2 Tesalonita 2:1-17
2 2:1-3 Ãté niꞌwa hã ma tô aima rowasuꞌu zaꞌra waꞌwa, Wanhibꞌapito Zezu Cristu za we apâ wazô iwisizéb zaꞌra na hã. Ãté bâdâ hã iwa waptãꞌã newa, ma tô aima rowasuꞌu zaꞌra waꞌaba ni. Tawamhã iwasuꞌu hã tô sena newa, ãma ꞌre rosaꞌrata zaꞌra waꞌaba mono õ di za, ꞌre aipẽꞌẽwara zaꞌra waꞌaba mono tõ da. Ãté ꞌRe ihâimana uꞌâsi mono hã, marĩ hã niꞌwai ma, te te iwaihuꞌu zarina newa, ãté duré marĩ hã te te iwapari zarina newa, ãté duré wanhimiꞌuiꞌéré zarina newa, niꞌwa hã ma tô ãne na aima rowasuꞌu zaꞌra waꞌwa. Mare di. Ãne danhimirowasuꞌu hã ꞌre saze zaꞌra waꞌaba mono õ di za, dazadawa nhipese na da te aiwi ꞌre udâ tõ zaꞌra waꞌaba mono da. Wanhibꞌapito wei morĩ õ ré, daro mono bâ te za ꞌRe ihâimana uꞌâsi mono nhimiroti zada ꞌre dahâimana zaꞌra. Duré niꞌwa hã iwasété uptabi hã te za dama sihâiꞌré. Ta hã, ropipa ãma za oto ꞌre ihâimana mono zé hã.
2 ꞌMadâꞌâ 2:1
3 ꞌMadâꞌâ 2:1
4 Ta hã, ꞌRe ihâimana uꞌâsi mono upana waihuꞌu pese newa, ãma ꞌre idawata zaꞌra mono norĩ hã te za dawi wẽꞌõ zaꞌra, ta norĩ ãma ꞌre dawata zaꞌra mono tõ da oto. Romhâiba hã te za duré dawi wẽꞌõ zaꞌra, ãma ꞌre dawata zaꞌra mono tõ da. Duré ꞌRe ihâimana uꞌâsi mono te te dama ꞌre iꞌapisutu mono hã te za dawi wẽꞌõ zaꞌra. Uburé ãma ꞌre idawata zaꞌra mono na te te ãma idaꞌrãnhipa na, te za siwasuꞌu ãne dama: “Wa hã, Ĩwaihuꞌupe. Wa hã ꞌRe ihâimana uꞌâsi mono.” Ãne te za siwasuꞌu. Tawamhã tiꞌai ãma ꞌRe ihâimana uꞌâsi mono nhorõwa ꞌri u, te za ãzé, tame sãmra da.
5 E ma tô tawamhã ãne na hã aiwi aimani zaꞌra waꞌwa, te aima irowahutu zaꞌra waꞌaba zé hã aiꞌrata ĩnhamra zaꞌra waꞌaba ré.
6 Tane nherẽ, aibâ iwasété uptabi hã ꞌRe ihâimana uꞌâsi mono, bâdâ te te tãma pisutu õ ré, we datẽme watobro õ di za aꞌâ. Niwa bâdâ hã iwa waptãꞌã wapsi, te za wei watobro, ꞌRe ihâimana uꞌâsi mono nhimipisutuzéb zarina si. Ãne na hã ma tô duré iwaihuꞌu zaꞌra waꞌwa.
7 Ãhã na piꞌuriwi, ma tô Waꞌuburé hã tinhimiromhuri na ãma sãnaꞌrata. Tawamhã ꞌRe ihâimana uꞌâsi mono te te tiwi isawizé hã te za aꞌâ ãma ꞌre hâimana, iwasété uptabi ãma, bâdâ iwa waptãꞌã õ wa aꞌâ. Taha parip si, te te tiwi isawizé hã ãma ꞌre hâimana mono õ di za oto.
8 Tawamhã iwasété uptabi hã te za we sihâiꞌré oto, danhoꞌa te te romhuri da. Tane nherẽ, Wanhibꞌapito Zezusi hã wei morĩ wamhã, tizadawa waꞌuꞌu na te za tiwĩ. Rowaꞌa zaꞌẽtẽ ré wei wisi wamhã, taha wamhã iwasété uptabi hã tâibâ za oto.
9 Tane nherẽ, Wanhibꞌapito wei morĩ õ ré, te za iwasété uptabi hã Satanasihi waihuꞌu pese zéb zarina, te te dama ꞌre romhõsi. Marĩ hã tô sena newa, da te ãma iwaihuꞌu zaꞌra zéb da hã, duré marĩ na idatobꞌuzu zaꞌra zéb da, te za te te dama ꞌre romhõsi.
10 Tinhimiromhuri wasété na te za dawi udâ pese zaꞌra, ꞌRe ihâimana uꞌâsi mono nhiti za ꞌre idahâimana uꞌâsi zaꞌra mono norĩ wi. Ta norĩ hã te iwasuꞌuwẽ hã te te siwi ꞌre wẽꞌõ zaꞌra, tô sena iwasuꞌuwẽ hã. Tahawa, ta norĩ hã te te ꞌre sõꞌreptu zaꞌra mono õ di za, ꞌRe ihâimana uꞌâsi mono hã.
11 Tô sena iwasuꞌuwẽ hã da te dasiwi ꞌre wẽꞌõ zaꞌra mono wa, ꞌRe ihâimana uꞌâsi mono hã te te dapawaptob õ di za. Tawamhã te te dapawaptob õ wa, te za oto dama pisutu zaꞌra, tizadawa nhipese na tô sena newa te te dawi iꞌudâ nhimiroti si, da te ꞌre sazei pese zaꞌra mono da oto.
12 Tahawa, sisiti te za dazatõrĩ zaꞌra ropipa u, tô sena iwasuꞌuwẽ hã da te ꞌre isaze zaꞌra mono õ norĩ hã, iwasété si, da te dasima ꞌre iwẽ zaꞌra mono norĩ hã.
ꞌRe idasisõꞌreptu zaꞌra mono zé wasuꞌu
13 Wasisãnawã norĩ, ꞌRe ihâimana uꞌâsi mono ãma, wa ꞌre wawata uꞌâsi zaꞌra, ãma ꞌre anomro wẽ waꞌaba mono wa, Wanhibꞌapito te te ꞌre iꞌasawi pese zaꞌra waꞌaba mono norĩ hã. ꞌRe ihâimana uꞌâsi mono hã ma tô marĩ õ uptabi ré sima aipisutu zaꞌra waꞌwa, imorĩꞌrata na te te ꞌre asõꞌreptu zaꞌra waꞌaba mono da. Tawamhã Tipẽꞌẽzani hã ma tô te te aima ꞌre anhomri ꞌwa, itẽme ꞌre anomro wẽ waꞌaba mono da. Ma tô duré aiꞌãma tinhibꞌaꞌuwẽ uptabi zaꞌra waꞌwa. Ma tô duré te te ꞌre aipawaptob uꞌâsi zaꞌra waꞌwa, tô sena iwasuꞌuwẽ hã ꞌre sazei pese zaꞌra waꞌaba mono da.
14 Te te ꞌre asõꞌreptu zaꞌra waꞌaba mono da, ma tô aipẽꞌẽ ꞌre aima nharĩ zaꞌra waꞌwa, iwasuꞌuwẽ, wa te aima wasuꞌu zaꞌra waꞌaba wamhã, Wanhibꞌapito Zezu Cristuhu siré rowẽ uptabi ré ꞌre aihâimana uꞌâsi zaꞌra waꞌaba mono da, isine rowaꞌa zaꞌẽtẽ ré.
15 Tahawa, wasiré isazeiꞌwa norĩ, ꞌre sazei pese zaꞌra waꞌaba mono za, sena na wa te aima ꞌre irowahutu zaꞌra waꞌaba mono na hã. Uburé wamreme na duré uburé wanhimiꞌuiꞌéré na, wa te aima ãma ꞌre irowahutu zaꞌra waꞌaba mono zé hã te za ꞌre isazei pese zaꞌra waꞌaba mo, isarina ꞌre anomro wẽ waꞌaba mono da.
16 2:16-17 ꞌRe ihâimana uꞌâsi mono hã Wamama hã, te te ꞌre waꞌazawi pese. Te duré te te ꞌre waꞌapawapto, wapẽꞌẽ ꞌre, ꞌre wanomro wẽ uꞌâsi mono da, wahâimana nhiptete sina wanhimiꞌẽ na sô ꞌre wanhimipari uꞌâsi zaꞌra mono da, iwẽ zô. Tahawa, wa za Wamama wi, wa te ꞌre rowaptẽrẽ uꞌâsi zaꞌra, duré Wanhibꞌapito Zezu Cristuhu wi zama, ato sina ꞌre aihâimana zaꞌra waꞌaba mono da, duré asiptete sina iwẽ na si tãma ꞌre romhuri pese zaꞌra waꞌaba mono da, asimirowasuꞌu wẽ zaꞌra waꞌaba na hã.
17 ꞌMadâꞌâ 2:16
