2 Samuéu 22:1-51
22 Ã hã danhoꞌre hã, Uburé Danhibꞌapito ma, Davi isõꞌrezé, Sauhu wi te te sõꞌreptui wa, duré uburé isitobꞌru norĩ wi zama te te sõꞌreptui wa:
2 Uburé Danhibꞌapito, ĩte ẽtẽ tõmo wawẽ tede, ĩte ꞌri itede. Duré ĩnhoꞌreptuiꞌwa te ĩma ꞌre hâimana.
3 Ĩte ꞌRe ihâimana uꞌâsi mono, ẽtẽ tõmo wawẽ itede, ãma ꞌre ĩsimaꞌuri mono zé.Õ hã ĩte ibaihâ tete ꞌmanharĩ zapoto na ĩsimapazé.Õ hã duré ĩnhoꞌreptuiꞌwa, iwaihuꞌu pe.Õ hã ĩte ꞌri ĩsima iwẽ na ĩhâimanazé.Õ hã Ĩnhoꞌreptuiꞌwa, dasipãrĩ wi te te ꞌre ĩnhoꞌreptui uꞌâsi mono.
4 Wa hã Uburé Danhibꞌapito wi, te rowaptẽrẽ wamhã, te za ĩnhitobꞌru norĩ wi hã ĩnhoꞌreptu.Tahawa maꞌãpé Uburé Danhibꞌapito ãma ꞌre aiwata zaꞌra waꞌaba mono!
5 Â sisaru dapãrĩꞌwa hã ma ĩꞌuirĩ.Te duré te te ĩwabzuri, ta hã.
6 Dadâꞌâzé, ma wedenhorõ na hã ĩwasisi.Duré abꞌre daꞌãma tiꞌazé, damramizé hã ma tô ĩzô ꞌmanha, te te ãma ĩꞌâri da.
7 Te robzépata zaꞌẽtẽ wa, wa tô Uburé Danhibꞌapito wi rowaptẽ saꞌẽtẽ, te te ĩpawaptob da.Tahawa, tite ꞌri ꞌrãihâ ãma ĩmreme hã ma tô wapa. ꞌRe ĩzadari mono zé hã ma tô duré wapa.
8 Tawamhã tiꞌa te popo. Tahawa siptete na hâimana waihuꞌu õ di.Ẽtẽ ꞌrãihâ nhanaꞌrata norĩ duré sãsãꞌã zaꞌra wamhã, ma tô tipopoꞌo zaꞌra, ꞌRe ihâimana uꞌâsi mono hã sahi sina hâimana wa.
9 Isisiꞌre hawimhã ma romnhizé hã watobro.Duré isadawa hawimhã ma tô préꞌa hã wairé, duré uzâ dahâiba uprosiꞌwa hã.
10 Õ hã ma tô hâiwa hã ꞌridawa. Tawamhã ma tô we siꞌra, hâiwaꞌa iꞌrãdâ ipara zahâpâ ihâimana na.
11 Hâiwa ãma romhuriꞌwa querubĩ na isisi ba nhisiwi ma tô wara. Te duré saꞌẽtẽ wara, rowaꞌuꞌu zaripi na hã.
12 Hâiwaꞌa iꞌrãdâꞌâ na ma tô siꞌupsi. Ma tô duré hâiwaꞌa ihâzaꞌõno hã, â ãma ihâimana zaꞌẽne te te siwi ihâiba uirĩ na hã tihâiba.
13 Tãsiꞌubuzi hawi ma tô préꞌa hã tiroꞌo zaꞌra isõꞌremhã.
14 Tawamhã Danhipai u Uburé Danhibꞌapito ma tô we hâiwa rãrã hã awaꞌawi ꞌmanha.Imreme da te dasiwi iwaparizéb da hã, ma tô ãhã wamhã ꞌmanha.
15 Õ hã tite ti hã te te sãmra wa, ma tô tinhitobꞌru norĩ ãma hã ropé.Duré isimirobꞌuiwẽ rowaꞌa ma, sisaꞌrei mono da hã, ma tô tãma ꞌmanharĩ zaꞌra.
16 Uburé Danhibꞌapito, tinhitobꞌru norĩ ma, saꞌẽtẽ te te tãma priꞌi zaꞌra wamhã, duré sada sitiꞌru zaꞌra wa, tãirãrãꞌã na si te te ꞌwapé zaꞌra wamhã, ma tô â naꞌrata uptabi hã sihâiꞌré.Tiꞌa naꞌrata mono hã ma tô duré sõꞌawimhã tihâimana zaꞌra.
17 Uburé Danhibꞌapito hâimo hawi we ĩzô simiwẽ wamhã, ma tô ĩpatété.Ma tô ĩwaze, â ꞌrehâ hawimhã.
18 Uburé Danhibꞌapito, ĩnhitobꞌru isiptete norĩ wi, ma tô ĩnhoꞌreptu, aré ĩzada isitiꞌru zaꞌra norĩ wi hã.
Uburé õ norĩ hã isiptete si hã aré ĩma hã.
19 Ĩma ropire hâimana wamhã, ma tô õ norĩ hã siwi ĩꞌwapé.Tane nherẽ, Uburé Danhibꞌapito ma tô ĩꞌwawi aimapa.
20 Isimimnhasi hawi ma tô ĩwaze.Ma tô duré ĩnhoꞌreptu, tãma ĩzawi pese uptabi wa.
21 Uburé Danhibꞌapito ma tô ĩꞌupari wẽ. E marĩ wa. Wa hã sena na iꞌuwaibaba na si ĩhâimana wa, tãma.Duré õ hã ma tô iwẽ hã te te ĩma ꞌre anhomri, wa hã iwẽ na ꞌre ĩhâimana mono wa.
22 Wa hã, Uburé Danhibꞌapito te te sima ꞌre iwẽ mono zéb zarina si, wa marĩ hã te ꞌre abꞌmanharĩ.Duré niwamhã iwasédé hã te ꞌmanharĩ waihuꞌu õ di, ĩte ꞌRe ihâimana uꞌâsi mono hã te irẽme na ꞌre ĩhâimana mono da hã.
23 Wa hã wa tô uburé isimiroti hã te ãma tãma ꞌre aꞌuwaimrami.Duré niwamhã niha na isimiroti te iwapari õ na ꞌre ĩhâimana mono õ di.
24 Uburé Danhibꞌapito ma hã waihuꞌu pese di, ĩwasédé te tiwi iꞌmanharĩꞌõzém na hã.Duré iwasété nhiti romhâ na ꞌre ĩhâimana mono na zama, tãma waihuꞌu pese di.
25 Ãne wa, te õ hã te te ꞌre ĩꞌupari wẽ. E marĩ wa. Sena na ꞌre ĩhâimana mono na tãma waihuꞌu pese dâꞌâsina, marĩ te iꞌupaiꞌõzém na hã.
26 Uburé Danhibꞌapito, a hã te sena na ꞌre aihâimana mo, sena na aima ꞌre ihâimana zaꞌra mono norĩ ma hã.Duré iꞌuwaibaba na si awaꞌawi aiꞌãma ꞌre inomro mono norĩ ma si, te duré iꞌuwaibaba na si tãma ꞌre aihâimana zaꞌra mo.
27 Wẽ na ꞌre ihâimana zaꞌra mono ma si, te duré aiwẽ uptabi na tãma ꞌre aihâimana zaꞌra mo.Tane nherẽ, te iwasété uptabi norĩ ma si, isitobꞌru na hã ꞌre aihâimana mo.
28 Wapu na ꞌre isiꞌmadâꞌâ zaꞌra mono norĩ hã te duré ꞌre iꞌanhoꞌreptui mo.ꞌRe isiꞌmadâꞌâ ze zaꞌẽtẽ zaꞌra mono norĩ si te ꞌre iꞌanhisém nomri mo.
29 Uburé Danhibꞌapito, a hã ĩte ĩma robꞌuiwẽꞌwa.A hã te duré robra ĩꞌãma ꞌre ihâimana mono hã ꞌre iꞌaꞌuprosi mo.
30 A hã te ĩnhiptetezé hã ĩma ꞌre isõmri mo, ĩnhitobꞌru norĩ te ãma ꞌre iꞌaꞌwapéi mono da hã, duré te ãma ꞌre iꞌaiꞌuté zaꞌra mono zéb da, asimipawaptobzéb zarina.
31 Ã hã ꞌRe ihâimana uꞌâsi mono, te uburé marĩ hã iꞌuwaibaba na si te te ꞌre abꞌmanharĩ. Te duré tinhimiropisutuzé hã te te ãma ꞌre aꞌuwaimrami.Õ hã aiwa ibaihâ tete ꞌmanharĩ zapodo dasimapazém ne, te ꞌre hâimana, sô ꞌre irĩtĩ zaꞌra mono norĩ ma hã.
32 Uburé Danhibꞌapito si, misire ꞌRe ihâimana uꞌâsi mono te ꞌre hâimana.ꞌRe ihâimana uꞌâsi mono si te ẽtẽ tõmo wawẽ tede hã wama ꞌre hâimana zaꞌra.
33 Õ hã ĩsimaꞌurizé, isiptede.Te ĩsima iwẽzéb zarina, ꞌre ĩne mono wamhã, te ĩꞌwawimhã ꞌre simapa.
34 Õ hã te te ꞌre ĩrẽme mono õ di, ĩsiꞌmarõwĩrĩ da hã.Ma tô ĩdâꞌâ ãna te te duré ꞌre ĩnhimizusi ẽtẽ ꞌrãihâ nhisiwimhã.
35 Õ hã dasiꞌwapé na te ĩma ãma ꞌre sisanho uꞌâsi, umnhiꞌã isiptete uptabi na ꞌre ĩsiꞌwapéi mono da hã.
36 Uburé Danhibꞌapito, a hã ibaihâ tete ꞌmanharĩ zapodo dasimapazé hã ma tô ĩma isõ, ĩnhoꞌreptuzéb da hã.Duré asimipawaptobzé hã ma tô te te ꞌre ĩnhiptete.
37 A hã ĩrẽme waihuꞌu õ di, ĩsiwaprosi ĩnhitobꞌru norĩ te te siwi ĩꞌâri da hã.Duré niwamhã misidi na wa hã ĩwaptãꞌã õ di.
38 Ĩnhitobꞌru norĩ zarina, wa hã ꞌre ĩne mono wamhã, wa za te ꞌre aꞌuprosi.Ĩnhimizazâri da hã mare di, te ãma aiꞌuté zaꞌra õ ré hã.
39 Wa hã wa duré te ꞌre azu pese. Tawamhã wahutu waihuꞌu zaꞌra õ di, õ norĩ hã.Õ norĩ ãma te ꞌre aiꞌuté zaꞌra mono wamhã, te ĩpara ãmamhã ꞌre rereꞌe.
40 A hã te dasiꞌwapé da, ĩnhiptede hã ĩma ꞌre isõmri mo. Taha zarina ĩnhitobꞌru norĩ ãma, te ꞌre aiꞌuté zaꞌra mono da hã, te ĩma ꞌre iꞌmanharĩ uꞌâsi mo.
41 Ĩma sisaꞌrei mono da hã te duré tãma ꞌre iꞌmanharĩ zaꞌra mo.Tahawa wa hã ĩzada isahi zaꞌra norĩ hã, wa duré te ꞌre apru.
42 Õ norĩ hã da te pawaptob zaꞌra da, dazô sõpré mono nherẽ, niꞌwai õ di, te te isõꞌreptu zaꞌra da hã.Uburé Danhibꞌapito, te te siwi ꞌmahârâ nherẽ, te te sadaꞌâbâ zaꞌra õ di.
43 Wa hã wa te ꞌre abaꞌréi pese zaꞌra. Tahawa te õ norĩ hã ꞌre sitiꞌa zaprub zaꞌra.Wa duré te ꞌre awatiꞌi, rowaiꞌo ꞌri nhiꞌriti na da te ꞌre iwatiꞌi zaꞌra mono ne.
44 A hã, te ꞌre ĩnhoꞌreptui uꞌâsi mo, ĩnhibꞌaꞌuwẽ, ĩzada ꞌre ihâimana zaꞌra mono norĩ waꞌwa hawi. Te duré apâ ꞌre ĩnhimizusi uꞌâsi mo, daro mono bâ dama iꞌrãnhoꞌõmo na ꞌre ĩhâimana mono da hã.Aꞌuwẽ aré ĩma isaꞌreseꞌõ norĩ hã ãhã na te oto pawaꞌâbâ ãna ĩma romhuriꞌwa na ꞌre hâimana zaꞌra.
45 Wasiré aꞌuwẽꞌõ norĩ hã te ĩnhoꞌremhã oto ĩma ꞌre siwẽꞌẽ zaꞌra.Te duré ĩnhimiroti te te ꞌre wapari pese zaꞌra, marĩ te tãma ꞌre aꞌrui mono wamhã.
46 Tinhiptede te duré te te ꞌre simini zaꞌra.Rẽrẽꞌẽ sina te duré ite zaꞌra ꞌri isiptete hawimhã ꞌre wairébé.
47 Uburé Danhibꞌapito te tô dâꞌâꞌõ uꞌâsi na ꞌre hâimana.Maꞌãpé ãma ꞌre aiwata zaꞌra waꞌaba mono, ĩte ẽtẽ tõmo wawẽ tete ãma.Maꞌãpé, ꞌRe ihâimana uꞌâsi mono hã dama ꞌre wasuꞌu zaꞌra waꞌaba mono, ẽtẽ tõmo wawẽ tede, ĩnhoꞌreptuiꞌwa hã.
48 Õ hã te te ꞌre ĩꞌruiwaꞌâbâ, ĩnhitobꞌru norĩ na.Te duré ĩnhiptete zahâpâ daro mono bâ ꞌre dahâimana zaꞌra mono da hã, te te ꞌre daꞌanhoré.
49 Te duré ĩnhitobꞌru norĩ wi hã ꞌre ĩzani mo.Uburé Danhibꞌapito, a hã te ĩma ꞌre iꞌmanharĩ mo, ĩnhitobꞌru norĩ ãma te ꞌre aiꞌuté mono da.Duré aibâ isipãrĩ ze zaꞌra norĩ wi hã te ĩꞌwawimhã ꞌre aimapa mo.
50 Tahawa, wa hã dawamri mono bâ ꞌre idahâimana zaꞌra mono norĩ waꞌwamhã wa aiꞌãma ꞌre ĩwata.Wa duré danhoꞌre na hã aiꞌãma ꞌre ĩwata.
51 ꞌRe ihâimana uꞌâsi mono, te tite apito ma hã te te ꞌre sõmri, saꞌẽtẽ na te te daꞌãma ꞌre iꞌaiꞌuté mono zé hã.Te duré tinhimizawizé hã te te ꞌre hâiꞌré, te te sima ipisutu ma hã, Davihi ma hã. Te za duré isihudu norĩ ma, te te ꞌre ahâiꞌré uꞌâsi.
