2 Samuéu 3:1-39
3 Tawamhã Sauhu te aꞌuwẽ norĩ hã, Dawihi te aꞌuwẽ norĩ me hã ma tô we ꞌre siꞌwapéi hâ zaꞌra. Sauhu te aꞌuwẽ norĩ, we ꞌre sibꞌuwa zaꞌra mono wamhã, ma tô Dawihi ma isiptetezé hã iwaꞌrãmib zaꞌra we te te tãma sina ꞌre hâimana uꞌâsi.
Dawihi ꞌra norĩ potozé wasuꞌu
2 Dawihi ꞌra norĩ, ꞌrinhoꞌu Hebrõ na isisi ãma ma tô tipoto zaꞌra ã norĩ hã: Ipotoꞌrada hã Amno, ꞌri nhoꞌu Zezereu ãma ꞌre ihâimana mono Ainoꞌãhã zéꞌre hawimhã.
3 Maparane ãma hã Quiriabe, Abigaiuhu ꞌra, aré Nabau na imro nhisi imrotõ, ꞌri nhoꞌu Carmeru na isisi ãma hã ꞌre ihâimana mono. Duré siꞌubdatõ ãma hã Absarõ, Maꞌacaha ꞌra, Gesu na romnhisi ãma apito Taumaꞌihi ꞌra.
4 Maparane siꞌuiwa na ãma hã Adonia, Hagitihi ꞌra. Duré 5 ãma hã Sefatia, Abitaꞌuhu ꞌra.
5 Imropâ ãma hã Itreꞌã, Eglaha ꞌra, Dawihi mrozé ꞌremhã. Ã norĩ hã ma tô uburé Hebrõ ãma hã tipoto zaꞌra.
Dawihi niwĩ, oto Abine ihâimanazé wasuꞌu
6 Sauhu niwĩ aꞌuwẽ norĩ hã, Dawihi niwĩ aꞌuwẽ norĩ me hã zahadu we ꞌre siꞌwapéi hâ zaꞌra mono ré hã, ma tô Abine hã Sauhu niwĩ aꞌuwẽ ihâimana zaꞌra norĩ hã we ꞌre ihâimana nhiptete mono zé te te sina ꞌre hâimo.
7 Sauhu ma, te imro prã hã tãma ꞌre hâimana, Risipa na isisi, Aiꞌasihi ꞌra hã. Nimahã bâtâ na Ibozéti hã ma tô Abine hã sadanha ãne:
— E marĩ wa, ma tô ĩmama mro prãi ré hã ano.
8 Ãne te te sadanharĩ wa, ma tô Abine hã sada tizahi pese. Tahawa te ãne tãma tinha:
— E ma tô ĩꞌãma irosaꞌra, wa hã dahâiba zaꞌréi wasété ꞌwa na hã. E ma tô duré ĩꞌãma irosaꞌra, Zudaha nhihudu norĩ niwĩ ꞌre ĩhâimana mono da, te isaprĩ na hã.
Te duré zahadu tãma tinha ãne:
— Sau aimama niwĩ ꞌre ĩhâimana mono zém hawim haré, wa tô sena na õne uꞌâ ꞌre ĩhâimana, asisãnawã norĩ niwĩmhã, duré asiwaihuꞌu zaꞌra waꞌaba niwĩmhã. Duré Dawi hã te te aiꞌãma aiꞌuté tõ da, wa tô te ꞌre aipawapto, iwẽ na hã. Tane nherẽ, ãhã na ma tô ã hã piꞌõi ré ĩnomro uꞌâbâ hã ĩwẽꞌõ.
9 3:9-10 Uburé Danhibꞌapito, Dawihi ma, ma tô ropisutu, Sauhu te iꞌrãnhoꞌõmo mono na te te ꞌre idaꞌaꞌmadâꞌâ mono zé, isihudu norĩ hawimhã te te wazere da, Izaraéu tiꞌai ꞌre ma, duré Zuda tiꞌai ꞌre ma zama ãma siꞌapito da, uburé ropâ tiꞌai waꞌõtõ nhoꞌõmo ꞌre, te te ãma ꞌre daꞌabꞌmadâꞌâ mono da, Dawi hã. Ãne hã wa hã te ꞌmanharĩ õ wamhã, ꞌRe ihâimana uꞌâsi mono te te tô ĩwĩrĩre za!
10 ꞌMadâꞌâ 3:9
11 Ibozéti hã, Abinehe ma pahi wa, niha hã te te tãma nharĩ waihuꞌu õ di.
12 Dawi hã, Hebrõ ãma hâimana ré, ma tô Abine ãne romreme ré hã dama rowasuꞌu ꞌwapéiꞌwa norĩ hã ꞌmazatõrĩ zaꞌra:
— E ꞌwa, ã hã tiꞌai ꞌremhã te za dama siꞌiꞌrãnhoꞌu. Maꞌãpé wasisazezé hã wa te wasima ꞌmanharĩ. Tawamhã wa hã wa za Izaraéu nhihudu norĩ hã uburé te ãma simro za, asiniwĩ ihâimana zaꞌra da hã.
13 Dawi hã ma te ãne ãma tãma waꞌrã:
— Wẽ di tô. Wasisazezé hã wa za tô wasima ꞌmanharĩ ni. Tane nherẽ, te duré asa marĩ ĩma iꞌmanharĩ da hã tihâiba. Ĩzabu da, we aimorĩ da wamhã, taré oto Sauhu ꞌra Micauhu ãna we aimorĩ õ di za.
14 Tawamhã Dawi, nima norĩ rowasuꞌu ꞌwapéiꞌwa ma tô satõrĩ zaꞌra, Ibozétihi ma, ãne na te te tãma ꞌmairowasuꞌu zaꞌra da hã:
— Ĩmro Micau hã maꞌãpé we apâ ĩma hâiba nhomri. E marĩ wa. Wa hã 100 na filisteu norĩ nhihâiwata nhihârizém na hã wa tô waꞌâbâ siro, õhõ ãma ĩmrozéb da hã.
15 Tawamhã Ibozéti ma tô imro Pautiéu, Laisihi ꞌra hawi da te wazere da hã dama tiꞌru, Micau hã.
16 Tane nherẽ, Pautiéu siwaꞌõi mono sina ma tô bâdâdi na isarina hã mo, ꞌrinhoꞌu Baurĩ na isisi tẽme isihutuzéb u. Tawamhã Abine ma te ãne tãma waihuꞌu:
— Apâ aimorĩ, ꞌri u hã.
Tahawa, ma tô apâ hã oto mo.
17 Tawamhã Abine, Izaraéu nhihudu norĩ ma, iꞌrãnhoꞌõmo norĩ u hã ma tô mo. Ãne te tãma nharĩ zaꞌra:
— A norĩ waꞌwa hã te duréi Dawi hã Izaraéu nhihudu norĩ ma, aima siꞌapito zaꞌra waꞌaba da hã asima iwẽ zaꞌra waꞌwa.
18 Ãhã na awaꞌawi hã ma tô oto bâdâ hã iwa waptãrã, niha ãma irobꞌmanharĩzéb da hã. Maꞌãpé, Uburé Danhibꞌapito ãne te te inharĩzém na hã ãma aipoꞌre puꞌu zaꞌra waꞌaba: “Ĩma romhuriꞌwa Dawi hã wa za pisutu, ĩnhibꞌaꞌuwẽ Izaraéu nhihudu norĩ te te anhoꞌreptu da hã, filisteu norĩ wi, duré uburé isitobꞌru norĩ hâiba amo norĩ wi hã.”
19 Abine hã, aꞌuwẽ Bẽzamihĩ nhihudu norĩ ma zama, ma tô tãma nharĩ zaꞌra. Taha pari Hebrõ u te mo, Dawihi ma, te te tãma rowasuꞌu da hã, Bẽzamihĩ nhihudu norĩ, duré Izaraéu nhihudu norĩ te te irowairébé zaꞌra zém na hã.
20 Tawamhã Abine hã 20 na aibâ norĩ ré, Dawi te te sõpẽtẽ da, Hebrõ u hã ma tô mo. Morĩ wamhã, ma tô dato isaꞌẽne, Dawi hã tãma ꞌmanharĩ zaꞌra.
21 Abine te Dawihi ma tinha, ãne:
— Ãhã na awaꞌawi na hã wa za mo, uburé Izaraéu tiꞌai ꞌre aꞌuwẽ ãma, te aima ãma aiꞌuté zaꞌra da. Ãhã wamhã, te za sima aiwẽ zaꞌra, tãma asiꞌapito zaꞌra da hã. Tawamhã te za a hã uburé tiꞌai waꞌõtõ nhoꞌõmo ꞌre, ꞌre iꞌabꞌmadâꞌâ mono da hã asiꞌiꞌrãnhoꞌu.
Dawi hã, Abine morĩ da hã ma tô tãma saꞌré. Tahawa ma tô rowẽ na oto mo.
Abine da te iwĩrĩzé wasuꞌu
22 Suru na ronomro pari, Zoabi, Dawihi te dasiꞌwapéi ꞌmanharĩꞌwai ꞌmadâꞌâꞌwa norĩ me ma tô apâ aihutu, waptu na te te idaꞌwapé zaꞌra hawimhã. Ta hawimhã ma tô marĩ hã ahâ uptabi na apâ ꞌwasa, tinhitobꞌru norĩ wi te te iwaibu zaꞌra hã. Tane nherẽ, Abine, Dawihi siré Hebrõ ãmamhã oto hâimana õ di. E marĩ wa. Rowẽ na imorĩzéb da hã bâdâ te te tãma sõmri wa.
23 Tawamhã Zoabi tite dasiꞌwapéi ꞌmanharĩꞌwa norĩ ré wisi wamhã, ma tô Abine hã tãma wasuꞌu zaꞌra ni, apito Dawihi ma, te te tãma nharĩ da imorĩ na hã, duré bâdâ te te tãma sõmri wẽ te, apâ rowẽ sina sima iwẽ na imorĩ na hã.
24 Tahawa, Zoabi, apito ma, te te tãma nharĩ da hã ma tô itẽme mo. Ãne te tãma tinha:
— E marĩ ma tô iꞌmanha. Abine ãwa wei morĩ wamhã, a hã marĩ tãma ꞌmanharĩ ãna apâ morĩ da hã, ma tô bâdâ tãma isõ.
25 Taré aiwi hâimana nhipese na simaꞌuri sina ma tô wei mo, za nimomo iꞌaimorĩzé, ro taré te te iwaihuꞌu da si, duré uburé marĩ ꞌre iꞌabꞌmanharĩ mono zé, te te ĩwaihuꞌu da si. Ãne hã aima waihuꞌu pese di!
26 Zoabi hã, Dawihi ꞌrata isabzém hawi watobro wi, ma tô romreme ꞌwapéiꞌwa norĩ ma hã ꞌmairobꞌru, Abinehe zarina ꞌmasiꞌabaꞌré da hã. Tawamhã Siraha te â zô abꞌre ãma te te siwi sasãmri wa, ma tô apâ ãma siwi siri. Tane nherẽ, Dawi ãne hã te te waihuꞌu õ di.
27 Abine, Hebrõ u oto wisi wamhã, ma tô Zoabi hã ꞌri nhoꞌõmo te, ꞌridawa zaꞌẽtẽ niwĩ saprõ, hâiba pisutu te te tãma robzanhamri da newa. Tame ma tô idiꞌi wimhã waꞌré. Ãne ma tô Abine Nehe ꞌra hã wĩrĩ ni, Zoabihi sisãnawã Azaéu te te wĩrĩ ꞌru te.
28 Dawi, ãne hã te te waihuꞌu wamhã, te tinha:
— Uburé Danhibꞌapito ma hã waihuꞌu pese di, wa hã te ãma ĩꞌupa õ zém na hã duré ĩnhibꞌaꞌuwẽ norĩ te te ãma iꞌupa zaꞌra õ zém na hã, Abine da te dasiwi iwĩrĩzém na.
29 Zoabi hã iꞌupaiꞌwai wa, idâꞌâ wapru isisiwimhã sisaꞌwarire, duré uburé isõrõwa ꞌre, ꞌre ihâimana zaꞌra mono norĩ nhisiwib zama! Duré tô isihudu we ꞌre hâimana zaꞌra mono sidâpâsi, ihâiba ꞌremhã dahâirutu hâire izubru ré hã we ãma ꞌre hâimana uꞌâsi zaꞌrare mono, ihâiba zaꞌra na hã. Duré daꞌwaꞌre hâirutu nhiminhi uprosi pe, isimimrami pe hã we tô ãma ꞌre hâimana uꞌâsi zaꞌrare mono. Duré piꞌõ nhimiromhurizép si tãma iꞌmanharĩ waihuꞌu pesere si we te te ꞌre ꞌmaꞌwamarĩ zaꞌrare mono! Duré sibꞌézé ꞌwa pa na we siꞌutõrĩre mono, isihudu sidâpâsi. Duré ĩsa zaꞌra zéb zô, tiwi sô ꞌre roꞌwanhiꞌriti uꞌâsi zaꞌrare mono!
30 Ãne ma tô Zoabi, tisisãnawã Abisaihi me, Abine hã wĩrĩ zahuré. E marĩ wa. Azaéu isisãnawã zahuré hã te te wĩrĩ wa, dasiꞌwapé Gibiã ãma hâimana siwaprã hã.
31 Tawamhã Dawi, Zoabihi ma, duré ite dasiꞌwapéi ꞌmanharĩꞌwa norĩ ime ihâimana zaꞌra ma, ma tô tãma ꞌru zaꞌra, ãne:
— Maꞌãpé, aiꞌuza hã hâiwazu zaꞌra waꞌaba. Duré saꞌu ihâiro na hã asima séme aba, Abinehe hâiba nhowa iré aiꞌruꞌru waꞌaba mono da.
Apito Dawi hã, te dahâiba hâi ꞌwapézéb zarina hã mo.
32 Tawamhã Hebrõ ãma ma tô Abinehe ãma hã dasiwi tiꞌa ni. Tame ma tô apito hã wawa ꞌrãihâ na abꞌre ꞌratamhã aiwaꞌõ. Duré uburé aꞌuwẽ norĩ zama ma tô isine ãma aiwaꞌõ zaꞌra.
33 Tawamhã Dawi, Abinehe ãma robzépatazém na ma tô tinhoꞌre ãne:
“E marĩ wa, ma tô Abine hã dârâ, isimizaꞌreseꞌõ norĩ dâꞌâzém ne.
34 Asibꞌrada hã wasisi zahuré õ di, duré aipara hã wasisi zahuré õ di.Iwasété uptabi norĩ nhibꞌrata, ꞌre idadâꞌâ zaꞌra mono ne, ma tô a hã atâ!”
Tawamhã te duré apâ Abinehe ãmamhã taꞌruꞌru ni.
35 Aꞌuwẽ norĩ, taha bâdâ siꞌutõrĩ õ ré, Dawihi ma, ma tô marĩ tãma ꞌru pibu zaꞌra ni, te te ꞌrẽne da hã. Tane nherẽ, ma tô ropisudu hã ꞌmanha ãne:
— ꞌRe ihâimana uꞌâsi mono hã te te ĩwĩrĩre za, wa hã ãhã bâdâ siꞌutõrĩ õ ré, marĩ te ꞌrẽne wamhã!
36 Ãne na da te wapari zaꞌra wamhã, ma tô dasiwi mreme wẽsãmri ni. Uburé apito te te ꞌre iꞌabꞌmanharĩ mono zé hã te tô dasiwi da te ꞌre wẽsãmri.
37 Ãne tô taha bâtâ na uburé apito Dawihi nhibꞌaꞌuwẽ norĩ hã duré uburé Izaraéu tiꞌai ꞌre aꞌuwẽ norĩ hã Abine, da te iwĩrĩzém na, dame ihâimana õ na hã ma tô dasiwi waihuꞌu ni.
38 Tawamhã te ãne Dawi hã tite dasiꞌwapéi ꞌmanharĩꞌwa norĩ ꞌmadâꞌâꞌwai ma hã tãma nharĩ zaꞌra:
— Maꞌãpé waihuꞌu zaꞌra waꞌaba! Izaraéu tiꞌai ꞌre, dama iꞌrãnhoꞌu isaꞌẽne ma tô ã bâtâ na hã dârâ.
39 Wa hã, apito da, ꞌRe ihâimana uꞌâsi mono nhimipisutu nherẽ, ĩnhibꞌuware di, ãhã na hã. Zeruꞌizaha ꞌra siꞌaibâ norĩ, ĩma hã isipãrĩ zei uptabi si hã! Uburé Danhibꞌapito, ã hã iwasété norĩ te te iꞌahâri da si, ĩma iwẽ hã, tiwasédé te te iꞌmanharĩ zahuré zéb zarina!
