2 Samuéu 20:1-26
20 Tawamhã roti zarina ꞌre ihâimana mono õ hã ma tô tamemhã tihâiba Seba na isisi hã Bicrihi ꞌra, Bẽzamihĩ nhihudu hã. Ta hã danhimnhihãsizé ma tô hârâ, aꞌuwẽ te te ꞌrãꞌõtõ da hã. Te duré hârâ ꞌrãihâ na ãne tinha:
— Wa norĩ hã, Dawihi ãmamhã marĩ wama hâimana zaꞌra õ di! Tahawa, isiré ꞌre iwahâimana zaꞌra mono da hã marĩ zôi õ di! Izaraéu nhihudu norĩ, oto apâ ꞌri u wasiꞌabaꞌréi waꞌaba!
2 Tawamhã ãne zarina uburé Izaraéu nhihudu norĩ, Dawi te te siwi rẽme wamhã, ma tô Sebaha siré oto aiꞌabaꞌré. Tane nherẽ, Zuda tiꞌai ꞌre aibâ norĩ, ma tô Dawihi ãma sena na tihâimana zaꞌra. Tahawa, ma tô Zodã pa hawim haré isiré aiꞌabaꞌré, Zeruzalẽ u hã.
3 Tawamhã Dawi, ma tô Zeruzalẽ ãma tinhimiromhurizéb ꞌri ꞌrãihâ u oto apâ mo. Morĩ wamhã, ma tô 10 na timro prã norĩ hã sõré, nimahã ꞌri ꞌre, isimiromhurizé ꞌri ꞌrãihâ, te te aré sô iꞌmadâꞌâ zaꞌra hã. Ma tô duré tiꞌru, dasiꞌwapéi ꞌmanharĩꞌwa norĩ hã te te siwi ꞌmadâꞌâ zaꞌra da hã. Uburé marĩ te te sima ꞌre iwẽ zaꞌra mono hã ma tô duré tãma sõmri zaꞌra. Tane nherẽ, piꞌõ norĩ ãmamhã te te ꞌmairomhâimana õ di. Tawamhã õ norĩ ma, ma tô pisutu zaꞌra, ꞌri ꞌre, ꞌre hâimana uꞌâsi zaꞌra mono da hã, tidâꞌâzéb u, imro tiwi ꞌre idâꞌâ zaꞌra mono ne, ꞌre ihâimana zaꞌra mono da hã.
4 Tawamhã apito, Amasaha ma, te ãne tinha:
— Maꞌãpé sô aihârâ zaꞌra na, uburé Zuda tiꞌai ꞌre aibâ norĩ zô. Tawamhã te za we ãwa awẽ amo na hã isiré apâ aiwisi zaꞌra.
5 Tawamhã Amasa ma tô watobro, aibâ norĩ zô hârâ zaꞌra da hã. Tane nherẽ, apito bâdâ te te tãma itizém na hã apâ te te sina siri õ di.
6 Tahawa, Dawi te Abisaihi ma tinha ãne:
— Seba hã, Absarõhõ nhipai u te za wawi roꞌwaꞌrutu pese zaꞌra. Tahawa, maꞌãpé ĩte aibâ norĩ hã waibu na, isarina aiꞌabaꞌréi waꞌaba da. Ãnei õ wamhã, nima norĩ ꞌri nhoꞌu iꞌwawi waꞌra ꞌrãihâ ihâimana zaꞌra hã te za wawi ãma ate zaꞌra, ãma wawi isimani zaꞌra zéb da hã.
7 Tawamhã Zoabihi te aibâ norĩ, quereti norĩ hã, pereti norĩ hã, duré dasiꞌwapéi ꞌmanharĩꞌwa isibꞌru norĩ hã ma tô Abisaihi siré aiꞌabaꞌré. Ãhã wamhã, Zeruzalẽ hawimhã ma tô wairé, Sebaha zarina siꞌabaꞌré da hã.
8 Tawamhã ꞌrinhoꞌu Gibiã ãma ẽne itõmo zaꞌẽtẽ u oto sihutu wamhã, ma tô Amasa, siwi sõpẽtẽ. Zoabi hã dasiꞌwapé da, ꞌre idasiꞌuza zaꞌra mono zém na uza ré, duré daꞌusisizém na sibꞌézé ꞌwapa dasiꞌwapézéb da, da te ꞌre iꞌwasari mono ãma saꞌo ré hã ma tô tihâiba. Tawamhã te te itẽme sina rotété wi, ma tô sibꞌézé ꞌwapa tiꞌai u hã tiwi waptãrã.
9 Tawamhã Zoabi, te Amasa hã sadanha ãne:
— Ĩsiwaihu, e rowẽ di.
Tawamhã tinhibꞌrata nhimire niwĩ, ma tô Amasa hã iwatasu na tiꞌâ, tobꞌrata hârâ na te te sawi da.
10 Tane nherẽ, Amasa te te ꞌmadâꞌâ õ di, isibꞌrata hâiba amo niwĩ sibꞌézé te te ꞌre iꞌâri hã. Tawamhã Zoabi taha na, ma tô Amasa hã idiꞌi wimhã waꞌré. Te te waꞌréi wamhã, ma tô isãna hã tiwi watobro. Ma tô duré tiꞌai u hã tiwi ropé. Tahawa, ma tô awaꞌawi dârâ. Tahawa Zoabi hã te te duré ãma waꞌré zahu õ di, sibꞌézém na hã.
Taha pari Zoabi norĩ, tisisãnawã Abisaihi me hã ma tô õne haré Sebaha zarina timorĩ na hã uzusi zahuré.
11 Tawamhã Zoabihi te, dasiꞌwapéi ꞌmanharĩꞌwa Amasaha hâiba ꞌrata ꞌrâwi iꞌmaza hã ma tô hârâ ꞌrãihâ na hâ ãne:
— Zoabihi niwĩ uburé iꞌaihâimana zaꞌra waꞌaba norĩ, duré Dawihi niwĩ iꞌaihâimana zaꞌra waꞌaba norĩ, maꞌãpé Zoabihi zarina oto tô aiꞌabaꞌréi waꞌaba!
12 Amasaha hâiba hã iwapru na hâiba zapré ré ma tô papo haré bâdâdi waꞌwamhã nomro. Tahawa, Zoabihi pawaptoꞌwa, uburé idanhimizahâri zaꞌra na hã te te daꞌabꞌmadâꞌâ wamhã, ma tô Amasaha hâiba bâdâdi nhiti hã tisa. Ma tô duré dasisuwazém na hâiba zuwa.
13 Amasaha hâiba, bâdâdi nhiti da te dasiwi saꞌréi pari, ma tô Zoabihi siré uburé aibâ norĩ hã Sebaha zarina oto aiꞌabaꞌré.
14 Seba hã ma tô uburé Izaraéu nhihudu norĩ wamri mono nhiptiꞌa na roꞌrazâ. Tahawa, ma tô ꞌrinhoꞌu Abéu-Bete-Maꞌaca na isisi u mo. Tawamhã uburé Bicrihi te aꞌuwẽ norĩ ma tô siꞌrãꞌõtõ. Ma tô duré isiré ꞌri nhoꞌõmo u hã asisi.
15 Zoabihi te dasiꞌwapéi ꞌmanharĩꞌwa norĩ hã ma tô oto aihutu. Sihutu wamhã, ma tô ꞌrinhoꞌu hã siwi uirĩ. Tahawa, ma tô tiꞌa hã nasi siwi saꞌwa, ꞌri nhoꞌõmo ꞌwawi waꞌra ꞌrãihâ tẽme. Ma tô duré ꞌri nhoꞌõmo ꞌwawi waꞌra ꞌrãihâ ꞌrowi abꞌre ꞌmanharĩ na hã ãma siwi sãnaꞌrata, waptãꞌã da.
16 ꞌRi nhoꞌõmo ãma te piꞌõ iꞌrãi waihuꞌu pe hã ꞌre hâimana. Ta hã ma tô hârâ ꞌrãihâ na hâ ãne:
— Asiwi ĩwapari aba! Asiwi ĩwapari aba! Zoabihi ma, maꞌãpé ꞌmanharĩ aba, we ĩtẽme morĩ da ãwa, wa hã te tãma robzanhamri da!
17 Tawamhã Zoabi itẽme morĩ wamhã, te piꞌõ hã ãne sadanha:
— E a hã Zoabi.
Ĩhe, wa hã! — Ãne ma te asa sadaꞌâ.
— Ĩwapari, za te aima inharĩzém na hã! — Ãne te piꞌõ tãma tinha.
— Wa aiwapa tô! — Ãne ma ãma tãma waꞌrã.
18 Tawamhã piꞌõ te ãne oto tãma tinha:
— Ãne te duréihã da te ãma ꞌre iromhõsi zaꞌra mono zéb zarina hã da te ꞌre nharĩ zaꞌra: “ꞌRinhoꞌu Abéu u hã aiꞌabaꞌréi waꞌaba, roti hã asiwi waptẽrẽ aba da”. Ãne zarina, ma tô marĩ ꞌre ihâimana zaꞌra mono zém na hã da te ꞌre rowairébé zaꞌra.
19 Wate ꞌrinhoꞌu hã saꞌẽtẽ uptabi di. Duré romharé na si iwa ꞌre iromhâimana mono. Duré wa norĩ sena na Izaraéu nhihudu norĩ ꞌremhã ꞌre iwahâimana zaꞌra mono. E tiha da, ma tô bété asima ipibu, ꞌrinhoꞌu za iprubzém na hã. E te asima iwẽ, Uburé Danhibꞌapito te, prub da hã.
20 Tawamhã ãne ma te Zoabi asa hã ãma tãma waꞌrã:
— Niwamhã tane hã te ꞌmanharĩ waihuꞌu õ di za! Duré niwamhã, wa hã te iprub da hã mare di za. Duré ate ꞌrinhoꞌu niwamhã te iwamnarĩ da hã ĩma hâimana õ di!
21 Tane hã ãma wanhimirowaꞌõtõ zaꞌra õ di. Aibâ Efraĩ nhiptiꞌa niwĩ ẽtẽ ãma ꞌre ihâimana mono, Bicrihi ꞌra hã, Seba na isisi hã ma tô wate apito Dawihi da hã, sada tiwasété na ãma sãnaꞌrata. Taha aibâ si maꞌãpé asiwi sõmri aba, wa hã duré apâ ĩmorĩ hâ.
— Wa norĩ wa za ꞌri ꞌwawi waꞌra ꞌrãihâ nhisi hawi iꞌrã wasiwi me ni, aima hã! — Ãne te piꞌõ hã tãma tinha.
22 Tawamhã ãhã pari ꞌri nhoꞌõmo u piꞌõ hã ma tô mo, aꞌuwẽ norĩ ma te te tãma waihuꞌu zaꞌra da hã. Tawamhã Sebaha ꞌrã, te te siwi sizâri wamhã, ma tô Zoabihi ma siwi time, ꞌri ꞌwawi waꞌra ꞌrãihâ nhisi hawi. Tahawa danhimnhihârâzé ma tô hârâ. Te te hârâ wamhã, ma tô tite aibâ norĩ hã ꞌrãꞌõtõ. Ma tô uburé ꞌrinhoꞌu hã siwi tirẽ, apâ ꞌri u hã siꞌabaꞌré da. Taha pari Zoabi hã ma tô apâ hã mo, Zeruzalẽ ãma apito Dawihi ꞌrata hâimana da hã.
Dawihi te, dasiꞌwapéi ꞌmanharĩꞌwa norĩ ꞌmadâꞌâꞌwai wasuꞌu
23 Zoabi hã, dasiꞌwapéi ꞌmanharĩꞌwa norĩ Izaraéu nhihudu ꞌmadâꞌâꞌwa na hã ma tô ꞌre hâimana. Duré Benaia, Zoiadaha ꞌra, ma tô aꞌuwẽ quereti norĩ nhibꞌihâꞌa na, duré pereti norĩ nhibꞌihâꞌa na hã ꞌre hâimana.
24 Adonirã hã, dawadaꞌuri pese na romhuri pire na te te ꞌre iromhuri zaꞌra mono norĩ nhibꞌihâꞌa na ma tô ꞌre hâimana. Duré Zosafa, Airudihi ꞌra, apito zahâpâ dama rotiꞌwa na hã ma tô ꞌre hâimana.
25 Seva na isisi hã dama romnhihâtâ ꞌmanharĩꞌwa na ma tô ꞌre hâimana. Duré Zadoqui norĩ, Abiataha me hã ma tô sasedoti na dama ꞌre hâimana zahuré.
26 Ira hã, ꞌrinhoꞌu Zai na isisi ãma ꞌre ihâimana mono hã, Dawihi te sasedoti na ma tô duré ꞌre hâimana.
