2 Samuéu 5:1-25
5 Tawamhã Uburé Izaraéu nhihudu waꞌõtõ norĩ hã, Davi te te siwi sõpẽtẽ da, Hebrõ u siꞌabaꞌréi wamhã, ma tô ãne tãma nharĩ zaꞌra:
— Wa norĩ hã tô õ hã aꞌuwẽ, a hã, wasiwapru.
2 Nimahã na hã Sau hã wanhibꞌapito na wama ꞌre hâimana zaꞌra mono ré, ma tô Izaraéu nhihudu norĩ ma dasiꞌwapéiꞌwa wadaꞌuriꞌwa na hã aihâiba. Tawamhã Uburé Danhibꞌapito hã ma tô duré tinha, a hã isibꞌaꞌuwẽ norĩ wadaꞌuriꞌwa na, duré ta norĩ ma iꞌrãnhoꞌõmo na ꞌre aihâimana mono da.
3 Ãne ma tô uburé Izaraéu nhihudu norĩ ma iꞌrãnhoꞌõmo norĩ, Hebrõ u siꞌabaꞌréi wamhã, Davi hã siwi sõpẽtẽ. Tawamhã Davi, Uburé Danhibꞌapito nhoꞌa te te ãma sina saze zaꞌra wa, ma tô oto siwi ꞌrãtiꞌi, Izaraéu nhihudu norĩ ma siꞌapito da hã.
4 30 na ãma iwahub ãma ma tô siꞌapito. Ma tô duré 40 na ãma tiwahu, dama iꞌrãnhoꞌõmo na ꞌre hâimana mono ré hã.
5 Zuda na danhiptiꞌai wamri ꞌre, Hebrõ ãma siꞌiꞌrãnhoꞌõmo wamhã, ma tô 7 na wahu aiwa ãma isipoꞌo na hã te te ꞌre daꞌaꞌmadâꞌâ. Taha pari ma tô duré 33 na ãma iwahub ãma Zeruzalẽ ãma Izaraéu na danhiptiꞌai wamri ꞌre duré Zuda tiꞌai ꞌre, te te ꞌre daꞌaꞌmadâꞌâ, simisutu na.
6 Tawamhã Apito Davi hã, tite dasiꞌwapéi ꞌmanharĩꞌwa norĩ me Zeruzalẽ u hã ma tô aiꞌabaꞌré, te te siwi rési da hã. Aꞌuwẽ zebuzeu na iwamri ꞌri nhoꞌõmo wa, ꞌre ihâimana zaꞌra mono norĩ hã ma tô ãne rosaꞌrata zaꞌra, Davi hã za te te ãma iꞌaiꞌuté waihuꞌu zaꞌra õ na hã. Tahawa ma tô ãne tãma nharĩ zaꞌra:
— Ã wamhã, niwamhã a hã we iꞌasébré da hã mare uptabi di. Duré asébré da wamhã, itobꞌa norĩ si, imorĩꞌõ norĩ me hã te aré asada tihâimana zaꞌra, ꞌri ꞌwawi isimapa zaꞌra da hã.
7 Tane nherẽ, Davi hã ma tô Siã* ꞌrinhoꞌu isiptede hã tiꞌâ. Ãne wa, ma tô “Davihi te ꞌri nhoꞌõmo” na hã oto da te ꞌre dasiwi ꞌre wamri.
8 Davi hã tô taha bâtâ na, te tite dasiꞌwapéi ꞌmanharĩꞌwa norĩ ma nharĩ zaꞌra ãne:
— Niꞌwa hã ĩnhitobꞌru norĩ, zebuzeu itobꞌa norĩ imorĩꞌõ norĩ me te te simro da, te te sima wẽ wamhã, te za â prabazéb da abꞌre, tiꞌai ꞌrowi bâdâdi na ãzé, za te te ꞌwapé zaꞌra da.
Tahawa, te ãne da te dasima ꞌre nharĩ uꞌâsi zaꞌra: “Itobꞌa norĩ, imorĩꞌõ norĩ me hã, ꞌRe ihâimana uꞌâsi mono nhorõwa ꞌri ꞌrãihâ u ꞌre isisisi mono da hã mare di za.”
9 Davi hã ma tô ꞌri nhoꞌu isiptete ãma ꞌre hâimana. Tahawa, ma tô “Davihi te ꞌri nhoꞌõmo na hã” oto sima sisi. Tahawa imana wawimhã ma tô ꞌri ꞌwawi waꞌra ꞌrãihâ hã duré wahutu, bâtâ pusizém niwĩ tiꞌa zaꞌwari ꞌre ihâimana mono hawi, danhibꞌihâꞌa nhimiromhurizé ꞌri ꞌrãihâ u.
10 Tawamhã Davi ma tô sidâpâsi ꞌre siptete mono. E marĩ wa. ꞌRe ihâimana uꞌâsi mono danhipai u isiptete uptabi hã ime ꞌre hâimana mono wa.
11 ꞌRinhoꞌu Tiru ãma apito Hirã hã ma tô romreme ꞌwapéiꞌwa norĩ, Davihi u satõrĩ zaꞌra. Wede nhinihã waꞌõno hã ma duré tãma sõmri zaꞌra. Wedepoꞌo na duré ẽtẽ zaꞌra na ꞌri ꞌmanharĩꞌwa norĩ zama ma duré itẽmemhã satõrĩ zaꞌra. Tawamhã ma tô Davihi nhimiromhurizéb da, ꞌri ꞌrãihâ hã ãma tãma ꞌmanharĩ zaꞌra.
12 Ãne ma tô Davi hã sina waihuꞌu, Izaraéu nhihudu norĩ ma iꞌrãnhoꞌõmo na ꞌre ihâimana mono zéb da, Uburé Danhibꞌapito te te tãma ipisutuzém na hã, duré tinhibꞌaꞌuwẽ te te ꞌre isawi pese zaꞌra mono zéb zarina, siptete uꞌâsi na iꞌrãnhoꞌõmo na ꞌre hâimana mono da, ꞌRe ihâimana uꞌâsi mono te te ꞌre pawaptob uꞌâsi mono da.
13 Hebrõ hawi watobro parimhã, ma tô Zeruzalẽ ãma timro prã norĩ da, duré timro da hã Davi sima awaibu. Tawamhã ta norĩ zéꞌre hawimhã ma tô iꞌra siꞌaibâ hã duré iꞌra sipiꞌõ hã tãma tipoto zaꞌra.
14 Davihi ꞌra norĩ, Zeruzalẽ ãma ipoto zaꞌra norĩ nhisi hã ãne: Samua, Sobabi, Natã, Saloma,
15 Iba, Erisua, Nefegue, Zapia,
16 Elisama, Eriada, duré Eripéréti.
Filisteu norĩ ãma, Davi te te iꞌaiꞌutézé wasuꞌu
17 Filisteu norĩ, Davi, Izaraéu ãma dama iꞌrãnhoꞌõmo na ꞌre hâimana mono da, te te siwi iꞌrãtiꞌizé te te waihuꞌu zaꞌra wamhã, ma tô ite dasiꞌwapéi ꞌmanharĩꞌwa norĩ hã wairé, te te siwi âri da. Ãne hã Davi te te waihuꞌu wamhã, ma tô ẽtẽ zaꞌra na ꞌri nhiptete u hã mo.
18 Oto ẽtẽ nhiꞌriti wa Refaꞌĩ na romharé nhisi u filisteu norĩ sihutu wamhã, ma tô tame tihâimana zaꞌra.
19 Tahawa, Davi hã te Uburé Danhibꞌapito hã sadanha ãne:
— E wa za filisteu norĩ hã aꞌwapé. E te za duré a hã ĩma isõ, te ãma iꞌaiꞌuté zaꞌra zé hã.
— Wa za aima tisõ za, ãma iꞌaiꞌuté zaꞌra zé hã. Tahawa maꞌãpé aimorĩ! — Ãne te Uburé Danhibꞌapito asa tãma tinha.
20 Tawamhã Davi, Baau-Perazĩ na romnhisi u morĩ wamhã, ma tô filisteu norĩ ãma tame aiꞌuté zaꞌra. Tahawa te ãne tinha:
— ꞌRe iꞌâpusi mono hã uburé pese marĩ te te ꞌre iꞌmarõpãrĩ zaꞌra mono ne, ma tô Uburé Danhibꞌapito, ĩnhitobꞌru norĩ da, tiꞌa ꞌridawa zaꞌra, siꞌutõrĩ da hã.
Tahawa, ã hã romnhisi hã Baau-Perazĩ* na.
21 Tame filisteu norĩ ma tô tite romhâibarĩ hã rẽme zaꞌra. Tawamhã Davi norĩ, tite dasiꞌwapéi ꞌmanharĩꞌwa norĩ me te te waibui wamhã, ma tô oto siré ꞌwasa.
22 Tawamhã filisteu norĩ, Refaꞌĩ na romharé nhisi u siꞌabaꞌréi wamhã, ma tô duré iwa apâ tihâimana zaꞌra.
23 Davi hã, Uburé Danhibꞌapito te te duré sadanharĩ zahu wamhã, ma tô ãne duré ãma sadaꞌâ:
— Isõꞌre hawi aꞌwapéi õ di za. Apâ aiꞌaꞌre nhiꞌoto, ibabarãi hawi sô aiwatobro zaꞌra da, amorera nhoꞌre hawi asiwaꞌrãmi aꞌwapé da.
24 Amorera na wede nhisi hawi da te ropãrĩ zaꞌra mono sina, dasisõré pese na idasiꞌabaꞌrézé dapara ꞌru hã wapari wamhã, asimire sina aihâimana za, aꞌwapé da hã. E marĩ wa. Asõwa wa hã ĩmorĩzé te wasuꞌu, filisteu norĩ te, dasiꞌwapéi ꞌmanharĩꞌwa norĩ na, za te ãma iꞌaiꞌuté zaꞌra zéb da hã.
25 Tawamhã Davi, Uburé Danhibꞌapito te te tãma iꞌruzé te te ꞌmanharĩ wamhã, ma tô filisteu norĩ ãma hã aiꞌuté zaꞌra, Zeba hawi, õ Geze u hã.
