2 Samuéu 9:1-13
9 Nimahã bâtâ na te Davi hã anha, ãne:
— E Sauhu hawi aꞌuwẽ hã te zahadu dâꞌâ ãna ꞌre ꞌmaihâimana. ꞌRe ꞌmaihâimana mono wamhã, wa hã wa tô ĩsima wẽ, marĩ iwẽ te tãma iꞌmanharĩ da hã, Zonataha hâiba uꞌâbâmhã.
2 Tawamhã Sauhu hawi aꞌuwẽ, Ziba na isisi romhuriꞌwa hã te ꞌre hâimana. Taha ma, ma tô niꞌwa hã tinha, Davihi u morĩ da, te te tãma rowasuꞌu da.
Tawamhã apito te sadanha ãne:
— E a hã, Ziba.
— Ĩhe, tô wa hã. Maꞌãpé, marĩ hã tô waihuꞌu! — Ãne ma te ãma sadaꞌâ asa.
3 Apito te duré ãne sadanha:
— E zahadu te Sauhu hawi aꞌuwẽ ꞌre ꞌmaihâimana, za marĩ iwẽ te tãma iꞌmanharĩ da hã, ꞌRe ihâimana uꞌâsi mono ma, wa hã te iropisutuzéb zarina.
Tawamhã Ziba ma te ãne ãma tãma waꞌrã asa hã:
— Ĩhe, iré hã. Zonataha ꞌra, te ꞌre hâimana, imorĩꞌõ, ipara siꞌuiwa na iparaꞌõtõ uwa hã.
4 — E mame te tihâiba. — Ãne te apito hã ãma sadanha.
Ziba hã te ãne tãma wasuꞌu:
— Õme Amiꞌéhé ꞌra Maquihi nhorõwa ãma te tihâiba, ꞌrinhoꞌu Lo-Deba na isisi ãma.
5 Tawamhã apito Davi ma tô sô daꞌmazatõ, sô daꞌmaimorĩ da hã.
6 Tawamhã Zonataha ꞌra Mefibozéti, Sauhu nhihudu oto itẽme wisi wamhã, ma tô Davihi nhoꞌremhã hiꞌrãtitõ nhamra, tiꞌubu na tiꞌai u te te ãma roptop sina, tãma iwazéb zarina. Tahawa, te Davi hã tãma tinha, ãne:
— Mefibozéti!
— Maꞌãpé, marĩ hã tô waihuꞌu! — Ãne ma te asa hã sadaꞌâ.
7 — Aipahi tõ!
Davi hã te duré ãne tãma tinha:
— Wa hã wa za Zonata aimama uꞌâbâmhã, iwẽ na hã aima ꞌre ĩhâimana. Tahawa wa za duré uburé aiꞌrada Sauhu ma, tiꞌa, aré ꞌre ihâimana mono hã apâ aima tisõ. Te za duré ĩsiré ꞌre asai uꞌâsi mo oto.
8 Mefibozéti hã ma tô duré apâ tãma aiwẽꞌẽ zahu. Ma duré ãne ãma tãma waꞌrã asa:
— E ꞌwa hã wa hã bété asibꞌaꞌuwẽ, wapsã idâꞌâ ne nherẽ, ĩꞌãmamhã ihâtâꞌâ da hã.
9 Tawamhã apito hã, Ziba Sauhu ma romhuriꞌwa zô hârâ wamhã, te ãne tãma tinha:
— Wa hã, asibꞌihâꞌa nhihudu Mefibozétihi ma, uburé Sauhu te, marĩ aré tãma ꞌre ihâimana zaꞌra mono hã, duré iꞌra norĩ ma zama, marĩ aré tãma ꞌre ihâimana zaꞌra mono hã wa tô apâ tãma sõmri zaꞌra.
10 A hã, aiꞌra norĩ hã, duré aima romhuriꞌwa norĩ me, te za tiꞌa na te te sada ꞌre robꞌmaꞌwamarĩ robꞌre da hã, asibꞌihâꞌa Sauhu nhihudu nhorõwa ꞌrem norĩ ma hã. Te za duré te te tãma ꞌre tehâri zaꞌra, õ norĩ ma isa zaꞌra hã tãma ꞌre hâimana zaꞌra mono da. Tane nherẽ, Mefibozéti te za õne uꞌâ duré ĩme hã ꞌre sai uꞌâsi, ꞌre ĩsimasisi mono zéb ãmamhã. (Tawamhã Ziba hã 15 na iꞌra, duré tãma romhuriꞌwa norĩ hã 20 na ihâiba zaꞌra hã.)
11 Tawamhã ma ãma sadaꞌâ ãne asa:
— Wa za uburé tô ꞌmanha za, a hã iꞌruzéb zarina.
Mefibozéti hã ma tô apito siré hã oto ꞌre sa, iꞌra uptabi ne.
12 Mefibozétihi ꞌra, zahadu iprédu pese õ iré hã, Mica na isisi hã. Tawamhã uburé Zibaha nhorõwa ꞌrem norĩ hã ma tô oto Mefibozétihi ma romhuriꞌwa na hã tãma ꞌre hâimana zaꞌra.
13 Ãne Mefibozéti, imorĩꞌõ, ipara siꞌuiwa na iparaꞌõtõ uwa hã ma tô Zeruzalẽ ãma ꞌre hâimana. Ma tô duré apito siré bâtâ sidâpâsi ꞌre isai mono zéb ãma hã, ime ꞌre sa.
