wamhã, ma tô timro norĩ hã siré saprõni zahuré. Ainoꞌã, ꞌrinhoꞌu Zezereu hawimhã, duré ihâiba amo Abigaiu, Nabauhu mro aré imrotõ ꞌrinhoꞌu Carmeru hawimhã.
3 Dawi hã tite dasiꞌwapéi ꞌmanharĩꞌwa norĩ zama te ꞌra ré siré hã te te simro. Ta norĩ hã ma tô Hebrõhõ waptoma ꞌre hâimana zaꞌra, ꞌri nhoꞌõmo mono na.
4 Tawamhã Zuda ãma aibâ norĩ hã ma tô Hebrõ u aiꞌabaꞌré. Tame ma tô Dawi iꞌrãnhoꞌõmo na tãma ꞌre ihâimana zaꞌra mono da hã siwi ꞌrãtiꞌi.
Tawamhã Dawi, Ziliadi tiꞌa niwĩ ꞌrinhoꞌu Zabesi na isisi ãma ꞌre ihâimana zaꞌra mono norĩ, Sau ãma te te itiꞌa zaꞌra zé te te waihuꞌu wamhã,
5 ma tô nima norĩ aibâ hã itẽme satõrĩ zaꞌra, ãne na romreme ré:
— Uburé Danhibꞌapito iwẽ si te te aima ꞌre pisutu zaꞌra waꞌaba mono, asimizawi aba zéb zarina, wate apito na asiwi itiꞌa zaꞌra waꞌaba zém na hã asiwi ꞌmanharĩ wẽ waꞌaba wa.
6 Wa ĩsima wẽ upta, Uburé Danhibꞌapito iwẽ na si aima ꞌre hâimana zaꞌra waꞌaba mono da si, duré sena na aima umnhasi zaꞌra waꞌaba sina, aima ꞌre hâimana zaꞌra waꞌaba mono da! Asiwi iꞌmanharĩ wẽ waꞌaba zéb zarina, ĩzama hã wa za duré te aima ꞌre ꞌmanharĩ wẽ zaꞌra waꞌwa.
7 Tahawa ãhã na hã asiptete zaꞌra waꞌaba, duré asibꞌru zaꞌra waꞌaba! E marĩ wa. Asibꞌapito zaꞌra waꞌwa Sau hã ma tô dârâ. Tahawa ma tô duré Zuda ãma aꞌuwẽ norĩ siwi ĩꞌrãtiꞌi, apito na tãma ꞌre ĩhâimana zaꞌra mono da.
8 Taha ré, Nehe ꞌra Abine, Sauhu te dasiꞌwapéi ꞌmanharĩꞌwa norĩ nhibꞌihâꞌa hã ma tô Sauhu ꞌra Ibozétihi me siré aimani zahuré dawi, Zodã pa pazara u, Maꞌanaꞌĩ na romnhisi u.
9 Tame Abine hã ma tô Ibozétihi ma, apito na ꞌre hâimana mono da hã, tãma ꞌmanha, ã norĩ ma romnhisi ma hã: Ziliadi, Asé, Zezereu, Efraĩ, duré Bẽzamihĩ ma zama. Tô uburé Izaraéu nhihudu norĩ ma, apito na ꞌre hâimana mono da hã ma tô tãma ꞌmanha.
10 Ibozéti 40 na ãma iwahub ãma ma tô Izaraéu nhihudu norĩ ma isiꞌiꞌrãnhoꞌõmo na hã ãma sãnaꞌrata. Maparane wahum na ma tô te te ꞌre daꞌabꞌmadâꞌâ. Tane nherẽ, Zudaha nhihudu norĩ hã Dawihi si te te siwi ꞌre umnhasi.
11 Dawi hã ma tô Hebrõ ãma ta norĩ nhibꞌihâꞌa na ꞌre hâimana, 7 wahu aiwa ãma isipoꞌo na.
Izaraéu ꞌremhã duré Zuda ꞌrem norĩ me isiꞌwapé zaꞌra zé wasuꞌu
12 Abine duré Ibozétihi te dasiꞌwapéi ꞌmanharĩ ꞌwa ꞌmadâꞌâꞌwa norĩ me, ma tô Maꞌanaꞌĩ hawimhã ꞌrinhoꞌu Gibiã u hã aiꞌabaꞌré.
13 Tawamhã Zoabi, ina Zeruꞌiza, Dawihi te dasiꞌwapéi ꞌmanharĩ ꞌwa ꞌmadâꞌâꞌwa norĩ me, ma tô Gibiã ãma puꞌu ꞌrata te te sõpẽtẽ zaꞌra da hã aiꞌabaꞌré. Tame ma tô puꞌu zaihâ siꞌuiwa na tihâimana zara Dawi norĩ hã, duré Abine norĩ hã.
14 Tawamhã Abine, te Zoabihi ma tinha, ãne:
— Maꞌãpé nima norĩ wate iprédupté wanhoꞌre tinhiꞌwa na, siꞌwapé zaꞌra da hã wa te tãma ꞌmanharĩ zaꞌra na.
— Wẽ di tô! — Ãne ma te Zoabi ãma sadaꞌâ.
15 Tawamhã Ibozétihi niwĩ Bẽzamihĩ nhihudu norĩ dasiꞌwapéi ꞌmanharĩꞌwa 12 na ihâimana zaꞌra hã ma tô Dawihi te ꞌwapé zaꞌra, 12 na ihâiba zaꞌra hã aiwa.
16 Isiꞌwapé zaꞌra mono bâ tiꞌrã na siwaibui wamhã, ma tô tiꞌaꞌre siꞌuiwa na sihâzu, sibꞌézé ꞌwapa na. Ãne wa, tiꞌai u siré rereꞌe wamhã, ma tô duré siré tidâꞌâ zaꞌra. Tahawa ꞌrinhoꞌu Gibiã ꞌrata taha romnhisi hã ãne: “Itehudu, sibꞌézé ꞌwapa na dasipãrĩzé.”
17 Tô taha bâtâ na ma tô dasiꞌwapé sena na itede hã watobro. Watobro wamhã, Dawihi te dasiꞌwapéi ꞌmanharĩꞌwa norĩ hã ma tô Abinehe ãma, Izaraéu nhihudu norĩ me hã ãma aiꞌuté zaꞌra.
18 Zeruꞌizaha ꞌra siꞌubdatõ ihâiba norĩ, Abisai, Azaéu, Zoabi, te tame siré tihâimana zaꞌra. Azaéu hã isiꞌabaꞌréi pe rom na aihâ isiꞌabaꞌréi pese ne.
19 Ta hã te Abinehe zarina awaꞌawi uꞌâsi wara.
20 Tawamhã Abine, sibabarãi u te te ꞌmadâꞌâ wa, ma tô ãne ꞌmahâ:
— Azaéu, e a hã.
— Ĩhe, wa hã! — Ãne ma te sadaꞌâ.
21 Abine te ãne tãma tinha:
— We ĩzarina hã aimorĩ tõ, asimizazâri! Maꞌãpé nimahã dasiꞌwapéi ꞌmanharĩꞌwa zarina si aiwara, isimarĩ hã tiwi asima ꞌmaꞌâri da.
Ãhã nherẽ, te Azaéu isarina si morĩ uꞌâ.
22 Tawamhã Abine te duré tãma nharĩ zahu ãne:
— We ĩzarina hã aimorĩ uꞌâsi tõ, asimizazâri! Te we rosaꞌrata nhiptede hã asina ĩma isõmri mo, te iꞌaiwĩrĩzéb da hã! Taha parimhã e niha wa za Zoabi asisãnawã hã ꞌmadâ za itõmo u, ĩtõmo na hã.
23 Tane nherẽ, Azaéu hã isarina timorĩ hã te te sazâri õ di. Tahawa, Abine isiꞌuwazi ꞌrãꞌwa na siwaꞌrãmimhã ma tô ãma simri, Azaéu hã. Tawamhã Azaéu diꞌi ꞌre ꞌrãꞌwazéb ré wamhã, ma tô iba u ꞌrãꞌwa watobro. Tahawa dâꞌâ siromo ma tô tiꞌai u hã waptãrã. Ma tô iwaptãꞌãzéb u nasi isihutu norĩ hã iꞌrata ꞌmazahâri zaꞌra ãma.
24 Tane nherẽ, Zoabi norĩ Abisaihi me, ma tô Abinehe zarina timorĩ na hã uzusi zahuré. Tawamhã bâdâ sébré wi, ma tô aimasisi zahuré Ama na ẽtẽ nhisi u, ꞌrinhoꞌu Giꞌa na bâtâ pusizém niwĩ ꞌre ihâimana mono u, bâdâdi na supara ꞌré na si ro ꞌre isaꞌwari mono nhoꞌõmo waꞌwaibaba Gibiã niwĩmhã.
25 Bẽzamihĩ nhihudu norĩ dasiꞌwapéi ꞌmanharĩꞌwa hã Abinehe mana wawimhã duré apâ te te sina ubumroi wamhã, ma tô ẽtẽ nhisiwi hâimo hã tihâimana zaꞌra.
26 Tawamhã Abine, Zoabi te ꞌmahâ ãne:
— E wasiꞌwapé na, wa za õne uꞌâ wa te ãma uzusi uꞌâsi zaꞌra. Ãne wamhã, romhâimanazé isé na si te za tirobꞌrãsutu. Wa norĩ hã asisãnawã zaꞌra waꞌwa! E niwamhã tãma waihuꞌu zaꞌra ã bâ bété, ate dasiꞌwapéi ꞌmanharĩꞌwa norĩ ma, wazarina tisiꞌabaꞌrézé te te isahâri zaꞌra zéb da hã.
27 Zoabi ma te ãne ãma sadaꞌâ:
— Wa hã, ꞌRe ihâimana uꞌâsi mono idâꞌâꞌõ nhisi na hã, wa ãne aima ropisutu. A hã tane ĩma nharĩ õ ꞌwaꞌâhã, te aré tô ĩte dasiꞌwapéi ꞌmanharĩꞌwa norĩ hã õne haré asarina zaꞌra waꞌaba aiꞌabaꞌré, awẽm na irowaꞌazéb u.
28 Tawamhã Zoabi ma tô hârâ, danhimnhihârâzé hã. Tahawa, ma tô uburé ite dasiꞌwapéiꞌwa norĩ, Izaraéu nhihudu norĩ zarina timorĩ hã sahâri zaꞌra. Duré dasiꞌwapé hã tahawa ma tô awaꞌawi ꞌmazazâ, te te ãma ꞌrãiwaꞌõmo zaꞌra ãna, timorĩ na.
29 Tô taha mara bâre, te Abine norĩ tite dasiꞌwapéi ꞌmanharĩꞌwa norĩ me hã Zodã pa waꞌwai baba ẽtẽ nhiꞌridi romharé inomro na si simisutu ropãrĩ sina sõré pese na aiꞌabaꞌré. Tawamhã ma tô oto Zodã pa â na hã saprĩ zaꞌra. Tawamhã awẽm na mararé bâre siꞌabaꞌréi wamhã, ma tô oto Maꞌanaꞌĩ u hã aihutu.
30 Tawamhã Zoabi, Abinehe zarina timorĩ te te ꞌrãiwaꞌõmo õ wamhã, ma tô uburé tite dasiꞌwapéi ꞌmanharĩꞌwa norĩ hã oto ꞌrãꞌõtõ. Tahawa ma tô oto waihuꞌu, 19 na sô iroꞌwanhiꞌriti zaꞌra na hã, Azaéu zamai ãna hã.
31 Tane nherẽ, Dawihi te dasiꞌwapéi ꞌmanharĩꞌwa norĩ hã ma tô Abinehe te norĩ Bẽzamihĩ nhihudu hã 360 na siwi uprosi.
32 Tawamhã Zoabi norĩ, tite dasiꞌwapéi ꞌmanharĩꞌwa norĩ me, Azaéu hâiba te te siwi âri wamhã, ma tô siwi tisẽ, Belẽ ãma isisãnawã norĩ te, abꞌre ꞌre. Taha pari ma tô duré mara bâre sisarina te te ropãrĩ zaꞌra mono sina, sõré pese na aiꞌabaꞌré. Siꞌabaꞌréi wamhã, awẽ wi ma tô oto aihutu, Hebrõ u hã.
