2 Samuéu 7:1-29
7 Apito Dawi tinhorõwa ꞌri ꞌrãihâ ãma te oto sima iwẽ na ꞌre sãmra. Uburé Danhibꞌapito hã ma tô duré uburé isitobꞌru norĩ hã te te tãma ꞌre abaꞌa.
2 Tawamhã Dawi nimahã bâtâ na, te ꞌRe ihâimana uꞌâsi mono zadawa ꞌmahârâꞌwa Natãhã ma hã tinha ãne:
— Maꞌãpé we ĩꞌãma hã rosaꞌrata! Ãhãta wa ãme wa hã ꞌre ĩhâimana, wede nhinihã na ꞌri ꞌmanharĩ ꞌre. Tane nherẽ, te ꞌRe ihâimana uꞌâsi mono te, wedehâꞌre hã romhâ ꞌmanharĩ na ꞌri itoire ꞌre, ꞌre sa.
3 Natã, ma te ãma sadaꞌâ ãne:
— Uburé marĩ asima iwẽ na hã ꞌre abꞌmanharĩ mono. E marĩ wa. Uburé Danhibꞌapito te asiré hã ꞌre hâimana.
4 Tane nherẽ, tô taha mara na, ma tô Uburé Danhibꞌapito, Natãhã ma hã tinha ãne:
5 — Maꞌãpé aimorĩ, ĩnhibꞌaꞌuwẽ Dawihi u, wa hã ãne te aima iwaihuꞌuzéb zarina, tãma ĩzadawa wasuꞌu da: “E a hã ꞌri ĩma ꞌmanharĩ da bâ, iwa ꞌre ĩnhamra mono da hã.
6 Wa hã Izaraéu nhihudu norĩ, Ezitu hawi te we isani zaꞌra hawim haré, ã bâtâ ꞌremhã ꞌri ꞌrãihâ ꞌremhã ꞌre ĩhâimana mono õ di. ꞌRe ĩne mono ré hã wa tô romhâ ꞌmanharĩ na ꞌri ꞌrep si ꞌre ĩhâimana.
7 Izaraéu nhihudu norĩ me ꞌre ĩne mono sidâpâsi, niwamhã wa hã dama iꞌrãnhoꞌõmo norĩ, te ipisutu zaꞌra hã te ꞌmazadanharĩ õ di, wede nhinihã na te te ĩma iꞌri zaꞌra õ zém na hã.”
8 Ãhã wa tô, ĩnhibꞌaꞌuwẽ Dawihi ma hã tãma ĩzadawa wasuꞌu na, wa hã, Uburé Danhibꞌapito Ĩwaihuꞌu pese uptabi, ãne te tãma inharĩzém na hã: “Wa hã poneꞌẽrebâ aꞌubuni wi ꞌre iꞌabꞌmadâꞌâ mono na ꞌre iromhuri mono zém hawimhã wa tô aiwaze, ĩnhibꞌaꞌuwẽ Izaraéu nhihudu norĩ ma asiꞌiꞌrãnhoꞌõmo da hã.
9 Wa hã nimomo uburé dazaꞌrui mono bâ ꞌre ane mono sidâpâsi, wa tô asiré õne uꞌâ ꞌre ĩhâimana. Tawamhã duré taha zarina uburé asitobꞌru norĩ, a hã ꞌre aꞌwapéi mono da, ꞌre azasãmri mono sidâpâsi, wa tô uburé asitobꞌru norĩ wi hã aiꞌãma hã ꞌre ĩsisaprĩ. Tawamhã wa za aima ꞌmanha, dama asaꞌrese zaꞌẽtẽ da hã, tiꞌai ãma uburé dama ipire norĩ dama saꞌrese zaꞌẽtẽ na ꞌre ihâimana zaꞌra mono ne.
10 7:10-11 Ĩnhibꞌaꞌuwẽ Izaraéu nhihudu norĩ ma, wa tô ro hã pisutu. Wa tô duré tame sõré, rowẽ uꞌâsi ꞌre ihâimana zaꞌra mono zéb da, ãma hã. Ã hã tiꞌai u isisisi hawim haré te aꞌuwẽ isipãrĩ ze norĩ hã sô ꞌre pra uꞌâsi, te te ꞌre sahui mono da hã. Ãne hã duré ꞌre iromhâimana zahu mono da hã, mare di za. Wa hã wa ropisutu aima hã ãne: Wa za uburé asitobꞌru norĩ wi hã te ꞌre asõꞌreptu. Duré asihudu norĩ hã wa za te aima ꞌre anhomri.
11 ꞌMadâꞌâ 7:10
12 Nimahã na atâꞌâ wa, aihiꞌrata norĩ zababa, da te aiꞌãma tiꞌai wamhã, wa hã wa za aiꞌra norĩ dama iꞌrãnhoꞌu isiptete na ꞌre ꞌmaihâimana mono da hã duré ꞌmaipisutu.
13 Ta hã te za ꞌri ꞌrãihâ hã ĩma ꞌmanha. Wa hã wa za isihudu norĩ ma hã iꞌrãnhoꞌõmo na ãma ꞌre hâimana uꞌâsi zaꞌra mono da hã te tãma ꞌre abꞌmanharĩ.
14 Wa hã za imama. Õhõ za ĩꞌra. Õ hã te te ꞌre upai mono wamhã, wa za te tãma ꞌre robꞌmanharĩ, damama norĩ tiꞌra ma, te te ꞌre irobꞌmanharĩ zaꞌra mono ne.
15 Tane nherẽ, niwamhã ĩnhimizawizé te tiwi iwazere da hã mare di za, a hã asiꞌapito da, Sauhu ma, te iꞌmanharĩ ne hã.
16 Õne uꞌâ te za asihudu norĩ hã aima ꞌre hâimana zaꞌra. Duré iꞌrãnhoꞌu ate hã aima ꞌre hâimana uꞌâsi mono da, wa za pisutu. Duré niwamhã ꞌre iꞌasãmra mono zé ipire hã isiꞌutõrĩ da hã mare di za.”
17 Natã hã ma tô Dawihi ma uburé wasuꞌu, ꞌRe ihâimana uꞌâsi mono te te tãma ihâiꞌrézé hã.
Dawi hã ꞌRe ihâimana uꞌâsi mono ãma, rowaptẽrẽ na iwatazé wasuꞌu
18 Tawamhã Dawi, romhâ ꞌmanharĩ na ꞌri u ma tô ãzé. Sébré wamhã, ma tô nhamra, Uburé Danhibꞌapito nhoꞌre. Ãne te tãma mre:
— Uburé Danhibꞌapito, ĩte ꞌRe ihâimana uꞌâsi mono, wa hã marĩ dai õ nherẽ, ma tô uburé marĩ ĩma ꞌre iꞌabꞌmanharĩ wẽ mo. Duré iꞌra norĩ zama za sadai õ nherẽ.
19 E duré iwẽ hã ĩma ꞌre iꞌanhomri mono hã suru bâ, te ãhã na awaꞌawi na romnhowam na ĩnhihudu norĩ ma hã asimiropisudu hã duré iꞌmanha. Uburé Danhibꞌapito, ĩte ꞌRe ihâimana uꞌâsi mono, e niha tiꞌai ãma aꞌuwẽ nherẽ, ma tô tãma isaꞌré, te te ãne ꞌmadâꞌâ da hã.
20 E marĩ na te aima inharĩ na sahu da bâ. Aima hã ĩwaihuꞌu pese di, tô wa hã asibꞌaꞌuwẽ wa.
21 Ãne hã ate ꞌre iꞌaihâimana mono zé, asima ꞌre iwẽ mono zéb zarina, ma tô a hã ĩma iꞌmanha. Tahawa ma tô saꞌẽtẽ na marĩ te awaihuꞌu da hã ĩma isaꞌré.
22 E niha iꞌasaꞌẽtẽ uptabi, Uburé Danhibꞌapito, wate ꞌRe ihâimana uꞌâsi mono! Niꞌwa hã asine hã ihâimana waihuꞌuꞌõ. Duré aiꞌãma damreme, wa te ꞌre iwapari zaꞌra mono hã tô, u aiwétési, ꞌRe ihâimana uꞌâsi mono hã. Duré aimawi asine hã ꞌre daꞌmaihâimana mono õ di.
23 E mahã aꞌuwẽ, te tiꞌai ãma hã ꞌre hâimana zaꞌra, asibꞌaꞌuwẽ Izaraéu norĩ ne hã. Ta norĩ si ma tô ꞌre iꞌanhoꞌreptui mo, asibꞌaꞌuwẽ si ꞌre hâimana zaꞌra mono da. A hã ma tô asaꞌrese zaꞌẽtẽ zé hã dama ihâiꞌré. Ma tô duré asibꞌaꞌuwẽ norĩ ma, marĩ isaꞌẽne iwẽ uptabi hã tãma ꞌre isõmri zaꞌra mo. Ezitu hawi asibꞌaꞌuwẽ awazere wamhã, ma tô duré aimawi aꞌuwẽ norĩ hã duré waihuꞌu pese newa, ihâibaꞌõ ãma ꞌre iwata zaꞌra mono norĩ zama tãma iwazere zaꞌra, asibꞌaꞌuwẽ te te ꞌre isasãmri zaꞌra mono zéb zarina.
24 Uburé Danhibꞌapito, a hã ma tô ate Izaraéu nhihudu norĩ ma hã tãma iꞌmanharĩ zaꞌra, ate uꞌâsi na õne uꞌâ aima ꞌre hâimana zaꞌra mono da hã, duré ite na oto ꞌRe ihâimana uꞌâsi mono na tãma ꞌre aihâimana zaꞌra mono da hã.
25 — Uburé Danhibꞌapito, wate ꞌRe ihâimana uꞌâsi mono, maꞌãpé ãhã na awaꞌawi na hã ĩꞌãma iropisudu iꞌmanharĩ hã, duré ĩꞌra norĩ ãma iꞌmanharĩ hã ãma uwaimrami pese, inharĩzéb zarina, za iromhâimanazéb da hã.
26 Ãne wamhã, aiwasuꞌu zaꞌẽtẽ uꞌâsi di za. Tahawa, te za õne uꞌâ da te ꞌre nharĩ zaꞌra, ãne: “Uburé Danhibꞌapito Iwaihuꞌu pe, Izaraéu nhihudu norĩ te, ꞌRe ihâimana uꞌâsi mono.” A hã te za duré ĩnhihudu norĩ ꞌremhã apito na sima ꞌre ihâimana uꞌâsi zaꞌra mono da hã iꞌmanha.
27 Uburé Danhibꞌapito, aiwaihuꞌu pese uptabi, Izaraéu nhihudu norĩ te, ꞌRe ihâimana uꞌâsi mono! Ĩnhiptede te ĩma tihâiba, ãma aima ĩmreme, te iꞌmanharĩzéb da hã. E marĩ wa. Ma tô ĩma ihâiꞌré, asibꞌaꞌuwẽ ma hã, a hã za iꞌmanharĩzém na hã ĩnhihudu norĩ, sima ꞌre isiꞌapito zaꞌra mono da hã romhutuꞌõmhã.
28 — Uburé Danhibꞌapito, a hã ꞌRe ihâimana uꞌâsi mono. Aimreme hã, tô sena uptabi. Ã hã asimiropisudu iwẽ hã ma tô ĩma iꞌmanha.
29 Ãhã na wa za ãma aiwi rowaptẽ. Ĩnhihudu norĩ hã maꞌãpé iwẽ na hã pawaptob zaꞌra na, õne uꞌâ atõmo nhoꞌa ꞌre ihâimana zaꞌra mono zém na te te ãma uzusi uꞌâsi zaꞌra mono da. Ãne na, a hã Uburé Danhibꞌapito, ĩte ꞌRe ihâimana uꞌâsi mono ma tô iropisu. Tahawa õne uꞌâ, ĩnhihudu norĩ ãmamhã asimipawaptobzé ꞌre ihâimana uꞌâsi mono da si iwẽ hã.
