2 Samuéu 24:1-25
24 Uburé Danhibꞌapito hã, Izaraéu tiꞌai ꞌrem norĩ zada, apâ duré sahi wa, ma tô Dawihi ma tiꞌru, sada hâimana zaꞌra da. Ãne te ꞌRe ihâimana uꞌâsi mono hã tãma tinha, Dawihi ma:
— Aimorĩ, Izaraéu tiꞌai ꞌrem norĩ zaꞌratazé, duré Zuda tiꞌai ꞌrem norĩ zaꞌratazé hã ꞌmanharĩ da.
2 Tawamhã Dawi, ite dasiꞌwapéi ꞌmanharĩꞌwa norĩ ꞌmadâꞌâꞌwa Zoabihi ma, ma tô ãne tãma tiꞌru:
— Maꞌãpé ate tiꞌai waꞌõtõ nhoꞌõmo ꞌre, ate dawadaꞌuriꞌwa norĩ ré, uburé Izaraéu nhihudu wamri mono norĩ tẽmemhã ꞌre aimorĩ, hâiwa nhimiꞌe niwĩ dazaꞌrui ihâimana u, duré hâiwa nhimire niwĩ dazaꞌru norĩ ihâimana zaꞌra u hã, aꞌuwẽ norĩ zaꞌrada hã ꞌmanharĩ da. Wa hã wa tô ĩsima wẽ, te waihuꞌu da, niha hâimana zô, wahâiba zaꞌrata zaꞌra zé hã.
3 Tane nherẽ, ma te Zoabi, ãne apito ãma sadaꞌâ asa:
— Uburé Danhibꞌapito, wate ꞌRe ihâimana uꞌâsi mono, Izaraéu nhihudu norĩ zaꞌrada hã te te iꞌmanharĩ da si iwẽ hã, 100 na isisiwi ãhã na ihâimana zaꞌra nhipai u, sina ꞌre ihâꞌâ uꞌâsi mono da si. Duré a hã ꞌre aihâimana hâ mono da si ĩma iwẽ hã, ãne hã ꞌmadâꞌâ da! Tane nherẽ, e marĩ da, ma tô bété asima iwẽ, ãne na dazaꞌrada ꞌmanharĩ da hã.
4 Tane nherẽ, apito ma tô ꞌmanha, Zoabi norĩ tite dawadaꞌuriꞌwa norĩ me te te tãma iꞌru zaꞌra zé, te te ꞌmanharĩ zaꞌra da. Tahawa ihawi wairébé wamhã, ma tô aiꞌabaꞌré oto, Izaraéu nhihudu norĩ te te saꞌrata zaꞌra da hã.
5 Tawamhã panhoꞌu Zodã pa na ma tô saprĩ zaꞌra. Te te saprĩ zaꞌra wamhã, ma tô hâiwa nhimire niwĩ Aroꞌe na ꞌri nhoꞌõmo nhisi ãma sima ꞌri nhoré zaꞌra, ꞌrinhoꞌu romharé wa ihâimana wa, Gadihi nhihudu norĩ nhiptiꞌai ãma hã. Duré ta hawi siꞌabaꞌréi wa, hâiwa nhimiꞌe niwĩ ꞌrinhoꞌu Zaze na isisi niwĩ,
6 ma tô timorĩ na Ziliadi u te te ãma uzusi zaꞌra wamhã, duré Cadi na romnhisi u hã aihutu, hitita norĩ nhiptiꞌai ꞌreb u. Duré tawamhã Dã na romnhisi u siꞌabaꞌréi wamhã, ma tô ta hawi wẽꞌẽ zaꞌra bâtâ zasizém niwĩ, Sidõ na romnhisi u siꞌabaꞌré da hã.
7 Taha pari ma tô duré wairé hâiwa nhimire niwĩ, siꞌabaꞌré da, ꞌrinhoꞌu Tiru na isisi ãma ꞌri ꞌwawi waꞌra ꞌrãihâ ihâimana u. Tawamhã ta hawi ma tô oto uburé ꞌri nhoꞌõmo mono u ꞌre nomro heveu norĩ u hã, cananeu norĩ u hã, duré Beseba na romnhisi u hã, hâiwa nhimire niwĩb ãma, Zuda tiꞌai u hã.
8 Ãne ma tô, 9 na aꞌamo ãma siꞌutõrĩ zaꞌra pari, duré 20 na bâdâ hã ãma siꞌutõrĩ zaꞌra pari, apâ hã aiꞌabaꞌré Zeruzalẽ u, tiꞌai waꞌõtõ nhoꞌõmo ꞌre, dazaꞌrui mono bâ ꞌre nomro mono parimhã.
9 Tawamhã Zoabi ma tô apito ma wasuꞌu zaꞌra, uburé aibâ norĩ dasiꞌwapéi ꞌmanharĩꞌwa da, ihâimana waihuꞌu pese zaꞌra hã ãne: 800 miu na Izaraéu tiꞌai ꞌremhã, duré 500 miu na Zuda tiꞌai ꞌremhã.
10 Tane nherẽ, Dawi te te azaꞌrata pari, isimirosaꞌrata ꞌmanharĩ hawi ꞌrãzé watobro wa, ma tô ãne tinha:
— Uburé Danhibꞌapito, wa hã wa tô ĩwasédé iwasété uptabi hã ꞌmanha, aꞌuwẽ norĩ zaꞌratazé te iꞌruzém na hã. Tahawa, ĩzawi na hã iꞌruiwapari tõ. Duré ĩꞌãma ꞌmadâꞌâ tõ! E marĩ wa, marĩ te iꞌmanharĩzé hã wasété uptabi di.
11 24:11-12 Tawamhã Uburé Danhibꞌapito zadawa ꞌmahârâꞌwa Gadi, Dawihi te, sõtõ ꞌrowim ne marĩ ꞌmadâꞌâꞌwai ma, te ãne tinha:
— Aimorĩ, Dawihi ma rowasuꞌu da, siꞌubdatõ marĩ te tãma iꞌruzahi ꞌremhã misi te te ꞌmaipisutu da. Duré nimahã te te iꞌmaipisutu zarina wa hã wa za ꞌmanha.
Tawamhã awẽm na, Dawi oto utu pari,
12 ꞌMadâꞌâ 24:11
13 ma tô Gadi hã itẽme mo. Morĩ wamhã, ma tô ꞌRe ihâimana uꞌâsi mono te te tãma inharĩzé hã tãma wasuꞌu. Tahawa, te sadanha ãne:
— E ma hã te za asima ipisu. E siꞌubdatõ wahum na asiptiꞌai ꞌre mrab zépatazé hã hâimana da, e siꞌubdatõ aꞌamo na asitobꞌru norĩ ma hã ꞌre asamroi mono da hã, duré e siꞌubdatõ bâtâ na asiptiꞌai ꞌre dahâzé ipire hâimana da hã. Maꞌãpé nimahã asima pisutu, duré awaꞌawi na ãma ĩzadaꞌâbâzé hã ꞌRe ihâimana uꞌâsi mono ma, te sõmri da hã.
14 Tawamhã Dawi, ma te ãne ãma sadaꞌâ asa:
— Ĩma robzeiꞌõzém na hã wa robzépata. Tane nherẽ, aibâ norĩ te te ĩma irobꞌmanharĩ zaꞌra da hã te ĩsima wẽ õ di. Uburé Danhibꞌapito si te te wama irobꞌmanharĩ zaꞌra da si, iwẽ hã. E marĩ wa. Õhõ si waꞌãma ꞌre siwamri mono dâꞌâsina!
15 Tawamhã Uburé Danhibꞌapito, Izaraéu tiꞌai ꞌre aꞌuwẽ norĩ nhisiwi dahâzé ipire waptãꞌã da hã, ma tô tãma robꞌru, awẽ wi irowaꞌazém hawi bâdâ hã te te ãma itizéb u. Tawamhã hâiwa nhimire niwĩ ꞌre ihâimana zaꞌra mono hã, duré hâiwa nhimiꞌe niwĩ tiꞌai waꞌõtõ nhoꞌõmo ãma hã, ma tô Izaraéu nhihudu norĩ hã aiꞌutõ, 70 miu na.
16 Tawamhã Uburé Danhibꞌapito te, hâiwa ãma romhuriꞌwa, Zeruzalẽ ãma aꞌuwẽ te te iꞌuprosi na, te te sãnaꞌrata wi, ma tô oto Uburé Danhibꞌapito hã tinhimirosaꞌrata na ãma saprĩ, te te dahâ zaꞌra zahu tõ da. Tahawa ma tô hâiwa ãma romhuriꞌwa daꞌuprosiꞌwai ma tinha ãne:
— Tôꞌã oto! Asimizazâri!
Tahawa, Uburé Danhibꞌapito te, hâiwa ãma romhuriꞌwa hã te Araꞌuna zebuzeu te, amnho préꞌézéb ꞌrata tihâiba.
17 Tawamhã Dawi, hâiwa ãma romhuriꞌwa, aꞌuwẽ te te iꞌmapãrĩzé te te ꞌmadâꞌâ wamhã, ma tô ãne tãma tinha, Uburé Danhibꞌapito ma hã:
— Ĩwétési marĩ na iꞌupaiꞌwa na hã wa ĩhâiba. Wa hã wa tô ãma upa. E marĩ, te te ꞌmanharĩ wasété zaꞌra bâ, ã norĩ hã. Taré ma tô ĩnhimiroti zarina ꞌre hâimana zaꞌra, poneꞌẽrebâ ne hã. Ĩma si, iꞌra norĩ me hã wama irobꞌmanharĩ zaꞌra da si, ibâre hã.
18 Tawamhã Gadi tô taha bâtâ na ma tô mo, Dawihi u. Morĩ wamhã, te ãne tãma tinha:
— Aimorĩ, amnho préꞌézé Araꞌuna te u hã, tame ꞌRe ihâimana uꞌâsi mono ma danhoprubzéb da, ẽne hã saꞌra da sisisiwip si.
19 Tawamhã Dawi, Uburé Danhibꞌapito te te tãma iꞌruzé hã ma tô wapa. Tahawa ma tô mo, Gadi hã te te tãma iwaihuꞌuzéb zarina.
20 Tawamhã Araꞌuna sipapara te te robꞌmadâꞌâ wamhã, ma tô ꞌmadâ, apito, duré ite dasiꞌwapéi ꞌmanharĩꞌwa norĩ me itẽme isiꞌabaꞌré norĩ hã te te tãma nharĩ zaꞌra da. Tawamhã hiꞌrãtitõ tãma sãmra wa, duré tiꞌubu na tiꞌai u te te tãma ropto wa, Dawihi nhoꞌremhã,
21 ma tô ãne sadanha:
— Apito, e marĩ zô, te we aimo ãwamhã.
Tawamhã Dawi, ma te ãma sadaꞌâ ãne:
— Wa wei mo, amnho préꞌézé tiꞌa te uipra da, Uburé Danhibꞌapito ma, danhoprubzéb da, ẽtẽ zaꞌra iwa te ꞌmanharĩ wa, dahâzé hã siꞌutõrĩ pese hâ.
22 Tawamhã Araꞌuna te ãne tãma tinha:
— Apito, asima iwẽzéb zarina uburé waibu na, ꞌRe ihâimana uꞌâsi mono ma, ãma tãma asõprubzéb da hã. Ãhãta te powawẽ ẽtẽ zaꞌra ꞌrãihâ nhisiwi izata zaꞌra da hã tihâimana zaꞌra. Ãhãta te duré ibutu tété zaꞌra zé hã tihâimana zaꞌra. Duré wedepo hã te ãhãta tihâimana zaꞌra, amnho préꞌézé hã, mimi na ãma hâimana zaꞌra da hã.
23 Tawamhã Araꞌuna, apito ma, uburé te te sõmri zaꞌra wamhã, te duré ãne tãma tinha:
— Uburé Danhibꞌapito, ꞌRe ihâimana uꞌâsi mono, te te iwẽsãmri da si, tãma iꞌasõprubzé hã!
24 Tane nherẽ, ma te apito ãne ãma sadaꞌâ asa hã:
— Wẽ di aré tô. Tane nherẽ, wa hã te ĩsima wẽ õ di. Uburé wa za tô waꞌâ. Duré Uburé Danhibꞌapito, ĩte ꞌRe ihâimana uꞌâsi mono ma ĩnhoprubzé, te waꞌâbâ zaꞌra õ nherẽ, te isõmri zaꞌra da hã mare di za.
Tawamhã Dawi, tiꞌa amnho préꞌézé hã ma tô uipra, duré powawẽ norĩ hã, 50 na ẽtẽ waipo prã prata zapotore na.
25 Tawamhã tame, ma tô Uburé Danhibꞌapito ma, danhoprubzéb da, ẽtẽ zaꞌra hã ꞌmanha. Te te ꞌmanharĩ wamhã, ma tô tinhoprubzé te te ĩzata pese zaꞌra hã tãma sõmri zaꞌra, duré ãma dama ꞌre irowẽ zaꞌẽtẽ zaꞌra mono zéb zama. Tahawa, Uburé Danhibꞌapito te te tiwi irowaptẽrẽzém na te te oto ãma sadaꞌâbâ wamhã, ma tô Izaraéu nhihudu norĩ ãmamhã dahâzé ipire hã oto aiꞌutõ.
