2 Samuéu 4:1-12
4 Tawamhã Sauhu ꞌra Ibozéti hã, Abine, Hebrõ ãma da te iwĩrĩ na te te waihuꞌu wamhã, ma tô oto isiptede hã tiwi aiꞌutõ. Ma duré uburé Izaraéu nhihudu norĩ hã tipẽꞌẽwara pese zaꞌra.
2 Ibozétihi te, dasiꞌwapéi ꞌmanharĩꞌwa norĩ nhibꞌihâꞌa maparane, tinhitobꞌru norĩ nhiptiꞌai waꞌõtõ ãma waptu na dasiꞌwapé na dawadaꞌuriꞌwa norĩ hã ma tô tihâimana zahuré. Isisi zahuré hã Baꞌana na, duré Recabi na, Rimohõ ꞌra zahuré hã, ꞌrinhoꞌu Beꞌerote Bẽzamihĩ nhihudu norĩ te ãma hã. (E marĩ wa, Beꞌerote, Bẽzamihĩ nhihudu norĩ nhiptiꞌa na hã duré ꞌre hâimana mono wa.
3 Duréihã Beꞌerote ãma aꞌuwẽ ꞌre ihâimana zaꞌra mono norĩ hã Gitaꞌĩ na ꞌri nhoꞌõmo nhisi u isisaꞌrei mono hã, õmem haré te ãhã na zama dame ꞌre hâimana zaꞌra oto, dasiréꞌõ na aꞌuwẽ na hã.)
4 Sau norĩ, Zonataha me hã, Zezereu ãma dâꞌâ zahuré wamhã, Mefibozéti, Zonataha ꞌra ãma hã, 5 na ãma iwahub ré. Sau norĩ, Zonataha me idâꞌâ zahuré wasuꞌu hã wisi wamhã, piꞌõ, Mefibozéti te te ꞌre iꞌmadâꞌâ mono hã ma tô saꞌra. Ma tô duré iré hã aimani. Tane nherẽ, waptu na saꞌẽtẽ iré watobro wa, ma tô tiwi waptãrã. Tahawa, ma timorĩ ꞌrãtẽ, Mefibozéti hã.
5 Tawamhã Recabi norĩ Baꞌanahã me, Ibozétihi nhorõwa u ma tô tineb zahuré. Neb zahuré wamhã, ma tô aimasisi, sai pari waꞌutu ré.
6 Piꞌõ, ꞌridawa ãma amnho trigu te te iꞌaꞌupõrĩ hã, ma tô nhono, tãma aptâꞌâ wa. Taha ré, Recabi norĩ, Baꞌanahã me ariꞌiwi pese ma tô tizasi zahuré, ꞌri para u hã.
7 Zasi zahuré wamhã, Ibozéti nhimiwaptâ u sõtõ pese ré, tame ma tô duré wĩrĩ zahuré. Tawamhã ma tô ꞌrã nhizâri zahuré. Te te ꞌrã nhizâri zahuré wamhã, ma tô siré âri zahuré. Tahawa, ma tô mara bâre tineb zahuré, ẽtẽ nhiꞌriti na Zodã pa u romharé inomro na.
8 Hebrõ u oto simasisi zahuré wamhã, ma tô Ibozétihi ꞌrã, te te tãma hâiꞌré zahuré wa, apito Dawihi ma wasuꞌu zahuré ãne:
— Ãhãta Ibozétihi ꞌrã waꞌuihâ, asitobꞌru Sau aré te te aiwĩrĩ da, te te sima iꞌaiwẽ ꞌra ꞌrã. Ãhã na ma tô Uburé Danhibꞌapito hã aiꞌruiwaꞌâ, ĩte apito a hã, Sauhu na, duré isihudu norĩ na zama.
9 4:9-11 Tawamhã Dawi asa ma te ãne ãma sadaꞌâbâ zahuré:
— Rowasuꞌuꞌwa hã wa hã wa tô ârire, ꞌrinhoꞌu Zicradi u te te ĩnhopẽtẽ da, ĩtẽme imorĩ hã. Tahawa wa tô duré tiꞌru, da te wĩrĩ da hã. E marĩ wa. Õ hã rowasuꞌu iwẽ te te ĩma wasuꞌu da newa, ma tô rosaꞌrata. Tane nherẽ, ma tô ĩma wasuꞌu, Sauhu dâꞌâzé hã. Tahawa, ãhã na awaꞌawi na hã wa za ropisutu Uburé Danhibꞌapito idâꞌâꞌõ nhisi na, uburé marĩ ipipa wi te te ꞌre ĩnhoꞌreptui mono ma hã, ãne: Wa hã wa za aibâ dazaꞌréiꞌwa norĩ ma hã rowasuꞌuꞌwai ma, te irobꞌmanharĩzém nhipai u pese tãma robꞌmanharĩ zahuré, aibâ iwẽ tinhorõwa ãma sõtõ ré, te te iwĩrĩ zahuré ma hã! Tahawa awaꞌawi na hã wa za ꞌruiwaꞌâ, a norĩ waꞌwa wĩrĩ aba wa, Ibozéti hã. Duré tahawa, wa za tiꞌai hawimhã aiꞌãma wamroi waꞌwa.
10 ꞌMadâꞌâ 4:9
11 ꞌMadâꞌâ 4:9
12 Tawamhã Dawi, tite dasiꞌwapéi ꞌmanharĩꞌwa norĩ ma, ma tô tãma ꞌru zaꞌra, Recabi norĩ, Baꞌanahã me te te siwi pãrĩ da hã. Taha pari duré te te siwi sibꞌrata nhihâri zahuré wamhã, duré te te siwi para nhihâri zahuré wamhã, ma tô Hebrõ ꞌrata â nhowada ãma hâiwi siwi sasõmri zaꞌra. Duré tawamhã Ibozétihi ꞌrã te te siwi âri wamhã, ma tô Abinehe ãma da te itiꞌazéb ꞌre, abꞌre wa, Hebrõ ãma hã ãma siwi tiꞌa.
