MAmosi 1:1-15
1 Ã hã ꞌRe ihâimana uꞌâsi mono timreme, Izaraéu norĩ hâiba na, Amosi poneꞌẽrebâ ꞌmadâꞌâꞌwa ꞌri nhoꞌu Tecoa na isisi ãma ꞌre ihâimana mono ma, te te isõmri. Ãne hã ma tô tiromhâiba, maparane wahu ihâimana ꞌre, tiꞌai popo hâimana wana ré, Uzias, Zuda tiꞌai ãma, apito na ꞌre hâimana mono ré, duré Zeroboã, Zoasihi ꞌra, Izaraéu tiꞌai ãma apito na ꞌre hâimana mono ré hã.
2 Amosi hã te tinha, ãne:
“Zeruzalẽ ãma, Siã na ẽtẽ ꞌrãihâ nhisi hawi te Uburé Danhibꞌapito hã mreme ꞌrãihâ na tinha, tãirãrãꞌã ne.Du hã te uburé we ꞌré mono. Duré uburé Carmeru na ẽtẽ nhisi ãma hã te we ꞌré pese.”
ꞌRe ihâimana uꞌâsi mono, Izaraéu waptoma ꞌre idahâimana zaꞌra mono norĩ, te te siwi iwẽꞌõ zaꞌra zé wasuꞌu
Siria na romnhisi
3 Uburé Danhibꞌapito hã te tinha, ãne:
— Damascu ãma aꞌuwẽ ꞌre ihâimana zaꞌra mono norĩ hã wasété zaꞌẽtẽ uptabi zaꞌra di. Wasété ahâ zaꞌra wa, wa hã wa za hâ zaꞌra. Ta norĩ hã ma tô Giliadi ãma aꞌuwẽ norĩ ma hã te te ꞌre robꞌmanharĩ wasété zaꞌra. Amnho préꞌézé isiꞌuwazi na iꞌwa, isisiwib zaꞌra te te ꞌre roꞌrahâri mono wa, te te ãma ꞌre hâpâ pese zaꞌra mono da, ma tô te te tãma ꞌre ꞌmanharĩ zaꞌra.
4 Tahawa, wa za apito Hazaéu nhimiromhurizé ꞌri ꞌrãihâ na ãma sazu, unhama na. Tô ã hã uzâ te za duré apito Bẽ-Hadadehe nhorõwa siptete uptabi na ꞌre isa mono hã pru.
5 ꞌRinhoꞌu Damascu te, ꞌridawa zaꞌẽne hã wa za te aꞌmarõpãrĩ. Duré iꞌrãnhoꞌõmo na ꞌre ihâimana zahuré mono norĩ Biqueati-Avé na romnhisi ãma hã, Bete-Édẽ na romnhisi ãmab zama, wa za uprosi zahuré. Tawamhã Siria ãma aꞌuwẽ norĩ hã te za Qui na romnhisi tiꞌai u da te simro. Wa hã, Uburé Danhibꞌapito, wa ãne tinha.
Filistéa na romnhisi
6 Uburé Danhibꞌapito te duré tinha ãne:
— Aꞌuwẽ dazaꞌru Gaza na isisi ãma ꞌre ihâimana zaꞌra mono norĩ hã wasété zaꞌẽtẽ uptabi zaꞌra di. Wasété ahâ zaꞌra wa, wa za hâ zaꞌra. Ta norĩ hã nimahã rom hawi ma tô uburé aꞌuwẽ tame ꞌre ihâimana zaꞌra mono te te iwaibu zaꞌra hã te te simro, sito pese na tãma ꞌre hâimana zaꞌra mono da. Taha pari aꞌuwẽ Edõ na romnhisi ãma ꞌre ihâimana zaꞌra mono ma hã, ma tô wede zaꞌra, pawaꞌâbâ ãna dama romhuriꞌwa na ꞌre hâimana zaꞌra mono da.
7 Tahawa, Gaza ꞌri ꞌwawi waꞌra ꞌrãihâ ꞌmanharĩ ãma wa za sazu. Duré tô ãhã uzâ, ꞌri nhoꞌõmo ꞌre, ꞌri isiptete norĩ ꞌre isimasa mono zama te za te te apru.
8 Apito norĩ hã wa za uprosi zahuré, Asidodi te hã duré Asquerõ te hã. ꞌRi nhoꞌu Ecrõ na isisi hã wa za uprosi. Uburé pese filisteu norĩ ihâiba amo hã wa za duré uprosi zaꞌra. Wa hã, Uburé Danhibꞌapito, wa tinha.
Tiru na ꞌri nhoꞌõmo nhisi
9 Uburé Danhibꞌapito te tinha, ãne:
— Aꞌuwẽ Tiru ãma ꞌre ihâimana zaꞌra mono norĩ hã wasété zaꞌẽtẽ uptabi zaꞌra di. Wasété ahâ zaꞌra wa, wa za hâ zaꞌra. Ta norĩ hã, Edõ u ma tô nimahã rom hawi uburé aꞌuwẽ ꞌre ihâimana zaꞌra mono te te iwaibu zaꞌra hã te te simro, sito pese na tãma ꞌre hâimana zaꞌra mono da, ta norĩ me, sisaze zaꞌra nherẽ, marĩ na siꞌwapéi ãna siré ꞌre hâimana zaꞌra mono da.
10 Tahawa, Tiru ãma ꞌri ꞌwawi waꞌra na unhama na wa za roꞌo. Duré tô õ hã uzâ, te za ꞌri nhoꞌõmo ꞌre, ꞌri isiptete norĩ ꞌre isimasa mono zama uprosi.
Edõ na romnhisi
11 Uburé Danhibꞌapito te ãne tinha:
— Aꞌuwẽ norĩ dazaꞌru Edõ na isisi ãma ꞌre ihâimana zaꞌra mono norĩ hã wasété zaꞌẽtẽ uptabi zaꞌra di. Wasété ahâ zaꞌra wa, wa za hâ zaꞌra. Tisisãnawã Izaraéu nhihudu norĩ ꞌrâwibre nherẽ, ma tô te te ꞌre ꞌwapé zaꞌra, ãma ꞌre siwamri zaꞌra mono ãna, duré ãma ꞌre pẽꞌẽzé zaꞌra mono ãna. Edomita norĩ zahizé hã ꞌrãtõ waihuꞌu õ di. Õne uꞌâ te sitiꞌru na ꞌre hâimana zaꞌra.
12 Tahawa, ꞌri nhoꞌu Tema na isisi ãma unhama na wa za ãma roꞌo. Duré tô õ hã uzâ, te za ꞌri nhoꞌu Bosra na isisi ꞌre, ꞌri isiptete norĩ ꞌre isimasa mono zama hã uprosi.
Amo na romnhisi
13 Uburé Danhibꞌapito te duré ãne tinha:
— Aꞌuwẽ norĩ dazaꞌru Amo na isisi ãma ꞌre ihâimana zaꞌra mono norĩ hã wasété zaꞌẽtẽ uptabi zaꞌra di. Wasété ahâ zaꞌra wa, wa za hâ zaꞌra. Giliadi na darom nhisi ãma tiꞌa te te sima saꞌẽtẽ zaꞌra da, te te ꞌre daꞌwapé zaꞌra mono wamhã, ma tô piꞌõ wasã ré ꞌre ihâimana zaꞌra mono norĩ hã te te ꞌre nomo wazu zaꞌra.
14 Tahawa, Raba ꞌwawi waꞌra ãma hã wa za roꞌo, unhama na. Tô õ hã uzâ te za duré ꞌri nhoꞌõmo ꞌre, ꞌri isiptete norĩ ꞌre isimasa mono zama uprosi. Taha siwaprã, te za dasiꞌwapé na dasipãrĩ ahâ hã watobro. Te za duré aibâ norĩ hã ꞌre hãsi, siꞌwapé zaꞌra sina.
15 Tawamhã apito, dama ipire norĩ me te za waibu ni, sito pese na dama ꞌre hâimana zaꞌra mono da. Wa hã, Uburé Danhibꞌapito, wa ãne tinha.
