2 Samuéu 21:1-22
21 Dawi iꞌrãnhoꞌõmo na dama ꞌre hâimana mono ré hã, ma tô siꞌubdatõ wahub ꞌremhã mram zépata na hã ꞌre romhâimana. Tahawa, Dawi ma tô Uburé Danhibꞌapito hã sadanha. Te te tiwi rowaptẽrẽ wamhã, ma tô ãma sadaꞌâ ãne:
— Sau, duré ihawi aꞌuwẽ norĩ te hã iꞌupa, dapãrĩ na hã. Ta hã ma tô Gibiã ãma aꞌuwẽ norĩ hã uprosi.
2 Gibiã ãma aꞌuwẽ norĩ hã, Izaraéu nhihudu norĩ hãi õ di. Ta norĩ hã amoreu na aꞌuwẽ wamri ĩsurure, Izaraéu nhihudu norĩ te te tãma iropisutu zaꞌra, iꞌwawi ꞌre simapa zaꞌra mono da hã. Tane nherẽ, ma tô Sau hã aré pibu, te te uprosi da, Izaraéu tiꞌai ꞌrem norĩ ma, te te iꞌmanharĩ wẽ zarina, duré Zuda tiꞌai ꞌrem norĩ ma. Tawamhã Dawi, Gibiã ãma aꞌuwẽ norĩ zô hârâ wamhã,
3 te ãne tãma nharĩ zaꞌra:
— E marĩ, wa za aima ꞌmanharĩ zaꞌra waꞌwa. Wa ĩsima wẽ, wa hã te waꞌâbâ da, iwasété ꞌmanharĩzé aima ihâimana zaꞌra waꞌwa hã, ãne zarina ꞌRe ihâimana uꞌâsi mono nhibꞌaꞌuwẽ norĩ ma, iwẽ hã ãma pisutu zaꞌra waꞌaba da.
4 Tawamhã ma te ãne ãma sadaꞌâbâ zaꞌra asa:
— Sauhu ãma, duré ihawi aꞌuwẽ norĩ ãmamhã wanhimirobꞌmadâꞌâ zaꞌra hã, ẽtẽ waipo pré oru na hã, duré ẽtẽ waipo prã prata na hã rowairébézé ihâimana da hã mare di. Duré wa te wasima wẽ zaꞌra õ di, Izaraéu nhihudu norĩ, wa te wasiwi iꞌmaiwĩrĩ da hã.
— Tane wamhã, e marĩ te bété asima iwẽ zaꞌra waꞌwa, wa hã te aima iꞌmanharĩ zaꞌra waꞌaba da hã. — Ãne te Dawi hã sadanharĩ zaꞌra.
5 Tawamhã ãne ma te ãma sadaꞌâbâ zaꞌra asa:
— Sau hã ma tô aré sima wẽ, te te waꞌuprosi pese da hã, duré wasiꞌmaꞌrãnhipa tõ da, Izaraéu nhihudu norĩ zaꞌrui ꞌremhã.
6 Tahawa maꞌãpé 7 na isihudu siꞌaibâ norĩ hã wama hâiba nhomri zaꞌra na, wa te sõꞌreti zaꞌra da, Uburé Danhibꞌapito nhoꞌre, Gibiã ãma, Sau ꞌri nhoꞌõmo wa ipotozéb ãma, siꞌapito da, Uburé Danhibꞌapito te te ipisudu hã.
Tawamhã apito, ma te ãne ãma sadaꞌâbâ zaꞌra asa:
— Wa za tô aima hâiba nhomri zaꞌra waꞌwa!
7 Tane nherẽ, Dawi, Zonataha me ropisudu te te sima iꞌmanharĩ zahuré zéb zarina, apito, Mefibozéti hã te te saꞌréi õ di, Zonataha ꞌra, Sau nhihudu, da te ĩwĩrĩ da hã.
8 Tane nherẽ, ma tô tiꞌâ Armoni hã, duré Mefibozéti hã, maparane Risipaha ꞌra norĩ hã, Aiꞌasihi ꞌrazéb ꞌremhã, Sauhu ma, te te isõmri hã. Duré 5 na ma tô Merabihi ꞌra norĩ hã waibu, Sauhu ꞌrazéb ꞌrem norĩ hã, Adriꞌé, Baziraꞌihi ꞌra ma, te te isõmri hã, ꞌrinhoꞌu Meꞌora na isisi ãma ꞌre ihâimana mono hã.
9 Tawamhã Dawi 7 na hã aꞌuwẽ Gibiã norĩ ma, te te ihâiba nhomri zaꞌra norĩ hã ma tô ꞌRe ihâimana uꞌâsi mono nhoꞌremhã sõꞌreti zaꞌra, ẽtẽ ꞌrãihâ ãma. Tawamhã siré simisutu ma uburé tidâꞌâ zaꞌra. Rowahâzé ꞌrãsutu ãma cewada na amnho nhisi tehârizém naꞌrata ãma, ma tô ãne na marĩ hã watobro.
10 Tawamhã Risipa, Sauhu mro prã hã ma tô zazahâ hâiro hã tiꞌâ. Ta hã ma tô ẽtẽ tõmo wawẽ nhisiwimhã hâparapo. Tawamhã tame ma tô tihâiba, amnho hã da te itehâri zaꞌra mono zéb naꞌrata hawim haré, tã hã 7 na ihâiba zaꞌra norĩ nhisiwi ipini waptãꞌãzéb u. Tawamhã si norĩ ma hã ihâiba zaꞌra hã te te rẽme zaꞌra õ di bâtâ na hã, duré abaze norĩ ma bara na ihâiba zaꞌra zô isihutu da hã te te tãma rẽme zaꞌra õ di.
11 Tawamhã Risipa te te iꞌmanharĩzé te te waihuꞌu wamhã,
12 Dawi hã ma tô mo, Zabesi-Ziliadi na romnhisi ãma ꞌre ihâimana zaꞌra mono norĩ wĩ, Sauhu hi hã, duré iꞌra Zonataha hi hã te te tiwi waibu zaꞌra da. Zabesi ãma ꞌre ihâimana zaꞌra mono norĩ hã ma tô aré ihâiba zahuré hã siwi sani, Bete-Sã na ꞌri nhoꞌõmo nhisi ãma ꞌre idasisõpẽtẽ zaꞌra mono zéb ãma, filisteu norĩ, Sau hã te te tô siwi iwĩrĩzé bâtâ na, ẽne hã Ziuboa na isisi wa, te te siwi isasõmrizéb ãma.
13 Tawamhã Dawi, Sau norĩ hi hã, Zonataha hi me hã ma tô 7 na aibâ norĩ ꞌrãiwazi na da te isimro norĩ hi zu hã saꞌra.
14 Tawamhã Sauhu hi hã, Zonataha hi me hã ma tô Quisi, Sau mama ãma da te itiꞌazéb ãma siwi sé, ꞌrinhoꞌu Zela na isisi ãma ꞌre ihâimana mono ꞌru wa, Bẽzamihĩ nhihudu norĩ nhiptiꞌai ãmamhã. Tawamhã apito te te iꞌruzé hã uburé ma tô dasiwi ꞌmanharĩ ni. Taha parip si, ma tô ꞌRe ihâimana uꞌâsi mono hã isimirowaptẽrẽ zaꞌra zém na hã ãma sadaꞌâbâ zaꞌra, ite zaꞌra tiꞌai waꞌõtõ nhoꞌõmo na hã.
Aꞌuwẽ ꞌrãihâ Filisteu norĩ ꞌwapézé wasuꞌu
15 Tawamhã dasiꞌwapé hã ma tô duré tihâiba filisteu norĩ ꞌremhã, Izaraéu nhihudu norĩ ꞌre me hã. Dawi norĩ hã tite dasiꞌwapéi ꞌmanharĩꞌwa norĩ me isiꞌabaꞌré hã ma tô filisteu norĩ hã ꞌwapé zaꞌra. Tawamhã Dawi dasiꞌwapé siwaprã hã wasutu uptabi di.
16 Tamemhã aibâ iꞌrãihâ Isbi-Benobi na isisi te hã ẽtẽ topsada brõzi ꞌmanharĩ ꞌrãꞌwa pire pibuzé hã 5 kilu na, duré taha te sibꞌézé ꞌwapa hã iꞌwa té. Tahawa, ma tô sima rosaꞌrata, Dawi te te ãma wĩrĩ da aré.
17 Tane nherẽ, Abisai Zeruꞌizaha ꞌra hã ma tô Dawi hã sõꞌreptu. Filisteu te te ꞌwapéi wamhã, ma tô tiwĩ. Tahawa, Dawihi te dasiꞌwapéi ꞌmanharĩꞌwa norĩ, ma tô ropisudu hã ãma sima ꞌmanharĩ zaꞌra, niwamhã isiré hã dasiꞌwapéi u hã ꞌre pusi mono tõ da. Tahawa ma tô ãne tãma nharĩ zaꞌra:
— Apito, a hã Izaraéu nhihudu norĩ te, robꞌuiwẽꞌwa. Wa norĩ hã wa te wasima aiwẽ zaꞌra õ di, wa te wasiwi iꞌasimini da hã.
18 Taha parimhã filisteu norĩ ꞌwapézé ihâiba amo hã ma tô duré tihâiba, ꞌrinhoꞌu Gobi na isisi ãma. Tawamhã Sibecaꞌi, ꞌrinhoꞌu Husa na isisi ãma ꞌre ihâimana mono hã ma tô aibâ iꞌrãihâ Safe na isisi hã tiwĩ.
19 Tawamhã filisteu norĩ ꞌwapézé ihâiba amo Gobi ãma duré hâimana wamhã, ma tô Elana, Zaihi ꞌra, Belẽ ãma hã aibâ ꞌrãihâ Gulia na isisi hã tiwĩ, ꞌri nhoꞌõmo Gati na isisi ãma. Tawamhã aibâ ꞌrãihâ te, isiꞌuwazi ꞌrãꞌwa paraꞌõtõ ubuzé hã zazahâ hâ zanhamri ne hã.
20 Tawamhã te duré Gati ãma dasiꞌwapé ihâiba amo hã tihâiba. Tamemhã aibâ iꞌrãihâ te ꞌre hâimana, aꞌuwẽ ꞌrãihâ nhihudu hã 6 na isiptõmohi isibꞌrata siꞌuiwa na hã, duré tô 6 na ipara siꞌuiwa na ipara hi hã.
21 Ta hã, Izaraéu nhihudu norĩ zada hâimana wamhã, ma tô Zonata, Siméiaha ꞌra hã, Dawihi sisãnawã hã tiwĩ.
22 Ã norĩ maparane siꞌuiwa na hã, Gati ãma aꞌuwẽ ꞌrãihâ norĩ nhihudu hã ma tô Dawihi nhibꞌratamhã, duré ite dasiꞌwapéi ꞌmanharĩꞌwa norĩ nhibꞌratamhã aiꞌutõ.
