2 Tesalonita 2:1-17
2 Ĩsisãnawã norĩ, ãhã na hã Wanhibꞌapito Zezu Cristu apâ we imorĩzé wasuꞌu na duré za wa te wasiwi isõpẽtẽzém na hã, wa za ãma aiwi waptẽrẽ zaꞌra waꞌaba ni, ãne:
2 Õne haré aiwi ꞌre robzeiꞌõ zaꞌra waꞌaba mono tõ. Duré tãma ꞌre aꞌrãmi zaꞌra waꞌaba mono tõ, niꞌwa hã Wanhibꞌapito za we imorĩzé bâdâ oto iwa iwaptãꞌã na te te aima wasuꞌu zaꞌra waꞌaba wamhã, ꞌRe ihâimana uꞌâsi mono Pẽꞌẽzani hawi wa te irowasuꞌu zaꞌra zarina newa, duré niwamhã wamreme zarina newa duré niwamhã wa te ãma irobꞌuiꞌéré zaꞌra zarina newa.
3 Maꞌãpé ꞌre asiꞌmadâꞌâ pese zaꞌra waꞌaba mono, ãne na niꞌwa hã te te aima robꞌrãmi zaꞌra waꞌaba tõ da. E marĩ wa. Ta hã bâdâ wisi wana ré hã ꞌRe ihâimana uꞌâsi mono zada idasimasabzé te za tô tihâiba. ꞌRe ihâimana uꞌâsi mono zada Iwasété Uptabi hã te za duré sihâiꞌré, ropipa u morĩ da, ꞌRe ihâimana uꞌâsi mono te te sô ipisutu siromo hã.
4 Ta hã te za ꞌRe ihâimana uꞌâsi mono upana uburé marĩ, ãma ꞌre idawata zaꞌra mono norĩ da hã ꞌre hâimana, duré uburé marĩ ꞌRe ihâimana uꞌâsi mono hawi dama ꞌre ihâimana zaꞌra mono da zama. Uburé ta norĩ nhipai u pire na duré simiroti nhiptete na te za ꞌre sisimizusi. ꞌRe ihâimana uꞌâsi mono nhorõwa ꞌri ꞌrãihâ u te za duré ãzé, tame sãmra da. Tawamhã te za duré dama ꞌre siwasuꞌu, tô ꞌRe ihâimana uꞌâsi mono na!
5 E ãne na ãma aipoꞌre puꞌu zaꞌra waꞌaba ãna, tame aiꞌrata ĩnhamra aba ré, te ãma aima irowasuꞌu zaꞌra waꞌaba na hã.
6 Duré aima waihuꞌu pese zaꞌra waꞌaba di, ãne hã awaꞌawi romhâimana tõ da, marĩ te te itété na hã, Iwasété Uptabi te bâdâ iwa waptãꞌã wapsi, za isihâiꞌré da hã.
7 Sãmri ãna Siptete na Iwasété Uptabi ꞌre ihâimana mono hã te oto tô romhu ãhã na hã. Tane nherẽ, ãne na za iromhâimana da hã, ãhã na romhâimana tõ da, itétéꞌwa hã da te saꞌréi wapsi, te za tô tiromhâiba za.
8 Tawapsi Iwasété Uptabi hã te za sihâiꞌré. Tawamhã Wanhibꞌapito Zezusi wei morĩ wamhã, te za tiwĩ, tizadawa waꞌuꞌu na si. Te za duré uprosi, waihuꞌu pese uptabi na ite rowaꞌa isaꞌẽtẽ ré ꞌre ihâimana mono zém na.
9 Iwasété Uptabi hã Satanasihi waihuꞌu pese zéb ré te za sihâiꞌré. Tawamhã marĩ dama iꞌmanharĩ waihuꞌuꞌõ senaiꞌõ hã te za te te ꞌre abꞌmanharĩ, te te ãma dama ꞌre iꞌarobꞌrãmi mono da hã.
10 Marĩ iwasédé hã te za imono bâ te te ꞌre abꞌmanharĩ, te te ãma ꞌre iꞌarobꞌrãmi mono da hã, niꞌwam norĩ hã isiꞌutõrĩzéb u ꞌre inomro mono norĩ ma, ta norĩ hã tô sena Cristuhu wasuꞌuwẽ zawi hã te te siwi ꞌre wẽꞌõ zaꞌra mono wa, ta hã te te aré sõꞌreptu zaꞌra da nherẽ.
11 Ãne wa, ꞌRe ihâimana uꞌâsi mono hã te za we satõ, marĩ isiptede ta norĩ ma robꞌrãmiꞌwa da hã, iwa ꞌre hâimana zaꞌra mono da, taha zarina dazadawa nhipe hã te te ꞌre saze zaꞌra mono da.
12 Ãne wa, tô sena Cristuhu wasuꞌu te te ꞌre isaze zaꞌra mono õ norĩ, marĩ iwasété si te te ꞌre iꞌmanharĩ zaꞌra mono na te te ãma sima ꞌre irowẽ zaꞌra mono hã ta norĩ ma, te za ꞌRe ihâimana uꞌâsi mono ropipa hã sô apisutu siro.
ꞌRe ihâimana uꞌâsi mono te te sima ꞌre iꞌapisutu mono, za te te ꞌre iꞌanhoꞌreptui mono zé
13 Wasisãnawã norĩ, Wanhibꞌapito te te ꞌre iꞌasawi pese zaꞌra waꞌaba mono hã, ꞌRe ihâimana uꞌâsi mono ãma wa za tô ꞌre wawata uꞌâsi zaꞌra aiꞌãma zaꞌra waꞌaba, romnaꞌrata hawim haré ꞌRe ihâimana uꞌâsi mono hã te te sima aipisutu zaꞌra waꞌaba wa, asõꞌreptuzé hã asima waibui waꞌaba da, wẽ uptabi na Ipẽꞌẽzani te te ꞌre iromhuri mono zéb zarina duré tô sena Rowasuꞌuwẽ hã asina ꞌre iꞌumnhasi zaꞌra waꞌaba mono zéb zarina.
14 Taha da, ꞌRe ihâimana uꞌâsi mono hã ma tô aipisutu zaꞌra waꞌwa, Rowasuꞌuwẽ ité wa te ꞌre iꞌmahârâ zaꞌra mono uꞌâbâmhã, Wanhibꞌapito Zezu Cristu rowaꞌa isaꞌẽtẽ ré ꞌre isãmra mono zé hã waibui waꞌaba da, isiré ꞌre aihâimana zaꞌra waꞌaba mono da.
15 Tahawa, wasisãnawã norĩ, maꞌãpé asiptete sina ꞌre aihâimana zaꞌra waꞌaba mono. Duré wamreme na wanhimiꞌuiꞌéré na zama wa te aima ãma irowahutu zaꞌra waꞌaba zé hã ꞌre sazei utõrĩ zaꞌra waꞌaba mono tõ.
16 Wanhibꞌapito Zezusi duré Wamama ꞌRe ihâimana uꞌâsi mono te te ꞌre iwaꞌazawi pese mono hã duré te te ꞌre iwaꞌapẽꞌẽ nhiptete uꞌâsi mono hã duré tinhimizawizém na wasiwawãi ãna ꞌre iwahâimana zaꞌra mono zé te te wama ꞌre iꞌanhomri mono hã,
17 aipẽꞌẽ ꞌre robzei uꞌâ hã te te aima ꞌre iꞌanhomri zahuré waꞌaba mono da si, duré te te ꞌre iꞌasiptete uꞌâsi zaꞌra waꞌaba mono da si, marĩ iwẽ si ꞌre ꞌmanharĩ uꞌâsi zaꞌra waꞌaba mono da, aihâimanazém na duré aimreme na zama.
