2 Samuéu 6:1-23
6 Dawi hã, Izaraéu ãma dasiꞌwapéi ꞌmanharĩꞌwa iwẽ isiptete uptabi norĩ hã 30 miu na ma tô duré ꞌrãꞌõtõ.
2 ꞌRinhoꞌu Baꞌara na isisi u ma tô te te oto simro, Zuda ãmamhã, ropoto zaripi papo waꞌwa tisimasisizém na Uburé Danhibꞌapito iwaihuꞌu pe isãmra nhisi ãma ihâimana nhimiroti ré wedehâꞌre, te te siwi âri da.
3 6:3-4 ꞌRe ihâimana uꞌâsi mono te, wedehâꞌre, wedewara zapore itéb ꞌre, te te siwi isẽrẽ hã ma tô ẽtẽ ãma Abinadabihi nhorõwa ꞌre isa mono ãma siwi siꞌra. Abinadabihi ꞌra norĩ, Uza, Aiꞌôhô me ma tô wedewara zapore, wedehâꞌre te te iꞌâri ré hã ꞌmapraba zahuré. Aiꞌô hã te isõwamhã mo.
4 ꞌMadâꞌâ 6:3
5 Dawi norĩ, uburé Izaraéu nhihudu norĩ me hã ma tô aiwapsisi. Ma tô duré Uburé Danhibꞌapito ãma siptete zaꞌra sina tinhoꞌre zaꞌra na ãma tiwata zaꞌra. Tawamhã tinhiptaꞌa zaꞌra zém na ma tô ãma roptaꞌa zaꞌra, isõrõ taꞌa na hã, tãbõrĩ na hã, iꞌraꞌrasi na hã, duré dasazém ne ꞌmanharĩ baihâire na hã.
6 Tawamhã Nacõhõ te, amnho tomhâi wazuzéb u oto sihutu wamhã, ma tô powawẽ norĩ hã tizaipraba zahuré. Tawamhã Uza ma tô tinhibꞌrada hã sô wẽ, ꞌRe ihâimana uꞌâsi mono te, wedehâꞌre te te sapari da.
7 Uburé Danhibꞌapito, Uzaha zada hã ma tô tizahi, te te wazéb õ wa. Tahawa ma tô tiwĩ. Tame ma tô Uza hã dârâ, wedehâꞌre zababa.
8 Dawi ma tô abꞌrui pese. E marĩ wa. Uburé Danhibꞌapito isahizéb zarina, Uzaha ma, te te robꞌmanharĩ wa. Tahawa ta hawim haré ã bâtâ na zama, romnhisi hã Perezi-Uza* na.
9 Tawamhã Dawi, Uburé Danhibꞌapito ma, pahi wa, te ãne ꞌrâwi sima tinha:
— E niha wa za ãhã na awaꞌawi na hã ĩsiré tiꞌâ, ꞌRe ihâimana uꞌâsi mono te, wedehâꞌre hã.
10 Ãne wa, ma tô Dawi hã sima rowairébé, wedehâꞌre te te siré âri tõ da, tite ꞌri nhoꞌõmo u hã. Ãne wa, te te aré âri da nherẽ, te te ãma saprĩ wa, ma tô Obedi-Edõhõ nhorõwa u si tiꞌâ, Gati na ꞌri nhoꞌõmo u.
11 ꞌRe ihâimana uꞌâsi mono te, wedehâꞌre ãma, aꞌamo tame siꞌubdatõ ãma siꞌutõrĩ wa, ma tô Uburé Danhibꞌapito, Obedi-Edõhõ ma, iwẽ hã te te ꞌre anhomri, iꞌra norĩ ma zama isabâdâ hã.
12 Apito Dawi ma tô waihuꞌu, wedehâꞌre uꞌâbâ, Uburé Danhibꞌapito, Obedi-Edõhõ sisãnawã norĩ ma, duré uburé marĩ tãma ihâimana zaꞌra ma, iwẽ hã te te iꞌapisutu mono zém na hã. Tahawa, Obedi-Edõhõ nhorõwa hawimhã ma tô waze, wedehâꞌre hã. Duré dato isaꞌẽne ihâimanazém na ma tô oto tiꞌâ, Dawihi te ꞌri nhoꞌõmo u hã.
13 Tawamhã aibâ norĩ, wedehâꞌre te te siwi duri ré, 6 na tiꞌai waꞌõtõ pibuzém na tipara te te isõré ãma, ma tô Dawi, ꞌRe ihâimana uꞌâsi mono ma, powawẽ ibaꞌõmo na duré powawẽ zapu ihâipese na hã ãma tãma tinhoprub zahuré.
14 Dawi hã sasedoti ꞌRe ihâimana uꞌâsi mono ma, daꞌãma romhuriꞌwa norĩ siꞌuzazé ipano pa te te sima isẽrẽ ré, ma tô Uburé Danhibꞌapito ãma tinhoꞌre na wata sina hã aiꞌrẽ.
15 Ãne Dawi norĩ, uburé Izaraéu nhihudu norĩ me, ma tô rowẽ te, sadawaꞌaꞌa mono sina, wedehâꞌre hã Zeruzalẽ u hã siwi tiꞌâ, danhimnhihârâzé hã te te hãsi mono sina.
16 ꞌRe ihâimana uꞌâsi mono te, wedehâꞌre oto ꞌri nhoꞌõmo u sébré wamhã, Sauhu ꞌra Micau hã zanela ꞌri zadazâri hawimhã ma tô ꞌmadâ, apito Dawi, siꞌrẽne mono ré, duré sarõtõ mono ré, Uburé Danhibꞌapito ãma wata mono sina. Tahawa, ma tô tipẽꞌẽ na hã ãma wẽꞌõ pese.
17 Wedehâꞌre te te siwi iꞌâri hã ma tô siwi tisã isabzéb ãma, Dawi romhâ ꞌmanharĩ na ꞌri te te sô iꞌmanharĩ ãma hã. Tawamhã ma tô Uburé Danhibꞌapito ma hã tinhopru, abaze, da te izata pese zaꞌra mono na, duré danhoprubzé, ãma irowẽ zaꞌẽtẽ na zama.
18 Tawamhã abaze norĩ zata na duré danhoprubzé ãma irowẽ zaꞌẽtẽ na tinhoprubzé te te ꞌmanharĩ pari, ma tô Dawi, Uburé Danhibꞌapito Iwaihuꞌu pese nhisi na daꞌahâ norĩ hã iwẽ na pawaptob zaꞌra.
19 Taha pari ma tô aibâ norĩ ma hâiba mono bâ, duré piꞌõ norĩ ma hâiba mono bâ iꞌuꞌẽtẽ wapu hã te te tãma sõmri, duré romnhi waꞌõno isebre hã, duré uwa ꞌru iꞌrãi ꞌré hã. Taha parimhã ma tô uburé tinhorõwa u hã oto te te ropé.
20 Dawi hã tiꞌra norĩ me oto hâimana da, tinhorõwa u apâ morĩ wamhã, ma tô Sauhu ꞌra Micau hã watobro, te te sõpẽtẽ da hã. Tahawa, te ãne tãma tinha:
— E niha iwẽre, Izaraéu nhihudu norĩ te, apito te te irobꞌmanharĩ hã! Isisébꞌõre ne hã ma tô tihâiba hã tite romhuriꞌwa norĩ sipiꞌõi ma hã tãma hâiꞌré zaꞌra.
21 Tawamhã Dawi ma te ãne ãma tãma waꞌrã:
— Wa hã Uburé Danhibꞌapito nhoꞌre wa tô ĩsiꞌrẽne, aimama nhibrobꞌre te te ĩpisutu nhoꞌremhã, aimama hawi aꞌuwẽ norĩ nhipai u zama. Uburé Izaraéu nhihudu norĩ ma, isibꞌaꞌuwẽ norĩ ma ĩꞌrãnhoꞌõmo na tãma ꞌre ĩhâimana zaꞌra mono da hã, ma tô ĩpisutu. Wa za duré Uburé Danhibꞌapito ãma ĩwata na ĩsiꞌrẽne na hã ãma uzusi.
22 Wa za duré tãma ĩsina tiꞌawi pese, isõꞌremhã. A hã ma tô ĩꞌãma hã irosaꞌra, wa hã tô, marĩ dai õ na hã. Tane nherẽ, õ hã piꞌõ norĩ ãma ĩma inharĩ zaꞌra norĩ hã te za siwi ĩwasuꞌu wẽ.
23 Ãne wa, Micau Sauhu ꞌra hã niwamhã ꞌra õ di.
Ĩwaꞌõtõ piꞌreba watsuꞌu mono
^ 6:8 Perezi-Uza hã Hebreu norĩ mreme na “Uzaha ma, robꞌmanharĩzé”
