2 Tesalonita 3:1-18
3 Wasisãnawã norĩ, iꞌrãsutu ãma hã oto, maꞌãpé waꞌãma ꞌre rowaptẽrẽ zaꞌra waꞌaba mono, Wanhibꞌapito wasuꞌu hã waptu na te te tô ꞌre ropéi uꞌâsi mono da, duré da te ꞌre wazé pese zaꞌra mono da zama, asine zaꞌra waꞌaba.
2 Duré waꞌãma ꞌre rowaptẽrẽ zaꞌra waꞌaba mono, ꞌRe ihâimana uꞌâsi mono hã iwasété uptabi norĩ wi te te ꞌre wanhoꞌreptu zaꞌra mono da, uburé da te dasina ꞌre umnhasi zaꞌra mono õ wa, Wanhibꞌapito hã.
3 Tane nherẽ, Wanhibꞌapito Zezusihi si umnhasi uptabi di. Ta hã te za te te ꞌre asiptete zaꞌra waꞌwa. Te za duré te te ꞌre aiꞌmadâꞌâ pese zaꞌra waꞌwa, Iwasété Uptabi* wi hã.
4 Duré Wanhibꞌapito hã ma tô ꞌmanha, wa te aiꞌumnhasi zaꞌra waꞌaba da hã. Ãne wa, aiꞌãma zaꞌra waꞌaba hã wasiwawã zaꞌra õ di, tô ãhã na iꞌmanharĩ zaꞌra waꞌaba na hã duré tô za ãma iꞌuzusi zaꞌra waꞌaba na zama, wa te aima iroti zaꞌra waꞌaba zéb zarina.
5 Wanhibꞌapito hã te te iꞌaipawaptob zaꞌra waꞌaba da si, ꞌRe ihâimana uꞌâsi mono nhimizawizé hã waihuꞌu wẽ zaꞌra waꞌaba da, duré Cristu tiꞌab ré danhibꞌrata te te robzépata nherẽ, simiꞌẽ na ꞌre ihâimana mono zéb zama.
Isazeiꞌwa norĩ te te ꞌre iromhuri zaꞌra mono zé, duré iwẽ te te ꞌre iꞌmanharĩ zaꞌra mono zé
6 Wasisãnawã norĩ, Wanhibꞌapito Zezu Cristuhu nhisi na, wa za ãma aima roti zaꞌra waꞌaba ni, ãne: Maꞌãpé tiwi asaꞌo hâ zaꞌra waꞌaba, wasisãnawã norĩ romhuri ãna ꞌre ihâimana zaꞌra mono norĩ wi hã duré wa te aima iroti zaꞌra waꞌaba zéb zarina ꞌre ihâimana zaꞌra mono õ norĩ wi hã.
7 Aima waihuꞌu pese zaꞌra waꞌaba di, ãma aima iwasisanho zaꞌra waꞌaba zéb zarina wanhirã na za tô ꞌre iꞌaihâimana zaꞌra waꞌaba mono da hã. E marĩ wa. Aiꞌrata wahâimana zaꞌra waꞌaba ré hã, romhuri ãna wahâimana zaꞌra õ wa.
8 Wasa hã waꞌâbâ ãna wa te nasi huri õ di. Tazahã, wa romhuri pese zaꞌra ni, pire na, wa te ãma iwazere pese zaꞌra zéb u. Bâtâ na duré mara na zama, wa nasi romhuri zaꞌra ni, ropire hã wa te aima ꞌmaihiri aba tõ da, wasina.
9 Wama iꞌru zahi nherẽ, wapawaptobzé wa te iwaibu da hã, tane nherẽ, marĩ hã wa te waptẽrẽ zaꞌra õ di, ãma aima wasisanho zaꞌra waꞌaba da, wanhirã zarina ꞌre ꞌmanharĩ zaꞌra waꞌaba mono da.
10 Aiꞌrata wahâimana zaꞌra waꞌaba ré hã, ãne wa tô aima roti zaꞌra waꞌaba ni: “Niꞌwa hã te te romhuri õ wamhã, tô ꞌre sai mono tõ.”
11 Wa wapari zaꞌra ni, niꞌwam norĩ wasuꞌu asiré zaꞌra waꞌaba hã, marĩ te te ꞌre ꞌmanharĩ zaꞌra mono ãna waꞌa na ꞌre ihâimana zaꞌra mono na hã, duré taré te te dawi ꞌre iroꞌwaꞌrutu zaꞌra mono na hã. Tahawa, wa tô ãne hã aima wasuꞌu zaꞌra waꞌaba ni.
12 Wanhibꞌapito Zezu Cristuhu nhisi na wa tãma roti pese zaꞌra ni, duré wa pawaptob zaꞌra ni, iꞌuwaibaba na si ꞌre hâimana zaꞌra mono da, duré te te tô ꞌre romhuri zaꞌra mono da, tisiꞌuparizéb da.
13 Tazahã, a norĩ waꞌwa wasisãnawã norĩ, ꞌre aiwaꞌa zaꞌra waꞌaba mono tõ, marĩ iwẽ ꞌre iꞌmanharĩ zaꞌra waꞌaba mono da hã.
14 Niꞌwa hã ã hã, wa te ãma irobꞌuiꞌéré zaꞌra zém na wanhimiroti te te ꞌmadâꞌâ pese õ wamhã, ꞌmadâꞌâ pese zaꞌra waꞌaba, niꞌwa hã zô. Taha parimhã, isiré aihâimana zaꞌra waꞌaba tõ, siséb da.
15 Tane nherẽ, asitobꞌru na hã ꞌmadâꞌâ aba tõ. Taré tãma roti waꞌaba, dasisãnawã da te ꞌre ipawaptob zaꞌra mono ne.
Robꞌuiꞌéré ꞌrãsudu
16 Wanhibꞌapito rowẽ nhomriꞌwa hã rowẽ uꞌâ te te aima ꞌre isõmri zaꞌra waꞌaba mono da si, imono bâ! Duré Wanhibꞌapito asiré ꞌre ihâimana uꞌâsi zaꞌra waꞌaba mono da si, iwẽ hã!
17 Wa hã Paulu, wa ãma asawi zaꞌra waꞌwa. Ĩsiꞌuihâ na wa ãma robꞌuiꞌéré, ĩnhibꞌrata na. Ã hã ãma iwaihuꞌuzé ĩnhimiꞌuiꞌéré mono na hã. Ãne, wa te te ꞌre robꞌuiꞌéré tô.
18 Wanhibꞌapito Zezu Cristuhu nhimizawizé aiꞌãma ꞌre ihâimana uꞌâsi zaꞌra waꞌaba mono da si, iwẽ hã.
Ĩwaꞌõtõ piꞌreba watsuꞌu mono
^ 3:3 Iwasété Uptabi Satanasi te wasuꞌu.
