2 Samuéu 23:1-39
23 Ã hã Dawi, Zéséhé ꞌra timreme na te te iꞌrãsutuzé. Ta hã pire na ꞌre hâimana mono da, Zacoho te ꞌRe ihâimana uꞌâsi mono te te ipisudu, siꞌapito da. Duré Izaraéu nhihudu norĩ ma, isõꞌreꞌwa iwẽ na ꞌre hâimana mono da, te te ipisudu hã ma tô ãne tinha, Dawi hã:
2 Uburé Danhibꞌapito pẽꞌẽzani hã te ĩnhoꞌõmomhã te te ꞌre nharĩ.Te duré isadawa wasuꞌu hã ĩzaihâ na ꞌre hâimana.
3 Izaraéu nhihudu norĩ te, ꞌRe ihâimana uꞌâsi mono hã ma tô rowasuꞌu.Izaraéu nhihudu norĩ ꞌwawi ꞌre isimapa mono hã ma tô ãne ĩma tinha:
“Niꞌwa hã apito iꞌuwaibaba na te te ꞌre idaꞌaꞌmadâꞌâ mono hã, duré ꞌRe ihâimana uꞌâsi mono te te sima ꞌre iwẽ mono zéb zarina, wazép sina te te ꞌre idaꞌabꞌmadâꞌâ mono hã,
4 ta hã aiwa mararé bâdâ ꞌre iꞌrã pusi mono wam ne hâiwa nhirõtõ ãna,duré tã ꞌre taꞌa mono pari, duroire bâtâ ro te te ꞌre iꞌuiwẽ zaꞌra mono ne hã.”
5 Ãne te za ꞌRe ihâimana uꞌâsi mono hã ĩnhihudu ma iwẽ hã te te ꞌre anhomri.E marĩ wa. Õ hã ma tô tinhimiroti isiꞌutõrĩ õ na hã, duré iꞌuwaibaba sena na hã ĩma ꞌmanha.Ã hã uburé wa tô wa hã ĩsima wẽ.Duré ã hã za ĩte te daꞌãma iꞌaiꞌutézéb da hã.Ĩma waihuꞌu pese di ãne hã, ꞌRe ihâimana uꞌâsi mono, za te te iꞌmanharĩ na hã.
6 Tane nherẽ, iwasété norĩ hã te za roꞌwa ne sãmra za.Niꞌwa hã tinhibꞌrata na te te duré iwaibu da hã mare di za.
7 Ta norĩ da hã da te ãma sãmra da hã te za isiꞌuwazi ꞌwa ré hã, duré niha wamhã wede ꞌwa ré hã sada tihâimana zaꞌra za.Tawamhã te za õ norĩ ãmamhã ãma sazu zaꞌra ni za, siꞌunhama pese da, unhama na.
Dawihi te dasiꞌwapéi ꞌmanharĩꞌwa norĩ, dama isaꞌrese zaꞌẽtẽ norĩ wasuꞌu
8 Ã hã dasiꞌwapéi ꞌmanharĩꞌwa norĩ, Dawihi te, dama isaꞌrese zaꞌẽtẽ norĩ nhisi: Zosebi-Basebeti, Taquemoni na romnhisi hawimhã dawaꞌõtõ nhisi hã “Siꞌubdatõ” na ãma hã. Tite isiꞌuwazi ꞌrãꞌwa na 800 na aibâ norĩ te te aꞌwapéi wamhã, ma tô uburé pese uprosi, dasiꞌwapéi wamhã.
9 Eriaza, Dodoho ꞌra, Aꞌoihi nhihudu hã dama isaꞌrese zaꞌẽne “Siꞌubdatõ” ihâiba zaꞌra ꞌremhã. Tawamhã nimahã na, õ hã Dawihi me, ma tô filisteu norĩ dasiꞌwapé da, nasi isiꞌrãꞌõtõ norĩ ma hã amhâzépa zahuré. Tawamhã ma tô Izaraéu nhihudu norĩ hã unhiniwĩ tãma tipraba zaꞌra.
10 Taha nherẽ, ma tô Eriꞌaza dazaꞌu tihâiba. Ma tô filisteu norĩ hã aꞌwapé, nasi sibꞌrata hi sitete mono wa, tisiꞌwapézé sibꞌézé ꞌwapa hã tinhibꞌrata hawi te te iwazere waihuꞌu õ zéb u. Tawamhã Uburé Danhibꞌapito hã ma tô taha bâtâ na hã saꞌẽtẽ na tãma tisõ, te te ãma iꞌaiꞌuté zaꞌra zéb da hã. Taha pari, dasiꞌwapé oto siꞌutõrĩ wamhã, ma tô Izaraéu nhihudu norĩ apâ hã oto aiꞌabaꞌré, Eriꞌaza idâꞌâ zaꞌra norĩ nhoꞌutu ubuzé te te iꞌazanizéb u.
11 Taha pari Sama, Agéhé ꞌra hararita hã ma tô duré wei mo. Filisteu norĩ hã ma tô siꞌrãꞌõtõ Lei ãma, erwira na robꞌrã nhisi, da te ꞌre izuri mono zéb ãma. Tawamhã Izaraéu nhihudu norĩ hã ma tô filisteu norĩ ma sisaꞌre.
12 Tane nherẽ, te Sama robꞌre ꞌwawi simapa da hã nhamra. Saꞌriti wa, ma tô filisteu norĩ hã ꞌmapã. Tawamhã Uburé Danhibꞌapito, tô taha bâtâ na ma tô saꞌẽtẽ na te te daꞌãma iꞌaiꞌutézé hã tãma tisõ.
13 Amnho tehârizéb u te te irosahutuzéb ãma, ma tô dawaꞌõno hã “Trinta na isisi” ꞌremhã siꞌubdatõ aibâ hã aiꞌabaꞌré, Adurã na ꞌri waꞌõtõ nhisi ãma ẽtẽ na abꞌre u hã, Dawi ihâimanazéb u, Aꞌuwẽ ꞌRãihâ na romharé nhisi ãma filisteu norĩ te te sima iꞌri nhoré zaꞌra wa, hâimana zaꞌra ré.
14 Tô taha wamhã, Dawi hã te ꞌri isiptete ãma tihâiba. Duré filisteu norĩ hã ma tô Belẽ ãma tihâimana zaꞌra.
15 Tawamhã Dawi hã te te sima iwẽzéb zarina ma tô tinha ãne:
— Wa hã wa aré ĩsima wẽ upta, â zô abꞌre hawi suru na â hã niꞌwa we te te ĩma aꞌâri wa, te hâꞌrẽne da, Belẽ u ꞌridawa zaꞌẽtẽ na ꞌre idanhisisi mono zéb ꞌratamhã!
16 Tawamhã dasiꞌwapéi ꞌmanharĩꞌwa norĩ siꞌubdatõ dama isaꞌrese zaꞌẽtẽ norĩ hã ma tô filisteu norĩ te te sima iꞌri nhoré zaꞌra zé waꞌwaibaba roꞌrahâri zaꞌra. Tahawa, ma tô â zô abꞌre hawi â te te iꞌaꞌâri zaꞌra hã siwi tiꞌâ, Dawihi ma. Tane nherẽ, taha â hã te te hâꞌrẽne õ di. Te te ihâꞌrẽne õ waꞌrãmi, ma tô saꞌwa, tinhoprubzém na Uburé Danhibꞌapito ma.
17 Tawamhã ma tô tinha ãne:
— Uburé Danhibꞌapito, maꞌãpé ĩma baꞌa, ã hã â hã te ꞌre hâsi tõ mono da! Te hâꞌrẽne ꞌwaꞌâhã, aré aibâ norĩ wapru te ihâꞌrẽne ne hã, â we te te aꞌâri zaꞌra da, tãma romnhimimnhasi nherẽ, sô isiꞌabaꞌré norĩ wapru hã!
Ãhã wamhã, õhõ â hã te te hâꞌrẽne õ di.
Ãne ma tô dama iwasuꞌu zaꞌẽtẽ norĩ hã siwi ꞌmanha, “siꞌubdatõ” ihâiba zaꞌra norĩ hã.
18 Abisai, Zoabihi sisãnawã, (Zeruꞌizaha ꞌra norĩ hã) ma tô danhibꞌihâꞌa na ꞌre hâimana, “Trinta na dawaꞌõtõ” ma, dama isaꞌrese zaꞌẽtẽ norĩ ma hã. Ta hã ma tô tite isiꞌuwazi ꞌrãꞌwa na 300 na aibâ norĩ te te aꞌwapéi wamhã, duré uprosi. Tahawa, ma tô dama iwasuꞌu zaꞌẽtẽ na hã oto dama tihâiba, “Trinta na dawaꞌõtõ” ꞌremhã.
19 Tawamhã Abisai, “Trinta na dawaꞌõtõ” ꞌremhã isiré norĩ nhipai u dama isaꞌrese zaꞌẽne. Tahawa, ma tô oto siꞌiꞌrãnhoꞌu tãma zaꞌra. Taha nherẽ, õ hã “Siꞌubdatõ na dawaꞌõno” dama isaꞌrese zaꞌẽtẽ norĩ nei õ di.
20 Benaia, Zeoiadaha ꞌra hã, ꞌrinhoꞌu Cabzeꞌeu na isisi ãmamhã, dasiꞌwapéi ꞌmanharĩꞌwa dama isaꞌrese zaꞌẽtẽ na hã te ꞌre hâimana. Ta hã ma tô sibꞌru na tinhiptede hã te te ꞌre ꞌmanharĩ. Ma tô duré moabita maparane isiꞌwapé tãma iwaihuꞌu pese norĩ hã tipã. Tawamhã nimahã bâtâ na rowahâzé pĩni ꞌrowi morĩ wamhã abꞌre u hã, ma tô huꞌu zérépa hã duré tiwĩ.
21 Ezipsiu zama ma tô duré tiwĩ, aibâ isaꞌẽtẽ uptabi hã, isiꞌuwazi ꞌrãꞌwa ré ihâiba hã. Tawamhã duré Benaia tite wede wãiwaré na ezipsiu te te ꞌwapéi wamhã, ma tô ite isiꞌuwazi ꞌrãꞌwa isibꞌrata hawimhã tiwi waze. Taha na ma tô tiwĩ.
22 23:22-23 Ãne ma tô marĩ hã Benaia hã te te ꞌre abꞌmanharĩ. Tawamhã taha zama te dama iwasuꞌu zaꞌrese zaꞌẽtẽ na hã ꞌre hâimana, “Trinta na dawaꞌõtõ,” ꞌremhã. Tane nherẽ, duré “Siꞌubdatõ na dawaꞌõno” dama isaꞌrese zaꞌẽtẽ norĩ nei õ di. Tahawa Dawi, tiꞌmadâꞌâꞌwa norĩ nhibꞌihâꞌa da hã ma tô pisutu, ta hã.
23 ꞌMadâꞌâ 23:22
24 23:24-39 Tawamhã “Trinta na dawaꞌõtõ” ꞌremhã, ãne isisi norĩ hã ma tô tihâimana zaꞌra: Azaéu, Zoabihi sisãnawã; Elana, Dodoho ꞌra, Belẽ ãmamhã; Sama, Ericaha me hã, ꞌrinhoꞌu Harodi na isisi ãma hã; Helesi, Peregui ãma hã; Ira, Iquesihi ꞌra, Tecoa na ꞌri nhoꞌõmo nhisi ãma hã; Abiꞌézé, Anatoti na ꞌri nhoꞌõmo nhisi ãma hã; Mebunaꞌi, Husa na ꞌri nhoꞌõmo nhisi ãma hã; Salmo, Aꞌoi na ꞌri nhoꞌõmo nhisi ãma hã; Maꞌaraꞌi norĩ, Herebihi me, Baꞌanahã ꞌra norĩ hã, ꞌrinhoꞌu Netofa na isisi ãma hã; Itaꞌi, Ribaꞌihi ꞌra, Gibiã, Bẽzamihĩ nhihudu norĩ nhiptiꞌa ãma hã; Benaia, Piratõ na ꞌri nhoꞌõmo nhisi ãma hã; Hidaꞌi, ẽtẽ nhiꞌriti ãma romharé Gaꞌasi na romnhisi ãma hã; Abi-Abõ, Araba na romnhisi ãma hã; Azmaweti, Baurĩ na ꞌri waꞌõtõ nhisi ãma hã; Eriaba, Saꞌabõ na ꞌri waꞌõtõ nhisi ãma hã; Zasẽhẽ ꞌra, Zonata; hararita na aꞌuwẽ wamri hã, Sama norĩ, Aiãhã me hã, Sararihi ꞌra norĩ hã; Eripéréti, Acasibaꞌihi ꞌra, Maꞌaca na romnhisi ãma hã; Eriꞌã, Aitopéhé ꞌra, Gilo na ꞌri waꞌõtõ nhisi ãma hã; Hezro, Carmeru na ꞌri nhoꞌõmo nhisi ãma hã; Paꞌaraꞌi, Arabi na romnhisi ãma hã; Igau, Natãhã ꞌra, Zoba na romnhisi ãma hã; Bani, Gadihi nhihudu norĩ nhiptiꞌai ãma hã; Zereti, Amo na romnhisi ãma hã; Naꞌaraꞌi, Beꞌerote na ꞌri nhoꞌõmo nhisi ãma hã, Zoabihi ma isiꞌwapézé te te tãma ꞌre iꞌaꞌwapéi mono, Zeruꞌiza na nhisi ma; Ira norĩ, Garebihi me hã, Zati na ꞌri waꞌõtõ nhisi ãma hã; duré Uria, hitita na aꞌuwẽ wamri norĩ ãma hã.
à norĩ hã dasiꞌwapéi ꞌmanharĩꞌwa dama isaꞌrese zaꞌẽtẽ norĩ, 37 na ihâiba zaꞌra hã.
25 ꞌMadâꞌâ 23:24
26 ꞌMadâꞌâ 23:24
27 ꞌMadâꞌâ 23:24
28 ꞌMadâꞌâ 23:24
29 ꞌMadâꞌâ 23:24
30 ꞌMadâꞌâ 23:24
31 ꞌMadâꞌâ 23:24
32 ꞌMadâꞌâ 23:24
33 ꞌMadâꞌâ 23:24
34 ꞌMadâꞌâ 23:24
35 ꞌMadâꞌâ 23:24
36 ꞌMadâꞌâ 23:24
37 ꞌMadâꞌâ 23:24
38 ꞌMadâꞌâ 23:24
39 ꞌMadâꞌâ 23:24
