3 Zuã 1:1-14
1 Wa hã isazeiꞌwa norĩ ꞌmadâꞌâꞌwa, wa aima robꞌuiꞌéré Gaiu, tô sena ĩma iꞌasawi ma.
2 Ĩsiwaihuꞌu, ĩma iꞌasawi uptabi, ꞌRe ihâimana uꞌâsi mono ma, wa tô aiꞌãma ꞌre ĩmreme uꞌâsi, rowẽ na ꞌre aihâimana mono da, aihâzé ãna, aipẽꞌẽ ꞌre aima rowẽ na ꞌre iꞌaihâimana mono ne.
3 Ĩma rowẽ uptabi di, nima norĩ wasisãnawã norĩ we isihudu hã te te ĩma aiwasuꞌu zaꞌra wa, asiptete sina ꞌre iꞌaihâimana mono na hã, duré tô sena ꞌRe ihâimana uꞌâsi mono nhimiroti na ãma ꞌre iꞌaihâimana uꞌâsi mono na.
4 Marĩ hã te te sina ĩma rowẽ wazere õ uptabi di, ĩꞌra norĩ tô sena ꞌRe ihâimana uꞌâsi mono nhimiroti zarina ꞌre inomro mono na rowasuꞌu te iwapari ne hã.
Gaiuhu wasuꞌu wẽ
5 Ĩsiwaihu, ĩma iꞌasawi uptabi, wasisãnawã norĩ ma, te tô sena aihâimana na marĩ hã ꞌre iꞌabꞌmanharĩ mo, ꞌre awaihuꞌu mono õ nherẽ.
6 Ta norĩ hã ma tô asimizawizém na aiwasuꞌu zaꞌra, isazeiꞌwa norĩ nhoꞌa ãme. Tahawa, maꞌãpé, ĩzawi na hã ãma aime zaꞌra na, timorĩ na te te tô ãma uzusi uꞌâsi zaꞌra mono da, ꞌRe ihâimana uꞌâsi mono ma, te te ꞌre irowẽ zani mono zéb zarina.
7 E marĩ wa. Ta norĩ hã ma tô Cristuhu ma romhuri zarina, tinem na hã ãma sãnaꞌrata zaꞌra, zudeuꞌõ norĩ hã ãma isime zaꞌra da, te te sima wẽ zaꞌra ãna.
8 Tahawa, wa norĩ isazeiꞌwa norĩ hã wa za ãma ꞌre wasina, ã norĩ ãma hã. Tawapsi, wa za isiré romhuri hã wa te ꞌre ꞌmanharĩ zaꞌra, tô sena ꞌRe ihâimana uꞌâsi mono nhimiroti na rowasuꞌu na hã.
Diutrefesi, duré Dimetriu
9 Robꞌuiꞌéré hã wa tisõ, isazeiꞌwa norĩ ma. Tane nherẽ, Diutrefesi pire na isazeiꞌwa norĩ ma, ꞌre hâimana mono da, te te sima ꞌre iwẽ mono hã, ta hã te te sima wẽ õ di, ĩnhimiroti te te iwapari da hã.
10 Tahawa, ãma atẽme ĩwisi wamhã, wa za tãma waihuꞌu, uburé marĩ te te ꞌre iꞌabꞌmanharĩ mono zém na hã, ãne: Te te waꞌãma iwasété pese zaꞌra zém na, duré tizadawa nhipese na te te dama iwawasuꞌu zaꞌra zém na zama. Tane nherẽ, taha si õ di, tiwasédé te te ꞌre iꞌmanharĩ mono zé hã. Wasisãnawã norĩ darob amoi hawi itẽme ꞌre sihutu mono wamhã, te te ꞌre awaibui mono õ di. Duré niꞌwa hã te te waibu da nherẽ, te za tiwi sawi. Te za duré waze, isazeiꞌwa norĩ hawimhã.
11 Gaiu ĩsiwaihu, ĩma iꞌasawi, marĩ iwasédé hã ꞌre sizusi mono tõ. Iwẽ si ꞌre anhizusi mono. Niꞌwa hã marĩ iwẽ si te te ꞌre iꞌabꞌmanharĩ mono hã, ta hã ꞌRe ihâimana uꞌâsi mono te. Tanei õ di, niꞌwa hã marĩ iwasété si, te te ꞌre abꞌmanharĩ mono wamhã, niwa ꞌRe ihâimana uꞌâsi mono hã te te ꞌmadâꞌâ õ di*.
12 Dimetriu hã, uburé te da te dasiwi ꞌre wasuꞌu wẽ. Tô sena ꞌRe ihâimana uꞌâsi mono nhimiroti hã te duré te te ꞌre wasuꞌu wẽ. Wa norĩ zama wa wa te ꞌre wasuꞌu wẽ zaꞌra. Ãne hã aima waihuꞌu pese di, wa te ꞌre irowasuꞌu zaꞌra mono zé, tô sena na hã.
Zuã hã te te irobꞌuiꞌéré ꞌrãsutuzéb ãma, isazeiꞌwa norĩ te te iꞌazawizé
13 Zahadu marĩ hã ahâ uptabi di, te aima ãma iwaihuꞌuzéb da hã. Tane nherẽ, te ĩsima wẽ õ di, ibaihâ na te aima ãma irobꞌuiꞌéré da hã.
14 Romhutu na te iꞌasõpẽtẽ da si, wa robꞌmadâ. Tawapsi wa za wasima ãma robzanhamri ni, wasisõꞌa.
15 ꞌRe ihâimana uꞌâsi mono te rowẽ hã, asiré ꞌre ihâimana uꞌâsi mono da si, iwẽ hã. Ãme asiwaihuꞌu norĩ ihâimana zaꞌra hã te ãma siwi asawi. Maꞌãpé duré ĩma sawi zaꞌra na, tame ĩsiwaihuꞌu norĩ hã, hâiba mono bâ.
Ĩwaꞌõtõ piꞌreba watsuꞌu mono
^ 1:11 te te ꞌmadâꞌâ õ di ꞌRe ihâimana uꞌâsi mono hâimanazé, te te iwaihuꞌu õ, te wasuꞌu.
