2 Samuéu 8:1-18
8 Davi hã nimahã na ronomro pari, filisteu norĩ te te sahui wamhã, ma tô ãma aiꞌuté zaꞌra. Duré siptete na ꞌre ihâimana zaꞌra mono zé hã ma tô tiwi uprosi zaꞌra, ta hã tiꞌai ꞌremhã.
2 Moabita norĩ ãmab zama ma tô duré aiꞌuté. Tiꞌai wa, simiꞌwara da, ma tô tãma ꞌru zaꞌra. Taha pari ma tô wedenhorõ na pibu zaꞌra. Tawamhã maparane wedenhorõ na te te ipibu zaꞌra norĩ hã ma tô simro. Misi wedenhorõ na te te ipibu zaꞌra norĩ si ma tô rẽme zaꞌra, hâiba ré. Ãne wa, ma tô moabita norĩ hã pawaꞌâbâ ãna Davihi ma romhuriꞌwa na oto ꞌre hâimana zaꞌra. Te duré tite robꞌuiprazé hã te te tãma ꞌre arĩ zaꞌra.
3 Tawamhã Davi, Zoba ãma apito Hadadeze, Reobehe ꞌra hã panhoꞌu Eufrati ꞌrata tiꞌa hã apâ te te duré âri õꞌumnhasite, ma tô irési na hã ãma sõzâ.
4 Davi hã, Hadadezehe te, awaru na dasiꞌwapéi ꞌmanharĩꞌwa norĩ hã ma tô tiwi sitob zaꞌra 1.700 na, duré 20 miu na dasiꞌwapéi ꞌmanharĩꞌwa norĩ para na isiré te te idaꞌwapé zaꞌra norĩ hã. Awaru, wedewara zapore sariꞌwa norĩ hã ma tô duré tiwi azarãnhihâ, morĩ tõ da. Tawamhã 100 na wedewara zapore ihâimana zaꞌra sariꞌwa da si, ma tô awaru hã rẽme zaꞌra.
5 Damascu hawi siriu norĩ hã Hadadeze te te siwi pawaptob da hã ma tô itẽme aiꞌabaꞌré. Tane nherẽ, Davi, ta norĩ hã 22 miu na ihâiba zaꞌra hã ma tô tiwi sõꞌrebzâ.
6 Taha pari, ma tô õne haré dasiꞌwapéi ꞌmanharĩꞌwa norĩ õmemhã ꞌri hã siwi sõré, õ norĩ nhiptiꞌai ꞌremhã. Tawamhã õ norĩ hã Davihi nhimiroti zahâpâ ꞌre hâimana zaꞌra mono wa, te oto rowaꞌâbâ arĩ hã te te tãma ꞌre sõmri zaꞌra. Tawamhã duré Uburé Danhibꞌapito, Davihi ma hã ma tô tisõ, uburé dazaꞌrui mono bâ ꞌre ine mono sidâpâsi te te daꞌãma iꞌaiꞌuté mono zéb da hã.
7 Davi hã ma tô waibu duré, Hadadezehe te, dama ipire norĩ te, ibaihâ zapoto ꞌmanharĩ na isimapazé hã ẽtẽ waipo pré oru ꞌmanharĩ na hã. Tawamhã Zeruzalẽ u hã ma tô tidu.
8 ꞌRi nhoꞌu Beta na isisi norĩ te, Berotaꞌi na isisi me hã ma tô duré ẽtẽ topsata ꞌmanharĩ brõzi iwaꞌâbâ zaꞌẽtẽ zama hã tidu, Hadadeze nhimiꞌmadâꞌâ na aré ꞌre ihâimana zahuré mono ãma hã.
9 Tawamhã apito Toꞌi, ꞌrinhoꞌu Hamati na isisi te hã ma tô Davi, Hadadezehe te uburé dasiꞌwapéi ꞌmanharĩꞌwa norĩ ãma te te iꞌaiꞌutézé hã waihuꞌu.
10 Tahawa, ma tô tiꞌra Zurã hã satõ, Davihi tẽmemhã, te te sawi da, duré Hadadezehe ãma te te iꞌaiꞌutézém na hã te te ãma uze da. Toꞌi hã, Hadadeze ma tô aré te te ꞌre ꞌwapéi uꞌâsi. Tawamhã Zurã, Davihi ma, ẽtẽ waipo prã prata ꞌmanharĩ norĩ hã, ẽtẽ waipo pré oru ꞌmanharĩ norĩ hã, duré ẽtẽ topsada brõzi ꞌmanharĩ norĩ me hã ma tô simisutu hã tãma duri zaꞌra.
11 Tawamhã apito Davi, ma tô Uburé Danhibꞌapito ma, pisutu zahi zaꞌra, aimawi aꞌuwẽ norĩ ãma te te aiꞌuté zaꞌra wa, isiꞌuwazi waipo prã prata norĩ, ẽtẽ waipo pré oru norĩ me, te te dawi iwaibu norĩ zu.
12 Te te iwaibu zaꞌra edomita norĩ wi hã, moabita norĩ wi hã, amonita norĩ wi hã, filisteu norĩ wi hã, duré amalequita norĩ wi hã. Tawamhã tô õne Hadadezehe wi te te tiwi iwaibu zaꞌra ma hã, ma tô duré robꞌmanha.
13 Davihi wasuꞌu zaꞌẽne hã ma tô duré oto sina hâimo pese, ẽtẽ nhiꞌriti siwaꞌaba wa, Rowarĩrĩzém na romharé nhisi ãma, edomita norĩ 18 miu na te te simroi pari, apâ wisi wamhã, tihâimanazéb u hã.
14 Edõ ꞌre, tiꞌai waꞌõtõ mono bâ ma tô dasiꞌwapéi ꞌmanharĩꞌwa norĩ hã te te sõré, awã ꞌri ꞌre. Tawamhã ma tô uburé edomita norĩ hã isimiroti nhiptete zahâpâ ꞌre hâimana zaꞌra. Uburé Danhibꞌapito hã ma tô Davihi ma, nimomo dazaꞌrui mono bâ dazô ꞌre ne mono sidâpâsi, te te daꞌãma ꞌre iꞌaiꞌuté mono zéb da hã te te tãma ꞌre sõmri.
15 Uburé Izaraéu tiꞌai ꞌre, Davi, apito na dama ꞌre hâimana mono wamhã, ma tô iꞌuwaibaba na si sena na õne uꞌâ te te ꞌre iꞌaꞌupari mono zé hã aiwapsi te te dama ꞌre abꞌmanharĩ, tô isarina si.
16 Zoabi, ina Zeruꞌiza, ma tô dasiꞌwapéi ꞌmanharĩꞌwa norĩ wadaꞌuriꞌwa na hã ꞌre hâimana. Duré Zosafa, Airudihi ꞌra hã apito zadawa para te daꞌuwatiꞌwa na dama ꞌre hâimana.
17 Zadoqui Aitubihi ꞌra, Aimereti, Abiataha ꞌra me hã te sasedoti na hã dama ꞌre hâimana zahuré. Seraia hã te duré apito mreme nhihâtâꞌwa na hã ꞌre hâimana.
18 Benaia Zoiadaha ꞌra, ma tô quereti norĩ nhibꞌapito na hã duré pereti norĩ nhibꞌapito na hã ꞌre hâimana. Tawamhã Davihi ꞌra norĩ hã te sasedoti na si we ꞌre hâimana zaꞌra.
